Dipotso Tse Di Tswang go Babadi

◼ Ke kgakololo efe tota eo Diane 27:23 e e neelang badisa ba semoya le Bakeresete ka kakaretso?

Temana eno e balega jaana: “U tlhōahalèlè go itse macomane a gago kaha a nntseñ ka gōna; u bo u tlhōkōmèlè matlhape a gago thata.” (Diane 27:23) Temana eno e ntse e dirisiwa gantsi go kgothaletsa badisa ba semoya gore ba kgatlhegele boemo jwa Bakeresete mo phuthegong le go itse boemo jwa bone le mathata a bone. Kgothatso e e ntseng jalo e a tshwanela, ereka Bibela e tshwantshanya bagolwane le badisa mme phuthego yone e tshwana le letsomane la dinku. (Ditihō 20:28, 29; 1 Petere 5:2-4) Lefa go ntse jalo, lemororo molaomotheo o o fa godimo o dira, temana eno tota ga e bue ka badisa ba semoya.

Buka ya Diane e na le ditemana di le dintsi tse di ikemetseng di le tsosi fela jaaka dipolelo tse di botlhokwa tse di gakololang, mme Diane 27:23 ke karolo ya setlhopha sa ditemana tseo: “U tlhōahalèlè go itse macomane a gago kaha a nntseñ ka gōna; u bo u tlhōkōmèlè matlhape a gago thata: Gonne dikhumō ga di nne ka bosakhutleñ; le e leñ serwalō sa bogosi a se tle se nne go ea tshikatshikeñ cotlhe? Boyañ yoa chwabi boa rorwa, me loreme lo setoge, e bile merōgō ea kwa dithabeñ e tle e phuthèlwe gae. Dikwanyana di ruecwe go nna diaparō tsa gago, le dipodi ke tlhwatlhwa ea lotlhagare: Me go tla nna mashi a dipodi a a lekanyeñ go yewa ke wèna, le ke ba ntlo ea gago, le go nna kotlō ea barweetsana ba gago.”—Diane 27:23-27.

Temana eno e e tlhotlheleditsweng e tlotlomatsa mofuta wa botshelo o o bonwang ka go tlhagafala, go dira ka natla, go dira dilo motlhofo, le go lemoga kafa re ikaegileng ka Jehofa ka gone. E dira seno ka go tlotlomatsa botshelo jwa go dira jwa modisa wa Moiseraele, gongwe e le go bo farologanya le botshelo jwa motho yo o tshelang ka tsela e e manobonobo joo bo ikaegileng ka go gweba le go huma ka bonako.

“Dikhumō,” kana go nna le madi a mantsi ao a bonweng ka go dira dikgwebo ka bonako, goo go felelang ka go nna wa maemo a a kwa godimo (serwalō sa bogosi), di ka nna tsa nyelela ka bofefo, jaaka fa ba le bantsi ba ka supa seo. Ka gone go na le go le gontsi goo go ka bolelwang ka botshelo jo bo motlhofo, jaaka jo bo neng bo tshelwa ke badisa ba bogologolo fa ba tlhokomela letsomane. Mokgwa oo wa go tshela o ne o se motlhofo mo o neng o ka tewa ga twe ke wa go se kgathale. Modisa o ne a tshwanetse a nna kelotlhoko mo letsomaneng la gagwe, a tlhokomele gore dinku di ne di sireleditswe. (Pesalema 23:4) Fa e ne e ka re fa a ntse a di tlhokomela, a fitlhela gore go na le nku e e lwalang kana e e utlwileng botlhoko, o ne a ka nna a e tshasa lookwane. (Pesalema 23:5; Esekiele 34:4; Sekaria 11:16) Gantsi modisa yo o kelotlhoko yo o tlhokomelang letsomane la gagwe o ne a tla bona kafa maiteko a gagwe a ntshang ditlamorago tse di molemo ka gone—go oketsega ka iketlo ga letsomane.

Modisa yo o dirang ka natla le yo o leng kelotlhoko o ne a na le motswedi o o ikanyegang thata wa thuso—ebong Jehofa. Jang? Gone, Modimo o re neela matlha le medikologo eo ka tlwaelo e ntshang bojang jo bontsi jo bo neng bo ka tlamela letsomane. (Pesalema 145:16) Fa, ka ntlha ya go fetoga ga matlha, bojang bo ne bo nyelela mo dikarolong tse di kwa tlase, bo ka nna jwa bo bo le bontsi mo dikarolong tse di kwa godimo, koo modisa yo o leng kelotlhoko a neng a ka isa diphologolo tsa gagwe gone.

Diane 27:26, 27 e umaka phelelo e le nngwe ya go dira ka natla jalo—dijo le diaparo. Gone ke boammaaruri gore, tlhaloso eno ga e bolele dijo tsa maemo a a kwa godimo thata kana diaparo tse di kgethegileng, ebile ga e neye modiri lebaka la go lebelela diaparo tsa mokgwa wa moragorago kana letsela la maemo a a kwa godimodimo. Mme fa e le gore o ne a iketleeditse go dira boiteko, modisa le lelapa la gagwe ba ne ba ka amogela mashi go tswa mo letsomaneng (mme ka ntlha ya moo ba bone kase), mmogo le boboa go dira diaparo.

Ka jalo kgakololo e e reng: “U tlhōahalèlè go itse macomane a gago kaha a nntseñ ka gōna” ga e bue thata thata ka balebedi ba semoya; e bua le Bakeresete botlhe. E bontsha kafa go leng botlhokwa ka gone gore re kgotsofalele dijo le diaparo tse re di amogetseng ka go dira ka natla, ka tlhoafalo, re solofela gore Modimo ga a kitla a re tlogela. (Pesalema 37:25; 2 Bathesalonika 3:8, 12; Bahebera 13:5) Fa o bapisa Diane 27:23-27 le kgakololo e e leng go Luke 12:15-21 le 1 Timotheo 6:6-11, re kgona go bona kafa kgakololo ya Modimo e ileng ya nna e e tlhomameng ka gone mo kgannyeng eno. Ka jalo mongwe le mongwe wa rona a ka nna a bala gape Diane 27:23-27, a ipotsa jaana, ‘A ke tsaya seno tsia mme ke se dirise mo botshelong jwa me jwa letsatsi le letsatsi?’

[Motswedi wa Setshwantsho mo go tsebe 31]

Pictorial Archive (Near Eastern History) Est.