Paradaise Kana Thothobolo ya Matlakala—O Ka Tlhopha Eng?
GA GO na ope yo o neng a ka re ga a tlhaloganye gore ke motho wa mofuta ofe: mojanala mongwe wa kwa Yuropa yo o neng a batla boikhutso ebile a nyoretswe go itumelela marang a letsatsi kwa setlhakatlhakeng se se neng se tshwana le paradaise. Fa a ntse a raletse mo patlelong ya dithota tsa moshawa o o dikologileng dintshi tsa lewatle, o ne a feta ka kelotlhoko a tsamaya mo godimo ga matlakala a mabotlolo a a latlhilweng, meteme, dikgetsana tsa polasitiki, ditšhapise le dipampiri tsa dimonamone, makwalodikgang, le dimakasine. Ereka go ne go bonala sentle gore o ne a kgopisitswe ke seno, o ne a ipotsa gore a tota eno e ne e le yone paradaise eo a neng a tletse go e bona.
A le wena o kile wa diragalelwa ke selo se se tshwanang? Ke ka ntlha yang fa batho ba eletsa go ipona ba ile kwa boikhutsong kwa lefelong lengwe la paradaise, mme e re fa ba tsena koo, go bo go bonala sentle gore ga go na sepe se se ba tshwenyang go ka fetola paradaise eo go e dira thothobolo ya matlakala ya mmatota?
Ga Se Fela kwa “Paradaiseng”
Mokgwa ono o go bonalang sentle gore batho ga ba tlhokomele bontle, bothakga, le bophepa ga o diragale fela kwa mafelong a e leng “diparadaise,” koo bajanala ba tlang teng ka bontsi. Morafe wa gompieno o tlhasetswe ka mo go utlwisang botlhoko ke kgotlelo eno e e setseng e fitlhelwa mo e ka nnang mo lefelong lengwe le lengwe. Dikgwebo di le dintsi di tsaya karolo e kgolo mo go kgotleleng ka go ntsha ditone di le dintsi tsa leswe. Dilo tse di latlhiwang tse di nang le botlhole ga di latlhelwe kwa mafelong a a tshwanetseng le dioli tse di tshologileng ka phoso di tshosetsa go ka senya dikarolo tse dintsi tsa lefatshe la rona, di di dira gore di seka tsa tlhola di tshwanelega gore go ka nniwa mo go tsone.
Dintwa le tsone di a kgotlela. Fa lefatshe le santse le le mo tlalelong, ntwa ya kwa Kgogometsong ya Persia ya 1991 e ne ya oketsa mokgwa o mongwe gape o mosha wa go kgotlela. Masole a Iraq a ne a tshuba ka boomo metlhodi e ka nna 600 ya oli, e dira gore Kuwait “e nne e kete e tlhoseditswe ka bodiba jwa molelo,” jaaka lokwalodikgang lwa Yuropa le ne la tlhalosa kgang eno. Makasine mongwe wa Jeremane eleng Geo o ne wa tlhalosa dikgabo tseno tsa molelo jaaka “tshenyo ya tikologo e kgolo go di gaisa tsotlhe e e dirilweng ke motho.”
Fa ntwa e fela, ka bonako go ne ga simololwa go phepafadiwa. Go ne ga tsaya dikgwedi di le dintsi go dirwa ka thata gore go timiwe fela metlhodi eno ya oli e e tukang. World Health Organization e ne ya bega gore kgotlelo e e okeditsweng kwa Kuwait e ka dira gore palo ya batho ba ba swang e tlhatloge ka diperesente di le 10.
Ga Di Kotsi go Le Kalo mme Lefa Go ntse Jalo di Kgoreletsa Thata
Gareng ga mekgwa e mengwe ya go kgotlela ka go sa kgathale le ka selekanyo se segolo, go na le mekgwa e mengwe gape e e diketekete ya go kgotlela ka selekanyo se sennye. Batho ba ba latlhelang matlakala gongwe le gongwe le “ba ba kwalang” mo maboteng ka pente, e ka tswa e le dilo tse di lebegang di se kotsi thata mo go kgotleleng, mme lefa go le jalo, di thusa mo go kgoreletseng Lefatshe gore le se ka la ntsha bokgoni jwa lone mo go nneng paradaise.
Mo mafelong a mangwe go kwala ka pente e setse e le selo se se tlwaelegileng mo e leng gore baagi ba teng ba setse ba le “difofu tsa mekwalo ya pente,” ke gore ga ba tlhole ba e tseela thata kwa tlhogong. E fitlhelwa mo ditereneng tse di tsamayang kafa tlase ga lefatshe mo maboteng a dikago, le mo matlwaneng a a dirisiwang ke batho go letsa mogala mo go one. Mekwalo ya pente ga e tlhole e fitlhelwa fela mo maboteng a matlwana a botlhe.
Ditoropo dingwe di tletse ka dikago tse di oleng le tse di sa tlholeng di nniwa. Matlo le dijarata tse di tlhakatlhakaneng di dirile gore matlo a go nniwang mo go one a seka a tlhola a kgatlhisa. Dikoloi tse di senyegileng, metšhini e e latlhilweng, le makgorokgoro a dilo tse di robegileng di gasagane mo dijarateng tsa dipolasi tseo di neng di tshwanetse go ka bo di kgatlha ka mo go itumedisang.
Mo dikgaolong dingwe go bonala ekete batho ga ba kgathale lefa ba le leswe ebile ba sa lebege sentle. Go tsamaya fela o apere ka tsela e e tlhakatlhakaneng ebile o sa ipaakanya sentle e ka tswa e se fela selo se se amogelwang mme gape e le selo se se tsewang se le mo fesheneng. Bao ba anaanelang bothakga le bophepa ba lebiwa jaaka ba ba siilweng ke nako ka mo go utlwisang botlhoko.
Abo E Tla Nna Namane E Tona Ya Tiro Jang Ne!
Abo go tla tlhokafala tiro e kgolo jang ne ya go phepafatsa go fetolela dintshi tsa lewatle, dikgwa, le dithaba tsa legae la rona la lefatshe mo diparadaiseng tse di tlholang di tshwantshitswe kafa ntle mo dimakasineng tse dintle tsa bajanala—re sa bue ka seo se tlileng go dirwa mo metsesetoropong, mo ditoropong, le mo dipolasing le mo bathong ka bobone!
Mojanala yo o umakilweng kwa tshimologong o ne a itumela thata fa a bona batho ba ba phepafatsang ba feta ba ntse ba phepafatsa moragonyana mo letsatsing leo ba tlosa mekoa e megolwane ya matlakala. Mme lefa go ntse jalo, ba ne ba tlogela kwa morago, diphatsa tsa digalase tse di thubegileng, dikhurumelo tsa mabotlolo, mekgothi ya meteme ya dino, le masalela a disekerete a a senang palo. Ka jalo le eleng morago ga gore go phepafadiwe, go ne go santse go itshupa thata gore lefelo leo le ne le ka tshwana thata le thotobolo ya matlakala go na le paradaise.
Go phepafadiwa ga kgolokwe e le gore go bolokwe polanete ya Lefatshe mo go nneng kgolokwe ya thothobolo ya matlakala go tla tlhokafala gore go tlosiwe masalela otlhe a go nna jalo a dilo tseno tse di kgoreletsang. A go na le tsholofelo nngwe ya gore go phepafatsa go go ntseng jalo go tla diragala? Fa e le gore go ntse jalo, go tla dirwa jang? Ke mang yo o tla dirang tiro eno ka botlalo? Mme leng?