Vɔ kokusama

Etena kɛmɔtshi, l’ɔkɔngɔ wa nkumekanga Nɛbukadinɛza mɛna dɔ diendana la lohingu, nde akasale lohingu la woke la paonyi. Nde akalemadia l’oswe wa Dura ndo akelɛ ɛnɛnɛ wa lo wodja, mbidja ndo Shadrakɛ, Meshakɛ la Abɛdɛ-Nɛngɔ dia nsangana la ntondo kalɔ. Nkumekanga akadjanga ate: ‘Lam’ayonyoka wondjo wa amama, nsɛsɛ ndo mpolo, kanyokusamee lohingu! Onto tshɛ lahatokusama, ayokadjema lo nkuka ka dja.’ Onde ase Hɛbɛru asato wakahombe nkusamɛ lohingu kana wakahombe ntɛmɔla paka Jehowa?

Ko nkumekanga akadjanga dia mishiki ntatɛ. Anto tshɛ wakakusama ndo wakatɛmɔla lohingu, onyake Shadrakɛ, Meshakɛ ndo Abɛdɛ-Nɛngɔ. Anto amɔtshi wakɛnyi dui sɔ ndo wakatotɛka nkumekanga ɔnɛ: ‘Ase Hɛbɛru asato anɛ wambotona ntɛmɔla lohingu layɛ.’ Nɛbukadinɛza akawaelɛ ndo akate ate: ‘Layanga nyosha diaaso dikina dia nyu ntɛmɔla lohingu. Naka hanyosadi dui sɔ, layonyoka lo nkuka ka dja. Ndooko nzambi kayonga l’akoka wa nyoshimbɛ oma l’anya ami.’ Vɔ wakakadimola ɔnɛ: ‘Sho bu l’ohomba wa diaaso dikina. Nzambi kaso koka toshimbɛ. Koko oyadi kaanga nde hatoshimbe, nkumekanga le, sho hatotɔtɛmɔla lohingu.’

Nɛbukadinɛza akoke nkɛlɛ k’efula. Nde akatɛ anto ande ate: ‘Nyɔhɛtsha nkuka kalolɔ mbala esambele ndeka woho watotololɔka!’ Ko nde akadjangɛ asɔlayi ande ate: ‘Nyokeleke apami anɛ ndo nyowaoke lo nkuka ka dja!’ Lam’ele nkuka kakalolɔ efula, lam’akakome asɔlayi suke la tɔ, vɔ wakavu mbala kakɔ ɔtɔi. Ase Hɛbɛru asato wakakɔ lo dja. Koko, lam’akende Nɛbukadinɛza lo nkuka, nde akɛnyi anto anɛi wakɛndakɛnda lo nkuka lo dihole dia asato. Nde akoke wɔma ndo akambola ɛnɛnɛ ande ate: ‘Shi anto asato mbakatoke lo dja? Lekɔ lo mɛna anto anɛi ndo ɔmɔtshi la l’atei awɔ ekɔ oko ondjelo!’

Nɛbukadinɛza akasukana suke la nkuka ka dja, ko akelɛ la dui dia wolo ate: ‘Nyotombe nyu ekambi wa Nzambi Kaheme-Tshɛ!’ Anto tshɛ wakambe dia mɛna dia Shadrakɛ, Meshakɛ ndo Abɛdɛ-Nɛngɔ wayatombe oma lo dja, aha la nongola. Koho yawɔ, avo awɔ ndo ahɔndɔ awɔ konongola, ndo vɔ komonga kaanga la nsolo ka dja.

Nɛbukadinɛza akate ate: ‘Nzambi ka Shadrakɛ, Meshakɛ ndo Abɛdɛ-Nɛngɔ ekɔ woke. Nde akatomi ondjelo ande ndo akaashimbe. Ndooko nzambi kele oko kawɔ.’

Onde l’ɛnyɛlɔ k’ase Hɛbɛru asato, wɛ amboyashikikɛ dia ntshikala la kɔlamelo le Jehowa oyadi kakɔna tshɛ kayotomba?