Andja wele kema la losembwe
SHI wɛ mbetawɔka dia tekɔ lo nsɛna lo andja wele kema la losembwe? Ndoko tâmu, wɛ mbetawɔka. Lo mɛtɛ, oyadi diewo dia ngande diele laso ndo kânga sho kokongɛka nsɛnɔ yaso la lomba tshɛ, sho hatotongaka la eshikikelo dia kana tayonga la ɔngɔnyi, la lɔsɛnɔ la dimɛna kana la mbo ya ndɛ. Tena efula awui ndjokadimɔka paka oko wakate Sɔlɔmɔna, nkumekanga ka lomba ka lo nshi y’edjedja ate: “Olelo kema le akanga a tomba kana ɔngɔnyi le wanɛ wele la yimba kana lɔsɛnɔ la dimɛna le akanga w’ewo.” Lande na? Nɛ dia Sɔlɔmɔna tetemalaka ate: “Tena ndo awui wa shashimoya komɛka anto tshɛ.”—Undaki 9:11, The New English Bible.
“Etena kakoma tena dia kɔlɔ la shashimoya”
Eelo, etelo k’ɔnɛ “tena ndo awui wa shashimoya” kalembetshiya mbala efula tanema lo dihole dia kɔlɔ ndo lo etena ka kɔlɔ, ndanyaka mbala efula kɛnɛ kakongɛso la yambalo tshɛ ndo dikongelo diaso. Lo ndjela Sɔlɔmɔna, sho mongaka “oko lose lambondama lo ɔtɛi ndo oko fudu yambotala lo djonga . . . etena kakoma tena dia kɔlɔ la shashimoya.” (Undaki 9:12, NE) Ɛnyɛlɔ, miliyɔ y’anto kambaka dikambɔ aha la mpekɔ dia kondjiyɛ nkumbo yawɔ mbo ya ndɛ, koko la shashimoya vɔ totanemaka lo “tena dia kɔlɔ” etena kahalɔ avula ndo kalanya ɔwɔ dinela diawɔ.
Anto akina pembaka kimanyiya wanɛ wele “tena dia kɔlɔ” diambakomɛ, koko kânga ekimanyielo kasha anto asɔ mɛnamaka mbala efula oko kema la losembwe. Ɛnyɛlɔ, lo welo wadjama dia shidiya ndjala, tshunda dimɔtshi diendana la woshelo w’ekimanyielo akate dia lo ɔnɔnyi ɔmɔtshi weke ka mbeta “dihonda di’otondo [dia Afrikɛ] diakalongola ekimanyielo ka paka katanu ɔtɔi ka falanga yakakimɔma dia sukɛ ta dia lo Golfe.” Onde aki dui dia losembwe dia wedja w’ɛngɔnyi kimɔ falanga ya tɔlɔsha ta lo wodja ɔtɔi, yoleki nyɛ yakawakimɔ dia shidiya pâ ndo kandji yaya oma lo ndjala lo dihonda di’otondo mbala tshanu y’etondo? Onde ekɔ dui dia losembwe dia anto efula monga la lomombo efula la l’emunyi etena kɛnɛ kele pursa 25 y’anto wa lo nkɛtɛ k’otondo nsɛnaka lo wola woleki tshɛ ndo miliyɔ y’ana wekɔ lo mvɔ ɔnɔnyi tshɛ la hemɔ yakoka mbewɔma? Ndooko!
Lo mɛtɛ, aha tsho “tena ndo awui wa shashimoya” mbele lo kiɔkɔ ya “tena dia kɔlɔ diakoma la shashimoya.” Koko welo wele la nkudu kotoleki mbahemɛka nsɛnɔ yaso ndo mbele lo kiɔkɔ ya kɛnɛ katokomɛ. Kɛsɔ mbakatombe la Beslan, lo wodja wa Alania lo eleko k’ɔlɔ akatshi ka lo 2004, etena kakadiakema nkama y’anto lo owanu waki lam’asa waa terɔristɛ l’asɔlayi. Efula l’atei awɔ waki ana w’akɛnda ndo ɔsɔ aki lushi lawɔ la ntondo la ntshɔ lo kalasa. Mɛtɛ, lo yɛdikɔ ya woke ɔsɔ aki dikambo dia shashimoya oyadi le wanɛ wakavu ndo wanɛ wakake lo mpokoso kɛsɔ. Koko ɔkɔkɔ woleki woke wa “tena dia kɔlɔ” sɔ aki ɔlɔshanelo wa l’asa anto.
Onde andja wayongaka nshi tshɛ aha la losembwe?
Etena katɛkɛtawɔ dikambo di’awui waha la losembwe, anto amɔtshi mbutaka ɔnɛ: “Ngasɔ mbele lɔsɛnɔ, ngasɔ mbelɔ nshi tshɛ ndo ngasɔ mbayoliongaka nshi tshɛ.” Le wɔ, anto wele la wolo wayɔsɔkishaka nshi tshɛ anto wele wɔdu ndo ase ɛngɔnyi wayosoyaka nshi tshɛ ase wola. Vɔ mbutaka dia awui asɔ sanganya la ‘tena ndo awui wa shashimoya’ ayongaka la shɛngiya le so edja tshɛ kayotongaka la lɔsɛnɔ la nkɛtɛ.
Onde awui pombaka monga mɛtɛ ngasɔ? Onde wanɛ wakamba la akoka awɔ la yimba tshɛ wayona kɛnɛ kɛdimi la olimu awɔ wa wolo? Onde onto ɔmɔtshi kokaka sala dikambo dimɔtshi diakoka mbela etshikitanu wa pondjo lo kɛnɛ kendana la andja ɔnɛ wele kema losembwe? Tende kɛnɛ kata sawo diaso diayela lo dikambo sɔ.
[Efundelo wɛnya kanga osato wa lo lɛkɛ 3]
MAXIM MARMUR/AFP/Getty Images