Elongamelo ka lânde!
“One leli la lumu, lambetawo, ndi havu pundju.”—JOANI 11:26.
1. Miliyɔ y’anto wambovɔ wayôlɔ lo dihole dia woho akɔna?
ETENA kayôlɔ miliyɔ y’anto lo eolwelo, aha lo nkɛtɛ kahɛnɛ anto mbayowôlɔ. (Etsha 24:15) Vɔ wayolwama lo dihole dia dimɛna efula diakalɔngɔswama ndo wayoyɛna dia mvudu y’amɛna, ahɔndɔ, ndo lokema la mbo ya ndɛ yambotalɔngɔswamaka edja lo dikambo diawɔ. Wana wayɔlɔngɔsɔla diangɔ sɔ tshɛ na? Aha la tamu, anto wayodjasɛ l’andja w’oyoyo la ntondo ka eolwelo ka la nkɛtɛ tatɛ. Ko wana na?
2-4. Naa elongamelo ka lânde kakongɛ wanɛ wasɛna lo ‘nshi y’ekomelo’?
2 Ekotshamelo ka pɔlɔfɛsi ka lo Bible mɛnyaka ɔnɛ tekɔ lo sɛna lo ‘nshi y’ekomelo’ ya dikongɛ nɛ di’akambo.a (2 Timote 3:1) Kem’edja, Jehowa Nzambi ayekama l’akambo w’anto ko minya akanga wa kɔlɔ tshɛ oma la nkɛtɛ. (Osambu 37:10, 11; Tukedi 2:21, 22) L’etena kɛsɔ, kakɔna kayokomɛ wanɛ wakambɛ Nzambi la kɔlamelo na?
3 Jehowa hatodiaka anto w’ɛlɔlɔ l’anto wa kɔlɔ kâmɛ. (Osambu 145:20) Nde atatshaka dui dia ngasɔ ndoko lushi, ndo nde hatoditsha lam’ayondonya kɔlɔ tshɛ oma la nkɛtɛ. (Ɛdika la Etatelu 18:22, 23, 26.) Lo mɛtɛ, dibuku di’ekomelo dia lo Bible tɛkɛtaka dia “ului a wuki w’antu waheyama mbala, uma lu wedja tshe, ndu uma lu wauhu tshe ndu uma lu weuhu w’antu tshe, ndu w’eteketa tshe,” wayatombe oma lo ‘fɔnu ka woke.’ (Enyelo 7:9-14) Eelo, olui a woke w’anto wayoka lo fɔnu ka woke kayokumiya andja wa kɔlɔ ɔnɛ, ndo vɔ wayɔtɔ l’andja w’oyoyo waki Nzambi. Lɛkɔ, akanga w’okitanyiya wayokoka kondja ɛlɔlɔ tshɛ w’oma lo yɛdikɔ ya diambo yakɔshi Nzambi dia tshungola anto oma lo pɛkato la nyɔi. (Enyelo 22:1, 2) Ɔnkɔnɛ, ‘olui a woke’ hawovɔki pondjo. Ɔsɔ ekɔ mɛtɛ elongamelo ka lânde!
4 Shi sho koka monga la mbetawɔ lo dikongelo sɔ dia dimɛna? Ɔsɔku mbediɔ! Yeso Kristo ndamɛ akate ate etena kayonga kayɔsɛna anto pondjo aha la mvɔ. La ntondo ka mbolola ɔngɛnyi ande Lazaro, Yeso akatɛ Mata ate: “One leli la lumu, lambetawo, ndi havu pundju.”—Joani 11:26.
Ndo wɛ lawɔ koka sɛna pondjo
5, 6. Naka wɛ nangaka sɛna pondjo lo Paradiso la nkɛtɛ, ahombayɛ ntsha na?
5 Wɛ nangaka sɛna pondjo lo Paradiso la nkɛtɛ? Wɛ kombolaka mɛna anto ayɛ wa ngandji nto? Lâsɔ kete wɛ la dia mbeka dia monga l’ewo k’oshika ka lolango la Nzambi l’asangwelo ande. Yeso akate lam’akandalɔmbaka Nzambi ate: “Lɔsɛnɔ la pondjo lɔnɛ: wêke dia keya wɛmɛ Nzambi ɔtɔi ka mɛtɛ, la Yeso Kristo, lakayatome.”—Joani 17:3, NW.
6 Nzambi nangaka di’‘anto wa weho tshɛ nshimbamela ndo kondja ewo k’oshika ka sɔlɔ.’ (1 Timote 2:3, 4) Ɔnɛ ekɔ etena ka wɛ mbeka woho wakokayɛ sɛna pondjo lo Paradiso la nkɛtɛ kâmɛ la miliyɔ y’anto akina watsha lolango la Nzambi. Ɛmɛnyi wa Jehowa wayɔngɛnangɛna dia kokimanyiya dia wɛ mbeka akambo akina efula wendana la Nzambi ndo l’adjango ande. Bonde kahayatshu dia tɛnana la wɔ lo Mbalasa ka Diolelo kele suke la lakayɛ kana mbâfundɛ mukanda l’adrɛsɛ woleki suke wele lo dikatshi diayela na?
[Nɔte ka l’ɛse ka dikatshi]
a Enda lo Ewo Katɔla Otsha lo Lɔsɛnɔ la Pondjo, lɛkɛ 98-107, dibuku diakafunde Watchtower Bible and Tract Society of New York, Inc.
[Osato wa lo lɛkɛ 31]
‛Olui a woke’ w’anto hawovɔki pondjo