Diolelo diayolɛ lo nkɛtɛ k’otondo

Onde wɛ mbeyaka Diolelo diatɛkɛtaso lanɛ?— Eelo, diɔ diekɔ Diolelo diaki Nzambi diayetɛ nkɛtɛ k’otondo paradiso. Onde wɛ nangaka mbeya akambo amɔtshi wendana la Diolelo sɔ?—

Diolelo tshɛ diekɔ la nkumekanga kadiɔ. Ndo nkumekanga kakɔ mbolɛka anto wa l’ɛtshi kande ka nkɛtɛ. Ko onde wɛ mbeyaka ele Nkumekanga ka lo Diolelo diaki Nzambi?— Ekɔ Yeso Kristo. Nde ekɔ lo mbidjasɛ l’olongo. Koko keema edja, nde ayanga monga Nkumekanga k’anto tshɛ wa la nkɛtɛ. Onde wɛ fɔnyaka dia tayonga l’ɔngɛnɔngɛnɔ etena kayolɛ Yeso oko Nkumekanga lo nkɛtɛ k’ontondo?—

Tayonga l’ɔngɛnɔngɛnɔ w’efula. Lo Paradiso, anto hawotɔlɔshana nto. Anto wayokana ngandji lam’asawɔ. Ndooko onto layotata hemɔ nto kana mvɔ. Akanga wa totshungu wayɔsɛna, akanga wa mpoke wayoka ndo akanga wa tshumbe wayolawɔ ndo wayolembɔlembɔ. Anto tshɛ wayoyala la mbo ya ndɛ tshavutshavu. Nyama yayoyala kaamɛ lam’asayɔ ndo lam’asayɔ l’anto. Anto wakavu wayolɔ. Apami ndo wamato efula wamboyeka akambo wendana la wɔ lo dibuku nɛ, ɛnyɛlɔ oko Rɛbɛka, Rahaba, Davidɛ ndo Elidja wayolɔ ndo vɔ lawɔ. Shi wɛ nangaka ndjowaɛna etena kayowolɔ?—

Jehowa kookaka ngandji ndo nangaka wɛ monga l’ɔngɛnɔngɛnɔ. Naka wɛ ntetemala mbeka akambo wendana la Jehowa ndo mbokitanyiya, kete wɛ ayoyɔsɛna pondjo pondjo lo paradiso ka dimɛna efula. Shi kɛsɔ mbakombolayɛ?—