“Boikokobeco bo tlo bo Ètèlèle Tlotlō Pele”

MONNA mongwe yo mmotlana o ne a le mo kgolegelong kwa Egepeto ka ditatofatso tsa maaka. O ne a sotlilwe fela thata, mme go ne go sa lebege go na le tsholofelo ya gore o tla gololwa mo kgolegelong. Morago o ne a laelwa go tla fa pele ga ga Faro. Badisa-kgolegelo ba ne ba mo ntsha ka bonako. O ne a ipeola ditedu, a apara diaparo tse dingwe, mme a tla fa pele ga kgosi.

Josefa o ne a tlile go diragalelwa ke dikgakgamatso. Josefa o ne a phutholola ditoro tse pedi tsa ga Faro ka thuso ya ga Jehofa. Faro o ne a mo raya a re: “Bōna, ke gu tlhomile go nna tlhōgō ea lehatshe yeotlhe ya Egepeto.” (Genesise 41:41) Abo joo e ne e le boitemogelo jo bo gakgamatsang jang ne—go tswa kwa kgolegelong go ya kwa ntlong ya segosi ka letsatsi le le lengwe fela! Boitemogelo jwa ga Josefa bo ne bo tshwantsha seo Kgosi Solomone a neng a tlhotlhelediwa go se kwala moragonyana: “Gonne eole a cwa mo tluñ ea kgolegèlō a tla go nna kgosi.” Ka mo go tshwanelang, Solomone o ne a kwala gabedi jaana: “Boikokobeco bo tlo bo ètèlèle tlotlō pele.”—Moreri 4:14; Diane 15:33; 18:12.

Gore o tle o solegelwe molemo ke boammaaruri joo jwa bomodimo, ipotse jaana: Ke eng seo se neng sa tshegetsa Josefa mo boitemogelong jwa gagwe fa a ne a sotliwa? Motlhanka yono yo o ikanyegang wa ga Jehofa o ne a kgona jang ditatofatso tsa maaka tseo di neng tsa mo tsenya mo kgolegelong? Jehofa o ne a akantse go naya Josefa tlotlo efe? Ke tlotlo ya mofuta ofe e e emetseng bao ba ileng ba ikanyega go kgabaganya makgolokgolo a dingwaga mme ka bopelokgale ba ileng ba bogisiwa le go sotliwa? Mo godimo ga tseo tsotlhe, ke eng se se re thusang go nna le boikutlo jo bo lekalekaneng fa re sotliwa?

Josefa o tshwanetse a bo a ile a tlhatlhanya gangwe le gape ka ditoro tse pedi tsa boperofeti tseo a neng a di lorile pele ga foo tseo di neng di bontsha gore bomorwarraagwe le batsadi ba gagwe ba ne ba tla mo “ikōbèlèla ha hatshe.” Ebile tota, bomorwarraagwe, fa ba utlwa toro ya gagwe ya ntlha, ba ne ba bua jaana: “A rure o tla re busa?”—Genesise 37:8-10.

Bomorwarraagwe Josefa ba ba lefufa ba ne ba batla ba mmolaya! Mme ka kaelo ya ga Jehofa, mosimanyana yono wa dingwaga tse 17 o ne a rekisediwa bagwebi ba ba tsamayang, bao, kwa morago ba neng ba mo rekisetsa Potifaro, mookamedi wa badisa-kgolegelo ba ga Faro.

Kgabagare, Josefa o ne a nna molaodi wa ntlo ya ga Potifaro, yoo mosadi wa gagwe a neng a leka go hepisa lekawana le lentle leno. Lefa go le jalo Josefa o ne a ikanyega mo go Jehofa mme a falola. Mosadi yo o boferefere yoo o ne a latofatsa Josefa ka maaka a gore o ne a leka go mmetelela, mme Potifaro o ne a mo dumela, jalo Josefa wa mogolo o ne a latlhelwa mo kgolegelong.

Lefa go ntse jalo, o ne a nna a ntse a ikanyega mo go Jehofa, yoo, jaaka go umakilwe, a neng a rulaganyeditse gore a isiwe kwa go Faro go ya go phutholola ditoro tsa gagwe. Morago ga foo Faro o ne a naya Josefa tshiamelo e kgolo ya go nna motlhokomedi wa dijo mo Egepeto. Fa leuba le ne le tsena kwa Kanana, eleruri bomorwaraagwe Josefa ba ne ba tla go mo obamela gore ba tseele balelapa la bone dijo.

Ba Bangwe ba ba Neng ba ‘Ikokobetsa mme ba Tlotliwa’

Mongwe wa batlhanka ba ba ikanyegang ba ga Jehofa yoo botshelo jwa gagwe bo tlhomamisang boammaaruri jwa bomodimo jwa gore “boikokobeco bo tlo bo ètèlèle tlotlō pele” e ne e le Moshe. Ereka a ne a godiseditswe mo ntlong ya segosi e e maphatsiphatsi ya ga Faro, Moshe o ne a na le isagwe e e eletsegang fa pele ga gagwe. Go ne ga bonala fa ditiragalo di ne di tsaya tsela nngwe e e sa itumediseng. Moshe o ne a bontsha tumelo mo go Jehofa le lorato mo bathong ba gagwe, mo e leng gore o ne a tshwanelwa ke go tshaba gore a boloke botshelo jwa gagwe mo go Faro yo o galefileng. O ne a ya kwa Midiana a le nosi. O ne a bontsha boikokobetso jwa gagwe ka dingwaga tse 40 ka go tshela botshelo jo bo kwa tlase jaaka modisa, a direla mogwagadiagwe ebong Jethero. Abo Moshe a tshwanetse a bo a ile a kgothatsega jang ne mo dingwageng tse 40 tsa go bopiwa ga botho jwa gagwe fa a ne a tlhatlhanya ka tsela ya ga Jehofa ya go mo kokobetsa mme a akanya ka seo a ka tswang a se boloketswe!

Jaanong go ne ga tla tlotlo. Jehofa o ne a tlhopha Moshe go nna morongwa wa Gagwe kwa go Faro le go ntsha batho ba Gagwe kwa Egepeto. Abo Moshe a ne a bona ditshiamelo tse di kwa godimo jang ne fa ka tlhamalalo a ne a kopanyelediwa mo dipetsong tse di lesome a ba a etelela Baiseraele pele go kgabaganya Lewatle Le Lehibidu! Moragonyana, Moshe o ne a amogela Molao go tswa kwa go Jehofa mo Thabeng ya Sinai. Fa a ne a fologa, batho ba ne “ba retelèlwa ke go leba sehatlhōgō sa ga Moshe ka tlhōmamō, ka ntlha ea kgalalèlō.—2 Bakorintha 3:7.

Tlhokomela gape Jobe, yoo a neng a le mogolo mo baaging botlhe ba Botlhaba. E ne e le monna “eo o itekanetseñ, eo o siameñ, motho eo o boihañ Modimo, me a tshaba boshula.” (Yobe 1:2, 3, 8) Jaanong o ne a latlhegelwa ke bana ba gagwe ba le lesome le diketekete tsa dinku tsa gagwe, dikamela, dikgomo, le dipitse tse di namagadi, ka tshoganetso fela.

Mme go ne ga seka ga felela foo. Mmele wa ga Jobe otlhe o ne wa apesiwa ke diso, tseo di neng di mo dira gore a ferose sebete. Mosadi wa gagwe le ene o ne a mo sotla jaana: “A u sa nntse u tshegeditse bosenañ molato yoa gago? itatolè Modimo, me u shwè.” (Yobe 2:9) Jobe o ne a lekwa le go sotliwa mo go botlhoko, mme o ne a sa itse gotlhelele ka thulano e e fa gare ga ga Jehofa le motsuolodi yo mogolo, Satane. Dipuisano tse ditelele fa gare ga ga Jobe le “ditsala” tse tharo tsa gagwe ga di a ka tsa tokafatsa boemo. Lefa go ntse jalo, Jobe o ne a boloka bothokgami jwa gagwe. O bile a amogela kgakololo e e botlhale ya ga Elihu ka boikokobetso—monna yo a neng a le mmotlana thata.—Yobe 32:4.

A Jobe o ne a duelwa? Ee. Jehofa o ne a fodisa Jobe, a mmusetsa matsomane a gagwe a menagane sebedi, mme o ne a mo naya barwa ba le supa le barwadi ba le bararo—bao ba neng ba le bantle go gaisa botlhe mo lefatsheng leo! Abo seno e ne e le phelelo e e galalelang jang ne ya boikokobetso jwa ga Jobe! Abo go ile ga itshupa go le boammaaruri jang ne gore—“boikokobeco bo tlo bo ètèlèle tlotlō pele.”—Yobe 42:12-15.

Mefuta e e Farologaneng ya Kgalalelo

Ka phepafalo fela go na le mefuta e e farologaneng ya kgalalelo—go tloga ka kgalalelo ya moriri wa mosadi go ya kwa kgalalelong ya sefatlhego sa ga Moshe fa a ne a fologa mo Thabeng ya Sinai. (1 Bakorintha 11:15; 2 Bakorintha 3:7) Tebego ya go wela go go sa tlwaelegang ga letsatsi e na le kgalalelo e kgolo, dinaledi le tsone di na le kgalalelo e nngwe.—1 Bakorintha 15:41.

Go dirisiwa dipopego tse di farologaneng tsa lefoko “kgalalelo” ka makgetlo a le mantsi mo Bibeleng. Fa re tlhatlhoba ditshupiso tseno le tlhaloganyo eo di dirisitsweng ka yone, go phepafetse sentle gore Jehofa ke motswedi wa kgalalelo. Batlhanka ba ba ikanyegang ba gagwe le dibopiwa tse dingwe tse di dirilweng ka matsetseleko tsa gagwe di supa fela kgalalelo ya gagwe ka ditsela tse dintsi le ka bogolo jo bo farologaneng.

Mo lekgolong leno la bo-20 la dingwaga, re na le bosupi jo bontsi jwa go sotliwa goo ba le bantsi ba ba nang le tsholofelo e e galalelang ya botshelo jwa selegodimo ba neng ba go itemogela. Mo Ntweng ya Lefatshe I, maloko a a eteletseng pele a Mokgatlho wa Watch Tower kwa Brooklyn, kwa New York, a ne a atlholelwa dingwaga di le 20 mo kgolegelong ka ditatofatso tsa maaka. Mo e ka nnang ka yone nako eo, pogiso e ne ya simologa mo dinageng tse dintsi. Ka sekai, J. B. Siebenlist o ne a tsenngwa mo kgolegelong malatsi a le mararo a sa fiwe dijo, kwantle ga manathwana a le mararo fela a borotho jo bo senyegileng. O ne a ntshiwa ke segopa sa batho mo kgolegelong, sa mo apola diaparo, sa mo tshasa sekontere se se bolelo, mme sa mmetsa ka kgole e e bofeletsweng mathale mo dintlheng tsotlhe. Motsamaisa-tsheko mongwe o ne a bua jaana kwa tshekong nngwe: “Ya kwa diheleng le Bibela ya gago; o tshwanetse wa bo o setse o le kwa diheleng o robilwe mokwatla; o tshwanetse go kalediwa.”

Mo Ntweng ya Lefatshe II, bangwe ba batlhanka ba ba ikanyegang ba ga Jehofa ba ne ba bogisiwa mo go botlhoko mo dikampeng tsa pogisetso tsa Ba-Nazi. Mongwe wa bone e ne e le Martin Poetzinger, Mosupi yo o tloditsweng yo o ileng a falola mme a nna leloko la Setlhopha Se Se Laolang sa Basupi ba ga Jehofa. O ne a tlhalosa Dachau jaaka “ntlo ya ditsenwa ya badimona.” Mo kampeng ya kwa Mauthausen, “Ma-Gestapo a ne a leka tsela nngwe le nngwe ya go re dira gore re robe boikanyegi jwa rona mo go Jehofa. Ba ne ba sa re neye dijo, ba itira ditsala tsa tsietso, ba re bogisa mo go botlhoko, ba re emisa mo godimo ga letlhomeso letsatsi le letsatsi, ba re kaletsa mo paleng ya boleele jwa dimitara di le tharo mabogo a rona a bofeletswe kafa morago, ba re itaya—tsotlhe tseno le tse dingwe . . . di ne tsa lekwa.”

Ke eng seo se Ileng sa Tshegetsa Bakeresete ba ba Ikanyegang Bano?

Mo maemong a a maswe ao le a a tlhabisang ditlhong, go ne ga felela ka gore tumelo ya bone le tebelelo ya isagwe e e galalelang eo e lebeletsweng ke bao ba tla bolokang bothokgami di ba thuse go itshoka. Mo go “lecomanyane” la Basupi ba ba tloditsweng, seno ke boswa jwa selegodimo. (Luke 12:32) Mofuta o o kgethegileng wa kgalalelo ya mo lefatsheng o boloketswe batho ba bangwe gape ba ba ikanyegang. Bangwe ba bone, jaaka Josefa le Moshe, ba umakiwa mo go Bahebera kgaolo 11. Tswee-tswee bala ditemana 32-40 mme o tlhatlhanye ka ditshotlo tseo baikanyegi bano ba ileng ba di itshokela. Mo godimo ga moo, “boidiidi yo bogolo,” bo direla Jehofa mo lefatsheng gompieno. (Tshenolō 7:9, 15) Isagwe ya bone ke eng?

Ba emetswe ke isagwe e e nonneng. Puso ya selegodimo kafa tlase ga ga Jesu Keresete e tla nna le baemedi ba selefatshe bao ba tla diragatsang ditaolo tseo di kwadilweng mo memenong eo go buiwang ka yone mo go Tshenolō 20:12. Bao ba tla bona ditshiamelo tse di galalelang, eseng jaaka dikgosi, mme jaaka “dikgōsana mo lehatshiñ yeotlhe,” mme gammogo le bone, batho ba ba senang palo ba ba boikokobetso, ba ba ikanyegang, go akareletsa le ba ba tsositsweng mo baswing, ba tla iponela botshelo jo bo sa khutleng mo lefatsheng le le galalelang la paradaise.—Pesalema 45:16.

Go na le dimilione tse di bontshitseng boikokobetso jwa tsone gompieno ka go tlogela ditumelo tsa maaka mme ka boitumelo di tsaya karolo mo tirong ya go rera ka ntlo le ntlo ya Basupi ba ga Jehofa. Bontsi jwa bone bo ile jwa sotliwa ke bamalapa a bone le ditsala, mme ba ile ba tshwarelela mo kobamelong ya boammaaruri. Ka boikokobetso ba ile ba amogela go bonwa phoso le go kgalemelwa e le gore ba ka obamela Modimo wa boammaaruri, Jehofa. Tsholofelo ya bone ke go tshela mo Paradaiseng e e tsosolositsweng, fa “lehatshe le tla [bo le tletse] kicō ya kgalalèlō ea ga Yehofa, yaka metse a khurumeditse lewatlè.”—Habakuke 2:14.

Ano ke matsatsi ao Jehofa a lekang batho ba gagwe ka one. Go ntse jaaka ekete re ne re le bajaki mo nageng ya seeng. Go ntse go lemotshegela pele gore go na le pharologano e kgolo gareng ga kobamelo ya boammaaruri le ya maaka. Rotlhe re sotliwa ka selekanyo se se rileng. Mme fela jaaka Jesu a ne a gomodiwa le go nonotshiwa ke boipelo joo bo neng bo beilwe fa pele ga gagwe, le rona re ka fenya diteko tseno ka go gakologelwa seo se tla diragalang kwa morago.

Bibela e re gakolola jaana: “Iñōtlahatseñ ha pele ga Morèna [Jehofa, NW], me o tla lo goletsa.” (Yakobe 4:10) Nako le nako fa o lekwa mo go botlhoko, akanya ka mafoko ano: “Boikokobeco bo tlo bo ètèlèle tlotlō pele.” Gakologelwa, gape gore Jehofa ga a kake a palelwa ke sepe!