‘Go Pagamela Pele ka Ntlha ya Boammaaruri’

“Me mo boreneñ yoa gago u pagamèlè ka go rañwa ke dilō, ka ntlha ea boamarure, le bopelonōlō, le tshiamō: me seatla sa gago se segolo se tla gu ruta dilō tse di boitshègañ.”​—PESALEMA 45:4.

1, 2. (a) Ke molaetsa ofe o o neng wa kgatlha mopesalema? (b) Ke ka ntlhayang fa one molaetsa oo o tshwanetse wa re tlhotlheletsa?

MOOPEDI yoo wa mmoki o ne a gakaletse go simolola pina ya gagwe. Go lebelela go tla ga puso e e molemo mo matsogong a mmusi yo o sa boleng, yo o siameng e ne e nonofile thata. O ne a sa kgone go didimala. O ne a sa tlhole a kgona go itshoka, mopesalema yono o ne a ponyega ka mafoko ano: “Pelo ea me e penologa ka kgañ e e monate: ke bua dilō tse ke di dihileñ kaga kgosi: loleme loa me ke sekwala sa mokwadi eo o boheho mo go kwaleñ.” (Pesalema 45:1) Moopedi yoo wa mmoki wa kwa tshimologong ga a bolo go swa. Mme pina ya gagwe ya boperofeti e santse e le gone, mme tlhotlheletso ya yone ga e ise e ke e tsamaye e nne maatla go gaisa jaanong.​—Bapisa Bakolosa 3:16.

² “Kgañ e e monate” eo e neng ya tlhotlheletsa pelo ya mopesalema e itshupile e le eng? E amana le mafoko a a molemo a Bogosi jwa Modimo! Molaetsa wa Bogosi o “monate” mo e leng gore o tshwanelwa ke go “rèrwa mo lehatshiñ yeotlhe, go nna chupō mo merahiñ eotlhe” pele ga “bokhutlō” jwa merafe eno bo tla. (Mathaio 24:14) Gompieno, a setlhogo se se “monate” sa Bogosi jwa Bomesia se ile sa tlhotlheletsa pelo ya gago? Se tshwanetse. Ka ntlha yang? Ka gonne lefoko la Sehebera leo le ranotsweng jaaka ea “penologa” (ra·chash’) le kaya go tlhantlhela, jaaka seeledi se se tswang dipudula se se belang. Lediri leo gape le raya go felela. Mme gakologelwa, Moeteledipele wa rona, ebong Jesu Keresete, o boletse gore: “Motho eo o molemō o ntsha se se molemō mo lohumoñ lo lo molemō loa pelo ea gagwè.” (Luke 6:45) Ka gone, a pelo ya gago, jaaka mopesalema, e phephetha ka “kgañ e e monate”? Fa go ntse jalo, ka gone ga go na sepe se se ka go thibelang gore o opelele boammaaruri jono jo bo molemolemo kwa godimo: Jesu Keresete o busa mo Bogosing jwa Modimo!

Anamisang Pina ya Boammaaruri

3. Ke mekgwa efe e mebedi ya konokono eo e dirisiwang go anamisa mafoko a a molemo a Bogosi gompieno?

³ Pina eno e e monate-nate e ka anamisiwa jang? Loleme lwa mopesalema lo ne lwa fetoga “sekwala,” ka moya o o boitshepo mo diatleng tsa ga Jehofa. (Bapisa 2 Samuele 23:2.) Mafoko a gagwe a mmino ao a kwadilweng a ne a opelwa gore baobamedi botlhe ba ga Jehofa ba bogologolo ba utlwe. Rona gompieno re ka emela boammaaruri jwa Bogosi jwa Modimo ka ditsela tse pedi tse di tshwanang le eo. Ya ntlha, ka go dira gore mafoko a rona a utlwiwe mo go rereng phatlalatsa le, ya bobedi, ka go dira gore mafoko a rona a balwe mo dibukeng tsa rona. Ka gone, fa re anamisa dibuka tse di theilweng mo Bibeleng, re bolela seo loleme lwa banna ba ba boitshepo ba ba tlhotlheleditsweng le sa tswang go se bolela. (2 Timotheo 3:16; 2 Petere 1:20, 21) Mme gompieno molaetsa wa Bogosi o o gatisitsweng o anamisiwa ka dipalo-palo le ka dipuo-puo le ka lobelo loo lo fetang loo mopesalema a neng a akantse ka lone. A o nna le seabe ka metlha mo go o anamiseng, segolo-bogolo ka go anamisiwa ga makwalo-paka a Tora ya Tebelo le Awake!?

4. (a) Keresete Jesu o fetogile “montlè thata go gaisa bana ba batho” jang? (b) Setlhopha se se tloditsweng sa molebedi se etsa jang ‘bontle jwa dipounama tsa ga Keresete’?

⁴ Tsela eo Kgosi ya ga Jehofa e lebegang ka yone e tlhotlheletsa mopesalema gore a kwale jaana: “U montlè thata go gaisa bana ba batho; bopelochweu bo tshecwe mo dipounameñ tsa gago: ke gōna ka mo Modimo o gu segōhaditseñ ka bosakhutleñ.” (Pesalema 45:2) Go tloga ka letsatsi leo Jesu a neng a tlodiwa ka lone ka moya wa Modimo, dipounama tsa gagwe di ne tsa rera Bogosi di sa kgaotse, go fitlhela batho bao eleng batlhanka ba ga Satane ba di didimatsa ka nakwana. Ka ntlha ya boikanyegi jwa ga Jesu, morago ga moo Jehofa o ne a mo segofatsa ka bosakhutleng ka go mo tsosa mo baswing le ka go mo godisa go feta dibopiwa tse dingwe tsotlhe. (Bafilipi 2:8-11) Fa esale go tloga ka nako eo Jesu a neng a galalediwa ka yone kwa legodimong, fa a ne a fetoga ‘setshwano sa sebele sa Modimo,’ o montle go gaisa mmusi yo o godisitsweng go gaisa, motho kana moengele. (Bahebera 1:3, 4) Jaanong, jaaka Kgosi e e tlhomilweng mo setulong sa bogosi, Jesu o nonotsha dipounama tsa setlhopha sa molebedi se se tloditsweng le tsa balekane ba bone gore ba opelele mafoko a a molemo a Bogosi kwa godimo ka bopelokgale. Lefa go ntse jalo, pina eno gape ke ya ntwa.

5, 6. (a) Go ‘palamela pele ka ntlha ya boammaaruri’ ga ga Keresete go kayang? (b) Setlhopha sa molebedi se dirisa jang Tora ya Tebelo le Awake!?

⁵ Morago ga moo mopesalema o goela Kgosi e e busang jaana: “Gatlha chaka ea gago kaha nokeñ ea gago, wèna senatla, kgalalèlō ea gago le borèna yoa gago. Me mo boreneñ yoa gago u pagamèlè pele ka go rañwa ke dilō, ka ntlha ea boamarure, le bopelonōlō, le tshiamō: me seatla sa gago se segolo se tla gu ruta dilō tse di boitshègañ.” (Pesalema 45:3, 4) Fa esale go tloga ka 1914 Keresete o ile a palama pitse ya ntwa, o iketleeleditse go tsaya kgato. (Tshenolō 6:1, 2) O ikgatlhile ka tšhaka​—letshwao la ntwa mme gape le la bolaodi le maatla a a tswang kwa Modimong gore a bolaye merafe e e mo ganetsang. Keresete o setse a tlhabane le Satane le badimona ba gagwe, a ba diga go tswa kwa legodimong le go ba tswalela mo tikologong ya lefatshe.​—Tshenolō 12:1-13.

⁶ Lefa go ntse jalo, pele ga kagiso e tsosolosiwa, dilo tse di maswe go feta seno di tla dirwa ke seatla sa moja sa Kgosi eo fa a ‘pagamela pele ka ntlha ya boammaaruri’ kwa Hara-Magedone go fedisa baba botlhe ba Modimo ba ba mo lefatsheng. (Pesalema 45:4; Tshenolō 16:14, 16; 19:17, 18) Keresete o ile a tsenya setlhopha se se tloditsweng sa molebedi bopelokgale gore le sone se opelele tlhagiso eno kwa godimo. “Molebedi” o dirisang go godisa lentswe la gagwe? Ditsebe tsa makasine ono wa Tora ya Tebelo segolo-bogolo​—lekwalo-paka leo le di gogang kwa pele mo go itsiseng Bogosi jwa ga Jehofa jo bo tlhomilweng. Setlhopha sa molebedi, jaaka lesogodi la tsie-seka-phepeng le le lomang, se tsentswe moya o o tshwanang le oo o tlhotlheletsang Keresete gore a “palamèlè pele . . . ka ntlha ea boamarure.” (Tshenolō 9:7-11) Ba dirisa dimakasine tseo di kwalwang kafa tlase ga kaelo ya “molebedi”​—eleng Tora ya Tebelo le Awake!​—ka matsetseleko “ka ntlha ea boamarure.”​—Mathaio 24:45; bapisa Tshenolō 9:16-19.

‘Go Pagamela Boammaaruri Pele’

7. Dimakasine tsa Tora ya Tebelo le Awake! di rotloetsa boammaaruri jwa Bibela ka tsela efe e e bogale?

⁷ Tora ya Tebelo e ile ya emela ‘boammaaruri jwa Bogosi’ go feta dingwaga di le lekgolo. E dirisa Lefoko la Modimo ka matsetseleko jaaka tshaka go obola makape a phoso ao a apesitseng dithuto tsa maaka tsa bodumedi. (Bapisa Baefesia 6:17; Bahebera 4:12.) Makasine wa Awake! le one o emela boammaaruri, Fa go tliwa mo ditiragalong tsa bosheng jaana, Awake! e kgabetlelela sesiro se se khurumeditseng dikgopolo tsa boitseanape tseo di ganetsang Bibela le ditshekamelo tsa loago le tsa boitshwaro tse di kotsi. Re ka dirang go tsamaisetsa batho ba ba oketsegileng dimakasine tseno e le gore ba ke ba utlwe molaetsa wa Bogosi o o bolokang botshelo?

8, 9. Go dirisa molao-motheo wa Baefesia 5:16 mo go baleng Tora ya Tebelo le Awake! go ka go thusa jang gore o ‘penologele’ go nna le seabe mo go supeng ka dimakasine? Neela dikai.

⁸ Botlhe bao ba ratang boammaaruri ba tshwanetse go “penologa” ka molaetsa oo makwalo-paka ano a Tora ya Tebelo le Awake! a nang le one. (Pesalema 45:1) Jang? Ke ka ntlhayang fa o sa di bale ka bonako fela fa o sena go di amogela? ‘Ga ke tle go bala makasine ope wa lefatshe kana buka go fitlhela ke fetsa go bala dimakasine tsa rona pele,’ Lillian o ne a ipolelela jalo dingwaga di le some tse di fetileng. O santse a tshegeditse boikemisetso joo. (Mathaio 6:33) O ka dirang fa o sena go di bala? Bua le ba bangwe ka diteng tsa tsone​—maloko a lelapa le maloko-mmogo le wena a phuthego. Gape seno se tshwanetse sa go tukisa ka tlhoafalo ya gore o supe ka dimakasine tseno e le gore o ke o bolelele banka wena ka dilo tse di molemo tseo o di badileng. Ga go na pelaelo ya gore o tla batla go nna le seabe mo bosuping jwa dimakasine beke nngwe le nngwe, o di isa kwa magaeng a banka wena. Seno se ka tshwantshiwa le tsela eo moaposetoloi Paulo a neng a “supa ka botlalo” ka yone.​—Ditihō 20:20, 21, NW.

⁹ Peter le mosadi wa gagwe ebong Petra ba ile ba direla jaaka barongwa mo nageng nngwe ya Afrika mo dingwageng di le nne tse di fetileng. Dimakasine tsa Tora ya Tebelo le Awake! ke nngwe ya metswedi ya bone ya konokono ya maikatlapelo a semoya. “Tora ya Tebelo e re thusa gore re ipoloke re thantse semoyeng mo tshimong ya rona,” Petra o bolela jalo. “Re bona kgothatso le nonofo go tswa mo tokololong nngwe le nngwe ya Tora ya Tebelo le Awake!,” Peter o oketsa jalo, “mme nako le nako fa dimakasine tseno di goroga, go lebega mo go rona ekete re amogela lekwalo le le tswang kwa gae.” (Bapisa Pesalema 46:1.) A o na le kanaanelo e e boteng e e tshwanang le eo mo makwalo-pakeng ano a rona le go tlhoafalela go a bala jaaka Peter le Petra ba dira? Moya o o ntseng jalo o tla go tlhotlheletsa gore o neele ba bangwe dimakasine tseno ka metlha gore le bone ba di bale.

10. Ke boikutlo bofe joo bo tlhokafalang mo bosuping jo bo matsetseleko jwa dimakasine, mme go ka tlhagisa melemo efe?

¹⁰ Baboledi ba Bogosi ba tshwanetse go ikutlwa ka mo go tshwanetseng ka bosupi jwa dimakasine. Batho bao ba ratang bodumedi ka bopelo-e-phepa ba santse ba amogela tshedimosetso eo e theilweng mo Bibeleng eo makwalopaka a rona a nang le yone. (Bapisa Ditihō 10:15, 30-33.) Ka ntlhayang? Ka gonne ga go na gope kwa gongwe koo ba ka e bonang gone. Mo dingwageng tse di fetang 45 tse di fetileng kwa Sweden, Lars o ne a amogela dimakasine tsa Tora ya Tebelo di le dintsi go tswa mo mothapiweng mongwe. “Seno se a utlwala,” o ne a bolelela mosadi wa gagwe jalo morago ga a sena go di bala. “Tora ya Tebelo e bolela seo Bibela e se bolelang.” Seo Lars a neng a se badile se ne sa mo tlhotlheletsa gore a kolobediwe​—March 1940. Tlhokomela sekai se sengwe. Badihedi bangwe ba le babedi ba babulatsela go tswa kwa borwa jwa United States ba ne ba bolela jaana:

“Go ne ga kopanwa le mosadi mongwe mo tirong ya dimakasine. Ke mmamatlotlo wa kereke nngwe e kgolo ya Baptist ebile gape ke seithuti se se tlhoafetseng sa Bibela. Fa a ne a bala metseletsele e e malebana le setlhogo sa Hara-Magadone mo ditokololong tsa Tora ya Tebelo tsa January 1 go ya go February 15, 1985, o ne a kgatlhega. O ne a ile a dirisa dioura-oura a batlisisa ka setlhogo seo mme a seka a bona sepe fela fa e se lekwalo leo le fitlhelwang mo go Tshenolō 16:16. O ne a kile a botsa moruti wa gagwe jaana: ‘Hara-Magedone ke eng? A o ka e tlhalosa?’ O ne a mo lebelela mme a bo a re, ‘Seo ke setlhogo se se thata tota,’ mme a bo a tsamaya. Mosadi yoo o ne a akgela gore Tora ya Tebelo, kafa letlhakoreng le lengwe, e ne ya araba potso nngwe le nngwe ya gagwe le gore e ne e le yone fela motswedi oo a neng a o bone o o neng o na le dikwalo tse di tlhokafalang malebana le setlhogo sa Hara-Magedone.”

11. (a) Ke ka ntlhayang fa o rulaganyetsa go supa ka dimakasine, mme ga kae? (b) A tirelo ya dimakasine e ka nna thuso mo tirong ya thuto ya Bibela? Tlhalosa. (c) O ka kgona jang go tsamaisa Tora ya Tebelo le Awake!? Bona letlole.

¹¹ A bobotlana o ka rulaganyetsa letsatsi le le lengwe la go supa ka dimakasine beke nngwe le nngwe, o dira gore seno e nne bontlhanngwe jwa thulaganyo ya gago ya semoya? (Bapisa Bafilipi 3:16.) “Baboledi, mmogo le babulatsela, ga ba dirise nako e e lekaneng mo tirong ya dimakasine,” lekala la Watch Tower Society la kwa Nigeria le akgela jalo. Mme a jaanong go supa ka dimakasine go tshwanetse ga sira tiro ya go dira barutwa? Go na le moo, dipego tse di tswang kwa makaleng a Mokgatlho kwa Australia le kwa Brazil di bontsha gore go tsamaisa dimakasine e ka nna kgato ya ntlha ya go simolola dithuto tse dintsi tsa Bibela. “Ke ne ka simolola dithuto di le tharo ka dimakasine tsa me tseo ke di tsamaisitseng la ntlha,” kgaitsadi mongwe wa Australia o bolela jalo. O ka kgona jang go tsamaisa dimakasine tse di ka gogelang kwa thutong ya Bibela? Leba letlole leo le nang le setlhogo se se reng “Go Tsamaisa Dimakasine” go bona dikakantsho.

A O Kile wa Leka Dikakantsho Tseno?

12. Ke dikakantsho dife tseo di itshupileng di le mosola mo mmoleding mongwe?

¹² Tirelo ya Rona ya Bogosi ya May 1984 e ne e na le tsenyeletso e e nang le ditsebe di le nne e e malebana le bosupi jwa dimakasine. A o kile wa leka dikakantsho tseo e neng ya di neela? Baboledi ba Bogosi ba tlaa bo ba dira sentle fa ba ka boela ba bala tsenyeletso eo gape le go dirisa kgakololo ya yone mo tirelong ya tshimo. Kgaitsadi yo mongwe go tswa kwa United States o ne a dira seno; diphelelo tsa gone di ne tsa mo gakgamatsa tota. O kwala jaana:

“Ke ntse ke dirisa dintlha tseo di bontshiwang mo tsenyeletsong ya March 1984 [ya May mo Afrika Borwa] ya Tirelo ya Bogosi kaga go tsamaisa dimakasine, mme ruri di a bereka! Fa 1983 e ne e fela ke ne ke tsamaisitse dimakasine di le 36 fela mo ngwageng eo yotlhe! Ke ne ke sa itumela, tota eseng segolo-bogolo ka ntlha ya dipalo tse di mo pegong, mme ka ntlha ya gore ke ne ke paletswe ke go neela batho tshedimosetso eno e e bolokang botshelo bao ba neng ba e tlhoka. Ke ne ka rapela Jehofa ka kgang eno mme ka ikemisetsa go dira boiteko jo bo oketsegileng gore ke tsamaise Tora ya Tebelo le Awake! Ke ne ka dirisa dikakantsho tseo di leng malebana le go itlhomela mokgele wa botho wa go di tsamaisa, ke dirisa neelano e khutshwane e e totobatsang makasine o le mongwe fela, ke ya tirelong ya tshimo ka metlha ka letsatsi la dimakasine, ebile ke na le boikutlo jo bo tshwanetseng. Jaanong fa mong wa ntlo a gana mpho e e tlwaelegileng, ke a re: ‘Mme, fa go ntse jalo ke tla go tlogelela fela ditokololo tsa bosheng jaana tsa Tora ya Tebelo le Awake! ka disente di le 40.’ Dintlha tseno eleruri di a bereka. Mo dikgweding di le nne tse di fetileng, ke ile ka kgona go nna le palogare ya dimakasine di le 14 ka kgwedi!”

13. Ke kgakololo efe eo e neng ya gatisiwa ka 1888 eo e santseng e le mosola le gompieno?

¹³ Mo tokololong ya Zion’s Watch Tower ya December 1888, kafa tlase ga setlhogo se se reng “Kakantsho go Barobi,” go ne ga neelwa kgakololo eno: “Bothata jo bogolo go gaisa mo go ba le bantsi go lebega e le, ereka dipelo tsa bone di tletse ka mafoko a a molemo, ba raelesega go bua go le gontsinyana malebana le Thulaganyo ya Modimo.” A kgakololo eo e santse e bereka? Fa molebedi mongwe wa potologo wa Fora a ne a bodiwa gore ke eng seo baboledi ba ka se dirang gore ba oketse dimakasine tseo ba di tsamaisang, o ne a araba jaana: “Bua ka bokhutshwane. Bua ka tlhamalalo.”

14, 15. Ditshwantsho tse di go Tora ya Tebelo le Awake! di ka dirisiwa jang mo bosuping? Neela dikai.

¹⁴ Ka dipuo tse dintsi tseo dimakasine tseno di tlhagang ka tsone, ditshwantsho tse di gogelang tsa mebala e le mene di ile tsa tlatseletsa mo go gogeleng ga molaetsa wa Bogosi jaaka o fitlhelela batho ba mefuta e e farologaneng. Go simolola ka tokololo ya January 8, 1987, Awake! e ile ya pata Tora ya Tebelo mo go gatisiweng ka mebala e le mene ka dipuo di le dintsi tsa konokono. A o ile wa dirisa dikao le ditshwantsho tseo di leng mo dimakasineng tseno jaaka dintlha tseo di buelelwang? Ba le bantsi ba ile ba dira jalo, ka diphelelo tse di molemo. Theresa, yoo esaleng e nna morongwa kwa Botlhaba jo bo Kgakala ka 1976, O ile a dira jalo. O tsamaisa dimakasine di le 260 ka kgwedi. “Ke dirisa ditshwantsho go tlotlomatsa ntlha ya konokono ya neelano ya me,” o bolela jalo. “Ka makgetlo a le mantsi ke bontsha mong wa ntlo setlhogo se se kafa ntle fela le go umaka setlhogo, mme e bo ekete makasine oo o itsamaisa ka boone.”

¹⁵ Kay, yoo eleng morongwa kwa nageng ya Suriname, o ile a nna le boitemogelo jo bo tshwanang le joo. Ene le monna wa gagwe ba na le dingwaga di le lesome ba le koo, mme ba fitlhela ditshwantsho di le mosola fa ba supa, segolo-bogolo mo go bao eleng ba tumelo ya Sehindu. Ka ntlhayang? Kay o tlhalosa jaana:

“Bodumedi jwa Sehindu ke bodumedi jwa ditshwantsho. Kwa ntlong nngwe, ke ne ka botsa mosadi mongwe jaana: ‘Tsweetswee a o ke o mpolelele gore leina la medimo ya lona e e mo ditshwantshong tsa lona ke bomang.’

“‘O ke Shiva,’ o ne a araba jalo.

“‘Jaanong, ke ofe o eleng modimo o mogolo?” Ke ne ka botsa jalo morago ga moo. Tsho. ‘A re ka bala Yeremia 10:10-12? Ke Modimo ofe o o ka bolelang gore ke Mmopi? Ke Jehofa fela. Re a itse gore o rata ditshwantsho. A ditshwantsho tseno tse di go Tora ya Tebelo le Awake! ga di dintle ebile ga di kgatlhise? A ga o kitla o rata go ipelela go ithuta gore di bolelang?’”

Ke ka ntlhayang fa o sa leke go nyalanya ditshwantsho le motlotlo wa gago nako e e tlang fa o le mo tirong ya dimakasine?

16. Ke dikakantsho dife tseo di tswang mo mmoleding mongwe wa kwa Hong Kong tseo o ka fitlhelang di le mosola?

¹⁶ Fa Gene a ne a direla kwa Hong Kong, o ne a tsamaisa palo-gare ya dimakasine di le 300 kgwedi le kgwedi. O ne a dira seno jang? O tlhalosa jaana:

“Santlha, rapelela masego a ga Jehofa mo go supeng ga gago ka dimakasine. Sa bobedi, nna le tsholofelo, nyenya, o bo o nne botsalano. Sa boraro, dumalana le boemo le go iketleeletsa go dumalana le mong wa ntlo, o bo o lebe dintlha tseo lo utlwanang le ene mo go tsone. Sa bone, otora dimakasine tse di lekaneng tsa kgwedi yotlhe. Ke na le otoro e kgolo, ereka seno se ntlhotlheletsa ka mo go oketsegileng. Sa botlhano, beela mantsiboa a le mangwe kwa thoko mo bekeng tirelo ya dimakasine, ereka batho ba le bantsi baa bo ba le kwa gae ka nako eo ebile ba iketlile. Sa borataro, simolola tselana ya dimakasine, lefa e le e nnyane.”

Go Simolola Tselana ya Dimakasine

17. (a) Molao-motheo o o mo go Ditihō 15:36 o dirisiwa mo karolong efe ya go supa ga rona ka dimakasine? (b) Mo dinageng tseo tirelo ya tsone ya poso e leng bokoa, baboledi ba ka tsamaisa dimakasine ka tsela efe e nngwe?

¹⁷ “Go nna le dipego tse di nepagetseng tsa koo go tsamaisitsweng dimakasine gone mme o bo o boela ka metlha ke tsela e nngwe ya go oketsa go anamisiwa ga dimakasine,” Ollie o bolela jalo, yoo o ileng a direla kwa nageng nngwe ya Afrika kwa Burkina Faso. “Ke ile ka nna le batho ba le 15 mo tselaneng ya me ya dimakasine. Ereka Burkina Faso e se lekala le le gatisang mme go romelwa ga dilo ka poso go sa tlhomamisege, gantsi basupi ba amogela dimakasine tsa bone tseo ba di tsamaisang di le ka ditlhopha, gongwe ditokololo di le nne kana di le tlhano ka nako e le nngwe.” A go ntse jalo le ka naga ya lona? Fa e le gore go ntse jalo, go ka dirwang go fenya kgwetlho eno ya go tsamaisa dimakasine? “O ka nna wa tshwara sekaelo sa tokololo nngwe le nngwe mo matsogong a gago, o bo o phatlalatsa dimakasine tseo, mme o kope motho yo o kgatlhegang gore a tlhophe gore ke ofe o a tla ratang go o bala,” Ollie o akantsha jalo. “Gantsi, o di tsaya tsotlhe.”

‘Penologa ka Kgang e e Monate’

18. Ke dikarolo dife tsa dipego tsa bosheng jaana tsa tirelo ya tshimo tseo di akgolelwang segolo-bogolo, mme re ka tlhokomela eng segolo-bogolo?

¹⁸ Lona baboledi ba Bogosi lo ile lwa thusa gore dipeeletso di le mmalwa tsa dimakasine tseno tsoopedi di tlhatlhoge ka mo go gakgamatsang. Lo tshwanetse go akgolelwa tlhoafalo ya lona mo go anamiseng mafoko a a molemo ka tsela eno. Gape seo lo se akgolelwang ke go tlhatloga ga palogotlhe ya dimakasine tseo di tsamaisitsweng. Lefa go ntse jalo, gongwe re ka tlhokomela dimakasine tseo re di tsamaisang ka namana go se kae. Mo ditshimong tseo di berekilweng thata, dimakasine tseo di tsamaisitsweng ke mmoledi a le mongwe di wetse tlase. Ereka re tshela mo gare-gare ga motlha ono wa bofelo, a re ka ‘penologa ka kgang e e monate’ ya Bogosi le eleng go feta moo ka go supa ka dimakasine?​—Pesalema 45:1; 1 Petere 4:7.

19. Re ka emela boammaaruri jwa Bogosi ka ditsela dife tse pedi?

¹⁹ Keresete o palamela pele mo mokgabong wa Bogosi gore a atlege mo go galaletseng leina le le boitshepo la ga Rraagwe le go tlotlomatsa bolaodi jwa Gagwe jwa lobopo lotlhe. (Tshenolō 6:2) A re ke re dirisetseng diteme tsa rona le dikgatiso tsa rona go itsise go goroga ga gagwe. Ekete re ka tsholetsa mantswe a rona ka boikanyego mmogo le setlhopha sa molebedi se se tloditsweng jaaka se kopanela le Keresete mo go emeleng boammaaruri jwa Bogosi jwa Modimo jo bo tlhomilweng jwa Bomesia. Ee, a re anamiseng Tora ya Tebelo le Awake! gotlhe​—eleng dimakasine tseo di nang le seabe sa konokono fa Kgosi ya rona e ntse e ‘palamela pele ka ntlha ya boammaaruri.’​—Pesalema 45:4.

A O A Gakologelwa?

◻ “Kgañ e e monate” eo e tshwanetseng ya tlhotlheletsa pelo ya gago ke efe?

◻ Go ‘pagamela pele ka ntlha ya boammaaruri’ ga ga Keresete go tlisa diphelelo dife?

◻ Tora ya Tebelo le Awake! di direla “ka ntlha ea boamarure” ka tsela efe?

◻ Re ka tlhokomela bosupi jwa dimakasine jang ka mo go oketsegileng?

[Lebokoso/​Setshwantsho mo go tsebe 18]

GO TSAMAISA DIMAKASINE

A O Kile wa Bo Leka?—

◆ Bosupi jwa ka ntlo le ntlo

◆ Bosupi jwa mmila

◆ Bosupi jwa kwa dikgwebong

◆ Bosupi jwa tselana ya dimakasine

◆ Bosupi jwa mantseboa

◆ Fa go ganwa mpho ya buka

◆ Fa o dira maeto a go boela

◆ Fa o boela mo diithuting tsa pele tsa Bibela

◆ Fa o le mo loetong kana o reka

◆ Fa o buisana le ba losika, badiri-mmogo, baagelani, ba o tsenang sekolo nabo, kana barutabana