Nembetshiya tolembetelo ekɔ dikambo di’ohomba!

“Ntondotondo, dimi lakafɔnya dia Andreas w’ɔnaso aki paka la pâ ka l’ɔtɛ. Koko nde akashisha mposa ka ndɛ diangɔ ndo akonge la demba dja dia wolo. Pâ ka l’ɔtɛ kakaleke monga wolo, ndo lakatatɛ mboka wɔma. Etena kakakalola omɛmi la ngelo, takatshu la Andreas le dɔkɔtɛlɛ. Dɔkɔtɛlɛ akasɛdingola tolembetelo ndo akatɔlɛ Andreas mbala kakɔ ɔtɔi lo lopitadi. Hemɔ kakaleke monga wolo oleki pâ ka l’ɔtɛ. Andreas aki la hemɔ ka hioho ya wɔɔngɔ (méningite). Nde akasakemɛ ndo akakɔlɔngana esadi.”​—Gertrud, mama kɛmɔtshi ka l’Allemagne.

DIKAMBO diakakomɛ Gertrud sɔ komɛka ambutshi efula. Vɔ sɛdingolaka tolembetelo tɛnya ɔnɛ ondo ɔnawɔ ekɔ la hemɔ. Kânga mbele aha hemɔ tshɛ monga wolo, ambutshi hawokoke minya yimba lo tolembetelo ta hemɔ tɛnama le anawɔ. Sɛdingola tolembetelo ndo mbɔsa tɛdikɔ tahombama mbeyaka monga la etombelo wa diambo. Ɔsɔ ekɔ dikambo di’ohomba efula.

Dui sɔ diekɔ mɛtɛ ndo lo akambo akina wotshikitanyi la yônge ya demba. Ɛnyɛlɔ kɛmɔtshi ele ka mpokoso kɛmɔtshi kelɛwɔ tsunami kakatombe lo Ngɔndɔ ka dikumi l’ahende 2004 lo ɛtshi ka nkɛtɛ ka l’omamu wa ndjale ka woke ka Indiya. Atshunda wa lo ahole asɔ, mbuta ate wa lo Australie ndo Hawaii wakɛnyi dia didimu dia nkɛtɛ dia wolo diaki suke la salema lo nɔrdɛ ka Sumatra ndo wâle wakakoke monga la didimu sɔ l’ɔkɔngɔ. Koko, ndoko ehomɔ kakakoke mbewola anto wa lo dihole sɔ waki lo wâle woho wa vɔ mbɔsa tɛdikɔ. Etombelo wakonge ele, ndekana anto 220 000 wakavu.

Tolembetelo t’ohomba efula

Etena kaki Yeso Kristo la nkɛtɛ, nde akasha ampokami ande wetshelo lo sɛdingola tolembetelo ndo sala akambo lo yoho yɔtɔnɛ la tɔ. Nde akatɛkɛtaka dia dui dimɔtshi diaki ohomba efula. Bible mbutaka ɔnɛ: “Afarise la Asaduke wakayi le Jesu dia ndjûhimba, wakôlombe dia ndi mbaenya djimbitelu y’uma l’ulungu. Keli ndi akâkaluya diui ati: La dikolo, nyu nyatutaka nyati: Ayuyala yanyi, ne dia ulungu weko tilili. La pindju, nyu nyatutaka nyati: Ayuyala tshitshi, ne dia ulungu weko tilili ndu lutshukutshuku. Nyu mbeyaka nshihudia akambu wa l’ulungu, keli hanyeyi nshihudia tulimbitelu ta tena.”​—Mateu 16:1-3.

Lo tɛkɛta dia “tulimbitelu ta tena,” Yeso akɛnya dia ase Juda wa lo ntambe ka ntondo wakôhokamɛka wakahombe mbeya dia wakasɛnaka lo tena diakawahombe sala akambo la shamanya. Dikongɛ di’akambo di’ase Juda diakahombe pomɔ mpokoso kakahombe monga la shɛngiya le wɔ vɔ tshɛ. Nshi ngana tsho la ntondo ka nyɔi kande, Yeso akatɛkɛta la ambeki ande lo kɛnɛ kendana la djembetelo kina, mbuta ate djembetelo ya wôngelo ande. Kɛnɛ kakandate lo diaaso sɔ ekɔ ohomba efula le onto tshɛ ɛlɔ kɛnɛ.