Tewɔ dionga dia lokaki diele l’anto wa l’andja ɔnɛ

ONDE wɛ ambɛna di’anto efula wa l’andja ɔnɛ nangaka dia vɔ mbasalɛ akambo lo yoho ya laande kana nongola waɛsɛ wa laande? Kaanga etena kawasalɛwɔ akambo lo yoho yotshikitanyi l’anto akina, vɔ tetemalaka mfɔnya dia vɔ sunganaka nongola waɛsɛ akina efula. Ekanelo ka yimba kɛsɔ ndja oma lo dionga dia lokaki ndo dia lɔhɛndɛ diele l’anto efula wa lo nshi y’ekomelo nyɛ.—2 Tim. 3:2.

Lo mɛtɛ, aha ɛlɔ kambomɛ dionga dia lokaki. Adama l’Eva waki la lotshungɔ la nsɔna kɛnɛ kele ɔlɔlɔ ndo kɛnɛ kele kɔlɔ, dui diakayowakonya l’etombelo wa kɔlɔ efula. Ntambe efula l’ɔkɔngɔ, nkumekanga Uziya ka la Juda, akafɔnyaka dia nde aki l’akoka wa nambola elambo lo tɛmpɛlɔ, koko nde akasale dui dia kɔlɔ efula. (2 Ɛk. 26:18, 19) Woho akɔ waamɛ mbele, Afarisɛ la Asadukɛ wakafɔnyaka dia Jehowa akakoke mbasalɛ akambo oleki anto akina l’ɔtɛ wakiwɔ tokanula ta Abrahama.—Mat. 3:9.

Sho nyingama l’anto wele la lokaki ndo wayaɔsa dia vɔ ndeka anto akina ndo dionga diele la wɔ sɔ koka monga la shɛngiya le so. (Ngal. 5:26) Sho koka ntatɛ mfɔnya dia sho koka nongola waɛsɛ amɔtshi kana ɔnɛ anto pombaka tosalɛ akambo lo yoho ya laande. Ngande wakokaso mbewɔ ekanelo ka yimba kɛsɔ? Dia nsala dikambo sɔ, sho pombaka mbeya kanyi ya Jehowa lo dikambo sɔ. Atɔndɔ ahende wa lo Bible koka tokimanyiya.

Jehowa shikikɛka kɛnɛ kahombaso nongola. Tɔsɛdingole bɛnyɛlɔ dimɔtshi.

Lo ndjela woho wokongɛmi nkumbo, omi pombaka nanga wadɛnde ndo wadi lo wedi ande pombaka nɛmiya omɛnde. (Ɛf. 5:33) Atshukanyi pombaka mɛnyanya ngandji lam’asawɔ. (1 Kɔr. 7:3) Ana nɔmbamaka dia nkitanyiya ambutshi awɔ ndo ambutshi pombaka nanga, nkokɛ ndo nsukɛ anawɔ.—2 Kɔr. 12:14; Ɛf. 6:2.
L’etshumanelo, dikumanyi diakamba olimu wa wolo sunganaka nɛmiyama oma le so. (1 Tɛs. 5:12) Koko, vɔ bu la lotshungɔ la mbahemɛ anangɛwɔ l’akadiyɛwɔ.—1 Pe. 5:2, 3.
Nzambi akasha mandji y’ana w’anto lotshungɔ la nɔmba elambo ndo mpika di’anto mbasha kɛnɛmɔ.—Rɔmɔ 13:1, 6, 7.

Jehowa toshaka la ngandji tshɛ kɛnɛ koleki kasunganaso nongola. L’ɔtɛ wa eongelo kaso k’anto wele keema kokele, sho sunganaka tsho mvɔ. (Rɔmɔ 6:23) Koko, Jehowa toshaka ɛtshɔkɔ efula l’ɔtɛ wa ngandji ka kɔlamelo katokande. (Os. 103:10, 11) Ɛtshɔkɔ kana waɛsɛ tshɛ walongolaso oma le nde, ndja oma l’ɔlɔlɔ ande waheyama mbɛdika.—Rɔmɔ 12:6-8; Ɛf. 2:8.

WOHO WA MBEWƆ DIONGA DIA LOKAKI NDO NSAKI KA NDJAƆSA DIA SHO NDEKA ANTO AKINA

Tewɔ dionga di’ase andja ɔnɛ. Aha la mbeya, sho koka ndjotatɛ mfɔnya dia sho koka nongola diangɔ efula oleki anto akina. Yeso akɛnya woho wakoka onto monga esadi eto la dionga sɔ, lo nkamba la wɛɛla w’ase olimu wakawafute dɛnariyo ɔtɔi. Ase olimu amɔtshi wakatatɛ nkamba la pindju ka pɛɛ ndo wakakambe lushi l’otondo lo yanyi ya wolo; koko akina wakakambe paka wonya wa ntango ɔtɔi oto. Olui wa ntondo w’ase olimu wakafɔnya dia vɔ wakahombe nongola difuto dioleki anto akina l’ɔtɛ w’olimu wa wolo wakawakambe. (Mat. 20:1-16) Lo nkamba la wɛɛla ɔnɛ, Yeso akalange mɛnya di’ambeki ande pombaka ngɛnangɛna la kɛnɛ kangɛnangɛna Nzambi dia mbasha.

Ase olimu amɔtshi wa lo wɛɛla wa Yeso, watɛkɛta l’owandji awɔ w’olimu la lonyangu. — Apami wakakambe olimu lushi l’otondo wakafɔnyaka dia wakakoke nongola difuto di’efula

Tonge la lowando, koko aha monga ɔnɔmbi. (1 Tɛs. 5:18) Tokoya ɔpɔstɔlɔ Pɔɔlɔ laki kɔnɔmba anangɛso wa la Kɔrɛtɔ dia vɔ mbosha kɛnɛ kakinde la tɔ ohomba kaanga mbakinde la lotshungɔ la nsala dui sɔ. (1 Kɔr. 9:11-14) Sho pombaka monga la lowando lo ɛngɔ tshɛ katosha anto ndo aha monga anɔmbi.

Ɔpɔstɔlɔ Pɔɔlɔ la apami akina ahende wasala mvudu y’apɛma kaamɛ. — Ɔpɔstɔlɔ Pɔɔlɔ kɔnɔmbaka di’anto mbokimanyiya la falanga

Onga l’okitshakitsha. Naka onto amboleka ndjaakana, kete nde ayotatɛ mfɔnya dia nde pombaka nkondja kɛnɛ koleki kɛnɛ kele la nde. Okitshakitsha ayotokimanyiya diaha sho nkanyiya ngasɔ.

Esato womamatanyi: 1. Omvutshi Danyɛlɛ aya osombe. 2. Osomba wa Babilɔna w’edjedja. 3. Ɔlɔngɔlɔngɔ Danyɛlɛ l’angɛnyi ande asato w’ase Hɛbɛru. — Okitshakitsha waki l’omvutshi Danyɛlɛ akawetɛ onto la nɛmɔ lo washo wa Jehowa

Omvutshi Danyɛlɛ akatotshikɛ ɛnyɛlɔ ka dimɛna lo kɛnɛ kendana l’okitshakitsha. Nde otokoka mfɔnya dia lam’ele nde aki lo nkumbo ka lokumu, aki olangala, aki la yimba ndo aki l’akoka akina, laasɔ anto wakahombe mbosalɛ akambo lo yoho ya laande ndo nde akahombe nongola waɛsɛ wa laande. (Dan. 1:3, 4, 19, 20) Koko lo dihole dia mfɔnya ngasɔ, Danyɛlɛ akatetemala monga l’okitshakitsha ndo dionga sɔ diakawetɛ onto la nɛmɔ lo washo wa Jehowa.—Dan. 2:30; 10:11, 12.

Tewɔ dionga dia lokaki ndo dia ndjaɔsa dia sho ndeka anto akina, dionga diambokokanɛ le anto wa l’andja ɔnɛ. Koko, nyɛsɔ totetemale nkondja ɔngɛnɔngɛnɔ oma lo ɛtshɔkɔ tshɛ watosha Jehowa oma l’ɔlɔlɔ ande waheyama mbɛdika.