Dipotso Tse Di Tswang go Babadi

A Johane yo o kolobeditseng Jesu o tshwanetse go bidiwa “Yohane Mokolobetsi” kana ‘Johane wa Mokolobetsi’?

Ditsela tseno tse pedi tsa go mmitsa di siame tsotlhe e bile Bibela e a di tshegetsa.

Johane o ne a tshwanetse “go baakanyetsa [Jehofa] seshaba se o se etleeledicweñ,” mme a dira jalo ka go “rèra kolobeco ea boikwatlhaō yo bo bōnañ boichwarelō yoa dibe.” (Luke 1:17; 3:3) Moaposetoloi Mathaio o ne a kwala jaana: “Yohane Mokolobetsi, a rèra mo nageñ ea Yudea, a re, Ikwatlhaeañ; gonne bogosi yoa legodimo bo atametse. . . . Hoñ ga cwèla kwa go èna Yerusalema, lehatshe yeotlhe ya Yudea . . . me ba kolobediwa ke èna mo nokeñ ea Yoredane, ba ipolèla dibe tsa bōnè.”—Mathaio 3:1-6.

Ela tlhoko gore Mathaio o bitsa Johane a re ke “Mokolobetsi.” Mathaio yo kwantle ga pelaelo a neng a kwala pego eno ya gagwe ka tsela e Bajuda ba neng ba ka mo tlhaloganya ka yone, o tshwanetse a bo a ne a itse gore Bajuda ba ne ba tla tlhaloganya gore “Mokolobetsi” ke mang. O ne a dirisa “Mokolobetsi” jaaka o ka re ke sefane sa gagwe. Jesu le barutwa ba gagwe ba ne ba mmitsa “Yohane Mokolobetsi” fela jaaka batlhanka ba ga Herode ba ne ba mmitsa.a—Mathaio 11:11, 12; 14:2; 16:14.

Morutwa Mareko o bega ka tiragalo nngwe e mo go yone o neng a bidiwa ka lone leina leno la “Mokolobetsi.” (Mareko 6:25; 8:28) Lefa go ntse jalo fa Mareko a ne a itsise Johane, o ne a mmitsa ‘Johane wa mokolobetsi.’ (Mareko 1:4) Segerika se se dirisitsweng mo go Mareko 1:4 se farologana go sekae le se se dirisitsweng mo ditemaneng tse dingwe. Mareko 1:4 e ka bewa gape ka mafoko a a reng, “yo o kolobetsang.” Mareko o ne a tlhalosa se Johane a neng a se dira; o ne a dira tiro ya go kolobetsa, ke gore, e ne e le mokolobetsi.

Lefa go ntse jalo, ga go bonale fa re tshwanetse go farologanya ditsela tseno tse pedi tsa go bitsa Johane. Mo go Mareko 6:24, 25, re bala jaana ka Salome: “Me a cwa, a ea a raea mmagwè, a re, Ke tla lōpa eñ? Me èna a re, Lōpa tlhōgō ea ga [Johane wa Mokolobetsi, NW]. Me a itlhaganèlèla kwa kgosiñ, a lōpa tlhōgō ea ga Yohane Mokolobetsi yana hèla ka mogocana.” Ditsela tseno tsa go mmitsa di ne tsa dirisiwa ka go di refosanya.

Batho bangwe ba ka tlhaloganya “Mokolobetsi” go ya ka tsela eno e a tlhalosiwang ka yone mo tlhalosong ya bobedi ya bukantswe: “Leloko kana motshegetsi wa tumelo ya Seporotesetante sa seefangele e e itseweng ka go nna le thulaganyo ya go busa ya phuthego le go kolobetsa fela batho ba e leng badumedi ba yone ka go ba nwetsa mo metsing.” Eleruri Johane o ne a sa nna jalo.

Ka gone, ditsela tseno tsa go mmitsa re re ke “Yohane Mokolobetsi” le ‘Johane wa Mokolobetsi’ di siame e bile di tshwanetse ka bobedi jwa tsone.

[Ntlha e e kwa tlase]