Sesupo—A ke Bosupi jwa Gore Lefatshe je Lesha le Gaufi?

“Morahe o tla cogologèla morahe, le bogosi bo cogologèle bogosi: me go Ua nna meshwèle, le dithoromō tsa lehatshe mo maheloñ mañwe le mañwe.”—Mathaio 24:7.

FA NTWA ya Lefatshe I e ntse e lowa, The Watch Tower, ya April 15, 1917, e ne ya tsopola mafoko ana ya bo ya tlhalosa jaana: “Jaanong re bona bontlhanngwe jwa tiragatso ya polelo eno ya pOlelelopele, ka go bo tota-tota merafe yotlhe e mo ntweng ya bOipolao. Selekanyo sa dijo tse di leng gone se ntse se ngotlega gongwe le gongwe le ditlhwatlhwa di ya kwa godimo.”

Jaanong, dingwaga di le 71 morago ga foo, makasine ono o ntse o gogela tlhokomelo ya babadi ba one mo polelelopeleng eno. Boraditiragalo ba le bararo ba bogologolo ba ne ba kwala polelelopele eno jaaka karolo ya “seshupō” se se filweng ke Jesu Keresete.—Mathaio 24:3, 7; Mareko 13:4, 8; Luke 21:7, 10, 11.

Fa esale ka 1914, dimilione tse di makgolokgolo tsa batho di ile tsa bolawa ke ntwa, ditlala, dikgogodi tsa bolwetse, le dikotsi tse dingwe. The New Encyclopædia Britannica (1987) e bolela fa go nnile le “Dithoromo tse dikgolo tsa lefatshe go gaisa mo ditiragalong” di le 63, mo boleeleng jwa dingwaga di le 1 700 tse di fetileng. Mo palogotlheng eno, di le 27, kana 43 lekgolong, di ile tsa diragala fa esale ka 1914. Buka Terra Non Firma, e e kwadilweng ke Bo-porofesa Gere le Shah, e na le tse dintsi tse di akaretsang nako e telejana. Mo palogotlheng ya dithoromo tsa lefatshe tse “dikgolo” tse di mo lenaaneng leo, 54 lekgolong ya tsone e ile ya diragala fa esale ka 1914.a Le eleng fa go ka bolelwa gore direkoto tsa dingwaga-kgolo tse di fetileng di ne di sa felela, ga re kake ra tila go konela ka gore batho ba ne ba amiwa ke dithoromo tsa lefatshe fela thata mo motlheng wa rona.

Sengwe se se tShosang le eleng go feta seo se neng sa ama dipelo tsa batho ke go thunya ga bomo mo metseng ya Japane ebong Hiroshima le Nagasaki. Mebuso e e nang le dibetsa tsa nuklea jaanong e na le dibetsa tseo di ka bolayang ka bontsi mo eleng gore batho jaanong ba tshosediwa ke go nyelediwa gotlhelele. Ke fela jaaka raditiragalo Luke a ne a tswelela go kwala jaana mo polelelopeleng ya ga Jesu: “Go tla nna dilō tse di rerisañ ha di bōnwa, le dichupō tse di cwañ legodimoñ . . . le mo lehatshiñ pitlaganō ea merahe, e rarañwa . . . Le batho ba idibadiwa ke poihō le tebèlèlō ea dilō tse di tlañ mo lehatshiñ.”—Luke 21:11, 25, 26.

Lefa babusi ba bagolo ba ka dumalana go fokotsa dipalo tsa dibetsa tse di mo mabolokelong a bone a ditlhabano tsa ntwa, ditumalano tse di ntseng jalo ga di ne di fokotsa go boifa ga motho bokebekwa jo bo setlhogo, go wa ga ikonomi, le borukhutlhi. “Seo se tshwenyang batho thata gompieno/’ ga bua jalo pampiri nngwe ya dikgang ya mo Afrika, “ke polokesego ya bone ya sebele. . . . Bokebekwa bo godile thata . . . ; poifo e gongwe le gongwe.” Ee, mme Jesu o ne a bolelela pele gore ‘boikepo bo tla ntsifala’ mme sena ke karolo e nngwe gape e e tlhomameng ya sesupo.—Mathaio 24:12.

“Mahoko a a Molemō”

Lefa go le jalo, o tla thusiwa ke go utlwa, gore ditiragalo tse di tShosang tse di sa tswang go umakiwa di ne tsa bolelelwa pele gore di ne di tla tsamaisana mmogo le “Mahoko a a Molemō, [a a tla rerwang] mo lehatshiñ yeotlhe.” (Mathaio 24:14) “Mahoko a a Molemō” ke a Bogosi jwa Modimo. Puso eo ya lefatshe e setse e kgobokantse dimilione tsa babusiwa ba ba ikanyegang. Mo nakong e khutshwane e tla tsenelela mo mererong ya batho mme e kgotsofatse keletso ya motho ya lefatshe je lesha la tshiamo.—Luke 21:28-32; 2 Petere 3:13.

Ba le bantsi ba kgaphela “Mahoko a a Molemō” kwa thoko ka go sa a dumele. Bangwe ba re baa a dumela, mme ga go sepe seo ba se dirang ka one. Ba bangwe ba a dirisa ka nakonyana, ba bo ba simolola go belaela. A boikutlo jo bo ntseng jalo jo bo sa siamang bo ile jwa bolelelwa pele gape jaaka karolo ya sesupo? Se se botlhokwa le go feta seo ke gore, sesupo sena se ka go solegela molemo jang?

[Ntlha e e kwa tlase]