Jehowa kokɛka wanɛ walongamɛ le nde
‘Ngandji kayɛ ka lɔsɛngɔ la kɛtshi kayɛ wakokɛke tena tshɛ.’—OSAMBU 40:11.
1. Kakɔna kakalɔmbɛ nkumekanga Davidi Jehowa, ndo ngande wakadimɔma dɔmbɛlɔ diande ɛlɔ kɛnɛ?
NKUMEKANGA DAVIDI ka l’Isariyɛlɛ w’edjedja ‘akalongamɛka la otema ɔtɔi le Jehowa’ ndo akatshutshuyama dia mbuta ɔnɛ Jehowa “akahuke tui uya le [nde] akuki delu [diande].” (Osambu 40:1) Mbala la mbala nde akɛnyi woho wakokɛ Jehowa wanɛ wawoka ngandji. Ɔnkɔnɛ, Davidi akakoke nɔmba dia kokamamɛka oma le Jehowa tena tshɛ. (Osambu 40:11) L’atei wa apami la wamato wa kɔlamelo wele la daka dia “nungula eulwelu kuleki ololo,” Davidi ekɔ kakianɛ lo yimba yaki Jehowa oko ɔnɛ layoyolongola difuto sɔ. (Heberu 11:32-35) Ɔnkɔnɛ, nde ayonga la nshi yayaye yoleki amɛna. Lokombo lande lambofundama lo “buku di’euhwelu” diaki Jehowa.—Malaki 3:16.
2. Ngande watokimanyiya Afundelo dia sho shihodia kɛnɛ kalembetshiya kokamamɛ oma le Jehowa?
2 Kânga mbele anto wa kɔlamelo wɔtɛkɛtami lo Heberu 11 wakasɛnɛ la ntondo ka Yeso Kristo ndjɔsɛna lanɛ la nkɛtɛ, vɔ wakasɛnɛ lo yoho yɔtɔnganɛ la ɛtɛkɛta ɛnɛ waketsha Yeso etena kakandate ate: “One lalanga lumu landi, ambulushisha. One latuna lumu landi la kete nye, ayululama utsha lu lumu la pundju.” (Joani 12:25) Ɔnkɔnɛ, kokamɛ oma le Jehowa halembetshiya ɔnɛ hatotohomana la asui ndo ɛhɛnyɔhɛnyɔ. Kɛsɔ nembetshiyaka dia onto ɔsɔ kokamamɛka lo yoho ya lo nyuma dia monga l’akoka wa tetemala mbetawɔma le Nzambi.
3. Djembetelo yakɔna yele laso yɛnya ɔnɛ Yeso akakokamamɛ oma le Jehowa ndo etombelo akɔna wakonge?
3 Yeso ndamɛ akasoyama wolo, akatɛngama, ndo l’ekomelo atunyi ande wakatondoya dia mbodakisha nyɔi ka sɔnyi efula ndo ka pâ. Koko, kɛsɔ hɛnya dia Nzambi kokotsha daka diande dia kokɛ Mɛsiya. (Isaya 42:1-6) Woho wakolɔ Yeso lushi la sato l’ɔkɔngɔ wa nyɔi kande ka kɔlɔ efula akashikikɛ dia Jehowa akoke dɔmbɛlɔ diande dia ekimanyielo oko wakandoke diaki Davidi. Jehowa akakadimola dɔmbɛlɔ diaki Yeso lo mbosha wolo wa nde nama olowanyi ande. (Mateu 26:39) Ɔnkɔnɛ, lam’ele nde akakokamamɛ lo yoho shɔ, Yeso akalongola eongelo kahavu l’olongo, ndo miliyɔ y’anto wele la mbetawɔ lo olambo ande wa tshungo wekɔ la elongamelo ka ndjokondja lɔsɛnɔ la pondjo.
4. Eshikikelo kakɔna kambowosha Akristo wa akitami w’esɔ ndo “ekoko ekina”?
4 Sho koka monga la eshikikelo ɔnɛ Jehowa mbetawɔka ndo ekɔ l’akoka wa kokɛ ekambi ande wa nshi nyɛ oko wakandasale dui sɔ lo nshi ya Davidi ndo ya Yeso. (Jakoba 1:17) Djui ya tshitshɛ ya atshikadi w’akitami w’esɔ wa anango Yeso weke lanɛ la nkɛtɛ koka ndjaɛkɛ lo daka diaki Jehowa diendana la: “Sangu diahahonde, diahalana, diahashisho, diakawanyukitshiya l’ulungu. Nyu ane wambulamema lu wulu a [Nzambi oma lo] mbetawo kanyu, nyayuyala la panda kayenyama le nyu l’etena k’ekumelu.” (1 Petero 1:4, 5) “Ekoko ekina” wele la elongamelo ka nsɛna la nkɛtɛ, koka vɔ lawɔ kitsha wɛkamu awɔ le Nzambi ndo lo daka diande diakate omembi w’esambo ɔnɛ: “Nyu ekilami tshe, nyuki [Jehowa] ngandji. [Jehowa] atulamaka kanga kolamelu.”—Joani 10:16; Osambu 31:23.
Vɔ kokamamɛka lo nyuma
5, 6. a) Ngande wakokamamɛ ekambi waki Nzambi nshi nyɛ? b) Diokanelo diakɔna diele lam’asa akitami w’esɔ la Jehowa, ndo kayotota dikambo dia wanɛ wele la elongamelo ka nsɛna la nkɛtɛ?
5 Nshi nyɛ, Jehowa mbɔsaka tɛdikɔ dia kokɛ ekambi ande lo yoho ya lo nyuma. Kânga mbahandakokɛ oma lo ɛhɛnyɔhɛnyɔ, oma l’ekakatanu ndo oma lo mpokoso yahomana la anto lo lɔsɛnɔ, la kɔlamelo tshɛ nde mbashaka ekimanyielo ndo ekeketshelo kewɔ latɔ ohomba dia vɔ kokɛ diokanelo di’oshika diasawɔ la nde. Diokanelo sɔ mpikama lo mbetawɔ kele lawɔ lo yɛdikɔ yoludi la ngandji yaki Nzambi yendana la tshungo. Amɔtshi l’atei wa Akristo wa kɔlamelo asɔ wakakitama esɔ ka nyuma ka Nzambi dia tolɛ kâmɛ la Kristo l’olongo. Vɔ wamboyindjama oko ana wa lo nyuma waki Nzambi, ndo le wɔ mbakotshama ɛtɛkɛta ɛnɛ wata ɔnɛ: “Ndi kakatutshungula uma lu wulu a udjima, kakatukadimula utsha lu diulelu dia On’andi la ngandji. Uma le ndi kesu l’etshungwelu kasu, ndu la edimanyelu ka kolo yasu.”—Kolosai 1:13, 14.
6 Miliyɔ nkina ya Akristo wa kɔlamelo wekɔ la eshikikelo dia vɔ lawɔ wayokondja wahɔ oma lo yɛdikɔ yaki Nzambi yendana la tshungo. Sho mbadiaka ɔnɛ: “Ne dia On’a untu kundja dia antu mbukambela ulimu, akayi dia ndjukambela antu akina ulimu, la dia nkimo lumu landi, dia ntshungula antu efula.” (Mako 10:45) Akristo asɔ wekɔ lo nongamɛ dia ndjonga la “lutumbu la ana a [Nzambi]” lo etena kakashikikɛma. (Romo 8:21) Etena kɛnɛ, vɔ ngɛnangɛnaka lɔngɛnyi lele lam’asawɔ la Nzambi ndo vɔ ndjatshutshuyaka la otema ɔtɔi dia keketsha diokanelo sɔ.
7. Lo toho takɔna takokɛ Jehowa yônge ya lo nyuma y’ekambi ande ɛlɔ kɛnɛ?
7 Yoho mɔtshi yakokɛ Jehowa yônge ya lo nyuma y’ekambi ande ele lo mbasha ekongelo ka wetshelo katatetemala. Dikambo sɔ mbakimanyiyaka dia vɔ nyomoleka kondja ewo k’oshika ka akambo wa mɛtɛ. Jehowa tetemalaka mbasha nto ɛlɔmbwɛlɔ oma lo tshimbo ya Ɔtɛkɛta ande, ya ɔlɔngɔswamelo ande ndo ya nyuma kande k’ekila. Lo ɛlɔmbwɛlɔ ka ‘ɔhɔmbɔ wa kɔlamelo ndo wa kɛsɔ,’ ekambi waki Nzambi wa lo andja w’otondo wekɔ oko nkumbo ka l’andja w’otondo. Olui w’ɔhɔmbɔ kotshaka ehomba wa lo nyuma ndo naka ekɔ ohomba vɔ kotshaka ndo ehomba wa l’emunyi wa nkumbo k’ekambi waki Jehowa oyadi wodja wewɔ kana dihole diele lawɔ lo tshunda.—Mateu 24:45.
8. Eshikikelo kakɔna kele la Jehowa le ekambi wa kɔlamelo, ndo dikambo sɔ mbashikikɛka na?
8 Oko waki Jehowa kokokɛ Yeso lo demba oma l’ɛhɛnyɔhɛnyɔ w’oma le atunyi ande, woho akɔ wâmɛ mbahandakokɛ Akristo nshi nyɛ. Onde dui sɔ mɛnyaka dia Nzambi hângɛnangɛna. Kema, aha ɔsɔku! Koko dui sɔ mɛnyaka eshikikelo kele lande ka ɔnɛ vɔ wayeta lo wedi ande lo dikambo dia woke diendana la anto tshɛ. (Jobo 1:8-12; Tukedi 27:11) Jehowa hakalɛki pondjo wanɛ wele la kɔlamelo le nde nɛ dia, “[Nde] atulangaka sambu k’ololo. Ndi hatosekaka [“anto ande wa kɔlamelo,” NW]. Antu w’ololo watulamemaka pundju.”—Osambu 37:28.
Ngandji ka lɔsɛngɔ ndo mɛtɛ mbakokɛka
9, 10. a) Woho akɔna wakokɛ mɛtɛ kaki Jehowa ekambi ande? b) Ngande wɛnya Bible ɔnɛ Jehowa kokɛka ekambi ande oma lo tshimbo ya ngandji kande ka lɔsɛngɔ?
9 Lo dɔmbɛlɔ diande dia lo Osambu 40, Davidi akalɔmbɛ dia kokamamɛ oma lo ngandji ka lɔsɛngɔ ndo mɛtɛ kaki Jehowa. Mɛtɛ ka Jehowa ndo woho walangande sambo k’ɔlɔlɔ mbɔlɔmbaka dia nde nembetshiya anto hwe ɛlɛmbɛ ande. Wanɛ wasɛna lo ndjela ɛlɛmbɛ ande kokamamɛka efula oma lo nyangu, wɔma ndo ekakatanu wakomɛ wanɛ wɔnyɔla ɛlɛmbɛ akɔ. Ɛnyɛlɔ, sho kokaka ndjakokɛ ndo kokɛ anto wokaso ngandji oma lo akambo efula washa pâ l’asolo naka sho tona dinɔnɔ dia wolo, ɔnwɛlɔ a wanu wa tshambandeko, awui wa mindo wa dieyanelo ndo yoho ya lɔsɛnɔ ya ngala. Kânga wanɛ watakɔ mboka ka mɛtɛ kaki Jehowa oko wakakitakɔ Davidi etena kɛmɔtshi wekɔ la eshikikelo ɔnɛ Nzambi ekɔ ‘dihole dia eshamelo’ le atshi wa kɔlɔ wayatshumoya. Anto asɔ koka mbida ekoko w’ɔngɛnɔngɛnɔ ɔnɛ: “We ayumumbaka uma lu pa.” (Osambu 32:7) Ɔsɔ ekɔ mɛtɛ djembetelo ya ngandji ka lɔsɛngɔ kaki Nzambi!
10 Ɛnyɛlɔ kekina ka ngandji ka lɔsɛngɔ kaki Nzambi ele Nzambi ekɔ lo mbewola ekambi ande dia vɔ kakitɔna la andja wa kɔlɔ ɔnɛ, wele kema edja wayanga nanyema. Sho mbadiaka ɔnɛ: “Tanyulangaki akambu wa la kete kuyanga diango dia la kete. Naka untu alanga akambu wa la kete, ku ngandji ka Shesu kema l’utema andi. Ne dia akambu wa la kete, saki ka dimba, ndu saki ka ashu, ndu utaku a lumu, vo waha uma le Shesu, keli weko uma la kete.” Lo mbidja yimba lo ɔhɛmwɛlɔ ɔsɔ ndo lo ntsha akambo lo yoho yɔtɔnganɛ la ɔhɛmwɛlɔ akɔ, sho koka kokɛ nsɛnɔ yaso lo pondjo lo yoho ya mɛtɛ mɛtɛ, nɛ dia divɛsa sɔ tetemalaka mbuta ɔnɛ: “Akambu wa la kete la saki yawo wayushila. Keli one latutshaka lulangu la [Nzambi], atuyalaka pundju.”—1 Joani 2:15-17.
Ekanelo ka yimba, shɛnɔdi ndo lomba mbakokɛka
11, 12. Lembetshiya woho watokokɛ ekanelo ka yimba, shɛnɔdi ndo lomba.
11 Lo wolo wa nyuma, Sɔlɔmɔna ɔnaki Davidi akafunde lo dikambo dia wanɛ wele la elongamelo ka mbetawɔma le Nzambi ɔnɛ: ‘Ekanelo ka yimba kayokokokɛ. Shɛnɔdi yayokokokɛ.’ Nde akalake nto ate: ‘Nyoyale la lomba, tanyolisɛkake ko lɔ layonyolama. Nyolange lomba ko lɔ layonyokokɛ.’—Tukedi 2:11; 4:5, 6.
12 Tayɛnya dia tekɔ la dikoka dia ekanelo ka yimba lo kanaka yimba la kɛnɛ kekaso oma lo Ɔtɛkɛta wa Nzambi. Naka sho sala ngasɔ, kete dui sɔ diayotokimanyiya dia monga la shɛnɔdi y’efula woho wa sho mbetsha awui woleki ohomba lo dihole dia ntondo. Dui sɔ diekɔ ohomba, nɛ dia efula l’atei aso mbeyaka ondo oma l’awui wakâkomɛ dia ekakatanu tombaka etena ketshawɔ awui wele bu ohomba lo dihole dia ntondo la lolango lawɔ kana aha la lolango lawɔ. Andja waki Satana tshutshuyaka anto dia nyanga lomombo la l’emunyi, lokumu, lowandji, etena kɛnɛ kele Jehowa tokeketshaka dia sho ndjasha lo eyango wa lo nyuma woleki ohomba. Naka hatetshisha eyango wa lo nyuma lo dihole dia ntondo, kete dui sɔ koka ndanya lɔsɛnɔ la nkumbo, lɔngɛnyi lasaso la anto akina kana toshimba dia kotsha eyango wa lo nyuma. Lâsɔ ndoko wahɔ wakoka kondja onto ɔsɔ lo ndjela ɛtɛkɛta waki Yeso wata ɔnɛ: “Waho akona wayuyala le untu lakundja kete tshe, naka ndi ambushisha lumu landi lu dikambu diako?” (Mako 8:36) Lomba totshutshuyaka dia sho kitanyiya dako nɛ diaki Yeso: “Keli ntundu nyutayangi diulelu la ololo wa [Nzambi], ku diango so tshe diayuyala dianyu.”—Mateu 6:33.
Wâle wonga lo ndjasha paka l’awui aso hita
13, 14. Kakɔna kalembetshiya ndjasha paka l’awui aso hita, ndo lande na kele bu dui dia lomba monga ngasɔ?
13 Anto wekɔ la mbekelo ka ndjashaka paka l’awui awɔ vɔamɛ. Naka onto ambetsha nsaki ndo wahɔ ande lo dihole dia ntondo lo lɔsɛnɔ lande, kete dui sɔ diayotodja efukutanu. Ɔnkɔnɛ, dia kokɛ diokanelo diasaso la nde, Jehowa tetshaka dia sho mbewɔ dionga dia ndjasha paka l’awui aso hita. Ndjasha l’awui aso hita nembetshiyaka “ndjakiyanya paka dikambo dia nsaki yaso, dia ehomba aso kana dia wahɔ aso.” Kema anto efula ɛlɔ kɛnɛ wekɔ lo kɛnɛmɔla dionga sɔ? Diɔ diakɔ diakate Bible ɔnɛ “lu nshi y’ekumelu” ya dikongɛ diaki Satana nɛ, “antu wayuyalanga,” kana wayoyasha paka l’awui awɔ hita.—2 Timote 3:1, 2.
14 Akristo shihodiaka ohomba wa kitanyiya didjango dia lo Bible diata dia ndjasha lo wahɔ w’anto akina, mbâlanga oko wayalangaso. (Luka 10:27; Filipi 2:4) Lo tshɛ kawɔ anto koka mbɔsa dia dikambo sɔ bu ɔlɔlɔ, koko diɔ diekɔ ohomba naka sho nangaka monga la diwala dia dimɛna, la diokanelo di’oshika lo nkumbo ndo la lɔngɛnyi l’oshika. Ɔnkɔnɛ, okambi wa mɛtɛ waki Jehowa hahombe mbetawɔ pondjo dia nsaki kotɔ l’onto ka ndjasha lo wahɔ ande hita mbahemɛ lɔsɛnɔ lande polo ndo lo nde tshindja akambo woleki ohomba l’ɔkɔngɔ. Dui dioleki ohomba ele ndjasha lo akambo wendana la Jehowa Nzambi katɛmɔlande.
15, 16. a) Dionga dia ndjasha paka l’awui aso hita koka konya onto lende, ndo lo ɛnyɛlɔ ka anto akɔna? b) Lo mɛtɛ, kakɔna katosalaka onto, etena kende suke dia nombosha anto akina?
15 Dionga dia ndjasha paka l’awui aso hita koka konya onto diande ndjaɔsa ndamɛ oko onto ɔlɔlɔ, ndo dionga sɔ koka ndjokonya onto dia nde monga la tokanyi ta kɔlɔ kana la lotamanya. Diakɔ diata Bible ɔnɛ: “We wuhu w’untu tshe latulumbuyaka akina, we hukundja luha, ne dia lu akambu watuyulumbuyaka akina, we atuyamiaka la wo, ne dia weme latulumbuyaka atutshaka pupu.” (Romo 2:1; 14:4, 10) Ewandji w’ɛtɛmwɛlɔ wa lo nshi ya Yeso waketawɔka la eshikikelo tshɛ dia vɔ wakasalaka akambo la sambo kawɔ k’ɔlɔlɔ, diɔ diakɔ diakawɔnyɔlaka Yeso ndo ambeki ande. Lo ntsha ngasɔ, vɔ wakayaetɛ vɔamɛ oko toshushi. Aha la mɛna kɔlɔ yawɔ vɔamɛ, vɔ wakayaela elombwelo.
16 Judasɛ ombeki waki Yeso wakayôfungaka, akayaetɛ ndamɛ shushi y’anto akina. Lo diaaso dimɔtshi la Bɛtaniya, etena kakakite Mariya kadiyɛnde la Lazaro Yeso esɔ k’oshinga a wolo, Judasɛ akatone la wolo tshɛ. Nde akɛnya lonyangu lande lo mbuta ate: “Okoko wana wakiwo kunsundja malashi one lu denariyo kama shatu, dia mbisha akanga a weula?” Koko ɔkɔndɔ tetemalaka mbuta ɔnɛ: “Ndi akati diui so, aha ne dia ndi akakanelaka akanga a weula; keli ne dia ndi aki uvi, ndu aki la tapa diakandosaka diango diakawakitshaka loko.” (Joani 12:1-6) Tatokomake pondjo oko Judasɛ kana oko ewandji w’ɛtɛmwɛlɔ, waki suke dia nombosha anto akina, ko tete le wakayalomboshaka vɔamɛ.
17. Ɛnya wâle wonga oma lo dionga di’ofunu kana dia ndjaɛkɛ tshɛ le so shoamɛ.
17 Lonyangu ko, kânga mbakiwɔ komonga wevi oko Judasɛ, Akristo amɔtshi wa ntondo, waki akanga w’etako ndo wakayasɛmaka. Jakɔba akafunde lo dikambo diawɔ ate: “Nyu nyambutakula lu ndjatumbula kanyu.” Oma lâsɔ, nde akakotsha ate: “Utaku one tshe, eko kolo.” (Jakoba 4:16) Ndjafuna lo awui wambotosala kana dia waɛsɛ wa lânde wele laso l’olimu wa Jehowa ekɔ wâle efula. (Tukedi 14:16) Sho mbohɔka kɛnɛ kakakomɛ ɔpɔstɔlɔ Petero, lakayasɛmɛ lo etena kɛmɔtshi lo ndjaɛkɛ tshɛ le nde ndamɛ lo mbuta ate: “Kuyanga antu tshe wayutakana lu dikambu diaye, dimi halutakana pundju . . . Naka dieli la mi dia mvo la ye, halakanguna.” Lo mɛtɛ, sho kema ndoko l’ɔkɔkɔ ɔtɔi wa ndjafuna. Kɛnɛ tshɛ kele laso ndja oma lo ngandji ka lɔsɛngɔ ka Jehowa. Naka tayohɔka dui sɔ, kete diɔ diayotokimanyiya diaha sho ndjafuna.—Mateu 26:33-35, 69-75.
18. Ngande wɔsa Jehowa dionga di’otako?
18 Vɔ totɛka ɔnɛ: “Utaku katetaka la ntundu k’elanyelu, la djawudi la ntundu k’ekwelo.” Lande na? Jehowa kadimolaka ate: “Utaku, ngala, . . . mbatumuhetshaka.” (Tukedi 8:13; 16:18) Aha la tâmu Jehowa akomalɛ “khum’ekanga k’Asuriya, ne dia djawudi la utaku andi.” (Isaya 10:12) Jehowa akawosha dilanya l’ɔtɛ w’otako ande. Kem’edja andja w’otondo waki Satana kâmɛ la dionga diawɔ di’ofunu, la ewandji awɔ wa tamanya tshɛ wɛnama ndo wahɛnama wayanga nongola dilanya ndo vɔ lawɔ. Tatongake pondjo la dionga di’otako diele la atunyi waki Jehowa!
19. Lo dikambo diakɔna diayafuna ekambi waki Nzambi kânga mbewɔ la okitshakitsha?
19 Akristo wa mɛtɛ wekɔ la ɛkɔkɔ wa monga la ofunu lo woho wewɔ ekambi waki Jehowa. (Jeremiya 9:24) L’etena kakɔ kâmɛ, vɔ wekɔ la ɔkɔkɔ wa monga la okitshakitsha. Lande na? Nɛ dia “antu tshe wakatshi kolo, hawukumi lu yediko ya lutumbu la [Nzambi].” (Romo 3:23) Ɔnkɔnɛ, dia sho kokɛ dihole diaso oko ekambi waki Jehowa, sho pombaka monga la woho wa dionga diaki la ɔpɔstɔlɔ Paulo, lakate ate: “Kristu Jesu akayi la kete dia ndjushimbela antu wa kolo,” ndo nde akakotsha ate: “Wulekimi kolo.”—1 Timote 1:15.
20. Ngande wakokɛ Jehowa ekambi ande ɛlɔ kɛnɛ, ndo ngande wayondakokɛ lo nshi yayaye?
20 Lam’ele ekambi waki Jehowa mbetshaka wahɔ awɔ lo dihole dia hende woho wa mbetsha lolango laki Nzambi lo dihole dia ntondo, sho koka ndjashikikɛ ɔnɛ Jehowa ayotetemala mbakokɛ lo nyuma. Sho koka nto ndjashikikɛ ɔnɛ etena kayoya fɔnu ka woke, Jehowa ayokokɛ ekambi ande aha paka lo nyuma oto koko ndo lo demba. Etena kayowɔtɔ l’andja w’oyoyo, vɔ wayonga l’akoka wa mbuda ekoko ɔnɛ: “Enda, one eli [Nzambi k]asu. Shu takukungela, dia ndi ntushimbela. On’eli [Nzambi], lakatakungelaka. Tongenengene, tuleki ngenangena lu panda kandi.”—Isaya 25:9.
Onde wɛ akohɔ?
• Ngande wakakokamamɛ nkumekanga Davidi nde la Yeso Kristo?
• Ngande wakokamamɛ ekambi waki Jehowa ɛlɔ kɛnɛ?
• Lande na kahombaso mbewɔ dionga dia ndjasha paka l’awui aso hita?
• Lande na kakokaso monga l’ofunu ndo monga la okitshakitsha?
[Esato wa lo lɛkɛ 19]
Ngande wakakokɛ Jehowa Davidi nde la Yeso?
[Esato wa lo lɛkɛ 21]
Toho takɔna takokamamɛ ekambi wa Nzambi lo nyuma ɛlɔ kɛnɛ?
[Esato wa lo lɛkɛ 22]
Kânga mbayafunaso lo woho wakambɛso Jehowa, sho la dia monga la okitshakitsha