Sesupo—A o a se Thlokomela?

“RE BATLA gore batho ba naga nngwe le nngwe ba ipelele katlego, molemo le boitumelo. Seno se ka fitlhelelwa fela ka go nna le lefatshe le le senang nuklea, leo le senang thubakanyo.”—Perestroika, ka moeteledipele wa Soviet ebong Mikhail Gorbachev.

Go a utlwala, go bo batho ba le bantsi ba belaela gore a tota-tota motho a ka kgona go tlisa maemo a a ntseng jalo a lefatshe. Moeteledipele mongwe, ebong Jesu Keresete, o ne a solofetsa sengwe se se molemo go gaisa seo—lefatshe la paradaise koo le eleng loso lo tla fedisiwang. (Mathaio 5:5; Luke 23:43; Yohane 5:28, 29) Legale, tsela ya go fitlhelela seo ke fela fa Modimo a ka tsenelela. Mo karabong ya potso ya gore go tsenelela gono go tla tla “leñ,” Jesu o ne a bua jaana: “Bogosi yoa Modimo ga bo tle ka go bōnwa.” Santlha, ke fela bao ba lebelelang ka tlhoafalo ka leitlho la tshwantshetso le le jaaka la ntsu ba tla bo lemogang. (Luke 17:20, 37) Ka ntlhayang fa go le jalo?

Lebaka la go bo re Tlhoka Sesupo

Fa esale a tlhatlogela kwa legodimong, Jesu Keresete o “agile mo lesediñ ye le sa kakeñ ya atamèlwa; eo go señ motho opè eo o kileñ a mmana, le gana opè a sa kake a mmōna.” (1 Timotheo 6:16) Ka jalo batho ga ba kitla ba mmona gape ka matlho a mmatota. Ke fela jaaka Jesu a ne a bua jaana mo letsatsing la bofelo la botshelo jwa gagwe jwa selefatshe: “E tla re kwa pelenyana, lehatshe le bo le sa tlhole le mpōna.” (Yohane 14:19) Mme o ka bonwa ka tsela ya tshwantshetso fela.—Baefesia 1:18; Tshenolō 1:7.

Lefa go le jalo, Jesu o ne a bolelela barutwa ba gagwe gore ba tla kgona go lemoga fa Bogosi jwa Modimo bo simolola go busa. Jang? Ka sesupo. Fa a araba potso e e reng, “Sesupo sa go nna gone ga gaga e Ha nna eng?” Jesu o ne a ba fa bosupi jo bo bonalang jwa go busa ga gagwe go go sa bonaleng ga isagwe.—Mathaio 24:3, NW.

Sesupo se ne se akareletsa le setshwantsho seo se neng se bontsha motuta wa batho bao se tla ba solegelang molemo. “Goñwe le goñwe kwa setoto se gōna,” Jesu o ne a bolela, “manoñ a tla a phuthègèle gōna.” (Mathaio 24:28) Botlhe ba ba batlang go talola bokhutlo jwa tsamaiso ya gone jaanong ya dilo gore ba tsene mo letatsheng je lesha la Modimo ba tshwanetse go ‘phuthega mmogo’ le go ipelela dijo tsa semoya gammogo le “baitshenkedwi” ba sekantsu ba ga Keresete.—Mathaio 24:31, 45-47.

Go Itisa Kgatlhanong le go Fela Pelo

Ga go motho ope yo o ka itseng letsatsi la bokhutlo jwa tsamaiso ya gone jaanong e e boikepo ya dilo. “Kaga letsatsi yeuō kgotsa nakō euō,” Jesu o ne a bolela go re, Olga go itse opè, leha e le baengele, ba ba kwa legodimoñ, leha e le Morwa, ha e se Rara hèla.”—Mareko 13:32, 33.

Lefa go le jalo, a e ka ne e le gore sesupo seo se ka boñ a la mo nakong ya dikokomana di le dintsi tsa batho? Nnyaa. Sesupo se tshwanetse go bonala mo kokomaneng e le nngwe tela e e kgethegileng. Yone kokomana eo e neng ya boñ a go simologa ga sesupo e tla bona gape konelo ya sone ka “sepitla se segolo mo metlheñ euō, se se e señ se ke se nne, e sa le ka tshimologō ea lehatshe.” Boraditiragalo ba bararo, ebong Mathaio, Mareko, le Luke, ba ne ba kwala tlhomamisetso ya ga Jesu kaga seno.—Mareko 13:19, 30; Mathaio 24:13, 21, 22, 34; Luke 21:28, 32.

Lefa go ntse jalo, go na le kotsi ya go tela pelo. Go setse go tetile dingwaga di le masome a supa le bone ta esale Ntwa ya Letatshe I e tlhagoga ka 1914. Go ya ka pono ya motho, sena se lebega e le nako e telele. Mme Bakeresete ba matlho a sekantsu bao ba boneng Ntwa ya Lefatshe I ba santse ba tshela. Kokomana ya bone ga e ise e tete.

Jesu fa a ne a naya sesupo, o ne a tlhagisa ka kotsi ya go fela pelo. O ne a bua ka batho bao ba neng ba tla bua jaana mo dipelong tsa bone: “Morèna oa me o diegile.” Jesu o ne a bontsha gore maikutlo a a jalo, fa a sa tlhokomelwe, a ka felela ka tira nngwe ya boeleele. (Mathaio 24:48-51) Baaposetoloi ba ga Keresete ba ne ba bua go le gontsi mabapi le seno.

“Bashotli”

Go ya ka mokwadi wa Bibela ebong Jude, baaposetoloi ba ga Keresete ba ne ba utlwatsa tlhagiso e e latelang: “E tla re mo motlheñ oa bohèlō go tla tla bashotli, ba ba tla tsamaeañ kaha dithatoñ tsa bōnè tsa boikèpō.”—Yude 17, 18.

Go eletsa botshelo mo lefatsheng le le phepa le lesha go ka nna ga emisediwa motlhofo fela ke ‘dithato tsa boikepo.’ Seno se kotsi segolo bogolo gompieno ka ntlha ya mekgwa ya go bua ya lefatshe le ya ditlhaeletsano. Thubakanyo, tirisa-badimo, boitsholo jo bo sa siamang jwa kafa dikobong ga di ise di ko di dirwe ka selekanyo sena fa esale mo ditiragalong tsa motho. Gantsi ke tsone kgang-kgolo mo radiong kana mo mminong o o opelwang, mme di bonwa mo dithulaganyong tse dintsi tsa TV, di-video, dipapatso, dibuka, le dimakasine.

Sesupo se supa kaga bokhutlo jwa bosula jo bo ntseng jalo. Ka tlholego, batho bangwe bao ba nang le keletso ya dilo tseo tse di bosula ba kgala sesupo. Jaaka go boleletswe pele, ba tatalala ka go re: “Dilō cotlhe di sa nntse di nntse yaka di nntse di nntse le mo tshimologoñ ea popō.”—2 Petere 3:3, 4.

‘Go Tsidifala ga Lorato’

Moragonyana jaana, mokwadi mongwe wa Moamerika yo o dingwaga di 75, ebong Paul Bowles, o ne a nna le puisano le makasine wa Newsweek. Fa a araba potso e e reng, “Pono ya gaga ke eng ka lefatshe?” Bowles o ne are: “Lefatshe le senyegile thata mo boitsholong. Ga go ope yo o ikanyegang ka tsela eo go neng go ntse ka gone dingwaga di le 60 tse di fetileng. Go ne go na le kgopolo ya gore motho yo o tlotlegang ke yo o ntseng jang; e ne. e le sengwe se se kwa godimo thata mo ngwaong ya rana ya Bophirima. Jaanong ga go ope yo o [tshwenyegang]. Gape madi a tseetswe kwa godimo thata.”

Boemo jono bo ntse fela jaaka Bibela e bo boleletse pele. Jesu o ne a bolelela pele are: “E tla re ka boikèpō bo tla bo bo ntsihetse, loratō loa bontsi bogolo lo tla tsidihala.” (Mathaio 24:12; 2 Timotheo 3:1-5) Jaaka bogagapa le bohula di ntse di ntsifala, go rata Modimo go a fokotsega. Batho ba le bantsi ba bontsha gore ba baya dikeletso tsa bone kwa pele ga melao ya Modimo ka go tsenelela mo ditirong tsa bosenyi, borukhutlhi, go sa ikanyege mo kgwebong, boitsholo jo bo sa siamang jwa kafa dikobong, le go dirisa diokobatsi ka mo go sa tshwanelang.

Bangwe ba lemoga tiragatso ya sesupo mme ba palelwa ke go se dirisa ka go bo ba tshwaregile ka go ikgotsofatsa. Mo letlhakoreng je lengwe, go tlhokomela sesupo go batla bopelotelele mo go bontsheng lorato lo lo senang bogagapa mo Modimong le mo moagelaning wa gago.—Mathaio 24:13, 14.

“Ditlhodiègèlō tsa Botshelō”

Jesu o ne a tlhagisa gape gore, kwantle ga boitlosobodutu jwa bogagapa, ditlhokafalo tse di tshwanetseng tsa nama le tsone di ka tshwara ba bangwe gore ba tlhokomologe sesupo. O ne a kgothatsa jaana: “Lo itlhōkōmèlè, gore e se re kgotsa dipelo tsa lona tsa imahadiwa ke go kgora bobe, le ke go tagwa, le ke ditlhodiègèlō tsa botshelō yono, me letsatsi yeuō ya lo wèla ka choganeco yaka seru: Gonne le tla wèla yalo botlhe ba ba agileñ mo lehatshiñ yeotlhe hèla.”—Luke 21:34, 35.

Legale, Bibela, e rotloetsa botshelo jo bo itumetseng jwa lelapa. (Baefesia 5:24-6:4) Gantsi sena se tlhoka gore tlhogo ya lelapa e bo e thapilwe kana e dira kgwebo ya mofuta mongwe go tlamela mosadi wa gagwe le bana. (1 Timotheo 5:8) Lefa go le jalo, go tla bo go sa tshwanela gore motho a letle botshelo jwa gagwe go dikologa fela mo go tlhokomeleng lelapa, kgwebo, le dilo tse di bonalang. Ka ntlha ya kotsi eno, Jesu o ne a tlhagisa jaana: “Me yaka go kile ga dihala mo metlheñ ea ga Noa, go tla nna héla yala le ma metlheñ ea Morwa Motho. Ba ne ba ya, ba nwa, ba nyala, ba neèlwa nyaloñ, ga tsamaea ga tla letsatsi ye Noa o tsènañ mo tluñ e e kokobalañ ka yeōna, me morwalèla oa tla, oa ba senya botlhe hèla . . . Go tla nna hèla yalo mo motlheñ o Morwa Motho o tla senolwañ ka ona.”—Luke 17:26-30; Mathaio 24:36-39.

A o tla “Tseèwa” Kana o tla “Tlogèlwa”?

Nako e ile. Gautshwane fela, Bogosi jwa Modimo bo tla tsenelela go baakanya dilo. Jalo motho mongwe le mongwe o tla amiwa ke nngwe ya ditsela tse pedi. Jaaka Jesu a tlhalositse: “Hoñ banna ba le babedi ba tla bo ba le mo nageñ; moñwe o tla tsèwa, moñwe a tlogèlwe: Basadi ba le babedi ba tla bo ba sila; moñwe o tla tsèwa, moñwe a tlogèlwe.”—Mathaio 24:40, 41.

Fa nako e e kotsi eo e goroga, boemo jwa gaga e tla bo e le bofe? A o tla tlogelelwa go senngwa kana o tla tseelwa phalolo? Go go kaela mo tseleng e e siameng, tlhokomela gape setshwantsho sena se se filweng ke Jesu: “Kwa setoto se gona, manoñ [“bontsu,” NW] le aōna a tla phuthègèla gona.”—Luke 17:34-37; Mathaio 24:28.

Jalo Jesu o ne a otlelela botlhokwa jwa go dira ka go bonela kgakala le ka kutlwano. Bao ba tseelwang phalolo ke bao ka metlha ba phuthegang mmogo le go solegelwa molemo ke dijo tsa semoya tse Modimo o di baakanyetsang. Dimilione di setse di lemogile gore go fepiwa mono ga semoya go tla fela ka go kopanela gaufi le diphuthego tsa Basupi ba ga Jehofa tse di fetang 55 000 le ka go ithuta dikgatiso tsa Bibela jaaka e o e balang jaanong.

Basupi ba ga Jehofa ba ba fetang dimilione tse tharo ba bontshitse tumelo mo sesupong ka go tsaya karolo mo ‘go rereng mafoko a a molemo a bogosi’ mo baagelaning ba bone. (Mathaio 24:14) A o arabela ka tsela e e siameng mo mafokong a a molemo? Fa go le jalo, o ka akanya thata ka tsholofetso ya go falolela mo paradaiseng ya selefatshe.

[Setshwantsho mo go tsebe 5]

Ba le bantsi ba tshwaregile thata ka dikgatlhego mo e leng gore ba tlhokomologa sesupo

[Setshwantsho mo go tsebe 6]

Go Tlhokomela sesupo go kopanyeletsa go kopana mmogo le go ikotla ka Lefoko la Modimo