A O Badile Gore Seno Se Tla Batla Gore O Duele Bokae?

“WA RENG! O gana selo se se molemolemo jaana?” Mookamedi o ne a sa kgone go dumela se a neng a fetsa go se utlwa. Mosadi yo o dirang kafa tlase ga gagwe, yo o tlotliwang tota ka ntlha ya botswerere jwa gagwe le boitshwaro jo bontle, o fetsa go gana go ya go ithuta kwa moseja ka dingwaga di le pedi a duelelwa ke khampani. Ke ka ntlha yang fa a ne a dira jalo?

Fa a amogela seno, mosadi yono o ne a tlhalosa, seo se ne se tla raya gore a kgaogane le monna wa gagwe le bana ba gagwe ka dingwaga tse pedi. O ne a tla ba tlhoafalela thata. Se se botlhokwa thata, o ne a tla bo a latlhile ditiro tse a di filweng ke Modimo tsa go nna mosadi le mmè. Seno se ne se tla mo ama thata mo maikutlong le semoyeng. Ke gone ka moo a neng a swetsa gore a gane seno fa a sena go bala gore seno se tla mo duedisa go le kana kang.

O ne o ka bo o dirile eng fa o ne o le mo boemong jwa gagwe? Go phepafetse gore ga se mongwe le mongwe yo a neng a tla dumalana le tshwetso e mosadi yono wa Mokeresete a neng a e dira. Ba bangwe jaaka badirimmogo nae, ba ka nna ba akanya gore o tlogetse tshono e e molemo go gaisa ya go tokafatsa tiro ya gagwe. Ba bangwe ba ka nna ba mo pega molato wa gore ga a akanyetse isagwe ya lelapa la gagwe, ka go bo, gone mme, dingwaga tse pedi di ne di tla feta fela ka bonako. Lefa go ntse jalo, ga a dira tshwetso eno a sa akanya kana ka go tsewa ke maikutlo. E ne e ikaegile ka mabaka a a utlwalang le melaometheo e e bonelang dilo kwa pele. Tseno ke eng?

Se Se Fetang Fela Se Se Itsiweng ke Mongwe le Mongwe

Monna yo o botlhale go ba gaisa botlhe yo o kileng a tsamaya mo lefatsheng ebong Jesu Keresete o ne a re naya tsela e re ka dirang ka yone mo go nngwe ya ditshwantsho tsa gagwe. “Ke ohe oa lona eo e ka reñ ha a rata go aga kagō e e godileñ, me a se ke a dula pele, a bala madi a eōna, gore a tlè a itse ha a na le a a lekanyeñ go e shwetsa”? Jesu o ne a botsa jalo. “E se re kgotsa a sena go e thaea, a retelèlwe ke go e shwetsa; me botlhe ba ba e bōnañ ba simolole go mo shotla, Ba re, Monna eo, o simolotse go aga, me a bo a sa nonoha go shwetsa.”—Luke 14:28-30.

Mongwe le mongwe o tla dumalana gore go botlhale go leba gore selo se tla batla gore o se duelele bokae pele o swetsa go dira sepe fela se se botlhokwa. Ka sekai, fa motho a ne a batla go reka ntlo, a o ne a tla itlhaganelela go saena tumalano a ise a botse gore ke bokae ebile a ise a tlhomamise gore o na le madi a a lekaneng go fetsa selo seno? Ruri o ne a tla lejwa a se botlhale fa a ne a ka dira selo se se ntseng jalo. Ee, ke selo se se itsiweng ke mongwe le mongwe gore motho o tshwanetse go batlisisa pele gore tiro nngwe e tla mmatla bokae pele a e simolola.

Lefa go ntse jalo, tota Jesu o ne a gatelela ntlha efe ka setshwantsho seo? O ne a bolela jaana pele fela a bolela setshwantsho seno: “Leha e le mañ eo o sa sikareñ mokgōrō o e leñ oa gagwè, me a ntshala moragō, ga a kake a nna morutwa oa me.” (Luke 14:27) Ka gone, ditemana tse di dikologileng di supa gore Jesu o ne a sa neye kgakololo fela e e tlwaelegileng ka dilo tse re di dirang ka tlwaelo letsatsi le letsatsi. Go na le moo, o ne a bua kaga go bala ditshenyegelo a lebisitse mo kgannyeng ya go nna morutwa wa gagwe.

Jesu o ne a bontsha ka setshwantsho seno gore go nna morutwa wa gagwe go ne go akaretsa gore motho a dire diphetogo dingwe a bo a intshe setlhabelo. Ka ntlha yang? Gonne tsamaiso eno ya jaanong ya dilo e sekametse thata mo go batleng dilo tse di bonalang ebile e tlhotlhelediwa thata ke go batla go ikgotsofatsa. Batho ba bantsi ba amegile thata ka go kgotsofatsa dikeletso tsa bone tsa senama, ba tlhokomela dilo tse ba di tlhokang semoyeng kana kamano ya bone le Modimo go le gonnye fela kana ebile ga ba re sepe fela ka yone. (2 Timotheo 3:1-4) Lefa go ntse jalo boikutlo jono, kana moya ono, o farologana gotlhelele le oo o neng wa supiwa ke Jesu Keresete. “Morwa Motho,” o ne a bolela, “[o] na a sa tla go dihèlwa, me e le go dihèla, le go ntsha botshelo jwa gagwè go nna thèkololō ea batho ba le bantsi.” O ne a tsaya dilo tsa semoya di le botlhokwa thata go gaisa dilo tsa senama fa a ne a bolela jaana: “Mōea ko ōna o rudisañ; nama ga e thuse sepè.”—Mathaio 20:28; Yohane 6:63.

Ka gone, fa Jesu a ne a gakolola bao ba neng ba batla go nna barutwa ba gagwe gore ba bale ditshenyegelo, o ne segolobogolo a bua ka dilo tsa semoya, eseng ka dilo tsa senama. Ke eng seo se leng botlhokwa thata mo go bone, a ke melemo ya dilo tsa senama tse lefatshe leno le di nayang kana a ke melemo ya semoya eo motho a e bonang ka go bo e le morutwa? Leno ke lebaka la go bo a ne a konela jaana fa a sena go bolela setshwantsho seno le se sengwe se se tshwanang le sone: “Go nntse hèla yalo, leha e le mañ mo go lona eo o sa tlogeleñ dilō cotlhe tse o nañ nacō, ga a kake a nna morutwa oa me.” (Luke 14:33) A motho yono yo e tlileng go nna molatedi o a eletsa ebile o iketleeditse go intsha setlhabelo ka tsela e e ntseng jalo, kana a seo ke tuelo e kgolo thata?

Pono E E Lekalekaneng

Le eleng lefa dilo tsa senama di ka nna tsa tlisa dilo tse eketeng ke melemo tse di kgonwang go lemogiwa ebile di bonwa ka bonako, melemo e e bonwang ka go latelela go bona dilo tsa semoya e nnela ruri ebile e a kgotsofatsa. Jesu o ne a baya mabaka ka tsela eno: “Se iphutheleñ dikhumō mo lehatshiñ, kwa motoutwana o senyañ gōna le morodu, le kwa magodu a phunyetsañ go ucwa gōna. Me iphutheleñ dikhumō kwa legodimoñ, kwa motoutwana o sa senyeñ gōna leha e le morodu, le kwa magodu a sa phunyeñ leha e le go ucwa gōna.” (Mathaio 6:19, 20) Mo motlheng ono wa rona, go tlhatloga ga ditlhwatlhwa, go wa ga boleng jwa ditoko tse di rekwang le tse di rekisiwang, dibanka tse di wang, le tse dingwe, go ile ga humanegisa bao ba ikantseng dikhumo tsa dithoto. Lefa go ntse jalo moaposetoloi Paulo o re kgothatsa gore re se ka ra ‘leba dilo tse di bonalang, me re lebe dilo tse di sa bonaleng: gonne dilo tse di bonalang ke tsa lobaka lono fela; me dilo tse di sa bonaleng ke tsa bosaeenkae.’ (2 Bakorintha 4:18) Lefa go ntse jalo, re ka tlhagolela jang gore re nne le kgopolo e e ntseng jalo?

Re ka dira jalo ka go etsa Sekao le Motlhomasekao, ebong Jesu Keresete. Ka nako ya fa a ne a le mo lefatsheng, o ne a sa itime dilo tsotlhe ka go feteletsa, jaaka seo se supiwa ke ntlha ya gore ka dinako dingwe o ne a ya kwa meletlong ya manyalo le kwa dijong tse go laleditsweng batho ba le bantsi kwa go tsone. Lefa go ntse jalo, go phepafetse gore o ne a baya dilo tsa semoya kwa pele. O ne a iketleetsa go ithiba le eleng mo dilong tse a neng a di leba e le tse di tlhokegang fela gore a kgone go dira se se ratwang ke Rraagwe. Ka nako nngwe o kile a bolela jaana: “Diphokoyè di na le mesima, le dinōnyane tsa loapi di na le ditlhaga; me Morwa Motho èna, ga a na ha o ka itatsañ tlhōgō gōna.” (Luke 9:58) O ne a leba go dira thato ya ga Rraagwe go le botlhokwa ebile go itumedisa mo e leng gore o ne a bolela jaana a tlhoafetse go tswa mo pelong: “Seyō sa me ke go diha go rata ga eo o nthomileñ, le go wetsa tihō ea gagwè.”—Yohane 4:34.

Jesu o ne a supa fa a kgona go bona dilo tse di botlhokwa gore ke dife ka tsela eo a neng a gana ka yone fa a ne a raelwa ke Satane. Diabolo o ne a leka go dira gore Jesu a dirise maatla a Gagwe ao a a filweng ke Modimo go itirela melemo ka Boene, go kgotsofatsa dikeletso tsa Gagwe tsa senama, le go tlotlomadiwa le go itsege thata mo lefatsheng. Jesu o ne a itse sentle fela gore melemo e e ntseng jalo e e belaetsang e ne e bonwa fela ka go duela tuelo e e kwa godimo thata—go sa tlhole a amogelwa ke Modimo—tlhwatlhwa e e neng e le kwa godimo thata go feta e a neng a batla go e duela, ka go bo o ne a tseela kamano ya gagwe le Rraagwe kwa godimo go feta sengwe le sengwe. Ke gone ka moo a neng a gana dilo tseo Satane a neng a re o a di mo naya ka tlhamalalo fela a sa etsaetsege.—Mathaio 4:1-10.

Jaaka balatedi ba ga Keresete, eleruri re batla go kgona go bona dilo tsa botlhokwa gore ke dife jaaka Mong wa rona. Mo tsamaisong eno ya jaanong ya dilo e e laolwang ke Satane, go ka nna le dilo tse dintsi tse di ka lebegang di solofetsa melemo e e itumedisang mme lefa go ntse jalo totatota di senya kamano ya rona le Modimo, Dilo tse di tshwanang le go bona maemo a a kwa godimo kwa tirong ya boitshediso, go batla thutego e e kwa godingwana gore o tokafatse maemo a gago, go ratana le batho ba ba sa dumeleng, go tsenelela mo dikgwebong tse di belaetsang di ka dira gore o felelwe ke tumelo motlhofo fela mme e re kwa bofelong Jehofa a se ka a go amogela. Re tshwanetse go bala ka kelotlhoko gore tuelo e tla nna bokae fa re lekwa ka ditsela tse di ntseng jalo.

Botlhale jwa Boammaaruri Bo A Sireletsa

Monna mongwe wa Mokeresete yo o nnang kwa toropong nngwe e kgolo kwa Botlhaba jo bo Kgakala o ne a bona tshono ya go ya kwa nageng nngwe e sele go ya go tsweletsa dithuto tsa gagwe mo dingwageng di le mmalwa tse di fetileng. Le mororo a ne a rutegile ebile tiro ya gagwe e mo duela sentle, o ne a ikutlwa gore seno ga se a lekana; o ne a batla go tokafatsa maemo a botshelo jwa gagwe. Bakeresete ba bangwe ba ne ba leka go bua le ene ka dintlha tse re sa tswang go di sekaseka tsa Dikwalo, mme lefa go ntse jalo o ne a le tlhogo e thata mme o ne a tswelela ka seo a neng a batla go se dira. Le mororo kwa tshimologong a ne a leka go kgomarela tumelo ya gagwe, o ne ka bonya ka bonya a tlogela go anaanela boammaaruri jwa Bibela, mme a simolola go belaela. Mo lobakeng lwa ngwaga kana go feta, o ne a felelwa ke tumelo gotlhelele a bo a bolela gore ene ke motho yo o dumelang gore Modimo ga o itsiwe kana ga o kake wa itsiwe. Ga go kake ga ganelwa gore go bona dikerii e e kwa godingwana ka thuto e e kwa godimo ya selefatshe go ne ga mo kgotsofatsa ka selekanyo se se rileng. Mme abo a ne a duela tuelo e e kwa godimo jang fela gore a tlotlomadiwe ka lobakanyana—go felelwa ke tumelo le go ipaya mo kotsing ya go latlhegelwa ke botshelo jo bo sa khutleng!—1 Timotheo 1:19.

Kafa letlhakoreng le lengwe, bao ba thibelang gore go se ka ga nna le sepe fela se se ka bayang kamano ya bone le Modimo mo kotsing ba ne ba roba masego a magolo tota a a tswang kwa go Jehofa.

Sekao se sengwe ke sa monna mongwe yo mmotlana yo a neng a na le kgwebo ya go kgabisa matlo kafa teng mo go one motsemogolo o o umakilweng fa godimo. O ne a kopiwa go dira tiro ya go kgabisa e e eletsegang thata—ya R82 000, fa a ne a na le dikgwedi di le mmalwa fela a sena go simolola go ithuta Bibela le Basupi ba ga Jehofa. Lefa go ntse jalo, e ne e tlile go mmatla gore a se ka a sala morago melao e e dirisiwang mo motsemogolong oo fa go agiwa dikago mmogo le gore a tlole melao ya go aga dikago tse di sa dumelelwang ka molao. Ereka a ne a ithutile gore Bakeresete ba tshwanetse go ikobela molao, o ne a lemoga gore Modimo o ka nna wa se ka wa tlhola o mo amogela fa a ka dumela go dira tiro eo. (Baroma 13:1, 2) Fa a sena go sekaseka kgang eno, o ne a swetsa ka gore a se ka a tsaya tiro eo. Go ne ga felela ka eng? Kgato eno ya go supa tumelo e ne ya dira gore a dire phetogo ya botlhokwa thata mo go tsweleleng pele ga gagwe semoyeng. Mo lobakeng lwa ngwaga, o ne a gatela pele mo a neng a ineela a bo a kolobediwa. O ne a rekisa kgwebo ya gagwe mme a batla tiro e e neng e mo letla gore a nne le nako e e oketsegileng ya go ganelela mo go batleng dilo tsa semoya. Jaanong o direla Jehofa a itumetse ebile a le tlhaga.

Makawana a mabedi ano a ne a bala tuelo. Ke eng se se neng sa dira pharologanyo mo dilong tse ba neng ba di tlhopha? Botlhale jwa bomodimo! Ke eng fa go tualo? Botlhale ke go kgona go dirisa kitso ka tsela e ka tlwaelo e lereng melemo e e nnang ka lobaka lo loleele, mme botlhale jwa bomodimo bo kaya go dirisa kitso go dumalana le seo boikaelelo jwa Modimo e leng sone ka rona. Le mororo makawana ano ka bobedi a ne a setse a itse sengwe ka Bibela, tsela e ba neng ba dirisa se ba se itseng ka yone e ne ya dira gore ba bone matswela a a sa tshwaneng. Buka ya Diane e bolela jaana: “Gonne botlhale bo tla gu tsèna mo peduñ, le kicō e tla nna monate mo moeeñ oa gago; Tlhalemaleye e tla gu tlhodumèla, tlhaloganyō e tla gu boloka: Go gu golola mo tseleñ ea boshula, mo banneñ ba ba buañ dilō tsa leshōkō.”—Diane 2:10-12.

Lefoko la Modimo, Bibela, ke motswedi wa botlhale jwa boammaaruri oo o ka yang kwa go one ka metlha gore e go kaele ka nako ya fa o tshwanela go dira ditshwetso tsa botlhokwa. Go na le gore o ipone o le botlhale, reetsa kgakololo eno: “Ikanyè Yehofa ka pelo eotlhe ea gago, me u se ka ua ikaèga tlhaloganyō ea gago hèla: Mo ditseleñ cotlhe tsa gago u ipolèlè èna, me o tla siamisa ditselana tsa gago.” (Diane 3:5, 6) Re tshwanetse go ikoba re bo re iketleetse go ithuta, re tile go gagamalela dikgopolo tsa rona le go nna le moya wa boitaolo o o tletseng mo lefatsheng gompieno.

Ee, ga re kake ra tila go roba seo re se jadileng, mme ebile go siame fela go bo re tshwanetse go itshokela matswela a ditshwetso le dilo tse re neng ra di tlhopha. (Bagalatia 6:7, 8) Ka jalo batla gore tuelo e tla nna bokae pele o dira sepe fela. O se ka wa letla sepe fela se se lebegang ekete ke molemo go go amoga semoya sa gago kana kamano ya gago le Jehofa Modimo. Rapelela botlhale le go kgona go atlhola ka tsela e e siameng gore o kgone go dira ditshwetso tse di siameng, ka go bo ditshwetso tse o di dirang jaanong di ka kaya gore a o tla bona botshelo kana loso—ka bosakhutleng!—Bapisa Duteronome 30:19, 20.

[Setshwantsho mo go tsebe 28]

A o tla baya ditiro tsa semoya kwa pele kana a o tla baya tiro ya selefatshe kwa pele?