TSHAPITA 47

Woho Wakokaso Mbeya Ɔnɛ Aramangɛdɔna Aya Nsuke

SHI wɛ mbeyaka kɛnɛ ketawɔ ɔnɛ djembetelo?. . . Lo Tshapita 46 takɛnyi djembetelo yakasha Nzambi dia mɛnya ɔnɛ nde hatolanya andja ɔnɛ l’elola nto pondjo. Apɔstɔlɔ vɔ lawɔ wakalɔmbɛ djembetelo yayowakimanyiya dia vɔ mbeya ɔnɛ okalwelo waki Yeso ndo ekomelo k’andja kana ka dikongɛ nɛ di’akambo kaya nsuke.—Mateu 24:3.

Lam’ele anto hawokoke mɛna Yeso l’olongo, vɔ waki l’ohomba wa djembetelo yakahombe mbakimanyiya dia mbeya ɔnɛ nde ambotatɛ la mbolɛ. Ɔnkɔnɛ, Yeso akɛnya awui wakahombe ambeki ande mendaka lanɛ la nkɛtɛ. Lam’akatombe awui asɔ, dikambo sɔ diakahombe mɛnya dia nde ambokawola ndo ambotatɛ la mbolɛ l’olongo oko Nkumekanga.

Dia mbetsha ambeki ande ohomba wa tetemala la nsɛna dimɛna, Yeso akawatɛ ate: “Nyendi utamba a fingu, ndu etamba ekina tshe. Lam’atuwutumbiaka songusongu, nyu nyame nyatenaka ndu nyateyaka nyati: Eleku ka owo kaya suki.” Wɛ mbeyaka kɛnɛ kɛnya dia nshi y’ɔwɔ yaya nsuke. Ndo wɛ koka mbeya ɔnɛ Aramangɛdɔna aya nsuke lam’ɛnayɛ awui wakatatshi Yeso lo dikambo diakɔ.—Luka 21:29, 30 (Sho mbɛnganyisha alɛta ango).

Lo dikatshi nɛ ndo lo nɛ diayela, totsha mɛna esato w’awui wakatatshi Yeso wakahombe monga l’atei wa djembetelo yɛnya dia Diolelo diaki Nzambi diaya nsuke. Naka awui asɔ tshɛ wambotomba, kete Diolelo diaki Nzambi diele Kristo Omboledi diayolanya mandji kina tshɛ oko wakatɛnyi lo Tshapita 46.

Ɔnkɔnɛ, enda esato wele lo ndjɛkɛ hiende yele la ntondo ka lɛkɛ lɔnɛ dimɛna kele tɔtɛkɛtɛ dikambo di’awui akɔ. Lo Mateu 24:6-14 ndo Luka 21:9-11, wɛ koka mbadia awui wɛnayɛ l’esato ɛnɛ. Ndo nto, lembetɛ shifidi ya tshitshɛ yele l’osato tshɛ. Shifidi yakɔ yamɛ mbatanema l’etatelo k’odingɔ watɛkɛta dikambo di’osato akɔ. Kakianɛ tende kana awui efula wa lo djembetelo yakasha Yeso wekɔ lo kotshama ɛlɔ kɛnɛ.

(1) Yeso akate ate: “Nyu nyayuka akambu wa ata la kumu ya ata. . . . Wudja ayolosha wudja ukina.” Onde wɛ atokaka sango yendana l’awui w’ata?. . . Ta dia ntondo dia l’andja w’otondo diakalɔma tatɛ lo 1914 polo 1918, oma lâsɔ ko Ta dia Hende dia l’Andja w’otondo ndjɔlɔ̂ma tatɛ oma lo 1939 polo 1945. Lo nshi ya ntondo, ndoko lushi lakalɔma ata wa l’andja w’otondo! Kakianɛ ata wekɔ lo ndɔma l’ahole tshɛ wa l’andja. Mɛnamaka dia lushi tshɛ tekɔ lo mboka kana mbadia awui wendana l’ata lo televiziɔ, lo aradiyo kana lo tojurunalɛ.

(2) Yeso akate nto ate: “Ndjala ya kasha . . . [y]ayuyala lu dihuli la dihuli.” Oko weyayɛ, aha anto tshɛ mbele la diangɔ dia ndɛ diakoka. Lushi tshɛ nunu di’anto mvɔka nɛ dia vɔ bu la diangɔ dia ndɛ diakoka.

(3) Yeso akakotsha ate: ‘Elando wayoyala lo dihole la dihole.’ Onde wɛ mbeyaka elɛwɔ olando?. . . Olando kɛdikɛdi hemɔ kana lotatshi ladiaka anto efula. Olando ɔmɔtshi wa wolo wakawelɛka grippe Espagnole akadiake anto nsuke la miliyɔ 20 paka l’ɔnɔnyi ɔtɔi oto kana nsuke l’ɔnɔnyi ɔtɔi. Nshi yaso nyɛ ondo anto ndekana miliyɔ 20 wayovɔ la hemɔ ka SIDA. Ndo hemɔ ka kansɛrɛ la ka lo dui, ndo hemɔ kina yekɔ lo ndjaka nunu efula di’anto ɔnɔnyi tshɛ.

(4) Yeso akate awui akina wa lo djembetelo ate: “Adidimu wa kete wayuyala lu dihuli la dihuli.” Onde wɛ mbeyaka ele adidimu wa nkɛtɛ?. . . Adidimu wa nkɛtɛ sutshasutshaka nkɛtɛ yele l’ɛse k’ekolo ayɛ. Mvudu nyukɔka ndo mbala efula anto mvɔka. Tatɛ oma l’ɔnɔnyi 1914, adidimu wa nkɛtɛ salemaka efula ɔnɔnyi tshɛ. Onde wɛ ambokaka watɛkɛta dikambo di’adidimu wa nkɛtɛ?. . .

(5) Yeso akate dia dui dikina dia lo djembetelo diayonga ‘ofulelo w’awui wa kɔlɔ.’ Diɔ diakɔ diotɛna awui wa wovi ndo wa ngala efula. Anto wa l’ahole tshɛ wekɔ la wɔma ɔnɛ onto ɔmɔtshi mbeyaka tondola mvudu yawɔ ko mbuva diangɔ. Lo nshi yaso nyɛ mamboleka awui w’esehe ndo wa ngala l’ahole tshɛ wa l’andja.

(6) Yeso akate dui dimɔtshi di’ohomba efula dia lo djembetelo shɔ lam’akandate ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mateu 24:14) Naka wɛ mbetawɔka “lukumu l’ololo lone,” kete wɛ pombaka mbutɛ anto akina lokumu lakɔ. Yoho shɔ mbakokayɛ mbisha lonya l’okotshamelo w’etenyi kɛnɛ ka lo djembetelo shɔ.

Anto amɔtshi mbeyaka mbuta ɔnɛ awui wakatatshi Yeso wakikɔ ndo lo nshi ya ntondo. Koko paka lo nshi yaso nyɛ mambotomba awui asɔ tshɛ l’ahole efula wa l’andja ndo l’etena kâmɛ. Lâsɔ, onde wɛ amboshihodia kɛnɛ kalembetshiya djembetelo shɔ?. . . Yɔ nembetshiyaka dia lam’ɛnaso awui asɔ tshɛ watomba, sho pombaka mbeya ɔnɛ andja w’oyoyo waki Nzambi waya nsuke la kita andja ɔnɛ wa kɔlɔ.

Lam’akasha Yeso djembetelo shɔ, nde akatɛkɛta nto dikambo di’eleko ka lânde ka l’ɔnɔnyi. Nde akate ate: “Nyolombe nyati: Elawelu kasu tayalaki l’eleku ka tshitshi.” (Mateu 24:20) Oko le yɛ Yeso akandalange mbuta lâsɔ na?. . .

Naka onto pombaka ndawɔ mpokoso kɛmɔtshi l’eleko ka tshitshi lam’ele lônge la tshitshi mbetɛka dikambo sɔ wolo efula kana koka mbokonya lo wâle, kakɔna kakoka tomba na?. . . Naka nde ndawɔ l’etena kɛsɔ mɛtɛ, kete nde ayosala dikambo sɔ l’okakatanu efula. Shi ayonga dikambo dia lonyangu naka onto mvɔ la lɔpɛpɛ la wolo la l’eleko ka tshitshi paka nɛ dia nde aki l’awui akina efula wa sala ko lâsɔ nde kotatɛ lɔkɛndɔ esadi?. . .

Onde wɛ amboshihodia kanyi y’ohomba yaki la Yeso lam’akandate di’aha konga polo l’eleko ka tshitshi dia ndjolawɔ?. . . Nde akatotɛka dia lam’ele sho mbeyaka dia Aramangɛdɔna aya nsuke, sho hatohombe tshimbatshimba dia mbɔsa yɛdikɔ dia mɛnya dia sho nangaka Nzambi lo tatɛ mbôkambɛ. Naka sho tshimbatshimba, kete etena ka kambɛ Jehowa ayoshila. Lâsɔ sho mbeyaka ndjonga paka oko anto waki l’etena ka Mvula k’Elola wakokaka woho akawaewolaka Nɔa koko kɔmbɔtɔ l’etei ka wato a luudu.

Mbala kayaye, tayɔtɛkɛta awui wendana la kɛnɛ kayeta l’ɔkɔngɔ wa ta dia woke dia Aramangɛdɔna. Tayeya kɛnɛ kambotɔlɔngɔsɔlɛ Nzambi sho wanɛ tshɛ wawoka ngandji ndo wokambɛ ɛlɔ kɛnɛ.

Avɛsa wayela anɛ wekɔ avɛsa wɛnya dia Aramangɛdɔna aya nsuke: 2 Timote 3:1-5 ndo 2 Petero 3:3, 4.

[Esato wa lo lɛkɛ 244-246]

Wetshelo akɔna wakashaka Yeso lam’akandatɛkɛtaka dikambo di’osongo wa fingo?

[Osato wa lo lɛkɛ 249]

Lam’akatɛkɛta Yeso dikambo dia ndawɔ l’eleko ka tshitshi, wetshelo akɔna wakandashaka?