Go Tlosa Kgotlelo Mo Pelong le mo Tlhaloganyong

JEHOFA ga a ka a dira gore batho ba eletse go bona go na le leswe kana tlhakatlhakano. Legae la bone la polanete le ne le diretswe go nna paradaise e e phepa, e e rulaganeng, le e ntle. E ne e se boikaelelo jwa Modimo gore e senyege gore e tshwane le thothobolo ya matlakala e e sa kgatlheng.—Genesise 2:8, 9.

Lefa go ntse jalo, fa batho ba sena go gana kaelo ya bomodimo, ba ne ba simolola go itirela thulaganyo ya mofuta wa bone wa lefatshe. Ereka ba ne ba sa sologelwe molemo ke botlhale jwa bomodimo gape ba tlhoka maitemogelo, ba ne ba patelesega go ithuta go kgaratlha thata fa ba batla go atlega mo sengweng. Ditiragalo tsa lefatshe di tshegetsa boammaaruri jwa Bibela jwa gore motho ka boene a ka se kgone go ipusa ka katlego; dingwaga tse di diketekete tse di fetileng ‘motho o ile a nna le thata mo go yo mongwe go mo utlwisa botlhoko.’ (Moreri 8:9; Yeremia 10:23) Bothata jwa kgotlelo jwa motlha wa rona, ka mefuta yotlhe ya yone, ke matswela a go sa buse sentle ga motho.

Go Etsa Tsela E Modimo O Lbang Dilo ka Yone

Batho ba ba eletsang go itumedisa Modimo, ba leka ka natla go tshela tumalanong le melao ya Mmopi ya bophepa. Ka jalo, Basupi ba ga Jehofa ba ne ba lebanwe ke bothata fa go ne go rulagantswe gore kopano ya boditšhabatšhaba e ne e tla tshwarelwa kwa Prague, Czechoslovakia, mo bogareng jwa 1991.a Go ne go fopholetswa gore go tla tla batho ba le 75 000, e le bontsi jo Setadiamo sa Strahov se neng se ka kgona go ba tshela sentle ba phuthologile. Mme lefa go ntse jalo, setadiamo seno se ne se na le dingwaga di le tlhano se sa dirisiwe. Se ne se tlhoka go baakanngwa, ka ntlha ya gore se ne se sentswe ke maemo a loapi. Basupi ba ga Jehofa ba ba ka nnang 1 500 ba ne ba senya diura di feta 65 000 ba se baakanya le go se penta gape. Ka nako ya kopano setlhopha seno se se phepafatsang se ne se dirile setadiamo seno lefelo le le tshwanelang la go obamela Modimo wa boammaaruri Jehofa.

Fa lefatshe ka kakaretso le bontsha gore ga le anaanele thata bophepa le thulaganyo, ke eng se se tlhotlheletsang Basupi ba ga Jehofa gore bone ba seka ba tshwana le lone? Ke go bo ba anaanela kgakololo ya Bibela ya gore Bakeresete ba tshwanetse go tlogela mekgwa e e sa siamang, jaaka bopelotshetlha, go sa akanyetse ba bangwe, megagaru, le go tlhoka lorato. Bibela e bolela jaana: ‘Apolang motho wa bogologolo le ditiro tsa gagwe.’ Mo boemong jwa seno ‘lo apare motho yo mosha yo o ntseng a shahalediwa mo kitsong kafa setshwanong sa yo o mo tlhodileng.’ Motho yo o itshupang gore o rata bophepa, thulaganyo, le bontle, ga a na a tsamaisana gotlhelele le ditlwaelo tsa go kgotlela.—Bakolosa 3:9, 10; 2 Bakorintha 7:1; Bafilipi 4:8; Tito 2:14.

Botho jo bosha bo tlhoka gore Bakeresete e nne batho ba ba elang tlhoko gore ba se ka ba kgotlela dilo, ba se ka ba kgotlela ka bomo kana ba se ka ba ikobela le go tlhokomologa melao e e kgatlhanong le go kgotlela e e tlhomilweng ke puso. Bo ba thusa go tila mokgwa wa go latlhela dilo gongwe le gongwe, bopelotshetlha, le mokgwa wa go nna setshwakga o o dirang gore motho a felele a le boatla. Fa ba tlhagolela mokgwa wa go tlotla dilo tsa ba bangwe go ba thusa gore ba seka ba kwala mo maboteng ka pente jaaka tsela nngwe ya go ntsha maikutlo a bone, jaaka go itshamekela fela, kana jaaka mokgwa mongwe wa botaki. Bo tlhoka gore magae, dikoloi, diaparo, le mebele e bolokwe e le phepa.—Bapisa Yakobe 1:21.

Fa go tliwa mo bathong bao ba sa ikaelelang go apara botho jono jo bosha, a Modimo o ka bonwa molato ka go sa ba letle go tshela mo Paradaiseng ya gagwe e e tlang? Le eseng. Mongwe le mongwe yo o santseng a na le mekgwa e e iphitlhileng ya go kgotlela mo pelong ya gagwe le mo tlhaloganyong ya gagwe a ka nna kotsi mo paradaiseng e ntle e e tla bong e tsosolositswe ya polanete ya Lefatshe, a utlwisa botlhoko bao ba eletsang go nna mo go yone. Tshwetso ya Modimo ya “go senya ba ba senyañ lehatshe” e siame ebile gape e lorato.—Tshenolō 11:18; 21:8.

A Re Tshwanetse go Tsaya Karolo ka Matlhagatlhaga?

Lefa go ntse jalo, a seno se raya gore Bakeresete ba tlhoka go tsaya dikgato tsa go bona gore go seka ga kgotlelwa kana go a phepafadiwa?

Go itshupa sentle gore kgotlelo e kotsi mo boitekanelong le mo pabalesegong ya batho. Go a utlwala gore Jehofa o a amega ka dikgang tseno, jaaka fa re ka bona mo melaong ya gagwe e a neng a e neile Baiseraele. (Ekesodo 21:28-34; Duteronome 22:8; 23:12-14) Mme lefa go ntse jalo, ga go na gope kwa re utlwang gore o ne a ba laela gore ba tsamaye ba ruta merafe e mengwe kaga go ipabalela; kana le eleng gore Bakeresete ba lekgolo la ntlha la dingwaga ba ne ba boleletswe go dira jalo.

Gompieno, dilo tse di amanang le tikologo di ka nna tsa nna dikgang tsa sepolotiki bonolo fela. Ebile tota, makoko mangwe a sepolotiki a ile a tlhomelwa fela gore a rarabolole mathata a a amang tikologo. Mokeresete yo o itetlang gore a tshwaediwe ke go tsaya karolo mo dikgannyeng tsa sepolotiki ga e tlhole e le yo o itlhaotseng. Jesu o ne a tlhomela barutwa ba gagwe molaomotheo o o reng: “Bōnè ga se ba lehatshe, hèla yaka nna ke se oa lehatshe.” Mokeresete yo o itlhokomolosang kaelo eno a ka nna mo bothateng jwa go iphitlhela e le tsala ya “babusi ba lehatshe yeno, ba ba cwañ lehèla hèla.”—Yohane 17:16; 1 Bakorintha 2:6.

Jesu ga a ka a leka go rarabolola mathata otlhe a batho ba neng ba na le one mo motlheng wa gagwe; kana le eleng go bolelela barutwa ba gagwe go dira jalo. Seo a neng a ba laela sone ke gore: “Ke gōna tsamaeañ, lo dihè merahe eotlhe barutwa, lo ba kolobetsè . . . Lo ba rutè go tlhōkōmèla dilō cotlhe tse ke di lo laoletseñ.” Ga a ise a ko a ba neye melao mengwe e e neng e amana le tikologo.—Mathaio 28:19, 20.

Fa a ne a tlhalosa seo se tshwanetseng go tla pele mo botshelong jwa Mokeresete, Keresete o ne a re: “Me batlañ pele bogosi yoa gagwè, le tshiamō ea gagwè.” (Mathaio 6:33) Fa Jehofa, ka Bogosi jwa gagwe jwa Bomesia, a diragatsa melaometheo ya gagwe ya tshiamo mo tikologong ya kgolokwe eno yotlhe, mathata a a amanang le tikologo a tla bo a rarabololetswe ruri go kgotsofatsa mongwe le mongwe.

Ka jalo, Basupi ba ga Jehofa ba tsaya dilo ka tekatekano. Go ya ka Baroma 13:1-7, ba filwe taolo ya gore digakolodi tsa bone di tshwanetse tsa ba kaela gore ba ikobele melao ya puso e e mabapi le tikologo. Mo godimo ga moo, molao wa Modimo wa gore ba rate batho ba bangwe o ba tlhotlheletsa gore ba tshware dilo tsa ba bangwe sentle—e ka ne e le tse di dirisiwang ke botlhe kana tsa motho ka boene—ba sa di senye le go sa latlhele matlakala gongwe le gongwe. Mme lefa go ntse jalo, go itshupa sentle gore ga ba a laolwa go etelela pele mo dikgannyeng tsa go phepafatsa tsa lefatshe. Ba dira se tota ba tshwanetseng go se dira eleng go rera molaetsa wa Bogosi jwa Modimo pele, ereka ba lemoga gore seno tota ke tsela ya go dira molemo wa goyagoile.

Phepafatso ya Semoya

Baiseraele ba bogologolo ba ne ba tlhagisiwa kgapetsakgapetsa ka seo se neng se tla ba diragalela fa ba ne ba kgotlela lefatshe ka go tsholola madi, ka go etsa mekgwa mengwe ya boitsholo jo bo maswe, kana ka go sa tlotle dilo tse di boitshepo. (Dipalō 35:33; Yeremia 3:1, 2; Malaki 1:7, 8) Go bonala sentle gore, ba ile ba bonwa molato ka ntlha ya go kgotlelega semoyeng e seng ka ntlha ya go kgotlela tikologo le mebele seo le sone ba ka tswang ba ne ba le molato mo go sone.b

Ka tsela e e ntseng jalo, Mokeresete gompieno o tla leka ka bojotlhe go tila kgotlelo kana leswe la semoya. Seno o se dira ka go ‘apara botho jo bosha,’ jo bo tlosang mekgwa e e kgotlelang mo pelong le mo tlhaloganyong. Basupi ba ga Jehofa ba ba fetang dimilione di le nne ba sologelwa molemo go tswa mo go phepafadiweng gono ga semoya, ba bona melemo ya go phepafadiwa ga boitsholo le ga bodumedi go tswa mo badumeding ka bone, mmogo le go phepafadiwa ga dilo go go bonwang ke botlhe.—Baefesia 4:22-24.

Gompieno go na le letsholo la go phepafatsa semoyeng. Letsholo la go phepafatsa tikologo ya lefatshe lotlhe le tla latela mo nakong e khutshwane mme le tla boloka legae la rona mo go nneng kgolokwe ya thotobolo ya matlakala ka go le naya tikologo e e sa kgotlelwang e le e tlhokang.—Moreri 3:1.

[Dintlha tse di kwa tlase]