Shɛngiya yakɔna yele la Yeso Kristo le yɛ?

LO MENDA kɛnɛ kakatasɛdingola lo sawo dia ntondo, onde sho koka mbidja tâmu dia wetshelo waki Yeso wakonge la shɛngiya ya wolo le anto wa l’andja w’otondo? Koko, dimbola diahombaso sho tshɛ ndjaoka diɔ nɛ: “Wetshelo waki Yeso wekɔ la shɛngiya yakɔna le mi?”

Wetshelo waki Yeso mendanaka la akambo efula. Wetshelo w’ohomba wele lɔkɔ koka mendana la dikambo tshɛ dia lo lɔsɛnɔ layɛ. Tɔsɛdingole awui waketsha Yeso lo kɛnɛ kendana la woho wa shikikɛ awui woleki ohomba lo lɔsɛnɔ, wa monga la lɔngɛnyi la Nzambi, wa monga la diɔtɔnganelo di’ɔlɔlɔ la anto akina, wa kandola ekakatanu ndo woho wa tona akambo wa ngala.

Shikikɛ awui woleki ohomba lo lɔsɛnɔ

Andja ɔnɛ wele akambo tshɛ salemaka paka lo wenya tomanɛka wolo ndo wenya woho ɔnɛ wele mbala efula sho ndjonyaka yimba lo akambo wa lo nyuma. Tɔsɛdingole ɛnyɛlɔ kaki Jerry lele la ɛnɔnyi 20 l’ɛmɔtshi. Kânga mbele Jerry ngɛnangɛnaka asawo wa lo nyuma ndo mbɔsaka kɛnɛ kekande oma lo asawo asɔ la nɛmɔ di’efula, nde kiyanaka ate: “Dimi bu l’etena ka mbekaka mbala la mbala. Dimi kambaka nshi shamalo lo lomingu. Lushi la lomingu loto mbemi bu l’olimu. Ndo l’ɔkɔngɔ wa dimi sala akambo wahombami sala, dimi nɛmbaka efula.” Naka wɛ ekɔ l’okakatanu wa woho ɔsɔ, kete wɛ ayokondja wahɔ oma l’akambo waketsha Yeso lo Dako dia lo Dikona.

Yeso akatɛ olui w’anto wakatshumana dia ndjôhokamɛ ate: “Tanyuyakananyaki dia nyumu nyati: Ayutole na? kana, ayutono na? kana dia alimba anyu nyati: Ayutolota na? Lumu haluleki mbu ya nde? dimba hadiuleki ahondo? Nyendi okone weli fudu ya l’ulungu, yo hayutuneka, hayutunaka, hayutumbaka diango lu apenge, keli Shenyu leli l’ulungu atuyileshaka. Nyu hanyuyileki ushinga a wulu uka? . . . Okone tanyuyakananyaki nyati: Ayutole na? kana, ayutono na? kana, ayutolota na? Ne dia asi wedja watuyangaka diango so tshe. Shenyu leli l’ulungu mbeyaka ati: Nyu dihumbaka dio tshe. Keli ntundu nyutayangi diulelu la ololo wa [Nzambi], ku diango so tshe diayuyala dianyu.” (Mateu 6:25-33) Wetshelo akɔna wakondjaso oma lo dikambo sɔ?

Yeso kombuta lâsɔ ɔnɛ sho pombaka kɔma anya diaha ndjakotshɛ ehomba aso wa lo demba ndo w’ase nkumbo yaso. Bible mbutaka ɔnɛ: “Keli naka untu humbi wane wuto la ndi, djekaleka wa lu khumbu kandi, ndi ambutuna mbetawo kandi, ambuleka untu lahetawo kolo.” (1 Timote 5:8) Koko, Yeso akalake dia naka sho mbetsha akambo woleki ohomba lo dihole dia ntondo ndo mbidja awui wa lo nyuma lo dihole dia ntondo, kete Nzambi ayosala woho w’ehomba aso ekina kotshama. Wetshelo wakondjaso oma lo ɛtɛkɛta ɛsɔ waki Yeso mendanaka la woho wahombaso shikikɛ akambo woleki ohomba. Ndjela dako sɔ mbishaka onto ɔngɛnɔngɛnɔ, nɛ dia ‘wanɛ weya ehomba awɔ wa lo nyuma wekɔ l’ɔngɛnɔngɛnɔ.’​—Mateu 5:3.

Onga la lɔngɛnyi la Nzambi

Wanɛ weya ehomba awɔ wa lo nyuma shihodiaka ohomba wa monga la lɔngɛnyi l’oshika la Nzambi. Ngande watotosalaka dia monga la lɔngɛnyi l’oshika l’onto ɔmɔtshi? Shi sho tosalaka la wolo dia mbeya onto akɔ dimɛna? Sho pombaka ndjatshungwɛ etena dia mbeya woho wɛnande akambo, dionga diande, akoka ande, kɛnɛ kamondosala, awui walangande ndo wahandalange. Kɛsɔ mbahombaso sala naka sho nangaka monga la lɔngɛnyi la Nzambi. Sho pombaka kondja ewo k’oshika kendana la nde. Etena kakandalɔmbaka Nzambi lo dikambo dia ambeki ande, Yeso akate ate: “Lumu la pundju lone, eli [mbeka dia] nkêya, weme [Nzambi k]a mete, la Jesu Kristu, lakayatumi.” (Joani 17:3) Eelo, monga la lɔngɛnyi la Nzambi nɔmbaka dia sho mbêya. Tshɔi ya kiɔkɔ ya ewo kɛsɔ ele Ɔtɛkɛta waki Nzambi wakasambiyama, mbuta ate Bible. (2 Timote 3:16) Sho pombaka ndjaombɛka etena ka mbekaka Afundelo.

Koko, aha ewo keto mbele ohomba. Lo dɔmbɛlɔ diakɔ diamɛ, Yeso akate ate: “Vo [ambeki ande] wakakitanyia diui diaye.” (Joani 17:6) Sho hatohombe kondja tsho ewo ka Nzambi koko sho pombaka ntsha akambo lo yoho yɔtɔnganɛ la ewo kakɔ. Ngande wakokakaso nto koma angɛnyi wa Nzambi? Onde sho kokaka pamia lɔngɛnyi lasaso l’onto ɔmɔtshi naka sho salaka akambo lo yoho yotshikitanyi la tokanyi tande ndo la wadjango ande? Woho wɔsa Nzambi akambo ndo atɔndɔ ande, pombaka nɔmbɔla wanya tshɛ wa lo lɔsɛnɔ laso. Tɔsɛdingole woho wendana atɔndɔ ande ahende la diɔtɔnganelo diasaso la anto akina.

Onga la diɔtɔnganelo di’ɔlɔlɔ la anto akina

Lo diaaso dimɔtshi, Yeso akakɔndɔla ɔkɔndɔ ɔmɔtshi wa mondo dia mbisha wetshelo w’oshika lo kɛnɛ kendana la diɔtɔnganelo diele lama wasa anto. Nde akatɛkɛta dia nkumekanga kɛmɔtshi kakalange mbadia la ekambi ande diangɔ. Ɔmɔtshi l’atei awɔ, akikɔ la dibasa dia woke efula ndo nde komonga ndoko la ɛngɔ dia mbodifuta. Nkumekanga akadjanga dia vɔ mbosondja nde la wadɛnde la anande dia futa dibasa sɔ. Ɔnɛ lakakama dibasa akayakɔsha l’ekolo ande ndo akɔsɛngasɛnga ate: “Utukumbete, ku layukongela diango tshe.” Nkumekanga akawoke kɛtshi ndo akôdimanyiya dibasa diande. Koko lam’akamɔ okambi ɔsɔ la ntondo ka nkumekanga, nde akahomana l’osekande okambi lakikɔ la dibasa diande dia yema tshitshɛ, ko nde akɔlɔmbɛ dia nde difuta. Koko, osekande okambi akɔsɛngasɛnga dia nde mboka kɛtshi, okambi ɔsɔ akawodje lo lokanu edja ndo nde ambofuta kɛnɛ tshɛ kakandakolama. Lam’akoke nkumekanga dikambo sɔ, nde akomala. Nde akawombola ate: “Taki ololo ndu we mbuka unyaye ketshi, uku akamakuki?” Nde akadje okambi waki konanga dimanyiyɛ osekande lo lokanu edja ndo nde ambofuta kɛnɛ tshɛ kakandakolama. Dia mbisha anto wetshelo oma l’ɔkɔndɔ ɔsɔ, Yeso akate ate: “Osoku mbanyutshela ndu Papa leli l’ulungu, naka nyu hanyudimanyiya anyanyu kolo uma l’etema anyu.”​—Mateu 18:23-35.

Oko weso anto wele bu kokele, tekɔ la wandja efula. Hatokokaki pondjo futɛ Nzambi dibasa dia woke diele laso nɛ dia sho mbosalɛka kɔlɔ. Dikambo ɔtɔi diakokaso sala ele mbɔlɔmba edimanyielo. Ndo Jehowa Nzambi ekɔ suke dia todimanyiya kɔlɔ yaso tshɛ, naka sho dimanyiyaka anangɛso kɔlɔ yatosalɛwɔ. Kema ɔsɔ ekɔ wetshelo w’ohomba efula! Yeso aketsha ambeki ande dia vɔ nɔmbaka ɔnɛ: “Utudimanyia kolo yasu, uku adimanyiyasu wane watutshela kolo.”​—Mateu 6:12.

Kandola ekakatanu oma ko kiɔkɔ yawɔ

Yeso aki onto lakashihodiaka dimɛna eongelo ka anto. Alako ande wendana la woho wa kandola ekakatanu tatɛka oma ko kiɔkɔ yawɔ. Tɔsɛdingole bɛnyɛlɔ pende diayela nɛ.

Yeso akate ate: “Nyu nyakuki diui diakawatela antu w’edjedja vati: Tudiakaki. Untu tshe ladiaka, ayuyala la dikambu dia ntsho l’elumbwelu. Keli dimi lambunyutela nti: Untu tshe luka unyandi kele, ayuyala la dikambu dia ntsho l’elumbwelu.” (Mateu 5:21, 22) Lanɛ Yeso akɛnya dia kiɔkɔ y’odiakelo ndeka tshelo y’odiakelo yɔ yɔamɛ kɔlɔ. Ɔsɔ ekɔ dionga diahama l’etei k’otema waki ondjakanyi. Otondongaka anto kombetawɔ dia nsaki ya lohetsho kana ya kɛlɛ pama l’etema awɔ, tshike kanyi y’onto sangoya dia ndjakimɔ l’awui wa ngala yamboshilaka. Ande woho wotewɔma otshulwelo wa efula wa akila naka anto kotsha wetshelo ɔnɛ lee!

Tende woho wamboshola Yeso kiɔkɔ ya dikambo dikina dianyangiya anto efula. Nde akatɛ olui w’anto ate: “Nyu nyakuki diui diakawati vati: Tunanaki luseka. Keli dimi lambunyutela nti: Untu tshe lenda umuntu, ku ndi ambûkumbula, ndi ambunana la ndi l’utema. Naka su diaye dia lupami diambukutakanya, udikhunduli, udikadja.” (Mateu 5:27-29) Yeso aketsha dia nsaki ka kɔlɔ katshutshuya onto dia kɔmiya womoto ndeka etshelo ka monanyi tɔ tɔamɛ kɔlɔ. Nsaki ka kɔlɔ mbôta loseka. Naka onto tona dia monga la nsaki ya kɔlɔ ndo ‘ndjinya’ oma lo yimba yande, kete nde mbeyaka ndjakimɛ diaha sala awui wa mindo wotondoyosala.

“Ukaluya yombo yaye lu dihusu”

L’otsho wakafungama Yeso ndo wakawawonde, ombeki ande ɔmɔtshi akatondja yɔɔmbɔ dia nde mboshimbɛ. Yeso akawotɛ ate: “Ukaluya yombo yaye lu dihusu; ne dia wane tshe wakimela yombo, wayuvo la yombo.” (Mateu 26:52) La wedi a pindju, Yeso akatɛ Pɔtiyɔ Pilata ate: “Diulelu diami diaha dia la kete nye. Utunduyala diulelu diami dia la kete nye mbedio, tshiki antu ami wutondwela ta, diaha dimi nkimwama l’anya w’asi Juda. Keli kakiane, diulelu diami diaha dia la kete nye.” (Joani 18:36) Onde wetshelo ɔsɔ wekɔ kɔlɔ?

Dionga diakɔna diaki l’Akristo wa ntondo lo kɛnɛ kendana la wetshelo waketsha Yeso lo dikambo diaha ndjakimɔ l’awui wa ngala na? Dibuku Dionga diaki la Akristo wa ntondo lo kɛnɛ kendana la ata (Angɛlɛ) mbutaka ɔnɛ: “Lam’ele vɔ [wetshelo waki Yeso] shimbaka weho tshɛ w’awui wa ngala ndo wa pumuya anto akina, mbokɛmaka hwe dia kema dimɛna ndjatambiya l’awui wa ata . . . Akristo wa ntondo wakayele kɛnɛ kakate Yeso nna lo nna, ndo wakashihodia wetshelo ande wa monga anto wa ki ndo wakahombe ndjalama diaha ndjatambiya l’awui wa ngala. Vɔ wakɛnya dimɛna dia wɔladi wekɔ lo ɔtɛmwɛlɔ awɔ; ndo vɔ mpetshaka awui wa ata la wolo tshɛ nɛ dia wakakɛdiaka akila.” Ande otshikitanu wotonga l’ɔkɔndɔ w’anto otondoyalaka anto tshɛ wata ɔnɛ wekɔ Akristo wakayele wetshelo ande lee!

Wɛ koka kondja wahɔ oma lo wetshelo tshɛ waki Yeso

Wetshelo waki Yeso wambotɔsɛdingola wekɔ dimɛna, wɔdu ndo la nkudu k’efula. Anto wotokondja wahɔ otoweya wetshelo akɔ dimɛna ndo kamba la wɔ olimu lo nsɛnɔ yawɔ.a

Ɛmɛnyi wa Jehowa wa lo ngelo kayɛ wayɔngɛnangɛna dia kokimanyiya dia wɛ mɛna woho wakokayɛ kondja wahɔ oma lo wetshelo wahatashaka ndoko onto. Tambokelɛ la wangasanu tshɛ dia wɛ mɛnana la wɔ kana mbafundɛ lo adrɛsɛ wele lo lɛkɛ 2 la periodikɛ kɛnɛ.

[Nɔtɛ ka l’ɛse ka dikatshi]

[Osato wa lo lɛkɛ 5]

“Shenyu leli l’ulungu atuyileshaka”

[Osato wa lo lɛkɛ 7]

Wetshelo wa Yeso koka monga la shɛngiya ya wolo lo lɔsɛnɔ layɛ