Tolowanya akoka aso wa nsambisha​—Lo nkimanyiya ‘wanɛ wele suke dia’ monga ambeki

OHOMBA WA DUI SƆ: Jehowa salaka dia ntɔngɔ y’akambo wa mɛtɛ mbola l’etema w’anto wele “suke dia mbetawɔ akambo wa mɛtɛ wakonya lo lɔsɛnɔ la pondjo.” (Ets 13:48; 1Kɔ 3:7) Sho kambaka kaamɛ la nde nɛ dia sho mbidjaka welo lo ndeka ndjasha dia nsambisha anto wetawɔ akambo wekawɔ. (1Kɔ 9:26) Ambeki wa Bible pombaka nshihodia ɔnɛ batisimu k’Okristo kekɔ ohomba dia nkondja panda. (1Pe 3:21) Sho mbakimanyiyaka dia vɔ monga ambeki wa Kristo lo mbaetsha dia nsala etshikitanu lo nsɛnɔ yawɔ, dia nsambisha, dia mbetsha ndo dia nambola nsɛnɔ yawɔ le Jehowa.​—Mat 28:19, 20.

WOHO WA NSALA DUI SƆ:

• Ohola ambeki wa Bible dia oyango wa wekelo awɔ ele dia mbakimanyiya dia vɔ ‘mbeya’ Jehowa ndo mbɔngɛnyangɛnya.​—Jni 17:3

• Kimanyiyawɔ dia vɔ nsala ehamelo lo ntondoya wekamu wahomana la wɔ, ɛnyɛlɔ mbekelo ya kɔlɔ ndo lɔngɛnyi la kɔlɔ

• Keketshawɔ la ntondo ndo l’ɔkɔngɔ wa vɔ nongola batisimu.​—Ets 14:22

NYENDE VIDƐO YELE L’ƆTƐ A DUI ƆNƐ: JEHOWA AYOKOKIMANYIYA, NDO OMA LAASƆ, NYOKADIMOLE LO AMBOLA WAYELA ANƐ:

• Kakɔna kakoka mbotsha onto wɔma dia ndjakimɔ ndo batizama?

• Ngande wakoka dikumanyi nkimanyiya ambeki wa Bible dia mpama lo nyuma?

• Kakɔna katetsha Isaya 41:10 lo dikambo dia Jehowa?

• Waonga akɔna wayotokimanyiya dia kambɛ Jehowa lo yoho yetawɔnde, kaanga mbeso keema kokele?