Tonge la Lɔkɛwɔ l’Ɔlɔlɔ Latombola Nzambi

¹ Oyadi dihole diakɔna dieso, lɔkɛwɔ laso, ɔlɔtɔ aso, ndo wonyelo kana ɛlɛngɛlɔ kaso ka divo mbishaka anto esambishelo lo kɛnɛ kendana la so ndo la Nzambi katɛmɔlaso. Dikambo sɔ ndeka mɛnama lo nsanganya ya weke y’ekambi waki Nzambi, lɛnɛ atɔsɛdingola anto efula. Lam’ashaso ɛnyɛlɔ k’ɔlɔlɔ, lokombo laki Jehowa tombɔmwaka. (1 Pet. 2:12) Koko, lɔkɛwɔ kana etsha wa kɔlɔ waki tɔtɔi t’anto kokaka mbisha lokombo laki Nzambi ndo l’ekambi ande sɔnyi. (Und. 9:18b) Teyake ɔnɛ oma lo lɔkɛwɔ laso, anto wa l’andja kokaka tɛkɛta kɔlɔ kana dimɛna lo dikambo di’ɔlɔngɔswamelo aso ndo dia Nzambi katɛmɔlaso, kɛsɔ tɛnyaka ohomba wa ‘ntshaka akambo tshɛ dikambo dia lotombo laki Nzambi.’​—⁠1 Kor. 10:⁠31.

² Tonge la Lɔkɛwɔ l’Ɔlɔlɔ l’Ahole Wodjashiso: Mbala efula, anto mambaka heyama lo menda kɔmba, loshilambo ndo pudipudi kele l’Ɛmɛnyi wa Jehowa. Lam’akandatɛkɛtaka dikambo dia nkumbo y’Ɛmɛnyi wa Jehowa yakahange l’ɔtɛlɛ ande, jɛra ya lɔkɔ akate ate: “Ana w’Ɛmɛnyi wa Jehowa mboleki ana w’ɛlɔlɔ l’ana tshɛ wamomɛna! Vɔ ndɔtaka oko esekaseka l’ɛlɔngɔlɔngɔ, vɔ wekɔ la loshilambo, nɛmiyaka anto akina, wekɔ la ditshelo di’ɔlɔlɔ, ndo ndoko ɛngɔ kakawalanya. Nyu mɛtɛ sunganaka mandɔma lo dikambo di’ananyu. Takangɛnangɛna dia monga kâmɛ l’ananyu lo dihole nɛ.” Sho mbokaka lowando la ngasɔ mbala efula nɛ dia wanɛ wekesanɛ la so kokaka mɛna ngandji ndo dilɛmiyɛlɔ diele l’atei w’ekambi wa Jehowa.

³ Ekɔ ɔngɛnɔngɛnɔ efula dia mɛna weolo wadja anangɛso l’akadiyɛso ndo angɛnyi wa lo mɛtɛ dia monga pudipudi l’ahole wa nsanganya. Dikambo sɔ keketshaka lokumu l’ɔlɔlɔ lele l’Ɛmɛnyi wa Jehowa, ndo diekɔ tshondo y’esambishelo. Koko, alapɔlɔ walongolaso mɛnyaka dia nkumbo mɔtshi mongaka l’ekakatanu naka owandji wa nkumbo hongi l’akoka wa sombɛ wadiɛnde l’anande ahɔndɔ w’eyoyo. L’ɔkɔkɔ ɔsɔ, anto amɔtshi wakatone ndo mbɔtɔ lo nsanganya ya weke. Dikambo sɔ diakayotshutshuyaka ewandji wa nkumbo dia mbɔtɔ abasa woho wa kotsha nsaki ya wadiɛwɔ l’anawɔ. Ko tete le, anto efula ndjaka lo nsanganya ya weke kânga mbewɔ ase wola. L’ahole amɔtshi, anangɛso tâmbaka akɔti, toshumishi ndo kalafanda dia monga l’ɛnamelo k’ɔlɔlɔ wonya wewɔ lo lɔyɛnga. Amɔtshi mbishaka asawo awɔ ekolo hwe nɛ dia vɔ bu la sabata! Vɔ hawetawɔ kânga dikambo ɔtɔi mbashimba dia pandja diaaso sɔ diahombawɔ nongola ekeketshelo k’oma lo nsanganya yaso ya weke. Ande dionga di’ɔlɔlɔ diele lawɔ lo kɛnɛ kendana la nsanganya yaso y’Akristo lee! Kânga mbalangaso mbisha nsanganya yaso nɛmɔ lo mongaka wonya tshɛ pudipudi, hatohombe mbɔhɛ dia oyango aso kema wa ‘ndjofuna ekondjelo kaso.’​—⁠1 Joa. 2:⁠16.

⁴ Ohangelo w’anto tosalemaka esangɔ efula lo mvudu yakana. Sho pombaka monga la lowando le anangɛso l’akadiyɛso wetawɔ todjasha lawakawɔ. Ndo nto, hosungana dia anto walongolawɔ ngasɔ nanya ɔlɔlɔ ɔsɔ ndo tohika ɔnɛ wâhangia nshi efula la ntondo kana l’ɔkɔngɔ wa losanganya. Pango mbishamaka paka lo nshi ya losanganya. Wanɛ washawɔ pango ya ngasɔ pombaka nɛnya diangɔ dia kanga luudu, aha nanya ndoko ema, aha ntshɔ l’ahole wewɔ hawowaele ndo mbidja yimba dia ndo anawɔ sala ngasɔ. Naka akanga a mvudu wekɔ l’okakatanu ɔmɔtshi lo dikambo sɔ, vɔ la dia mbewoya wanɛ wakamba olimu wa pangia anto esadi, ko wayonga l’ɔngɛnɔngɛnɔ dia mbâkimanyiya. Ekimanyielo k’onto l’onto kekɔ ohomba di’olimu wa pangia anto kɛndakɛnda dimɛna. (Heb. 13:17) Takalongola alapɔlɔ ɔnɛ anto amɔtshi totshikaka luudu lakawawosha dia panga aha la mbuta ko ntshɔ lo lokina lele ɔngɛnyi ande kana onto ɔmɔtshi leyana la nde. Dikambo sɔ fukutanyaka lotumu l’anangɛso wakamba olimu wa pangia anto. Sho nyɔlɔmbaka nyu tshɛ dia nyu mbisha lonya l’olimu ɔsɔ.

⁵ Pombaka ntsha tshɛ dia mbidjasɛ dimɛna la kanga luudu. Lo mɛtɛ, hatolange anto tshikala la suvɛnirɛ ka kɔlɔ kaki ekambi wa Jehowa. Oko weso Akristo, sho pombaka ndjalɔmbɔla la losembwe tena tshɛ. Hatolange dia wanɛ watohangiya ndjotɔfɔnya l’ase wevi kana monga la “suvinirɛ” ya kɔlɔ oma le so.

⁶ Tonge la Lɔkɛwɔ ndo l’Ɛnamelo k’Ɔlɔlɔ lo Losanganya la Woke: Oyadi dihole diakɔna diayokamba laso, diɔ pombaka mbɔsama oko Mbalasa ka woke ka Diolelo l’etena kasalema losanganya. Ɔnkɔnɛ, sunganaka di’ɔlɔtɔ aso la ɛlɔngɔswɛlɔ kaso ka divo monga paka oko kɛnɛ katongaka laso lam’atotɔtɔka lo nsanganya ya l’etshumanelo kaso. Oyadi lo wonya wa losanganya kana l’ahole akina, anangɛso l’akadiyɛso pombaka mbewɔ dia ndɔta yoho ya kɔlɔ kana yahasungana yakoka kɛnɛmɔla yimba ya l’andja ɔnɛ ndo yakoka ndjonga wolo totshikitanya l’anto wa l’andja ɔnɛ. Akadiyɛso pombaka sɛna ɔlɔlɔ di’aha ndɔta tojupɛ ta tomondo kana ta mwɛ, vɔ pombaka ndɔta ahɔndɔ wasungana. (1 Tim. 2:​9, 10) Oyadi lam’eso lo losanganya la woke, wohangiso l’ɔtɛlɛ kana weso l’anangɛso, l’angɛnyi ndo l’ewotɔ aso, kana lam’asombaso ɛngɔ lo makashinyi, sho pombaka mɛnyaka wonya tshɛ dia tekɔ ekambi waki Nzambi, ndo sho pombaka mbewɔ dia monga otamba w’otakanya le anto.​—⁠2 Kor. 6:⁠3.

⁷ Lo losanganya lɔsɔ la woke, anto wayobatizama l’etenyi ka pindju ka Lushi la Samalo. Tshoto y’Etangelo ya Ngɔndɔ ka Nɛi 1, 1995, lɛkɛ 30, mɛnyaka dionga diahomba monga laso lo diaaso sɔ. Yɔ mbutaka ɔnɛ sho “pombaka mbɔsa batismu la nɛmɔ di’efula. Ɔsɔ kema etena ka kɛnɛmɔla nsaki yaso lo yoho ya tshambandeko, kana ka sala ɛfɛtɛfɛtɛ kana ka tondɔ la sale yamboleka. Koko, tɔ bu nto etena ka monga oko yana ya kiɔkɔ yambotambɛ lo dimamba, mbuta ate etena k’ɔkɛi.” Hasungana dia wanɛ wayobatizama ndɔta ahɔndɔ wasanga demba, oyadi apami kana wamato mbewɔ. Koko, vɔ tshɛ pombaka mbɔsa dikambo sɔ la nɛmɔ efula ndo monga l’ɔngɛnɔngɛnɔ watongaka l’Okristo wambobatizama.

⁸ Petero toholaka ‘weho w’anto wahombaso monga lo lɔkɛwɔ l’etsha w’ekila ndo l’etsha w’anto wamamema Nzambi.’ (2 Pet. 3:11) Nyɛsɔ totshe di’ɛtɛkɛta l’etsha wakiso lo Losanganya la Distrikɛ l’ɔnɔnyi ɔnɛ lele l’ɔtɛ a dui ɔnɛ: ‘Wanɛ Wakitanyiya Ɔtɛkɛta wa Nzambi’ wakimanyiya wanɛ watɔsɛdingola l’otema ɔtɔi dia vɔ mbeya Nzambi kaso ka woke ndo mbɔtɛmɔla, nde ɔnɛ lasungana nongola kɛnɛmɔ ndo lotombo tshɛ.​—⁠1 Kor. 14:​24, 25.