Thapelo ya Mount Hiei—A e ne e le Tsela ya go Lere Kagiso ya Lefatshe Lotlhe?

ATHAPELO e ka tlisa kagiso mo lefatsheng lotlhe? “Kagiso ga e kake ya tla fela ka go rapela. Ga go kake ga nna motlhofo ka tsela eo,” ga bolela jalo Gijun Sugitani, morulaganyetsi wa pokano ya thapelo e e neng e tshwerwe ka August 1987 mo Japane. “Mme ga ke gopole gore kagiso e ka nna gone kwantle ga thapelo.” Pono ya gagwe e ne e tshwana fela le ya Majapane mangwe a ka nna 500 le baemedi ba moseja ga mawatle ba le 24 bao ba neng ba le gone mo Phuthegong ya Sedumedi ya 1987 e e neng e tshwaretswe mo Kyoto, Japan.

Lekoko la Tendai la Mabuda le ne la buelela pokano eno ya thapelo jaaka tatediso ya e e neng ya tshwarwa ka 1986 kwa Assisi (Italy) mme la e rulaganyetsa gore e tsamaele gongwe le segopotso sa bo-1 200 sa go bulwa ga Tempele ya Enryakuji mo Mount Hiei. Batho ba bodumedi jwa Sebuda, bao ba reng ke Bakeresete, ba-Confucian, Mahindu, Mamoselema, Bajuda, Masikh, le Mashinto ba ne ba fapaanela go rapela mo thabeng eo. A tota pokano eo ruri e ne e le tsela ya go lere kagiso mo lefatsheng lotlhe?

Pokano ya “Mokgabisa wa Dithunya”

“Pokano eno ke mokgabisa wa dithunya wa sedumedi,” ga bua jalo Etai Yamada, moruti-mogolo wa lekoko la Tendai le modula-setilo yo o tlotlegang. “Ga go na sethunya sepe se se latlhegelwang ke sebopego sa sone le monko.” O ne a raya gore fa fela ditumelo di utlwana mmogo mo keletsong ya tsone go lere kagiso ya lefatshe lotlhe, nngwe le nngwe ya tsone e ka nna le ditumelo tsa yone tse di farologanyeng, fela jaaka dithunya tse di sa tshwaneng mo mokgabiseng.

Gareng ga “dithunya” tse di tlhomologileng kwa pokanong eo e ne e le Kereke ya Katoliki, eo e neng e emetswe ke Francis Cardinal Arinze wa Bokwaledi jwa Vatican jwa batho ba eseng Bakeresete. Arinze o ne a bala molaetsa wa ga mopapa, o o neng o re “kagiso e ka se nne gone kwantle ga thapelo mme lemororo dintwa di ka nna tsa simololwa ke palo e potlana ya batho, kagiso e tlhoka tirisanyo-mmogo le popagano ya mongwe le mongwe.”—Mainichi Daily News, August 5, 1987, tsebe 12.

Fa e le gore tsholofelo ya go nna gone ga kagiso mo lefatsheng lotlhe “go tlhoka tirisano-mmogo le popagano ya mongwe le mongwe,” Modimo yo ba mo rapelang o nonofile go le kana kang? Batla-pokanong ba ne ba rapelela kagiso, mme ba ne ba dumela gore batho ke bone ba neng ba ka e tlisa ka maiteko a bone. Fela jaaka mokgabisa wa dithunya o montle, pokano ya bone ya thapelo e ne e tshwanetse go nna boitshupo jo bontle jwa maiteko a bone.

Mokgabisa wa dithunya o montle fa o lebeletswe, mme fa tiragalo e e kgethegileng e sena go feta, dithunya tse di senang medi di a swaba mme bontle jwa tsone bo a nyelela. Bontle jwa sethunya sengwe le sengwe le matsetseleko a mokgabisa oo ka bonako di a nyelela. Mme dithunya tseo ga di a bewa foo go tlhagisa maungo ape. A pokano eno e ile ya felela jaaka “mokgabisa wa dithunya” o o ungwang maungo?

Baeteledipele ba bodumedi ba ba neng ba tlhakanetse ka bobone ga baa ka ba kgotsofadiwa ke diphelelo. “Ba ne ba ratile gore ba ope kgomo lonaka kaga gore ke dikgato dife tseo ditumelo di tshwanetseng go di tsaya mo isagweng, mme ba re nako e ne e sa lekanela gore go nne le dipuisano tse di ntseng jalo,” ga bega jalo Asahi Evening News. Lefa go ntse jalo, go ne go lebeletswe tiragalo e e ntseng jalo. “Boikaelelo jwa rona,” ga bolela Takaaki Kobayashi, mongwe wa barulaganyetsi ba pokano eo, “ke go utlwa dikakantsho go tswa tumelong nngwe le nngwe gore ke ditsela dife tse di botoka thata go bona kagiso. Ntlha ya konokono ke gore motlhakanedi mongwe le mongwe a reetse dipono tsa ba bangwe kwantle ga go akgela kana go arabela kana go tsosa kgang.” Maiteko a bone kwa pokanong ya thapelo a ne a lekanyeditswe fela mo go reng ba reetse ba bangwe, eseng go tsaya kgato. Ka ntlha ya gone moo, pokano “e ne ya palelwa ke go tlhoma lenaneo la dipuisanyo le le phepafetseng la go fitlhelela maikaelelo a pokano eo.”

A e ne e le ya Bakeresete ba Boammaaruri?

Batho ba ba lekang thata go latela Jesu Keresete ba ka nna ba ipotsa ba re: ‘A Mokeresete o tshwanetse go tlhakanela mo pokanong e e ntseng jalo ya thapelo?’ Lebaka la go bo e ile ya tshwarelwa mo Mount Hiei, ebong thaba e e boitshepo ya lekoko la Mabuda, e dira gore motho a ikakanye. A o akanya gore Jesu Keresete o ne a ka tlhatlogela mo thabeng e e boitshepo ya Mabuda go rapelela kagiso?

Moaposetoloi Paulo o ne a tlhagisa balatedi ba ga Jesu Keresete a re: “Se pataganeleñ yokwe le ba ba sa dumeleñ, e le mo go sa lekalekaneñ: gonne tshiamō e na le bolekane bohe le tshiamololō? kgotsa lesedi le na le kabalanō ehe le lehihi? Me Keresete o na le kutlwanō ehe le Beliale? kgotsa eo o dumèlañ o na le kabèlō ehe le eo o sa dumeleñ? Le tempela ea Modimo e na le tumalanō ehe le medimo ea disètwa? . . . Me ke gōna, Cwañ mo gare ga bōnè, lo lomologanè, go bua Yehofa, me lo se ka loa ama sepè se se itshekologileñ; me ke tla lo amogèla.”—2 Bakorintha 6:14-17.

A go rapela dithapelo mo pokanong ya tlhakanelo-tumelo mo thabeng e e boitshepo ya Mabuda ga se go ‘pataganela jokwe le ba ba sa dumeleng’? A mme seno he se raya gore Bakeresete ba boammaaruri ba tshwanetse go itlhokomolosa go rapelela kagiso? Gotlhelele nnyaa!

Thapelo ya Kagiso

Mo polelelong pele ya gagwe e e malebana le ‘metlha e e tla tlang kwa morago,’ moperofeti Isaia o ne a bua ka bontsi jwa bao ba tla reng: “Ntloñ, a re tlhatlogeleñ kwa thabeñ ea ga Yehofa,” eseng kwa Mount Hiei ya Mabuda. ‘Thaba ya ga Jehofa’ e tshwantshetsa kobamelo ya boammaaruri ya Modimo wa Bibela. ‘Go tlhatlogela’ kwa thabeng eo go felela ka eng? Ebu, Jehofa “o tla re ruta ditsela tsa gagwè, me re tla sepela mo ditselaneñ tsa gagwè,” ga bolela jalo Isaia! “O [Jehofa] tla atlhola ha gare ga merahe,” moperofeti a oketsa. Ka jalo, go tla nna le kagiso mo lefatsheng lotlhe, ka go bo moperofeti o ne a bolelela pele gore baobamedi ba boammaaruri ba tla “thula dichaka tsa bōnè magale a megoma, le marumō a cōna dithipa tsa mabèlè: morahe ga o ketla o ekèla morahe chaka; le gōna ga ba ketla ba tlhōla ba ithuta tlhabanō gopè.”—Isaia 2:2-4.

Boemo jono bo setse bo le gone gareng ga Basupi ba ga Jehofa, mme ka bonakonyana bo tla apesa lefatshe lotlhe. Mme jang? Jehofa Modimo, eseng batho, ke ene a tla tlisang kagiso ya go ya go ile ka Bogosi jwa gagwe. Bo tla tlosa mo lefatsheng lotlhe ba ba senyang kagiso mme bo tla lere lefatshe la paradaise. (Tshenolō 11:15, 18) Ka go sa tshwane le mafoko a a builweng kwa phuthegong eo e neng e tshwana le “mokgabisa wa dithunya” o o kgatlhang mme o sena maungo, mafoko a ga Jehofa ga a ke a boela mo go ene a sa diragadiwa.—Isaia 55:11.

Ke eng he, re tshwanetse go rapelela kagiso fa e le gore Modimo o tla e tlisa go sa kgathalesege maiteko a batho? Ka go rapelela gore Bogosi jwa Modimo bo tle, re a bo re supa keletso ya rona ya go nna le kagiso mme re bontsha tumelo ya rona mo tseleng ya Modimo ya go e tlisa mo lefatsheng. (Mathaio 6:9, 10) A e ka ne e le gore re tla bona kagiso e e tlisitsweng ke Modimo kana nnyaa go ikaegile ka ‘go lebelela ga rona mo go Jehofa.’ Jalo tla mo “thabeñ ea ga Yehofa” mme o kopanele mo go rapeleleng kagiso ya boammaaruri e a e solofeditseng!—Pesalema 37:9, 11.

[Setshwantsho mo go tsebe 8]

Mokgabisa wa dithunya o montle fa o o lebeletse, mme ga o a direlwa go ungwa sepe

[Setshwantsho mo go tsebe 9]

Mount Hiei, thaba e e boitshepo ya lekoko la Mabuda a Tendai, koo pokano ya thapelo e neng e tshwaretswe gone