ƆKƆNDƆ 77

Vɔ wakatone mbika adwe

ONDE wɛ akôhɔ ɛlɔngɔlɔngɔ esato engo ondo? Eelo, vɔ wekɔ angɛnyi wa Danyɛlɛ wanɛ wakatone ndɛ kɛnɛ kaki kɔlɔ le wɔ. Ase Babilɔna wakawaelɛka Shadarakɛ, Meshakɛ la Abɛdɛ-Nengo. Ko, ohowaenda kakianɛ. Lande na kewɔ hawoke adwe la ntondo ka lohingo l’otale longo oko asala anto akina na? Tênde dikambo diakɔ.

Onde wɛ akôhɔ ɛlɛmbɛ wakafunde Jehowa ndamɛmɛ welɛwɔ ɔnɛ: Ɛlɛmbɛ Dikumi oka? Ɔlɛmbɛ wa ntondo aki ɔnɛ: ‘Wɛ hatɛmɔlaki tozambizambi tokina paka dimi.’ Ɛlɔngɔlɔngɔ ɛnɛ wekɔ lo ndjela ɔlɛmbɛ ɔsɔ, kânga mbediɔ kema nshi tshɛ dikambo dia tshitshɛ.

Nebukadineza, nkumekanga ka Babilɔna, akelɛ lemba l’anto la mamba dia ndjukusamɛ lohingo longo lakandemɛ. Lam’akatshumana anto tshɛ nde akawatɛ ate: ‘Lam’ayonyoka londjo l’amama, la lɔngɔmbi la weoho ekina wa mishiki, kanyoke adwe ndo kanyɔtɛmɔlɛ lohingu lɔnɛ la paunyi. Onto tshɛ lahatoka adwe ndo lahatɔtɛmɔla ayokadjema lo khuka ka dja yalombalomba.’

Nebukadineza akomala efula lam’akandoke ɔnɛ: Shadarakɛ, Meshakɛ la Abɛdɛ-Nengo kombika adwe. Nde akawaemadia la ntondo kande. Akawatɛ nto dia vɔ mbika adwe. Koko ɛlɔngɔlɔngɔ akɔ wakɛkama le Jehowa. Vɔ wakatɛ Nebukadineza vate: ‘Nzambi kaso kakambɛso ekɔ la wolo wa toshimbela, sho hatotokɛ lohingo layɛ la paunyi adwe kânga nde hatokoke.’

Nebukadineza akomala nto hakoke kam’akandôke ngasɔ. Khuka ka dja kaki suke lâwɔ, ko nde akatome dui ate: ‘Nyɔhɛtsha khuka tena esambele ndeka yɛdikɔ yokowokihɛtshaka!’ Nde akatɛ ahoka w’apami wa l’olui ande w’alembe dia vɔ keleka Shadarakɛ, Meshakɛ la Abɛdɛ-Nengo ndo mbakadja lo khuka ka dja. Khuka kakaleke pɛta wolo, ko ahoka akɔ w’apami wakadiakema la lombe la dja. Ko kakɔna kakakomela ɛlɔngɔlɔngɔ esato wakawakadja lɔkɔ na?

Nkumekanga akênde l’etei ka khuka, ko akoke wɔma efula. Nde akambola ate: ‘Kema apami asato wokelekami mbakatakadjisha lo khuka ka dja yalombalomba oka?’

Ekambi ande wakôkadimola vate: ‘Eelo.’

Ko nde akate ate: ‘Koko lambɛna apami anɛi watakɛndakɛnda l’atei wa dja. Vɔ hawokelekami ndo dja halongoya. Onto la nɛi fɔnaka la jambizambi.’ Ko nkumekanga akasukana tshalo soko dia khuka, ndo akawelɛ ate: ‘Shadarakɛ lee! Meshakɛ ee! Abɛdɛ-Nengo lee! Nyotombe nyoye, nyu ekambi wa Nzambi Nkum’Olongo!’

Lam’akawatombe anto tshɛ wakɛnyi dia vɔ konongola. Ko nkumekanga akate ate: ‘Nzambi ka Shadarakɛ, Meshakɛ la Abɛdɛ-Nengo atombwame! Nde akatome ondjelo ande ndo akâshimbela nɛ dia vɔ wakatone mbika adwe ndo tɛmɔla jambizambi kina, paka Nzambi kawɔ.’

Kema ɔsɔ ekɔ ɛnyɛlɔ ka dimɛna ka kɔlamelo le Jehowa ka sho ndjela?

Etumbelu 20:3; Danyele 3:​1-30.