TSHAPITA 27

Ele Nzambi Kayɛ?

LANDE na kele wombola w’ɔnɛ Ele Nzambi Kayɛ? wekɔ ohomba efula?. . . Wombola ɔsɔ wekɔ ohomba nɛ dia anto tɛmɔlaka weho wa nzambi efula. (1 Koreto 8:⁠5) Lam’akalongola ɔpɔstɔlɔ Paulo wolo oma le Jehowa wa kɔnɔla pami kɛmɔtshi kaki kɔkɛndakɛndaka lakandotɔ, anto wakate la dui dia wolo ɔnɛ: ‘Waa nzambi yamboya le so l’efanelo k’anto!’ Anto asɔ wakalange tɛmɔla Paulo nde la Baranaba k’ɔngɛnyi ande. Vɔ wakete Paulo ɔnɛ Hɛrɛmɛ ndo Baranaba Zeu. Hɛrɛmɛ la Zeu waki nkombo ya tozambizambi ta kashi.

Koko Paulo nde la Baranaba kombetawɔ di’anto mbâtɛmɔla. Vɔ wakatombe oma l’atei w’olui ɔsɔ w’anto ndo wakate vate: ‘Nyɔtɛmɔlɛ Nzambi ka lomu ndo nyotshike akambo w’anyanya anɛ.’ (Etsha 14:​8-15) Ele ‘Nzambi ka lomu’ kakatonge diangɔ tshɛ na?. . . Jehowa mbele ‘Nkum’Olongo lo nkɛtɛ k’otondo.’ Yeso akete Jehowa ate: ‘Nzambi ɔtɔi ka mɛtɛ.’ Lâsɔ onto akɔna akoka tɛmɔma na?. . . Paka Jehowa ndamɛ oto!​—⁠Osambu 83:18; Joani 17:3; Enyelo 4:⁠11.

Anto efula tɛmɔlaka tozambizambi tokina lo dihole dia tɛmɔla ‘Nzambi ɔtɔi ka mɛtɛ.’ Mbala efula vɔ tɛmɔlaka diangɔ diasalawɔ l’esongo, l’ave kana la mbolo. (Etumbelu 32:​4-7; Akambu w’Asi Lewi 26:1; Isaya 44:​14-17) Kânga apami kana wamato wonga la lokumu efula mbetamaka tena dimɔtshi ɔnɛ tozambizambi, mbut’ate anto weyama efula kana watɛmɔlawɔ. Onde ekɔ dimɛna mbisha anto asɔ lotombo?. . .

L’ɔkɔngɔ wa Saulo koma ɔpɔstɔlɔ Paulo, nde akafunde ate: ‘Jambizambi ya l’andja ɔnɛ ambetɛ anto wahetawɔ oko totshungu lo tokanyi tawɔ.’ (2 Koreto 4:⁠4) Ele jambizambi shɔ na?. . . Satana Diabolo! Satana akonge l’akoka wa tshutshuya anto dia tɛmɔla weho w’anto ndo wa diangɔ efula.

Lam’akahembe Satana dia tshutshuya Yeso dia nde mbokusamɛ ndo mbɔtɛmɔla, Yeso akandatɛ Satana na?. . . Nde akawotɛ ate: ‘Jehowa Nzambi kayɛ mbahombayɛ tɛmɔla ndo ndamɛ oto mbahombayɛ kambɛ olimu w’ekila.’ (Mateu 4:10) Ɔnkɔnɛ, Yeso akɛnya hwe dia paka Jehowa oto mbahomba tɛmɔma. Ɛsɔ tadia awui wendana l’ɛlɔngɔlɔngɔ ɛmɔtshi wakeyaka dui sɔ. Nkombo yawɔ aki Shadarakɛ, Meshakɛ la Abɛdɛ-Nɛngɔ.

Ɛlɔngɔlɔngɔ w’ase Hɛbɛru ɛsɔ waki l’atei wa wodja waki Nzambi w’Isariyɛlɛ ndo wakatɔlama lo fumbe lo wodja wa Babilɔna. Lo wodja ɔsɔ, nkumekanga kakawelɛka Nɛbukadinɛza akasale lohingu la paunyi la woke ndo l’otale efula. Lushi lɔmɔtshi, nde akadjanga dia lam’ayoka anto londjo la mishiki, onto tshɛ pombaka kusamɛ lohingu lɔsɔ. Nde akate ate: ‘Onto tshɛ layotona kusama dia tɛmɔla lohingu ayodjama lo nkuka ka dja.’ Otoyosala otondonga wɛ mbakawatɛ ngasɔ na?. . .

Nshi tshɛ, Shadarakɛ, Meshakɛ la Abɛdɛ-Nɛngɔ wakatshaka dui tshɛ diakataka nkumekanga kɛsɔ. Koko vɔ wakatone dia kusamɛ lohingu. Onde wɛ mbeyaka lande na kakawatone sala dui sɔ?. . . Aki nɛ dia ɔlɛmbɛ waki Nzambi akataka ɔnɛ: ‘Wɛ hahombe monga la tozambizambi tokina lâdiko diami. Wɛ hahombe ndjasalɛ lohingu ko kusamɛ lohingu lakɔ.’ (Etumbelu 20:​3-5) Ɔnkɔnɛ, Shadarakɛ, Meshakɛ la Abɛdɛ-Nɛngɔ wakakitanyiya ɔlɛmbɛ waki Jehowa lo dihole dia kitanyiya kɛnɛ kakadjanga nkumekanga kɛsɔ.

Nkumekanga akomala efula ndo akate ko wonya akɔ dia vɔ mbêla ɛlɔngɔlɔngɔ esato ɛsɔ w’ase Hɛbɛru. Nde akawambola ate: ‘Onde lo mɛtɛ katonanyu dia kambɛ tozambizambi tami? Lotsha nyosha diaaso dikina. Kakianɛ, lam’ayonyoka mishiki, ko nyu kusama ndo tɛmɔla lohingu lakamasale. Naka nyu tona, kete wayonyodja lo nkuka ka dja. Ndo nzambi kakɔna kɛsɔ kakoka nyotshungola oma l’anya ami na?’

Kakɔna kakasale ɛlɔngɔlɔngɔ ɛsɔ l’etena kɛsɔ na? Ko wɛ otoyosala na?. . . Vɔ wakatɛ nkumekanga kɛsɔ ɔnɛ: ‘Nzambi kaso kakambɛso ekɔ l’akoka wa totshungola. Koko oyadi nde hatotshungodi, sho hatotɔtɛmɔla tozambizambi tayɛ. Sho hatotokusamɛ lohingu layɛ la paunyi.’

Nkumekanga akomala efula. Nde akatome dui ate: ‘Nyɔhɛtsha nkuka ka dja mbala esambele oleki woho watowɔkihɛtshaka!’ Oma lâsɔ nde akatɛ apami ande wa wolo dia vɔ keleka Shadarakɛ, Meshakɛ la Abɛdɛ-Nɛngɔ ko mbadja lo nkuka ka dja kɛsɔ! Nkuka ka dja kakɔ kakahɛtɛ wolo efula woho ɔnɛ wele apami waki nkumekanga wakadiakema la laladi la dja! Ko kakɔna kakakomɛ ase Hɛbɛru asato asɔ na?

Shadarakɛ, Meshakɛ la Abɛdɛ-Nɛngɔ wakadjama l’etei ka lombe la dja. Koko oma lâsɔ vɔ wakakɛndakɛndaka. Vɔ konongola. Ndo vɔ komonga nto l’ɛkɔdi wakawâkeleka. Ngande wakakoke dui sɔ salema na?. . . Nkumekanga akalengɛ lo nkuka ka dja, koko kɛnɛ kakandɛnyi kakawokiya wɔma. Nde akambola ate: ‘Kema apami asato mbakatadjisha lo dja? Ekambi ande wakakadimola ɔnɛ: ‘Eelo nkumekanga.’

Oma lâsɔ, nkumekanga akate ate: ‘Ohonyenda! Lekɔ lo mɛna anto anɛi weteta ndo dja halongoya ndoko onto l’atei awɔ.’ Onde wɛ mbeyaka ɔnɛ laki onto la nɛi ɔsɔ?. . . Ɔsɔ aki ondjelo waki Jehowa. Nde akakokɛ ase Hɛbɛru asato asɔ di’aha vɔ nongola.

Lam’akandɛnyi ngasɔ, nkumekanga akaye la soko dia nkuka ka dja ndo akate la dui dia wolo ate: “Shadaraka, Meshake, la Abede-Nengo, ekambi wa [Nzambi] Khum’Ulungu, nyutumbi, nyuyi lane!” Lam’akawatombe, anto tshɛ wakɛnyi dia vɔ konongola. Vɔ komonga kânga la nsolo ka dinga dia dja. Oma lâsɔ, nkumekanga akate ate: ‘Nzambi ka Shadarakɛ, Meshakɛ la Abɛdɛ-Nɛngɔ atombwame, nde akatumi ondjelo dia ndjotshungola ekambi ande nɛ dia vɔ hawɔtɛmɔla woho wa jambizambi tshɛ onyake Nzambi kawɔ hita.’​—⁠Danyele tshapita 3.

Sho koka kondja wetshelo oma lo kɛnɛ kakatombe l’etena kɛsɔ. Kânga ɛlɔ kɛnɛ anto salaka pingu kana esato dikambo di’ɔtɛmwɛlɔ. Dibuku dimɔtshi (Encyclopedia Americana) mbutaka ɔnɛ: “Dalapo dia wodja ekɔ ekila oko kurusɛ.” Mpingu koka salema l’esongo, l’ave ndo la mbolo kana l’ahɔndɔ. Ambeki waki Yeso wa ntondo kɔtɛmɔla owandji w’ase Rɔma. Ombewi w’ɛkɔndɔ Daniel P. Mannix akate dia tona sala dui sɔ ekɔ oko “tona dia tɛmɔla dalapo kana dia tondja ɛtɛkɛta wɛnya kɔlamelo.”

Lâsɔ onde wɛ fɔnyaka dia Nzambi koka ngɛnangɛna naka sho sala lohingu lɔmɔtshi la dihɔndɔ, l’osongo la dive kana la lowolo dia litɛmɔla?. . . Onde koka monga dimɛna le okambi waki Jehowa dia tɛmɔla lohingu?. . . Shadarakɛ, Meshakɛ la Abɛdɛ-Nɛngɔ kosala dui sɔ ndo Jehowa akângɛnangɛna. Ngande wakokayɛ mbokoya ɛnyɛlɔ kawɔ na?. . .

Wanɛ wakambɛ Jehowa hawokoke tɛmɔla onto okina tshɛ kana ɛngɔ. Adia kɛnɛ katama lo dui sɔ lo Jashua 24:​14, 15, 19-22; Isaya 42:8; 1 Joani 5:21; ndo Enyelo 19:⁠10.

[Osato wa lo lɛkɛ 143]

Lande na kakatone Paulo nde la Baranaba di’anto mbakusamɛ?

[Osato wa lo lɛkɛ 144]

Lande na kakatone apami anɛ dia kusamɛ lohingu?

[Osato wa lo lɛkɛ 145]

Ngande wakashimbɛ Jehowa ekambi ande oma lo nkuka ka dja?

[Esato wa lo lɛkɛ 146]

Waa na watɛmɔma ɛlɔ kɛnɛ na?