Tshapita 24
Sangwelo Diaki Jehowa Diambokotshama lo Lotombo
SANGWELO diaki Jehowa diolodi la lomba ndo la ngandji—ele dia sanganya ditongami tshɛ diele la timba l’ɔtɛmwɛlɔ wa mɛtɛ ndo mbasha lotshungɔ la lotombo l’ana wa Nzambi. Ndo nto, ɔsɔ kele dikambo diakombola wanɛ tshɛ walanga losembwe l’otema ɔtɔi.
2 Jehowa akatatɛ la kotsha sangwelo sɔ dia dimɛna efula lam’akandatatɛ olimu ande w’etongelo. Etongami kande ka ntondo kaki Ɔn’ɔmɔtshi, ɔn’akɔ akalembetshiya dia nde ekɔ “ngaingai ka lutumbu landi, ndu efanelu k’utundu andi.” (Heb. 1:1-3) Ɔn’ɔsɔ aki ɛtɔi, nɛ dia nde akatongama oma le Nzambi ndamɛmɛ. Oma lo tshimbo yande mbakayotongamaka ana akina—ntondo andjelo l’olongo, ko l’ɔkɔngɔ diko, anto la kɛtɛ. (Jobo 38:7; Luka 3:38) An’asɔ tshɛ mbakakengaka nkumbo ɔtɔi ka l’andja w’otondo. Jehowa mbaki Nzambi kawɔ vɔ tshɛ, ndo ndamɛmɛ oto mbakiwɔ la dia tɛmɔla. Nde mbaki Omboledi w’Andja w’otondo. Nde aki nto Shɛwɔ ka ngandji. Onde nde ekɔ oko Shɔ, ndo wɛ ekɔ l’ɔnɔngɔ wa an’ande oka? Naka ɔsɔku mbediɔ, kete ande diɔtɔnɛlɔ di’ohomba efula diele l’asayɛ lande lee!
3 Kânga mbediɔ ɔsɔku, sho pombaka mbeya shate: etena kakafundamɛ ambutshi aso wa ntondo nyɔi oko atshi wa pɛkato, vɔ wakatshanyema oma l’ekambɔ k’Ɛdɛna ndo Nzambi kômbaɔsa oko an’ande nto. Oma k’etena kɛsɔ, vɔ kondjala nto l’atei a nkumbo kaki Jehowa ka l’andja w’otondo. (Etat. 3:22-24; ɛdika la Euhwelo k’Elembe 32:4, 5.) Lam’eso sho tshɛ ana w’Adama, otshi wa pɛkato, sho tshɛ takotɔ la saki ya sala pɛkato. Oko weso ekana w’ambutshi asɔ wakatshanyema oma l’atei a nkumbo ka Nzambi, sho hatokoke sɛma ɔnɛ tekɔ ana wa Nzambi l’ɔtɛ w’ɔnɛ anto mbakatote. Koko, Jehowa akeyaka dia anto amɔtshi w’oma l’atei w’ana w’Adama wayolanga losembwe, ndo oma lo ngandji kande, Nde akawasha diaaso dia kondja lotshungɔ la lotombo l’ana wa Nzambi.—Romo 8:20, 21.
DIƐSƐ D’ISARIYƐLƐ
4 Suke l’ɛnɔnyi 2 500 l’ɔkɔngɔ w’Adama tongama, Jehowa akanyomoyosha anto amɔtshi diɛsɛ dia vɔ mbɔtɔnɛ lande oko an’ande. Lo ndjela sheke yakandadje nde l’Abarahama, Jehowa akasɔnɔla Isariyɛlɛ dia vɔ monga anto ande. Ɔnkɔnɛ, lam’akandatɛka Farawɔ, nde akatɛkɛta dikambo d’Isariyɛlɛ ate: “on’ami a pami.” (Etum. 4:22, 23; Etat. 12:1, 2) L’ɔkɔngɔ diko, nde akayoshaka Isariyɛlɛ Ɛlɛmbɛ ande lo Dikona dia Sinai, nde akakenge anto asɔ dia vɔ ndjâla wodja ande ndo nde akakambe lawɔ olimu dia kotsha sangwelo diande. Nɛ dia wodja akɔ waki “wodja [wa lânde, NW]” waki Jehowa, vɔ wakelamɛ ɔnɛ: “[ana wa Nzambi, NW].” (Euhw. 14:1, 2; Is. 43:1) Ndo nto, oma lo diokanelo dia lânde diakinde l’anto amɔtshi wa lo wodja, Jehowa akawaɔsaka oko an’ande. (1 Ek. 22:9, 10) Nde aki lawɔ la diokanelo sɔ oma lo sheke yakawadje vɔ la Nzambi. Koko, dikambo sɔ hadiolembetshiya ɔnɛ: vɔ waki la lotshungɔ la lotombo lâki l’Adama etena kakinde oko ɔna Nzambi. Vɔ waki nshi tshɛ lo lɔhɔmbɔ la pɛkato la nyɔi.
5 Kânga mbakidiɔ ɔsɔku, lo woho wakiwɔ oko ana, vɔ waki la diɛsɛ lo asho a Nzambi. Ndo nto, vɔ waki l’ɔkɛndɛ wa nɛmiya Shɛwɔ ndo kamba olimu wɔtɔnɛ la sangwelo diande. Yeso akake epole ɔsɛkɛ l’ohomba wa vɔ kotsha ɔkɛndɛ ɔsɔ—aha paka lo sɛmaka tsho ɔnɛ Nzambi mbele Shɛwɔ, koko ‘lo mɛnya vɔamɛmɛ’ ɔnɛ an’ande mbewɔ. (Mat. 5:43-48; Mal. 1:6) Koko, wodja w’Ase Juda w’otondo wakakite tatala lo dikambo sɔ. Ɔnkɔnɛ, l’ɔnɔnyi a komelo w’olimu waki Yeso wa la kɛtɛ, lam’akate Ase Juda wakayangaka dia mbodiaka vɔate: “Teko la Shesu otoi, ee [Nzambi, NW],” Yeso akâhonolɛ dia ditshelo diawɔ la yimba yawɔ kɔmɛnyaka mɛtɛ ka dikambo sɔ diakawasɛmaka. (Joa. 8:41, 44, 47) L’ɔnɔnyi 33 T.D., Nzambi akakumiya sheke y’Ɛlɛmbɛ, ndo diokanelo dia lânde diaki Ase Isariyɛlɛ vɔ la Nzambi diakakomɛ. Koko Jehowa akatetemala la mbɔsa anto amɔtshi oko an’ande.
JEHOWA AMBOSANGANYA ANTO ANDE
6 Lo mukanda wakandafundɛ Ase Ɛfɛsɔ, ɔpɔstɔlɔ Paulo akatɛkɛta dikambo di’ekongelo ka Nzambi k’endana l’osanganyelo w’anto ande—yɛdikɔ shɔ yakɔsama oma le Nzambi dia mbisha wanɛ wele la mbetawɔ dikoka dia vɔ ndjâla elangemi wa lo nkumbo Kande, lam’akandate ate: “Ndi [Nzambi] akatewuya [sheke y’ekila, NW], dia lulangu landi lakandasonola [ɛlɔmbwɛlɔ ka wa lo luudu], dia ntukutshiya dikukelu di’enonyi, ne dia nsanganya diango tshe le Kristu, ndu dia l’ulungu, ndu dia la kete.” (Ef. 1:9, 10) “Ɛlɔmbwɛlɔ” kakɔ kɛsɔ salemaka oma le Yeso Kristo. Oma lo tshimbo yande mbambetawɔma anto lo asho a Nzambi—amɔtshi wekɔ l’elongamelo ka lɔsɛnɔ la l’olongo; akina l’elongamelo ka sɛna la kɛtɛ—dia vɔ kamba kâmɛ l’andjelo, ana a Nzambi wakatshikala la kɔlamelo le Jehowa.
7 Tatɛ oma l’ɔnɔnyi 33 T.D., Nzambi akakotola yambalo yande le “diango dia l’ulungu” ntondo, diangɔ diakɔ kɛdikɛdi wanɛ wayoyala ekitɔ kâmɛ la Kristo lo Diolelo dia l’olongo. Oma lo mbetawɔ kawɔ lo nɛmɔ di’olambo wa Yeso, vɔ wakɔsama oko akanga a losembwe la ntondo ka Nzambi. (Romo 5:1, 2) Omalɔkɔ, vɔ “wakuto ntu,” mbuta ate Nzambi akawaote oko an’ande wele l’elongamelo ka lɔsɛnɔ la l’olongo. (Joa. 3:3; 1:12, 13) Anto asɔ mbakenga wodja wa lo nyuma wakadje Nzambi lawɔ sheke y’oyoyo. L’ɔkɔngɔ diko, oyadi Ase Juda kana Ase Wedja wakayɔtɔka l’atei wa sheke yakɔ, ndo lofulo l’anto asɔ tshɛ lekɔ 144 000.—Ngal. 3:26-29; Eny. 14:1.
8 Kânga mbewɔ ekokele edja tshɛ kekewɔ lo demba, atshikadi w’ekitɔ ɛsɔ wa Diolelo dia l’olongo wekɔ la diɔtɔnɛlɔ di’ɔlɔlɔ efula kâmɛ la Shɛwɔ. Lo kɛnɛ k’endana la dikambo sɔ, Paulo akafunde ate: “Ne dia ana wa luta mbenyu, [Nzambi, NW] akatumi [nyuma, NW] k’On’andi l’etema asu, ata ati: Aba, Shesu. Okone we kema fumbi ntu, ona a luta keye. Naka ona a luta keye, keti ukito mbeye lu dikambu dia [Nzambi, NW].” (Ngal. 4:6, 7) Tshɛkɛta shɔ ya l’Arameya “Aba” yalembetshiya ɔnɛ: “Papa,” yekɔ tshɛkɛta ya ngandji—yatɔtɛkɛtaka ɔna dia mbutɛ she dikambo. Oma lo woke woke w’olambo a Yeso ndo ngandji ka mamba ka Nzambi, Akristo asɔ w’akitami wekɔ la diokanelo dia ma ma vɔ la Nzambi oleki diokanelo nɛ diakakoke anto wele ekokele ndjâla ladiɔ la tshina di’Ɛlɛmbɛ. Koko, dikambo dialongamɛwɔ lo nshi yayaye ndeka diambo.
9 Naka vɔ ndjaɛnya la kɔlamelo polo ndo lo nyɔi, kete vɔ wayoyala ana wa Nzambi wa lânde lam’ayowolɔ dia kondja lɔsɛnɔ lahawakokaki mvɔ nto l’elongo. Lɛkɔ, vɔ wekɔ la diɛsɛ dia kamba kâmɛ la ntondo ka Jehowa Nzambi. Paka lofulo la tshitshɛ loto l’ana wa Nzambi asɔ mbêke la kɛtɛ.—Romo 8:14, 23; 1 Joa. 3:1, 2.
OTSHUMANYELO WA “DIANGO DIA LA KETE”
10 “Ɛlɔmbwɛlɔ” ka ngasɔ kasha anto diaaso dia vɔ tshumanyema lo luudu la Nzambi dia vɔ kondja lɔsɛnɔ la l’olongo, mendanaka nto la “diango dia la kete.” Mɛtɛ, anto wele la mbetawɔ l’olambo wa Kristo wakatshumanyema, djekoleko l’ɔnɔnyi 1935, l’elongamelo ka ndjokondja lɔsɛnɔ la pondjo lanɛ la kɛtɛ. Oko wokimanewɔ dihɛka lo dihɛka kâmɛ l’atshikadi wa l’olui w’akitami, vɔ wekɔ lo tombola lokombo la Jehowa ndo ɔtɛmwɛlɔ ande. (Zef. 3:9; Is. 2:2, 3) La dilɛmiɛlɔ di’efula, vɔ mbetaka Jehowa vɔate: “Papa,” nɛ dia vɔ mbeyaka dia nde kele Kiɔkɔ ya lɔsɛnɔ, ndo vɔ ndjâtshutshuyaka l’otema ɔtɔi dia kɛnɛmɔla waonga ande oko walongamɛnde oma le wɔ. Oma lo mbetawɔ kawɔ lo dikila dia Yeso diakatshulwama, vɔ wambetawɔma la ntondo ka Nzambi. (Mat. 6:9; Eny. 7:9, 14) Koko, vɔ mbeyaka dia vɔ pombaka konga lo nshi yayaye dia vɔ ndjeyama mɛtɛ oma le Nzambi oko an’ande.
11 Oko wɛnyamidiɔ lo Romo 8:19-21, vɔ wekɔ lo nongamɛ “enelo k’ana wa [Nzambi, NW]” l’asolo walokɔlokɔ, nɛ dia l’etena kɛsɔ ditongami “diayutshungwama uma lu lohombo la ehondelo.” “Enelo” kɛsɔ kayosalema l’etena kayɛna anto lanɛ la kɛtɛ ɔnɛ ana wa Nzambi w’akitami wa nyuma wakakondja difuto diawɔ dia l’olongo wambotatɛ la mbolɛ kâmɛ la Yeso Kristo, Nkumɛwɔ kotombwami. Dikambo sɔ diayɛnama ntondo l’elanyelo ka dikongɛ di’akambo dia kɔlɔ di’otondo, ko l’ɔkɔngɔ diko, ɛtshɔkɔ wayoyala lo Diolelo diaki Kristo di’Ɛnɔnyi Kinunu, l’edja k’etena kɛsɔ, “ana wa [Nzambi, NW]” wayodjasɛka suke la Yeso oko nkumi ya dikanga l’ɛlɔmbɛdi.—Eny. 2:26, 27; 20:6.
12 Ande ɔngɛnɔngɛnɔ wayoyala l’ɔkɔngɔ wa fɔnu ka woke dia mbeya etena kayosangana ana wa Nzambi kâmɛ la Kristo dia sanganya awui awɔ dia tombola Nzambi, wata l’ɔngɔnɔngɛnɔ vɔate: “Khumadiondjo [Nzambi, NW], Kanga-Wulu-Tshe, Ndi etsha aye waki ndu mamba li! We Khum’ekanga ka wedja tshe, Mbuka yaye yeko ololo la mete! Khumadiondjo, akona ahukuka woma, Ndu ahutumbula lukumbu laye na? Ne dia weme utu keli ekila. Wedja tshe wayuya, wayukotemola, Ne dia etsha aye w’ololo wambenama”! (Eny. 15:3, 4) Eelo, anto wotumbi oma lo wedja tshɛ wayosangana l’ɔtɛmwɛlɔ wa Nzambi ka mɛtɛ. Kânga wanɛ wele lo waombo wohɔma wayolɔ ndo wayoyokondja diaaso dia vɔ sanganya awui awɔ dia tombola Jehowa.
13 Satana Diabolo hatoyala nto “[nzambi ka dikongɛ di’akambo nɛ, NW].” Atɛmɔdi wa Jehowa wele la kɛtɛ hawotɔlɔshana nto la tɔsɛngiya tande ta kɔlɔ. (2 Kor. 4:4; Eny. 20:1-3) Ɛtɛmwɛlɔ wa kashi wɛnya didjidji dia kashi diaki Nzambi ndo wakakitola anto hawotoyala nto. Ekambi waki Nzambi hawotɛngiyama nto ndo hawotohihama nto oma le emboledi wa pɔlitikɛ. Ande lotshungɔ la mamba layoyala l’ehandɔ wa lo fɔnu ka woke lee!
14 Oko wende “On’a Okoko a [Nzambi, NW], latunyaka [pɛkato, NW] ya wa la kete,” Yeso Kristo ayokamba olimu la nɛmɔ di’olambo ande dia minya pɛkato tshɛ y’edjedja yakasale anto. (Joa. 1:29) Lanɛ la kɛtɛ, etena kakatɛ Yeso onto ɔmɔtshi ate: pɛkato yayɛ yambodimanyiyama, nde akɔ̂kɔnɔla dia mbisha djembetelo ya dikambo diakɔ. (Mat. 9:1-7) Lo yoho yakɔ yâmɛ mbayondosala dihindo dia mamba oma k’olongo dia kɔnɔnya akanga a tutshungu, akanga a poke, akanga a lumi, akanga a dikɔmɔ, anto wele la hemɔ ya lo yimba ndo wanɛ wele l’elando ekina. Yema yema, lam’ayowotayelaka mboka y’osembwe yaki Jehowa la kɔlamelo tshɛ, anto tshɛ wayonga l’etema w’ɛlɔlɔ ndo l’okitanyiya, wayɔlɛmbia “olembe wa kolo” wele l’alemba awɔ tshɛ, lo woho w’ɔnɛ ditshelo diawɔ, tokanyi tawɔ la saki yawɔ yayowangɛnyangɛnya vɔamɛ ndo yayɔngɛnyangɛnya Nzambi. (Romo 7:21-23; ɛdika Isaya 25:7, 8 la Enyelo 21:3, 4.) La ntondo k’ekomelo ka Diolelo di’Ɛnɔnyi Kinunu, vɔ wayokoma lo lokokele l’anto mɛtɛ mɛtɛ. Vɔ wayotshungɔ oma lo pɛkato ndo oma l’etombelo wa kɔlɔ w’oma lɔkɔ. Mɛtɛ mɛtɛ, vɔ wayɔkɛnɛmɔla ‘efanelo ka Nzambi’ l’atei a Paradiso ka la kɛtɛ kayokokanɛ l’okama a kɛtɛ w’otondo.—Etat. 1:26.
15 Etena kayokonya Kristo anto tshɛ lo lokokele, nde ayokaloya lowandji lakawawosha dia sala olimu ɔsɔ l’anya wa She. Oko akadialakema lo 1 Koreto 15:28: “Lam’ayuyala diango tshe diolembiami le ndi, ndu Ona ndame ayolembiama le one lakayalembiya diango tshe, dia [Nzambi, NW] ayali la diku dia diango tshe, la lu diango tshe.”
16 Lam’ayokoma anto tshɛ kokele, l’etena kɛsɔ, vɔ wayokondja diaaso dia vɔ mɛnya yɛdikɔ yahatshikitanaki yakawɔshi dia kambɛ Nzambi ɔtɔi kasɛna ndo ka mɛtɛ olimu pondjo pondjo. Diɔ diakɔ diele, la ntondo ka vɔ mbɔsama oko an’ande oma lo tshimbo ya Yeso Kristo, Jehowa ayodja anto tshɛ wambokoma kokele l’ohemba wa ekomelo. Satana l’ɛdiɛngɛ ande wayotshungɔ oma lo difuku di’aha l’ekomelo. Ɔlɔshanelo wakiwɔ hawotosala ndoko kɔlɔ le onto lôka Jehowa ngandji l’otema ɔtɔi. Koko, wanɛ tshɛ wayokimɔ kɔlamelo yawɔ dia monga l’ohedia le Jehowa wayolanyema pondjo kâmɛ la tɔmbɔki ka ntondo l’ɛdiɛngɛ ande.—Eny. 20:7-10.
17 L’ɔkɔngɔ diko, oma lo tshimbo ya Yeso Kristo, Jehowa ayɔsa anto wambokoma kokele, wanɛ wayoshika tanga l’ohemba wa komelo oko an’ande. L’etena kɛsɔ mbayowokondja “[lotshungɔ la lotombo l’ana wa Nzambi, NW].” (Romo 8:21) Ɔnkɔnɛ, vɔ wayonga l’atei a nkumbo ka Nzambi ka l’andja w’otondo ndo kele kâmɛ, Jehowa kayoyala ɔtɔi awɔ a Nzambi pondjo pondjo, Omboledi w’Andja w’otondo ndo Ombutshi awɔ wolodi la ngandji. L’etena kɛsɔ, ditongami tshɛ diaki Jehowa diele la timba, dia l’olongo ndo dia la kɛtɛ, diayosangana kâmɛ nto l’ɔtɛmwɛlɔ wa Nzambi ɔtɔi ka mɛtɛ.
[Wembola]
1, 2. (a) Sangwelo diakɔna diele la Jehowa lo dikambo dia ditongami diande diele la yimba na? (b) Wa na wakakengaka nkumbo k’atɛmɔdi wa Nzambi kele kâmɛ na? (c) Lo menda dikambo sɔ, naa wembola wahomba onto l’onto sɛdingola na?
3. (a) Lande na kele ndoko ɔtɔi la l’atei aso lele “[ɔna Nzambi, NW]” oma lo mbotwelo na? (b) Ko yɛdikɔ yakɔna yolodi la ngandji yakɔshi Jehowa lo dikambo diaki ana w’Adama na?
4. (a) Oma lo dikambo diakɔna diaki Ase Isariyɛlɛ “ana” wa Nzambi na? (b) Kakɔna kaki konembetshiyaka dikambo sɔ na?
5. Woho akɔna wakashisha Isariyɛlɛ diɛsɛ diawɔ lo asho a Nzambi na?
6. “[Ɛlɔmbwɛlɔ, NW]” kakɔna kakakɔndwama oma le Paulo lo Efeso 1:9, 10, ndo naa oyango w’ɛlɔmbwɛlɔ kakɔ na?
7. Wa na wele “diango dia l’ulungu,” ndo lo woho akɔna wewɔ lo tshumanyema na?
8. Diokanelo diakɔna diele l’asa ekitɔ wa Diolelo vɔ la Shɛwɔ lo mbɛdikola la nɛ diaki l’Ase Juda la tshina di’Ɛlɛmbɛ wa Mɔsɛ na?
9. Woho akɔna wayalawɔ ana wa Nzambi wa lânde na?
10. (a) Wa na wele “diango dia la kete,” ndo tatɛ oma l’etena kakɔna kakawatatɛ tshumanyema l’ɔtɛmwɛlɔ na? (b) Naa diokanelo diele l’asawɔ vɔ la Jehowa na?
11. (a) Daka diakɔna di’endana l’anto tshɛ diele lo Romo 8:19-21 na? (b) “Enamelo k’ana wa [Nzambi, NW]” kakɔna kalongamɛwɔ l’asolo walokɔlokɔ na?
12. L’ɔkɔngɔ wa fɔnu ka woke, lembo lakɔna la lotombo layemba ana wa Nzambi wa lo nyuma wakadje otshumba, ndo dikambo sɔ ayodiolembetshiya na?
13. Lotshungɔ lakɔna la lotombo layoyala l’ehandɔ esadi eto l’ɔkɔngɔ wa fɔnu ka woke na?
14. Woho akɔna ayowotshungɔ oma lo pɛkato ndo oma l’etombelo atɔ tshɛ na?
15. L’ekomelo ka Diolelo di’Ɛnɔnyi Kinunu, kakɔna kayosala Kristo, ndo l’oyango akɔna na?
16. Dikambo diakɔna diayokomɛ anto wa kokele l’etena kɛsɔ ndo lande na?
17. Lo ndjela sangwelo diaki Jehowa, ngande wayoyala ditongami diande tshɛ diele la timba na?
OVUSWELO A LƆKƐTSHANYA
● La ntondo k’ɔtɔmbɔkwɛlɔ wakasalema l’Ɛdɛna, diokanelo diakɔna diaki l’asa Jehowa nde l’atɛmɔdi ande na?
● Ɔkɛndɛ akɔna wele le wanɛ wele ana wa Nzambi na?
● Wa na wele ana wa Nzambi ɛlɔ kɛnɛ na? Wa na wahomba ndjâla nto ana wa Nzambi, ndo diokanelo diakɔna diele l’asa dikambo sɔ la sangwelo diaki Nzambi di’endana la kâmɛ ka l’ɔtɛmwɛlɔ na?