Ba Bona Boitumelo jwa Boammaaruri mo “Paradaiseng”
PARADAISE! Fa go buiwa ka Hawaii lefoko leno go le gantsi le tla mo megopolong ya batho—mme e le ka ntlha ya mabaka a a utlwalang. Sengwe le sengwe ke ntletsentletse koo ka maemo a bosa a a itumedisang, loapi lo lobududu, ditlhare tsa dipalema tse di temekelang kwa le kwa, pheswana e e monate e e lapolosang, le dintshi tsa lewatle tse di tletseng ka mošawa—dilo tseo ba bantsi ba ka di lebang e le tseo di fitlhelwang mo paradaiseng.
Dilo tseno di ile tsa ngoka batho go tswa gaufi le kgakala. Ba ile ba tla gone ba tswa Asia, kwa Pacific, kwa Dinageng Tse Di Kopaneng tsa Amerika, le eleng go tswa mafelong a a ntseng jaaka ditlhaketlhake tsa Caribbean le Yuropa. Ba le bantsi ba ile ba fudugela koo ka ntlha ya maemo a bosa a a nang a ntse a le bothitho ngwaga otlhe. Bangwe ba ile ba falalela gone ba batla tshireletsego mo itsholelo—ee, le go batlana le boitumelo. Go feletse ka gore e nne lefelo le le nang le meraferafe e e farologaneng le ditso tse di farologaneng, leo le nang le motswako o o sa tshwaneng wa dingwao le ditumelo tse di farologaneng.
Lefa go ntse jalo, go na le seemo se sengwe gape seo se farologaneng le seo. Jaaka fa go ntse ka mafelo a mantsi a mantle mo lefatsheng, Hawaii le yone e ganyaotswe ke bokebekwa, diokobatsi, botlhokatsebe, kgotlelo, le mathata a mangwe a mantsi ao a tshwenyang lelapa la motho go sa kgathalesege gore motho a ka tswa a nna kae. Ka ntlha ya go sa kgathaleng le bopelotshetlha jwa batho, ditlhaketlhake tsa Hawaii ka bonya ka bonya di senyegelwa ke bontle jwa tsone jwa tlhago. Batho ba rata paradaise, lefa go le jalo ga se botlhe bao ba nnang koo bao ba dirang gore ditlhaketlhake tseo e nne paradaise kana bao bobotlana ba di bolokang di ntse di le yone. Go tlhokega se se fetang fela ponalo e e kgatlhang matlho le maemo a a itumedisang a bosa go dira paradaise.
Lefa go ntse jalo, go na le setlhopha sengwe se se ntseng se gola sa bao ba nnang koo, bao ba ipelelang boitumelo jwa boammaaruri mo tikologong eno ya paradaise. Ke bao ba amogelang boammaaruri jwa Bibela ebile ba tsaya tsia tsholofetso eno e e kgatlhisang ya Modimo: “Ke tlhōla magodimo a masha, le lehatshe ye lesha; me dilō tsa pele ga di ketla di gakologèlwa, leha e le go tla mo mogopoloñ.” Batho bano ka boitumelo ba lebile pele isagweng eno ba ntse ba bolokile mafoko ano a ga moaposotoloi Petere mo megopolong ya bone: “Rona, kaha poleloñ ea ōna ea choloheco, re lebeletse magodimo a masha, le lehatshe ye lesha, a go tla agañ tshiamō mo go ōna.” (Isaia 65:17; 2 Petere 3:13) Batho bano ke bomang? Go tlile jang gore ba ithute kaga tsholofelo e e molemo eo go buiwang ka yone mo Bibeleng? Mme ke diphetogo dife tseo ba neng ba tshwanelwa ke go di dira mo matshelong a bone?
Go Fenya go Boifa Loso
Isabel le monna wa gagwe, George, ke bao ka tsalo ba tlhagang kwa Philippines. Isabel o ne a godisiwa gore a ke a gotse batsadi ba gagwe mo bodumeding jwa Roma Katoliki, lefa gone ene ka boene a ne a ise a ko a tsamaye a sekaseke se se mo Bibeleng. Isabel o ne a rutilwe gore moya wa motho ga o swe. O ne a arabela jang mo thutong eno ya maaka? Ee gone, o ne a boifa go swa lebekebeke ka gonne a ne a na le kgopolo ya gore o tla fitlhiwa ka bosakhutleng mo lekasing a ntse a tshela, ka jaana moya wa gagwe o tla retelelwa ke go swa. Lefa go ntse jalo, ka 1973 Isabel o ne a simolola go ithuta Bibela le Basupi ba ga Jehofa. Fa a ne a sena go ithuta gore moya wa motho o a swa ebile Modimo o tla fedisa loso ka tsogo ya baswi, o ne a phephetha ka boitumelo a bo a ikutlwa a gololesegile mo go gakgamatsang. (Esekiele 18:4, 20; Yohane 5:28, 29) Boammaaruri jwa Bibela bo ile jwa mo tlhotlheletsa thata jaana mo a ileng a gatela pele ka lobelo lo logolo.
Go tweng ka George? Le ene o ne a nna gone mo motlotlong wa Bibela lefa go le jalo e le fela go batla go supa fa Basupi ba se mo boammaaruring. Lefa go ntse jalo, ga a a ka a bona selabe sepe mo go seo ene le mosadi wa gagwe ba neng ba se rutwa. Tota ebile, ka bonako fela morago ga gore ba simolole go ithuta, go ne ga tsoga kgang kaga madi. Go tla go fitlha mo nakong eo, George o ne a ntse a rata go ja dijo tseo di apeilweng ka madi. Lefa go le jalo fa a ne a lemoga Bibela e kgala go ja madi e tlhamaletse, o ne a tlogela go tlhola a ja dijo tse di nang le madi. (Genesise 9:3, 4; Lefitiko 17:10-12; Ditihō 15:28, 29) O ne a tswelela pele a tsaya karolo mo thutong ya Bibela mme a itumelela gore kwa bofelong o bone boammaaruri. Fa re bua jaana, George, Isabel, le bana ba bone ba bane ba itumetse ka mmatota ka ntlha ya go tshela ga bone tumalanong le ditekanyetso tsa Modimo.
Ba Gogetswe ke Bokeresete jwa Boammaaruri
Monna mongwe wa Mojapane yoo leina la gagwe eleng George le mosadi wa gagwe wa Mopotokisi, Lillian, ba mo dingwageng tsa bone tsa 60. Ka bobedi jwa bone ba tsholetswe kwa Hawaii ba bo ba golela teng. Ereka jaana George a ise a ko a rutiwe sepe ka ga bodumedi ke batsadi ba gagwe, ga a ise a ko a tsamaye a tseele bodumedi tlhogong. Go ntse go le jalo, o ne ka dinako tsotlhe a dumela mo Modimong. Kafa letlhakoreng le lengwe, batsadi ba ga Lillian ba mo godiseditse mo bodumeding jwa bone, jaaka leloko la kereke ya Roma Katoliki.
Lefa gone George e ne e se mmadi yo o tlhagafetseng wa Bibela, o ne a na le dingwaga di ka tshwara 30 a ntse a bala dimakasine tsa Tora ya Tebelo le Tsogang! Ka gone o ne a setse a ithutile go le gontsi ka Bibela. Lefa go ntse jalo, ka ntlha ya go bo a ne a nwa ebile a goga motsoko bobe, o ne a nna bonya go dira diphetogo mo botshelong jwa gagwe. Jaaka fa dingwaga di ntse di kgabaganya, George o ne a tswelela pele a ntse a bala dimakasine tseno ebile nako le nako a tle a nne gone kwa dipokanong tsa Bokeresete kwa Holong ya Bogosi. Ka ntlha yang? Gonne, jaaka fa a tlhalosa, “ditumelo tse dingwe di tletse boitimokanyi” ka di rotloetsa dilo tse dintsi tse di bosula tseo Bibela e di kgalang. O ne a kgona go lemoga gore Basupi ba ga Jehofa ba farologane.
Ke eng seo se neng sa gogela mosadi yo o ikanyegang wa ga George ebong Lillian mo boammaaruring jwa Lefoko la Modimo lefa gone a ne a tlhotlheleditswe thata ke bodumedi jwa batsadi ba gagwe? Ee gone, morwadiammaagwe o ne a mo laletsa go nna gone kwa dipokanong kwa Holong ya Bogosi. “Ke ne ka itumelela moya o o itumedisang wa sekalelapa le menyebo ya botsalano,” Lillian o ne a gakologelwa jalo. Lorato lwa mmatota leo a neng a le bona gare ga batho ba ga Jehofa le ne la mo dira gore a tlhatswege pelo gore seno ke boammaaruri. (Yohane 13:34, 35) O ne a dumela gore a tshwarelwe thuto ya Bibela, kgabagare a ineela mo go Jehofa Modimo, mme a kolobediwa dikgwedi di le mmalwanyana fela morago ga gore monna wa gagwe a kolobediwe.
George ga a tlhole a goga motsoko kgotsa gone go tagwa, mme Lillian o latlhile ditshwantsho tsotlhe tsa gagwe tsa bodumedi. Ka dipelo tse di phophomang ka lorato, ba bolelela ba bangwe ka seo ba se ithutileng, go kopanyeletsa le ditlogolwana tsa bone tse 25 le dikokomana tse 4. A o ko o lebe difatlhego tsa bone fela, mme o bone gore George le Lillian ba itumetse jang!
Ba Bona Kagiso le Boitumelo
Patrick, monna wa dingwaga tsa magareng wa Mo-Irish, le mosadi wa gagwe wa Mojuda, Nina, ba ne ba fudugela kwa Hawaii ka bobedi go tswa kwa borwabophirima jwa United States. Mo nakong e e fetileng, ba ne ba tshela botshelo jo bo fa jo go tweng ke jwa go dira maratwaepelo jwa go ja diokobatsi, go lekeletsa ditumelo tse di farologaneng, le jwa maitsholo a a repileng. Ba ne gape ba fetsa dingwaga di le dintsi e le maloko a setlhopha sengwe sa bodumedi seo se nang le dingwao le ditsamaiso tse di sa tlwaelegang, ba kgaratlhela go fitlhelela maemo a a kwa godimo a go tlhaloganya dilo ka go dirisa diokobatsi, go tlhatlhanya, le go thusiwa ke morutisi wa bone yo o ba thusang go tlhaloganya masaitseweng. Fa nako e ntse e tsamaya, Patrick o ne a simolola go tenwa ke go fufegelana, go sa utlwaneng, le go tlhola go ngangisanwa ga maloko a bodumedi jono ao a neng a iphaka fa a setse a fitlheletse ‘maemo a a kwa godimo a go tlhaloganya dilo.’ O ne a kgaogana le setlhopha seno mme a boela kwa Hawaii, koo a kileng a ne a nna gone, a solofetse go ikhutsa tlhaloganyo. Morago ga moo, Patrick o ne a kgona Nina, yo ka nako eo e neng e santse e le mosetsana fela yo a ratanang nae, gore a mo etele. Kgabagare, ba ne ba nyalana mme ba nna teng kwa Hawaii.
Patrick le Nina ba ne ba se ka ba itse gore ntseana go batlana ga bone le kagiso le boitumelo go tla feleletsa go dirile gore ba iphitlhele ba ithuta Bibela le Basupi ba ga Jehofa. Ka a ne a ntse a tlhomamisegile mo botshelong jotlhe jwa gagwe gore ga go na Modimo, Nina jaanong o ne a simolola go bona dikarabo tse di kgotsofatsang tsa Bibela tsa dipotso tse di ntseng di mo tshwenya tse di ntseng jaaka gore ke ka lebaka lang boikepo bo le gone le gore ke ka ntlha yang fa dilo tse di maswe di diragalela batho ba ba molemo. Ka tsela e e tshwanang go batlana le boammaaruri ka dingwaga tse some ga ga Patrick go ne ga tla mo bowelong jwa gone ka tsela e e itumedisang. Go ise go e kae, seo ene le Nina ba neng ba se ithuta go tswa mo Bibeleng se ne sa fetola tsela eo ba neng ba itshwara ka yone. Morago ga lobaka lo loleele le go kgaratlha ka thata, Patrick o ne a kgona go ikgolola go tswa mo go tshwakgolweng ke motsoko go go tseneletseng. Mo e ka nnang lobaka lwa dingwaga tse some go fitlha jaanong, ene le mosadi wa gagwe ba ile ba tshela botshelo jo bo phepa, jo bo nang le maitsholo a mantle tumalanong le ditekanyetso tsa Modimo. Ka dipelo tse di itshekileng le digakolodi tse di phepa, ba ipelela kagiso eo ba neng ba ntse ba senkana le yone.
Go Intsha Setlhabelo le Maduo a Gone
“Ganèlañ go tsèna ka kgōrō e e pitlaganyeñ: gonne kea lo raea, bantsi ba tla batla go tsèna, me ba tla retelèlwa.” (Luke 13:24) Mafoko ano a ga Jesu Keresete a bontsha ka phepafalo gore ga go bonolo go direla Modimo le go tshela ka ditekanyetso tsa Dikwalo. Mongwe le mongwe yo o eletsang go dira jalo o tshwanetse gore a se ka a dira fela maiteko ao a tlhokegang mme gape o tshwanetse a intsha setlhabelo mo go tlhokafalang gone. Eleruri go bonala fa go ile ga nna jalo ka mongwe le mongwe wa bao ba umakilweng mo kgannyeng eno. Lefa go le jalo abo ba ile ba duelwa ka tsela e e kgatlhang jang ne!
Ka sekai, akanya fela ka Patrick le Nina, bao ba sa tswang go umakwa gone fela jaanong. Ba ile ba dira phetogo e kgolo go tswa mo tseleng ya bone ya botshelo eo mo go yone ba neng ba kgona go kgobokanya madi a mantsi mme ba tsena mo go ya tirelo ya nako e e tletseng ya Bokeresete ba tshegediwa ke tiro ya boitshediso eo e sa tseyeng letsatsi lotlhe. Go ntse go le jalo, ba tlhatswegile pelo gore melemo eo ba e bonang semoyeng e feta kgakala go intsha setlhabelo goo ba kileng ba ne ba go dira mo dilong tse di bonalang. Mme eleruri ba itumetse.
Ka ntlha ya dingwaga tsa bone, ga go a ka ga nna bonolo ka George le Lillian go dira diphetogo mo botshelong jwa bona. Go nna le seabe mo dipokanong tsa Bokeresete le mo tirelong go tlhoka nako, tlhokomelo, le mmele o o tlhaga. Lefa go ntse jalo, seo se ileng sa ba itumedisa thata ke gore, boitekanelo jwa bone jwa mmele bo ne jwa tokafala, mme botshelo jo ba bo tshelang gone jaanong bo ka tlhalosiwa go twe ke jwa go tlala matlhagatlhaga, jo bo nang le maikaelelo, le jo bo itumedisang.
Fa e le ka George le Isabel, kgwetlho e kgolo eo ba lebaneng le yone ke go thapisa bana ba bone le go ba thusa go tsena mo tseleng e e isang botshelong. Go tlhoka nako e ntsi le maiteko go baakanya bana ba babotlana ba bane bano gore ba nne gone kwa dipokanong kgotsa go ba rulaganyetsa gore ba nne gone mo bodiheding jwa Bokeresete. Ka nako nngwe kgatelelo e e sa boeng ka morago e ne ya dira gore George le Isabel ba repise dikgwele mo maikarabelong a bone a botsadi. Lefa go le jalo puo ya Bibela e e nang le setlhogo se se reng “Go Tsosolosa Moya wa go Intsha Setlhabelo” e ne ya ba tlhotlheletsa go gagamatsa maiteko a bone a go tlhokomela bana ba bone ba bane le go ba thapisa ka ditsela tsotlhe tseo di tlhokegang gore ba ‘ba godisetse mo kotlhaong le mo taong ya ga Jehofa.’ Ke boammaaruri gore, maiteko ao a ile a duelwa mo go golo.—Baefesia 6:4.
Ga se ponalo e ntle ya dilo tsa tlhago, maemo a a itumedisang a bosa, kgotsa botshelo jwa go tlhaba kgobe ka mmutlwa tseo di leretseng batho bano le ba bangwe ba bantsi boitumelo jwa boammaaruri. Go na le moo, ke kitso ya gore ba dirisa matshelo a bone tumalanong le thato ya Modimo le gone ba tshela ka ditekanyetso tsa Lefoko la gagwe, eleng Bibela. (Moreri 12:13) Mo godimo ga moo, boitumelo jwa boammaaruri bo phophoma mo dipelong tsa bone jaaka fa ba akanya ka nako e e ipedisang ya fa paradaise ya lefatshe e tla bo e buseditswe lefatshe ka bophara.—Luke 23:43.
[Setshwantsho mo go tsebe 25]
George, Isabel, le bana ba bone ba itumelela go bala Bibela
[Setshwantsho mo go tsebe 26]
George le Lillian ba itumelela bodihedi jwa Bokeresete
[Setshwantsho mo go tsebe 27]
Patrick le Nina ba itumelela go nna le kagiso ya boammaaruri fa ba ntse ba direla Jehofa