Lebaka la go bo O Tshwanetse go Itse Boammaaruri Kaga Aberahame
ABERAHAME—a ke mogale wa ditlhamane fela kana moperofeti wa boammaaruri? Karabo ya potso eo e botlhokwa go le kana kang? Go ya ka tlhatlhamano ya metlha ya Bibela, Aberahame o tshetse dingwaga tse di ka nnang 4 000 tse di fetileng. Ka gone, ba bangwe ba ka nna ba re, ‘Go bo eleruri a kile a tshela kana a se kile a tshela go na le pharologanyo efe?’
Ebu, sephatlo sa baagi ba lefatshe ke ba ditumelo tseo di iphakang di dumela mo go Aberahame. Lenane la 1988 Britannica Book of the Year le bontsha gore 32,9 lekgolong ya batho ba lefatshe ke Bakeresete, 17,2 lekgolong ke Bamoselema, mme 0,4 lekgolong ke Bajuda, mme Aberahame ke motho yo o kwa godimo mo ditumelong tsotlhe tse tharo tseno. Eleruri, badumedi ba ba tlhoafetseng ba ditumelo tseno ba tshwanetse go batla go tlhomamisa gore seo ba ileng ba se rutwa kaga Aberahame se boammaaruri. Le eleng le ba ditumelo tse dingwe kana bao ba bolelang gore ga ba mo bodumeding bope ba tshwanetse go kgatlhegela seno. Ka ntlhayang?
Ka gonne Bibela e bolela gore Aberahame e ne e le moperofeti. (Genesise 20:7) Leo ke lefoko le Bibela e le dirisitseng go tlhalosa mmueledi wa Modimo yo o tsholetseng batho molaetsa. Fa e le gore Aberahame e ne e le moperofeti wa boammaaruri, he rotlhe re ka solegelwa molemo. Ka ntlhayang? Ka gonne molaetsa o a neng a o amogela o ne o na le mafoko a a molemo go batho botlhe. (Bagalatia 3:8) Go ya ka Bibela, Modimo o ne a solofetsa Aberahame jaana: “Mo go wèna ditshika cotlhe tsa lehatshe di tla segōhala.”—Genesise 12:3.
Eo ke tsholofetso e e kwa godimo, mme Aberahame o ne a e utlwa e buiwa ka makgetlo a mangwe gape a mabedi. (Genesise 18:18; 22:18) E le gore Modimo a e diragatse, o tla ba a tsosa mo baswing baemedi ba ditshika bao ba suleng. Botshelo mo bathong ba ba tsositsweng bano e tla nna tshegofatso eleruri, ereka bontsi jwa bone ba tla bo ba boela mo lefatsheng le le mo boemong jwa Paradaise leo motho a neng a latlhegelwa ke lone kwa tshimologong. Morago ga foo, ba tla rutiwa gore ba ka iponela jang masego a botshelo jo bo sa khutleng.—Genesise 2:8, 9, 15-17; 3:17-23.
Fa e le gore, mo letlhakoreng je lengwe, Aberahame e ne e le motho fela wa tlhamane, go ne go tla bo go sena motheo wa go dumela tsholofetso e e gakgamatsang eno eo a e amogetseng. Mo godimo ga moo, fa e le gore ditsholofetso tsa Bibela di ka seka tsa ikanngwa, ba bangwe ba ka nna ba ganelela mo botshelong jwa bone jwa go tshelela dikgatlhego tsa botshelo jwa jaanong fela. Ke fela jaaka mongwe wa Bakeresete ba pele a ne a kwala jaana: “Ha bashwi ba sa cosiwe, a re yeñ, re nweñ, gonne re coga re shwa ka moshō.”—1 Bakorintha 15:32.
Ka gone, o na le mabaka a le mantsi a go tlhatlhoba potso eno, A Aberahame e ne e le mogale fela wa ditlhamane kana a e ne e le moperofeti wa boammaaruri? O ka nna wa gakgamadiwa ke go itse seo baruti bangwe ba bagolo ba lekgolo la bo-19 la dingwaga ba ileng ba se bolela kaga seno. Mo nakong eno, baribolodi ba ne ba ile ba bona diphitlhelelo dingwe tse di gakgamatsang tseo di gwetlhang dipono tsa baruti bao.