Onde wɛ ekɔ ɔsɔnyi?
1 Hatokoke mamba lam’ɛnaso yana mɔtshi ya dikɛnda atolawɔ l’ɔkɔngɔ wa nyango kana wa she kam’atɛnande. Ana w’akɛnda mongaka l’ɔsɔnyi efula. Kânga epalanga efula mongaka l’ɔsɔnyi wa lôtɔ lo yɛdikɔ mɔtshi. Lâsɔ ahombayɛ sala naka ɔsɔnyi wekɔ lo kodjɛ wekamu l’olimu ayɛ w’esambishelo na?
2 Tɔlɔsha ɔsɔnyi: Ekɔ ohomba sho mbidja yimba lo “elengelo k’utema kushami.” (1 Pet. 3:4). Keketsha ngandji kayɛ le Jehowa ndo le anyayɛ anto. Yashikikɛ l’ɔlɔlɔ tshɛ ɔnɛ yoho yoleki dimɛna ya mɛnya ngandji kayɛ ka ndjahombia ele kamba olimu w’esambishelo wakawakosha. Onga la mbekelo k’ɔlɔlɔ ka salaka wekelo w’onto ndamɛ ndo ka mbɔtɔka lo nsanganya. Lɔmbaka mbala la mbala, djekoleko dia kondja ekimanyielo ka Jehowa. Naka wɛ monga la mbetawɔ ka nge ndo ndjaɛkɛ le nde, kete wɛ ayoyashikikɛ la “dihunga diambuleka dia mvuta diui dia [Nzambi] aha la woma.”—Fil. 1:14.
3 Tɔlɔsha kanyi ya ndjaokaka oko onto lele bu l’akoka wahombama. Mɛnamaka dia Timɔtɛ akahombaka ndɔshana la kanyi shɔ. Paulo akakeketsha Timɔtɛ ate: “untu tonyolaki nshi yaye y’olongolongo a pami,” lo mbohola dia “[Nzambi] kutusha utema a woma keli nde akatusha utema a wulu.” (1 Tim. 4:12; 2 Tim. 1:7) Jehowa akakambe efula la Timɔtɛ, woho akɔ wamɛ mbayondokamba nto la yɛ, naka wɛ ayotsha tshɛ dia pama lo ndjaɛkɛ tshɛ le Nde.—Osam. 56:11.
4 Oma lo diki diande, kadiyɛso kɛmɔtshi akokaka omɛnde lakoshimbaka dia nde mbeka akambo wa mɛtɛ wɔma efula, koko nde akayokimanyiyamaka lo kana yimba la divɛsa dimɔtshi di’oma lo Bible, ɛnyɛlɔ oko Mateu 10:37. Oma l’etete kande, olimu w’esambishelo wakayokoma wɔdu le nde, ndo l’ɔkɔngɔ diko omɛnde, nyango ndo anango tshɛ wakayetawɔka akambo wa mɛtɛ.
5 Ndjalɔngɔsɔla ekɔ ohomba: Wɛkamu ayɛ le Nzambi wayoleka pama naka wɛ ayoyalɔngɔsɔlaka dimɛna dimɛna otsha l’olimu. Sɔna mbɔtwɛlɔ kɛmɔtshi ka sawo ka wɔdu oma lo dibuku Comment raisonner kana oma l’Olimu Aso wa Diolelo, kimɛtɔ dimɛna l’ɔtɛ ndo vusolatɔ. Lo dihole dia ndjakiyanyaka amboleka, ɛna akambo la sso di’ɔlɔlɔ. Kamba kâmɛ l’anto akina dia wɛ monga la dihonga. Eya dia efula k’anto wayotahomanaka la yɛ wekɔ l’ɔsɔnyi oko wɛ. Onto tshɛ ekɔ l’ohomba wa losango la Diolelo.
6 Naka wɛ ekɔ ɔsɔnyi, tɔkɔmɔke demba. Jehowa ayokokimanyiya lo welo wadjayɛ dia monga opandjudi wa shika wa lokumu l’ɔlɔlɔ. L’ɔkɔngɔ diko, wɛ ayoyokondja ɔngɛnɔngɛnɔ l’olimu wakiyɛ.—Tuk. 10:22.