Onde ɔnayɛ kokaka mbɔsa yɛdikɔ y’ohomba?
1. Yɛdikɔ yakɔna yakɔshi ɛlɔngɔlɔngɔ l’esekaseka wele Ɛmɛnyi wa Jehowa lo kɛnɛ kendana la okambelo wa la dikila? Sha ɛnyɛlɔ kɛmɔtshi.
1 Yɛdikɔ y’ohomba lo dikambo diakɔna? Lo dikambo di’okaloyelo wa dikila. Oko wɛnyishamidiɔ lo sawo diele l’ɔtɛ a dui ɔnɛ: “Tɔkɛndɛkɛndɛ lo ndjela wetshelo waki Jehowa” diele lo Tshoto y’Etangelo ya Ngɔndɔ ka samalo 15, 1991, lo Falase, ana w’Ɛmɛnyi wa Jehowa pombaka mbɔsa yɛdikɔ ya wolo ndo yɛnama hwe dia mɛnya ɔnɛ nsaki kawɔ ka kitanyiya ɛlɛmbɛ wa Nzambi wendana la dikila ekɔ ohomba le wɔ oko wele dui sɔ ohomba le ambutshi awɔ. Onde dui sɔ mbalɔmbama ndo le ɔnayɛ leke dikɛnda?
2. Naa yɛdikɔ yakɔshi tuminadi tɔmɔtshi dikambo di’ɔna dikɛnda lakatone dia vɔ mbokaloya dikila ndo kakɔna kakoka ambutshi w’Akristo ndo anawɔ weke akɛnda mbeka oma lo dui sɔ?
2 Kakɔna kata Ɛlɛmbɛ? Lo États-Unis, tuminadi ta lâdiko takɔshi yɛdikɔ lo kɛnɛ kendana la lotshungɔ lele l’ana w’akɛnda wambotshunda dia tona okaloyelo wa dikila ekɔ Tuminadi ta lâdiko ta lo Illinois. Etena kakawasɛdingolaka nto dikambo diendana la kadiyɛso kɛmɔtshi ka Ɔmɛnyi wa Jehowa kaki l’ɛnɔnyi 17, tuminadi takɔshi yɛdikɔ nyɛ ɔnɛ: “Naka ekɔ tolembetelo ta hwe ndo tashikikɛ dia ɔna dikɛnda ambotshunda dia shihodia etombelo w’etsha ande [ndo] kanyiya oko opalanga, kete lâsɔ, tɔndɔ dia lo ɛlɛmbɛ wakashikikɛma lo ndjela tɛdikɔ takɔsama mboshaka lotshungɔ la nde mbetawɔ kana tona osakelo ɔmɔtshi oko anto akina tshɛ.” Ɔnkɔnɛ, dia shikikɛ kana ɔna dikɛnda ambotshunda ndo aya l’akoka wa mbɔsa yɛdikɔ yande ndamɛ, adɔkɔtɛlɛ kana ɛnɔmbɔdi wa lɛɛta mbeyaka mbɔkɔnya dia mboka oma lo onyɔ w’ɔna woho watonande dia kamba la dikila. Ɔna pombaka shihodia woke woke wa hemɔ kande ndo etombelo wayonga la woho w’esakelo kamondɔsɔna ndo nde mɛnya lo yoho yokɛma hwe ndo ya shikaa dietawɔ diande lo kɛnɛ kendana la ɔlɛmbɛ wa Nzambi wendana la dikila.
3. Ambola akɔna wahomba ambutshi sɛdingola la yambalo tshɛ, ndo lande na?
3 Kakɔna kayota ɔnayɛ? Onde anayɛ wekɔ l’akoka wa ndjatɛkɛtɛ vɔamɛ lo kɛnɛ kendana la Ɔlɛmbɛ wa Nzambi lo dikambo dia dikila? Onde vɔ mbetawɔka la etema awɔ dia Nzambi mbadjangɛka dia ‘tona dikila’? (Etsha 15:29; 21:25) Onde vɔ kokaka nembetshiya dietawɔ diawɔ oma lo Afundelo? Onde vɔ wayamɛ la dihonga tshɛ yɛdikɔ yawɔ ya shikaa yendana la dikila naka dɔkɔtɛlɛ mbahonwɛ dia lɔsɛnɔ lawɔ lekɔ lo wâle, oyadi ambutshi awɔ kema lawɔ? Lam’ele ‘tena ndo awui wa shashimoya tokomɛka sho tshɛ,’ ngande wakokayɛ nɔngɔsɔla anayɛ dikambo dia oseka ohemba tshɛ wakoka tomba la shashimoya wendana la olowanyi awɔ?—Und. 9:11; Ef. 6:4.
4, 5. a) Ɔkɛndɛ akɔna wele l’ambutshi ndo ngande wakokawɔ kotsha ɔkɛndɛ akɔ? b) Dihomɔ diakɔna diele laso dia kimanyiya ambutshi?
4 Ambutshi, kakɔna kakokanyu sala? Nyekɔ l’ɔkɛndɛ wa mbetsha ananyu kanyi yaki Nzambi lo dikambo dia dikila. (2 Tim. 3:14, 15) Olembetshiyelo wa shikaa tanemaka lo dibuku Comment raisonner, lɛkɛ 359-362, lo Falase. Nyɔsɛdingole la yambalo tshɛ awui akɔ la nkumbo kanyu. Lo kamba la sawo diele lo lɛkɛ 362-364, diele l’ɔtɛ a dui ɔnɛ: “Naka onto ambota ɔnɛ,” nyohembe awui akɔ la ananyu dia mbakimanyiya dia vɔ kondja ewo ka mbeya nembetshiya kɛnɛ ketawɔwɔ ndo lande na kakietawɔwɔ. (1 Pet. 3:15) Dihomɔ dikina diatetsha lo kɛnɛ kendana la dikila ko: biukubuku Comment le sang peut-il vous sauver la vie ? lo Falase ndo Tshoto y’Etangelo ya Ngɔndɔ k’esambele 1, 2004 lɛkɛ 8-18. Ndo nto, vidɛo yele l’ɔtɛ a dui ɔnɛ: Soigner sans transfuser : besoins et droits du patient ndo Pas de sang : la médecine relève le défi, yele kakianɛ lo DVD diele l’ɔtɛ a dui ɔnɛ: Des alternatives à la transfusion — Documentaires mbishaka awui wetawoya wendana la ekanelo k’ɔlɔlɔ ndo etombelo w’ɔlɔlɔ waya lo sakɛ kana sala onto epaso aha la mbokaloya dikila. Onde nkumbo kayɛ keke esadi wa menda ndo kɛtshanya awui wa lo vidɛo shɔ?
5 Nyokimanyiya ananyu dia vɔ ‘shikikɛ vɔamɛ kɛnɛ kele ɔlɔlɔ, ketawɔma ndo lolango la kokele laki Nzambi’ lo kɛnɛ kendana la dikila. Lâsɔ, mbayowokoka mbɔsa yɛdikɔ y’ohomba yayowaela ɔtshɔkɔ wa Jehowa.—Romo 12:2.