Onde Wɛ Koka Kimanyiya?
1 Tena tshɛ Jehowa nyangaka toho ta kimanyiya ekambi ande wa kɔlamelo. (2 Ek. 16:9; Is. 41:10, 13) Lo mbɛ̂dika l’olami w’ɛkɔkɔ, Isaya akafunde ate: “Ndi ayosa ana w’ekoko l’anya andi; ndi ayuwakhumbatela lu tulu. Ndi ayolombola wali la tana tawo okoke.” (Is. 40:11) Tɔsɛdingole toho tɔmɔtshi takokaso mbokoya Jehowa lo ndjakiyanya la ngandji tshɛ dia anto akina.
2 Tokimanyiya Eyoyo: Sho kokaka kimanyiya eyoyo lo mbaetsha dia vɔ mbɔtɔ kâmɛ la so lɔngɛnyi lakeketsha, mbut’ate l’ɔlɔlɔ. (Tuk. 13:20) Lo mbohɔ woho wakôkimanyiya anto akina lam’akandatatɛ sangana l’etshumanelo, ɔnangɛso ɔmɔtshi akate ate: “Mbala efula, ase nkumbo kɛmɔtshi wakambetaka lo wekelo awɔ wa lo nkumbo. Lam’akamayahamaka, atshukanyi amɔtshi w’ambatshi mboka waki weke ka tshukana wakanɔmbaka mbala la mbala dia dimi sambishaka la wɔ lushi l’otondo. Takongaka mbala tshɛ l’asawo w’amɛna efula wa lo nyuma.” Nde akakotsha ate: “La ntondo ka dimi koma Okristo, lakatshɔka lo tɔkɛnyɔ l’otsho wa Lushi la Tanu la Lushi la Samalo. Koko wenya wakametshaka l’anangɛmi, akakotshaka ehomba ami wa lɔngɛnyi.” Woho wakayasha ase etshumanelo la ngandji tshɛ le nde akakimanyiya ɔnangɛso ɔsɔ dia mbika edio ndo monga nge lo mbetawɔ, ndo ɛlɔ kɛnɛ nde ekɔ lo kamba lo nkumbo ka Bɛtɛlɛ.—Kol. 2:6, 7.
3 Tokeketshanake: Etena kahomana anangɛso l’akadiyɛso l’ekakatanu, sho koka kondja diaaso dia mbakimanyiya. Onde wɛ koka nɔngɔsɔla dia sambisha lo telefɔnɛ kâmɛ l’opandjudi ɔmɔ wele l’ɛkɔmɔ kana mbɔlɔmba dia kotshindɛ dia teka l’onto ɔmɔ Bible, kana ondo wɛ ntshɔ l’ombeki wa Bible dia nyu teka laka opandjudi akɔ? Onde ombutshi ɔmɔtshi wele l’ana wa totshitshɛ ekɔ l’ohomba w’ekimanyielo etena kasambishande? Onde ekɔ akanga wa ɔsɔnyi amɔ wayɔngɛnangɛna ekimanyielo kayɛ dia sala wendelo w’eyoyo kana ndjasha lo yoho kina y’esambishelo? Ndjakiyanya la ngandji tshɛ dikambo di’anangɛso l’akadiyɛso ayototshutshuya dia nyanga toho ta mbakeketsha.—Romo 14:19.
4 Naka sho mbokoya Jehowa lo woho wayakiyanyande la ngandji tshɛ dikambo di’ekambi ande, kete tayokeketshana, tayokimanyiya etshumanelo dia monga kâmɛ ndo dia tombola Shɛso lele l’olongo.—Ef. 4:16.