Anton Petrus/Moment via Getty Images
TETEMALA NSUNGUKALA!
Onde ta dia l’andja w’otondo diayanga ndɔma?—Kakɔna kata Bible lo dikambo sɔ?
L’edja k’ɛnɔnyi 30 w’etshi, anto efula wakafɔnya dia diɔtɔngangelo dia lam’asa wedja diekɔ dimɛna ndo diekɔ lo taleke ndowana. Koko, kɛnɛ keke oma la ntomba mɛnyaka dia dui sɔ bu mɛtɛ.
“Anto efula wekɔ la lonyangu dia ta dialɔma la Gaza diayonga la shɛngiya le wedja efula wosukanyi la Israël ndo Hezbollah ambotatɛ ndɔsha l’olelo wa Liban.”—Reuters, Ngɔndɔ ka ntondo 6, 2024.
“Elui walɔmbɔma oma le Iran wekɔ lo ndɔsha ahole wotshikitanyi ndo mbala kakɔ ɔtɔi, Iran ambotatɛ nto nsala waa bɔmbɛ nikleyɛrɛ. Ndo nto, Russie la Chine waya kakianɛ kaamɛ la Iran. Ɔsɔ tshɛ ekɔ tshondo ya waale le wedja wa lo ehotwelo ka wonya.”—The New York Times, Ngɔndɔ ka ntondo 7, 2024.
“Ta dialɔsha wodja wa Russie diekɔ lo ntetemala monga l’etombelo wa kɔlɔ efula.”—UN News, Ngɔndɔ ka ntondo 11, 2024.
“Ekondjelo ka wodja wa Chine ndo wolo waya l’asɔlayi awɔ, woho wamboleka wodja wa Taiwan mfudia otako awɔ ndo nkɛlɛ ka lam’asa Chine la États-Unis mɛnyaka dia lofunge koka ndjaala esadi eto.”—The Japan Times, Ngɔndɔ ka ntondo 9, 2024.
Kakɔna kata Bible lo kɛnɛ kendana la woho watatshikitana akambo wa l’andja ɔnɛ ɛlɔ kɛnɛ? Onde akambo asɔ wayokonya lo ta?
Bible kakatewoyisha awui wa nshi nyɛ
Bible kombewoya woho wa ta dimɔtshi shikaa l’ata wɛnaso nshi nyɛ. Koko, tɔ kakatɛkɛta di’ata walɔma nshi nyɛ ndo ‘wanya wɔladi la nkɛtɛ.’—Ɛnyɛlɔ 6:4.
Dibuku dia Danyɛlɛ diakewoya dia “lo etena k’ekomelo,” mandji yoleki welo ya l’andja ɔnɛ yayɔlɔshana lo yoho ya “otshindjiyelo” kana nsala tshɛ dia nɔmbɔla. Ɔlɔshanelo ɔsɔ wayotondja lofulo la woke l’asɔlayi ndo wayokamba la “diangɔ di’amɛna” kana falanga lo yoho y’efula.—Danyɛlɛ 11:40, 42, 43.
Ta diayanga ndɔma keema edja
Bible mɛnyaka di’awui wa l’andja ɔnɛ wayolana lo yoho ya kɔlɔ la ntondo ka vɔ nɔngɔsɔma. Yeso akate ate “mfɔnu ka woke kayoyala woho wahatayalaka oma ko etatelo k’andja.” (Mateo 24:21) “Mfɔnu ka woke” kɛsɔ kayokomɛ la ta dia Aramangɛdɔna, dielamɛ oko “ta dia lushi la woke la Nzambi Kanga-Wolo-Tshɛ.”—Ɛnyɛlɔ 16:14, 16.
Koko anto w’ɛlɔlɔ wayoka lo ta dia Aramangɛdɔna, vɔ hawotolanyema. Lo tshimbo ya ta sɔ, Nzambi ayela ekomelo k’ɛlɔmbwɛlɔ k’ana w’anto kambokonya lo ata wele la etombelo wa kɔlɔ efula. Dia mbeya woho wayonga wɔladi l’ɔkɔngɔ wa ta di’Aramangɛdɔna, adia asawo anɛ: