Wekelo wa biukubuku Nyotetemale sungukala!

Tshumanelo dia l’andja w’otondo wayeka biukubuku Nyotetemale sungukala! tatɛ lomingu la Ngɔndɔ ka tanu 23 polo lomingu la Ngɔndɔ ka samalo 20, 2005, lo Wekelo wa dibuku wa l’etshumanelo. Lam’alangayɛ, kamba la ambola wayela anɛ etena kayalɔngɔsɔlayɛ ndo kalɔmbɔlayɛ wekelo akɔ. Etena kekanyu, nyadia awui wele lɔkɔ, ndo avɛsa woshilami naka etena kekɔ.

Lomingu la Ngɔndɔ ka tanu 23

◼ Lɛkɛ 3-4: Dui diakɔna dioshidiwɔ lanɛ diendana la lɔsɛnɔ layɛ? Kakɔna kakɛnya dia akambo asɔ bu tsho awui wasalema paka lo dihole ɔtɔi?

◼ Lɛkɛ 5: Kakɔna kakoshikikɛ dia Nzambi mɛtɛ tokanɛka? Kakɔna kakoka mɛnya polo lo yɛdikɔ yakɔna yayashaso lo awui wa Nzambi ndo lo kɛnɛ kasalande?

◼ Lɛkɛ 6-8: Kakɔna kata Mateu 24:​1-8, 14 lo kitshimudi ya akambo wa l’andja ɔnɛ? Oko wɛnyamidiɔ lo 2 Timote 3:​1-5, lo etena kakɔna kasɛnaso kakianɛ? Ko ekɔ nshi y’ekomelo ya na? Kakɔna kakoshikikɛ dia Bible mɛtɛ ekɔ Ɔtɛkɛta wa Nzambi? Diolelo diasambishaso ediɔ na?

◼ Lɛkɛ 9-10: Lande na kahombaso sɛdingola l’ɔlɔlɔ tshɛ tɛdikɔ tɔsaso lushi la lushi ndo awui woleki ohomba lo lɔsɛnɔ laso? (Romo 2:6; Ngal. 6:⁠7) Etena kasɛdingolayɛ ambola wele lo lɛkɛ 10, avɛsa akɔna wakoyɛ lo yimba wahomba monga la shɛngiya lo kɛnɛ kasalayɛ?

Lomingu la Ngɔndɔ ka tanu 30

◼ Lɛkɛ 11: Lande na kahombaso sɛdingola l’onto ndo l’onto ambola wombwami lo lɛkɛ lɔnɛ? (1 Kor. 10:12; Ef. 6:​10-18) Ekadimwelo aso lo ambola asɔ ɛnyawɔ lo kɛnɛ kendana la nɛmɔ diele la dako diaki Yeso dia lo Mateu 24:44 le so?

◼ Lɛkɛ 12-14: Naa ‘wonya w’elombwelo’ wɔtɛkɛtami lo Enyelo 14:​6, 7? Kakɔna kalembetshiya etelo k’ɔnɛ, “nyuki [Nzambi] woma, nyûtumbuli”? Elɛwɔ Babilɔna ka Woke, ndo kakɔna kayokikomɛ? Tɛdikɔ takɔna tendana la Babilɔna ka Woke tahombaso mbɔsa kakianɛ? Wonya w’elombwelo wakatama mendanaka nto la na? Woho wahateye ‘lushi kana wonya’ w’elombwelo ka Nzambi kakatama, pombaka monga la shɛngiya yakɔna le so? (Mat. 25:⁠13)

◼ Lɛkɛ 15: Naa dikambo diendana la lowandji, ndo ngande wendana dikambo sɔ la so l’onto ndo l’onto?

◼ Lɛkɛ 16-19: Ele “ulungu w’uyuyu” ndo “kete y’uyuyu”? (2 Pet. 3:13) Akɔna akalake akambo asɔ? Etshikitanu akɔna wayela olongo w’oyoyo la nkɛtɛ y’oyoyo? Onde sho shoamɛ tayokondja wahɔ oma lɔkɔ?

Lomingu la Ngɔndɔ ka samalo 6

◼ Lɛkɛ 20-21: Ɔhɛmwɛlɔ akɔna wendana la olawelo wakasha Yeso ambeki ande wa lo ntambe ka ntondo? (Luka 21:​20, 21) Etena kakɔna kakawakoke ndawɔ? Lande na kakawahombe ndawɔ aha la tshimbatshimba? (Mat. 24:​16-18, 21) Lande na kele anto efula hawodje yimba lo ɛhɛmwɛlɔ? Ngande wakakokɛ nunu di’anto nsɛnɔ yawɔ la Chine ndo la Philippines lo kitanyiya ɛhɛmwɛlɔ w’eshika wakashama? Bonde kele ekɔ ohomba efula ndjela ɛhɛmwɛlɔ wa lo Bible wendana la ekomelo ka dikongɛ nɛ dia akambo? Lam’ele pombaka sala akambo la shamanya y’efula, ɔkɛndɛ akɔna wele laso? (Tuk. 24:​11, 12)

◼ Lɛkɛ 22-23: Lo Australie, lo 1974 ndo la Colombie lo 1985, lande na kele anto efula kombidja yimba lo ɛhɛmwɛlɔ wendana la mpokoso, ndo dikambo sɔ diakayala la etombelo akɔna? Ngande wotoyosala la ntondo ka ɛhɛmwɛlɔ ɛsɔ ndo lande na? Kakɔna kakoka mɛnya dia kana sho totokitanyiya ɔhɛmwɛlɔ wa lo nshi ya Nɔa? Lande na kele anto wakalangaka nsɛna la Sɔdɔma k’edjedja kana lo ngelo yakasukana la tɔ? Ngande wakokaso kondja wahɔ lo kana yimba dimɛna la kɛnɛ kakakomɛ Sɔdɔma?

Lomingu la Ngɔndɔ ka samalo 13

◼ Lɛkɛ 24-27: Kamba la “Ambola wa wekelo” wele lo lɛkɛ 27.

Lomingu la Ngɔndɔ ka samalo 20

◼ Lɛkɛ 28-31: Kamba la “Ambola wa wekelo” wele lo lɛkɛ 31.

Ɔsɛdingwelo aso wa biukubuku shɔ ayotokimanyiya dia sho ‘tetemala sungukala’ ndo shoamɛ monga suke. Olimu aso wa lo sɛkɛ wakɛnɛmɔlake nshi tshɛ ohomba wa ɛtɛkɛta waki ondjelo wata ɔnɛ: “Nyuki [Nzambi] woma, nyûtumbuli, ne dia unya andi w’elumbwelu ambukuka.”​—⁠Mat. 24:​42, 44; Eny. 14:⁠7.