Ngɛnangɛna la Kɛnɛ Kele Layɛ
1 Afundelo tɔlɔmbaka dia sho kotsha ehomba wa l’emunyi w’ase nkumbo kaso, koko dui sɔ hadiohombe mbɔsa dihole dia ntondo lo lɔsɛnɔ laso. Akambo wa lo nyuma mbahomba mbeta lo dihole dia ntondo. (Mat. 6:33; 1 Tim. 5:8) Monga la wɛdimo ekɔ dikambo dia wolo efula lo ‘tena dia wolo mbikikɛ nɛ.’ (2 Tim. 3:1) Kakɔna kayotokimanyiya dia ndjala la wɛdimo?
2 Toyele Kanyi ya lo Bible: Ɔtɛkɛta wa Nzambi tewolaka di’oyango w’ɔngɔnyi koka ndanya lonyuma laso. (Und. 5:10; Mat. 13:22; 1 Tim. 6:9, 10) L’etena ka wolo kɛnɛ, ayonga wâle efula naka sho ndeka ndjasha l’olimu wa l’emunyi kana l’awui wa falanga ko mbetsha awui wa lo nyuma, mbut’ate nsanganya, wekelo, ndo esambishilo lo dihole dia hende lo nsɛnɔ yaso. (Luka 21:34-36) Koko, Bible tolakaka ɔnɛ: “Keli lam’ayutuyala la diango dia nde ndu la [ahondo] wa ndota, shu tayuyala la ongenongeno lu diango diako.”—1 Tim. 6:7, 8.
3 Dui sɔ hadiolembetshiya dia Akristo pombaka ndjaetɛ wola. Koko diɔ tokimanyiyaka dia mbeya diangɔ dieso mɛtɛ l’ohomba oko diangɔ dia ndɛ, ahɔndɔ wa ndɔta, ndo tangangɔ tokina tokoki tokimanyiya lo dihole diodjashiso. Naka tekɔ la kɛnɛ kele ohomba lo lɔsɛnɔ, kete hatohombe tetemala la nyanga dia nyomoleka monga la diangɔ efula kana dioleki dimɛna. Lam’akanyiyaso dia nyanga kana kamba elimu ekina lâdiko wa wɔnɛ wakambaso, sho pombaka ndjambola ɔnɛ ‘Onde dikambo nɛ diekɔ mɛtɛ ohomba?’ Lam’ayotosalaka ngasɔ, tayokimanyiyama dia kitanyiya dako dia l’Afundelo diata ɔnɛ: “Tanyuyalaki la saki ya diango. Nyuyali la ongenongeno lu diango dieli la nyu.”—Heb. 13:5.
4 Naka sho ndjaɛkɛ le Jehowa, kete nde ayotɔtshɔkɔla. (Tuk. 3:5, 6) Kânga mbahombaso kamba la wolo dia kotsha ehomba aso wa lushi la lushi, hatohombe mbidja yambalo yaso tshɛ paka lo diangɔ diakɔ. Oyadi ɔngɔnyi mbeso kana wola, sho ndjaɛkɛka le Jehowa dia nde tokotshɛ ehomba aso. (Fil. 4:11-13) Etombelo waya oma lo dikambo sɔ ele, sho mongaka l’ɔngɛnɔngɛnɔ ndo l’ɛtshɔkɔ ekina efula.
5 Tokoya Mbetawɔ k’Anto Akina: Ombutshi ɔmɔtshi wakodiaka ɔnande la womoto ndamɛ lo mbetsha akambo wa mɛtɛ akayasalaka yema yema dia mbetɛ lɔsɛnɔ lande ɔsɛlɛngɛ. Kânga mbakinde la lomombo efula, nde akonɔ otsha lo luudu loleki tshitshɛ ndo l’ɔkɔngɔ diko akayokoma lo mbidjasɛ lo luudu lele paka la shambrɛ ɔtɔi. Dui sɔ diakokimanyiya dia nde kitshakitsha wenya wakandetshaka l’olimu wa l’emunyi woho wa nde ndeka ndjasha l’esambishelo. L’ɔkɔngɔ w’ɔnande mbola ndo tshukama, nyango akalɔmbɛ pasiɔ kânga mbakinde atakotsha ɛnɔnyi wa sala dikambo sɔ ndo kânga mbele dikambo sɔ akalɔmbaka dia lofuto lande kitakita. Ɛlɔ kɛnɛ, kadiyɛso kɛsɔ aya lo ɔnɔnyi ande w’esambele wende lo kamba oko ombatshi mboka wa pondjo ndo nde kema la lonyangu lo woho wakandatshike dia ndjasha lo diangɔ dia l’emunyi l’oyango wa mbetsha wahɔ wa Diolelo lo dihole dia ntondo lo lɔsɛnɔ lande.
6 Ekumanyi kɛmɔtshi nde la wadɛnde wakakambe oko ambatshi mboka ɛnɔnyi efula lam’akawodjaka ana awɔ asato. Lo nkumbo kawɔ, vɔ wakeke woho wa kotshaka ehomba awɔ koko aha kɛnɛ kakawakombolaka monga la tɔ. Ɔnangɛso ɔsɔ akate ate: “Sho takahombaka nyomoleka monga la lɔsɛnɔ l’ɔsɛlɛngɛ. Kânga mbakiso l’ekakatanu lo tena dimɔtshi, Jehowa akatokotshɛka ehomba aso. . . . Lam’ɛnami nkumbo kami wadja wahɔ wa lo nyuma lo dihole dia ntondo lo yoho nyɛ, dimi mɛnaka di’oseka dikambo tshɛ diekɔ woho wahombadiɔ monga ndo dimi ndjaokaka dia olimu wakamakambe kɔmbɔtɔ l’ashi.” Wadɛnde akakotsha ate: “Lam’ɛnami omɛmi ayasha l’awui wa lo nyuma, dimi mbokaka ɔngɛnɔngɛnɔ efula.” Ana nto mongaka l’ɔngɛnɔngɛnɔ efula lam’ɛnawɔ ambutshi awɔ wayashikikɛ dia kambɛ Jehowa l’olimu wa lo tena tshɛ.
7 Bible ndakaka ɛtshɔkɔ efula kakianɛ ndo lo lɔsɛnɔ layaye le anto tshɛ wasɔna yoho ya lɔsɛnɔ shɔ lo dihole dia ndjasha l’eyango wa lomombo la l’emunyi.—1 Tim. 4:8.