Kgopolo E E mo Bibeleng

A Go Dirisa Maselamose go na le Kotsi Nngwe?

‘FA O re o leba kafa ke maselamose o re o leba kafa le gone fela jalo. Ka tshoganetso fela, go tutudubakana ga moropa go baka modumo. Matlho otlhe a bo a tsepama banna ba le babedi ba ba apereng jinifomo ba tshwere ditlhobolo tsa mmotefete. Fa ba sena go sikira ditlhobolo tsa bone mo magetleng, ba di lebaganya le ramaselamose wa Motšhaena yo o apereng ka tsela ya mabonobono. O tshwarela poleiti ya letsopa fa sehubeng sa gagwe. Ditlhobolo di bo di thunya. Gone fela foo, ramaselamose o wela fa fatshe, a porotla madi. Maaka a gore poleiti e ka kganela lerumo a felela ka selelo le khuranyo ya meno.’ Phosonyana mo go nngwe ya ditlhobolo e ile ya dira gore lerumo le tswe mme le ye go ralala sehuba sa ga ramaselamose. Go bolela jalo buka e go tweng Henry Gordon’s World of Magic.

A bo e le go tshameka ka mpho ya botshelo jang ne—go direlwa fela go akabatsa, go kgatlha, le go tlosa bodutu mo go tsamaelanang le mokgwa oo wa maselamose. A eo ke tsela e o ikutlwang ka yone? Kana o tsaya fela gore ke dingwe tsa dikotsi tse di ka nnang teng mo metshamekong e e ntseng jalo? Go sa kgathalesege gore o ikutlwa jang, fa maaka ano a ne a pala go ne ga baka kotsi e e maswe thata. Go re dira gore re ipotse jaana: A go na le kotsi nngwe e e sa lemotshegeng ka go dirisa maselamose? Go bona karabo, a re sekasekeng kwa motshameko ono wa bogologolo o simologileng teng.

Tlhotlheletso ya Maselamose mo Hisitoring Yotlhe

Go tswa fela kwa metlheng ya bogologolo, motho fa esale a kgatlhiwa le go tsiediwa ke masaitseweng a maselamose. Lefoko “magic” (maselamose) la Seesemane le tswa mo leineng “magi,” le e neng e le setlhopha sa seperesiti sa Peresia bogologolo se se neng se itebagantse le ditiro tsa kobamelo. Tlhaloso ya one e e motlhofo, ke gore maselamose ke maiteko a go dirisa dinonofo tsa tlholego kana tse di fetang tsa tlholego go direla motho. Egepeto wa lekgolo la bo18 la dingwaga B.C.E. o ne a na le baperisiti ba ba dirisang maselamose. Maselamose gape e ne e le karolo e kgolo thata mo bodumeding jwa Bakaladea ba bogologolo ba kwa Babelona mo lekgolong la borobabobedi la dingwaga B.C.E. (Genesise 41:8, 24; Isaia 47:12-14; Daniele 2:27; 4:7) Tlhotlheletso eno e ne e le teng mo Bagerikeng le mo Baromeng ba bogologolo go ya go tsena ka Motlha wa Bogare le go tla go fitlha le mo lekgolong la rona la bo20 la dingwaga.

Mefuta e e farologaneng ya maselamose e ka bewa ka ditlhopha tse di farologaneng. Mo bukeng ya gagwe e go tweng The Magician, Robert A. Stebbins o baya maselamose ka ditlhopha tse tharo.

Mefuta e Meraro ya Maselamose

Maselamose a masaitsiweng ke “kitsiso ya sephiri.” A tlhalosa gore “ditiragalo tse di ganetsanang le kitso e e teng kana ya saense” di “boammaaruri kana di a utlwala.” Stebbins o tswelela ka go tlhalosa gore “maselamose a masaitseweng ke sedirisiwa sa botlhokwa sa . . . go tshwaratshwara, boloi, alchemy, le bodumedi mo maemong a a rileng.”

Ka maselamose a go tsietsa, “boramaselamose ba tsietsa balebeledi ka go ba bontsha maaka e kete ke boammaaruri fela gore ba ijese monate.” Ba itse gore ba aketsa batho, mme go ya ka Stebbins, “ba kgothaletsa ba ba lebeletseng gore ba dumele se se farologaneng—gore ba dumele gore, bone jaaka boramaselamose, ba na le dinonofo tse di kwa godimo ga tsa batho kana gore ba na le tirisano e e kgethegileng le batho ba ba nang le dinonofo tseo.”

Maselamose a boitlosobodutu one maikaelelo a one ke go gakgamatsa ka malepanyana a one a a tsietsang. A kgaogantswe ka mefuta e le metlhano e fa gongwe e kopanang: “maselamose a a direlwang mo seraleng, a a direlwang gaufi thata le babogedi, malepa a a dirwang ka boferefere, go baya seatla matlhong, go bala mogopolo.”

A a Kotsi mo Bakereseteng?

A re ko re sekasekeng pele maselamose a masaitseweng. Maselamose a masaitseweng a dirwa ka ditsela tse di farologaneng. Ka sekai, go na le baobamedi ba ga Satane ba ba dirisang maselamose a “mantsho” le a “masweu.” Maselamose a “mantsho” a akaretsa go konopa, go tshela dikgaba, go hutsa ka maikaelelo a go utlwisa baba ba motho botlhoko. Maselamose a “masweu” one, a dirisediwa go dirolola le go tlosa dikgaba. Mme lefa go ntse jalo, ka bobedi ke ditiro tsa masaitsiweng. Ka dinako tse dingwe go dirisiwa maselamose a masaitsiweng go batla go nna le thobo e kgolo kana go fenya mo dikgaisanong tsa metshameko. Mme lefa go ntse jalo, fa Bibela e bua mabapi le maselamose ano a tirisabadimo, ga e okaoke: “Lo se ka loa diha merèō, leha e le go shwaba ka eñ le eñ.”—Lefitiko 19:26; Duteronome 18:9-14; Ditihō 19:18, 19.

Kotsi ya maselamose a go tsietsa yone ke efe? Babadi ba ditselana tsa seatla, boreaitse, le ba ba fodisang ka thapelo, fa go umakiwa ba se kae fela, ba dirisa maselamose a tsietso go diragatsa dikeletso tsa bone. A ga ba aketse batho ka se ba se dirang? Lefoko la Modimo la re: “Lo se ka loa diha ka tsieco, leha e le go akèlana.”—Lefitiko 19:11.

The Encyclopedia Americana e bolela gore: “Ka dinako tse dingwe, ditiro tsa maselamose di ka dirisiwa go patelela meya.” A re ka batla go ipiletsa mathata go tswa mo meyeng ya sedimona le fa e ka bo e le ka go amega ka tsela e e seng ya tlhamalalo mo tirong eno? Fa a fiwa sebaka, madimona a ka re tsenya mo mathateng. A lebile ‘sebaka se se tshwanetseng’ mme ebile ga a ineele mo maitekong a one.—Luke 4:13; Yakobe 1:14.

Mmantswitswidi mo go tsietseng le mo go latlheng ke Satane Diabolo ka sebele. Fa e sale a simolola go dira jalo ka lekgetlho la ntlha fa a ne a lebagane le motho kwa tshimong ya Edena. (Genesise 3:1-19) Ke Mokeresete ofe yo o ka batlang go tshwana le ene? Go na le moo, Bakeresete ba gakololwa gore ‘ba nne baetsi ba Modimo’ le gore “[ba ineele] mo Modimoñ; me [ba] tlhaban[e] le diabolo.”—Baefesia 5:1; Yakobe 4:7.

Lefa go ntse jalo, batho ba le bantsi ba tsaya gore lefoko “maselamose” le bua ka boitlosobodutu fela. Motho a ka nna a baya batho seatla matlhong kago dirisa diatla tsa gagwe (malepa a boferefere), ka go itse gore fa gongwe letsogo le nna bofefo go gaisa leitlho. Bibela e ka nna ya bo e sa ganane le seno. Lefa go ntse jalo, fa maikaelelo e le go dira gore batho ba akanye gore go na le masaitsiweng a maselamose, a Mokeresete o ka rata go dira gore batho ba akanye gore o na le nonofo nngwe e e fetang ya motho, e e ka se kang ya tlhalosiwa? Kana fa e le gore ba bangwe ba akediwa ka ntlha ya metshameko ya “maselamose,” a Mokeresete o ka se ka a batla go kgaogana le mofuta oo wa boitlosobodutu gore a se ka a kgopisa ba bangwe? (1 Bakorintha 10:29, 31-33) Mo godimo ga moo, go na le kotsi ya gore motho o ka nna a raelesega go tsenelela kwa teng mo ditirong tsa maselamose.

Ka ntlha ya seo, fa go papametse gore maselamose mangwe a amana le tirisabadimo, ka botlhale Bakeresete ba boammaaruri ba tla tila go a dirisa. Mme e bile gape, tsela nngwe le nngwe e Mokeresete a tshelang botshelo jwa gagwe ka yone—a ke tiro ya boitshediso, boitapoloso, kana boitlosobodutu—o tla rata go nna “le segakolodi se se siameñ,” segakolodi se se sa mo letleleleng go kgopisa Modimo kana motho yo mongwe.—1 Petere 3:16; Ditihō 24:16.

[Motswedi wa Setshwantsho mo go tsebe 12]

The Bettmann Archive