Go Ithuta go Boifa Modimo

“Boiha Yehofa, u bo u kgaoganè le boshula.”—DIANE 3:7.

1. Diane e ne e kwaletswe bomang?

BUKA ya Bibela ya Diane e na le kgakololo e ntsi tota ya semoya. Kwa tshimologong, Jehofa o ne a ntshitse buka eno ya kaelo gore e kaele morafe wa gagwe wa Iseraele. Gompieno, e na le mafoko a a botlhale a e a bolelelang morafe wa gagwe o o boitshepo wa Bakeresete, ‘o dikhutlo tsa metlha di wetseng mo go one.’—1 Bakorintha 10:11; Diane 1:1-5; 1 Petere 2:9.

2. Ke ka ntlha yang fa tlhagiso e e mo go Diane 3:7 e tshwanetse motlha wa gompieno?

² Re bala jaana fa re bula mo go Diane 3:7: “U se ka ua nna botlhale mo matlhoñ a gago; boiha Yehofa, u bo u kgaoganè le boshula.” Fa e sale ka nako ya batsadi ba rona ba pele, fa Noga e ne e hepisa Efa ka go ba solofetsa gore ba tla “itse molemō le boshula” motho o ile a palelwa go naya batho dilo tse ba di tlhokang ka botlhale jwa gagwe. (Genesise 3:4, 5; 1 Bakorintha 3:19, 20) Seno ga se ise se ko se papamale thata jaana mo lobakeng lope fela mo hisitoring jaaka se papametse mo lekgolong leno la bo 20 la dingwaga—mo “metlheñ ea bohèlō” ya fa motho a tlhasetswe ke go tlhaolana ga batho ka ditso, thubakanyo, le boitshwaro jwa mefuta yotlhe jo bo maswe, mme ao ke maungo a go latola ga gagwe gore Modimo o teng le go akanya ga gagwe gore dilo di itlhageletse fela. (2 Timotheo 3:1-5, 13; 2 Petere 3:3, 4) Ke ‘tlhakatlhakano e ntšha ya lefatshe’ eo UN kana ditumelo tse di makgaoganyane tsa lefatshe di ka se kang tsa e rarabolola.

3. Ke ditiragalo dife tse go neng ga bolelelwa pele gore di tla diragala mo motlheng ono wa rona?

³ Lefoko la Modimo la seperofeti le re bolelela gore badimona ba ile kwa “dikgosiñ tsa lehatshe yotlhe, [ba] ea go di phuthèla kwa ntweñ ea letsatsi ye legolo ya Modimo, Mothataeotlhe . . . mo heloñ ha go bidiwañ Hara-Magedona, mo puoñ ea Sehebera.” (Tshenolō 16:14, 16) Go ise go e kae bogale jwa ga Jehofa bo tlile go tukela dikgosi tseo kana babusi bao. Bo tla tshwana le letshogo le le neng la wela Bakanana ka nako ya fa Joshue le Baiseraele ba ne ba tla go diragatsa katlholo mo go bone. (Yoshue 2:9-11) Mme gompieno, Keresete Jesu, ene yoo a tshwantshediwang ke Joshue—ene yo e leng “Kgosi ea dikgosi le Morèna wa barèna”—yo ‘o tla busang merafe ka tsamma ya tshipi,’ o tlile go supa “bogale yoa chakgalō ea Modimo Mothataeotlhe.”—Tshenolō 19:15, 16.

4, 5. Ke bomang ba ba tlileng go bolokwa, mme ka ntlha yang?

⁴ Ke mang yo o tla bolokiwang ka nako eo? Ba ba tla gololwang e tla nna botlhe ba ba ileng ba ithuta go tlotla Jehofa ka go mmoifa eseng ba ba tla bong ba le mo poifong. Ga ba itseye ba le botlhale ka gope, mme ba ‘kgaogana le bosula.’ Ba a ikokobetsa mme ba fepa ditlhaloganyo tsa bone ka se se siameng, mo e leng gore ba ntsha megopolo e e bosula mo ditlhaloganyong tsa bone. Ba supa fa ba tlotla Jehofa, Morena Molaodi, “Moatlhodi oa lehatshe yeotlhe,” yoo a tla tlogang a bolaya botlhe ba ba ngaparetseng bosula, fela jaaka a ne a nyeletsa Basodoma ba boitsholo jo bo maswe. (Genesise 18:25) Eleruri, mo bathong ba e leng ba Modimo, “go boiha Yehofa ke mocwedi oa botshelō, ke go tlogèla diru tsa losho.”—Diane 14:27.

⁵ Mo letsatsing leno le Modimo o tlileng go atlhola ka lone, botlhe ba ba ineelang ka botlalo mo go Jehofa ka go bo ba boifa go mo utlwisa botlhoko ba tla lemoga boammaaruri jono jo bo boletsweng ka tsela ya tshwantshetso mo go Diane 3:8: “[Go boifa Jehofa go] tla nna phodishō mo khubuñ ea gago, le mmōkō mo marapoñ a gago.”

Go Tlotla Jehofa

6. Ke eng se se tshwanetseng go re tlhotlheletsa gore re reetse Diane 3:9?

⁶ Go boifa Jehofa ka go bo re mo anaanela mmogo le go mo rata ka lorato lo logolo thata, go tshwanetse ga re tlhotlheletsa go reetsa Diane 3:9, jaaka e re: “Tlotla Yehofa ka thoto ea gago, le ka tsa ntlha tsa totahalèlō eotlhe ea gago.” Ga re patelediwe go tlotla Jehofa ka go ntsha meneelo. Re tshwanetse go e ntsha ka go rata ga rona jaaka go supilwe ka makgetlo a le 12 go tloga mo go Ekesodo 35:29 go fitlha mo go Duteronome 23:23 fa go ne go buiwa ka ditlhabelo kwa Iseraele wa bogologolo. Mabutswapele ano a a newang Jehofa e tshwanetse ya nna dimpho tse di gaisang tsotlhe tse re ka di ntshang, re di ntsha jalo ka go bo re lemoga bomolemo jwa gagwe le bopelonomi jwa gagwe jwa lorato jo a bo re diretseng. (Pesalema 23:6) A tshwanetse a supa gore re ititeile sehuba gore ‘re batla pele bogosi jwa gagwe, le tshiamo ya gagwe.’ (Mathaio 6:33) Ke eng se re se bonang fa re tlotla Jehofa ka dithoto tsa rona? “Yalo mabolokèlō a gago a tla tlala letlōtlō, le dithatholèlō tsa gago di tla penologa boyalwa yo bosha.”—Diane 3:10.

7. Re tshwanetse go naya Jehofa mabutswapele afe, mme seo se tla felela jang?

⁷ Jehofa o re segofatsa thata semoyeng go gaisa kafa a re segofatsang ka teng mo ditseleng tse dingwe. (Malaki 3:10) Ka gone, mabutswapele a re a mo nayang e tshwanetse segolo thata e nne a semoya. Re tshwanetse go dirisa nako ya rona, maatla, le nonofo ya rona e e botlhokwa thata go dira thato ya gagwe. Tiro eno e tla re nonotsha, fela jaaka e ne ya nna “seyō” mo go Jesu. (Yohane 4:34) Mabolokelo a rona a semoya a tla tlala, mme boitumelo jwa rona jo bo tshwantshediwang ke beine, bo tla penologa. Mo godimo ga moo, fa re ntse re rapela mme re solofetse gore re tla newa dijo tse di lekaneng tsa letsatsi lengwe le lengwe, re ka ntsha meneelo ka bopeloephepa go tswa mo dilong tse re itshedisang ka tsone gore re kgone go dira tiro ya Bogosi mo lefatsheng ka bophara. (Mathaio 6:11) Sengwe le sengwe se re nang le sone go akaretsa le dithoto tse re nang le tsone di tswa mo go Rraarona yo o lorato wa selegodimo. O tla re naya masego a mangwe gape, go ya ka selekanyo se re dirisang dilo tse di botlhokwa tseno ka sone go mo galaletsa.—Diane 11:4; 1 Bakorintha 4:7.

Go Kgalema ka Lorato

8, 9. Re tshwanetse ra leba kgakololo le kgalemelo jang?

⁸ Diane kgaolo 3 mo temaneng ya 11 le ya 12 e bolela kaga kamano ya morwa le rraagwe ba ba ratanang ba ba mo malapeng a bomodimo, mmogo le kamano e e fa gare ga ga Jehofa le bana ba gagwe ba semoya ba ba mo lefatsheng. Re bala jaana: “Morwaaka, u se ka ua nyatsa koatlhaō ea ga Yehofa; le gōna u se ka ua lapisiwa ke kgalemō ea gagwè: Gonne eo Yehofa o mo ratañ o tla a mo kgalemèle.” Batho ba lefatshe ga ba rate go kgalemelwa. Batho ba ga Jehofa ba tshwanetse go go itumelela. Moaposetoloi Paulo o ne a nopola mafoko ano a a tswang mo go Diane a re: “Morwaaka, se nyatse koatlhaō ea ga Yehofa, u bo u se ñodiege ha u kgalemèlwa ke èna; Gonne eo Yehofa o mo ratañ oa tla a mo oatlhaee, a kgwathise ñwana moñwe le moñwe eo o mo amogèlañ . . . Mo bakeñ lono, ekete koatlhaō eotlhe e nntse yaka ekete ga e na boitumèdishō, ha e se tlhokohaco hèla: leha go nntse yalo ea re kwa moragō ba ba e rutintshicweñ, e ba uñwèle louñō loa kagishō, eboñ louñō loa tshiamō.”—Bahebera 12:5, 6, 11.

⁹ Ee, kgalemelo le kotlhao di a tlhokega fa mongwe le mongwe wa rona a katisiwa, re ka tswa re e amogela go tswa mo batsading, ka phuthego ya Bokeresete, kana fa re ntse re tlhatlhanya ka Dikwalo fa re ithuta ka namana. Go reetsa kgalemelo ke kgang ya loso le botshelo, jaaka Diane 4:1, 13 le yone e bolela jaana: “Bomorwaaka, utlwañ thutō ea rra batho, lo tlhōkōmèleñ go itse tlhaloganyō: Chwara thutō thata thata; u se ka ua e lesa: u e tshegetsè; gonne ke botshelō yoa gago.”

Boitumelo Jo Bogolo go Gaisa

10, 11. Ke dilo dife tse dingwe tse di umakiwang mo mafokong a a kgatlhang a a mo go Diane 3:13-18?

¹⁰ A bo jaanong go latela dipolelwana tse di monate jang ne, ee ruri, ‘mafoko a boammaaruri a a kwadilweng ka thokgamo’! (Moreri 12:10) Mafoko ano a a tlhotlheleditsweng a ga Solomone a tlhalosa boitumelo jwa boammaaruri. Ke mafoko a re tshwanetseng go a kwala mo dipelong tsa rona. A balega jaana:

¹¹ “Go tlhōgōnōlō motho eo o bōnañ botlhale, le motho eo o bapalañ tlhaloganyō. Gonne tlhōtlhwa ea yōna e gaisa tlhōtlhwa ea selefera, le papadi ea yōna e gaisa papadi ea gouda e e itshekileñ. O tlhōkèga bogolo go diperela: me mo diloñ cotlhe tse u ka di eletsañ ga go na sepè se se ka chwantshiwañ naè. Boleele yoa malatsi bo mo seatleñ sa gagwè se se siameñ; mo seatleñ sa molèma go dikhumō le tlotlō. Ditsela tsa gagwè ke ditsela tsa monate, le ditselana tsa gagwè cotlhe ke kagishō. O setlhare sa botshelō mo go ba ba mo chwarañ: me go tlhōgōnōlō moñwe le moñwe eo o mo itshadisetsañ.”—Diane 3:13-18.

12. Botlhale le temogo di ka re solegela molemo jang?

¹² A bo botlhale bo umakiwa kgapetsa jang ne mo bukeng ya Diane, bo umakiwa ka makgetlo a le 46! “Go boiha Yehofa ke tshimologō ea botlhale.” Jono ke botlhale jo bo ka dirisiwang jwa bomodimo jo bo thailweng mo go itseng Lefoko la Modimo jo bo dirang gore batho ba gagwe ba kgone go tshela sentle ba babalesegile mo sefefong se se kotsi se se tsubutlang mo lefatsheng la ga Satane. (Diane 9:10) Temogo e e umakiwang ka makgetlo a le 19 mo go Diane, ke botlhale jo bo botlhokwa thata joo bo re thusang go fenya maano a ga Satane. Mmaba yo mogolo yono o dirisa boitemogelo jo a nang najo jwa dimileniamo tse dintsi go dira gore ditiro tsa gagwe tsa maano di atlege. Mme re na le selo se se botlhokwa thata go gaisa se se re rutang se se fetang boitemogelo—temogo ya bomodimo, nonofo ya go itse se se molemo le se se bosula le go tlhopha go latela tsela e e siameng. Seno ke sone se Jehofa a se re rutang ka Lefoko la gagwe.—Diane 2:10-13; Baefesia 6:11.

13. Ke eng se se ka re sireletsang mo dinakong tse di thata tsa ikonomi mme jang?

¹³ Tlhakatlhakano ya ikonomi e e leng teng mo lefatsheng la gompieno e supela kwa pele se se tla diragalang fa boperofeti jono jo bo mo go Esekiele 7:19 bo diragadiwa: “Ba tla latlhèla selefera sa bōnè mo mebileñ, gouda ea bōnè e tla nna yaka selō se se itshekologileñ; selefera sa bōnè le gouda ea bōnè ga di ketla di lekana go ba golola mo letsatsiñ [la] kgalehō ea ga Yehofa.” Khumo yotlhe e e mo lefatsheng ga e ka ke ya bapisiwa le maatla a a gololang a botlhale le temogo. Kgosi Solomone yo o botlhale o ne a bolela jaana ka nako nngwe: “Gonne botlhale ke phemèlō, hèla yaka madi e le phemèlō: me molemō o o gaisañ oa kicō, ke go re, botlhale bo boloka botshelō yoa eo o nañ nayō.” (Moreri 7:12) Eleruri go itumela botlhe ba ba tsamayang mo ditseleng tsa ga Jehofa tse di itumedisang le bao ka botlhale ba tlhophang go bona “bolele yoa malatsi,” botshelo jo bo sa khutleng jo Modimo o bo nayang mongwe le mongwe yo o dumelang mo setlhabelong sa thekololo sa ga Jesu!—Diane 3:16; Yohane 3:16; 17:3.

Go Tlhagolela go Nna le Botlhale jwa Boammaaruri

14. Jehofa o ile a supa botlhale jo re tlhokang go bo etsa jang?

¹⁴ Rona jaaka batho ba ba dirilweng mo setshwanong sa Modimo, re tshwanetse go lwa ka natla gore re tlhagolele go nna botlhale le go nna le temogo, dinonofo tse Jehofa a neng a di supa ka boene ka nako ya fa a ne a bopa dilo tse di gakgamatsang. “Yehofa o thaile lehatshe ka botlhale; a tlhōmamisa magodimo ka tlhaloganyō.” (Diane 3:19, 20) Ga a ka a bopa ditshedi ka gore di itlhagele fela ka botsone ka tsela e e sa itsiweng e e sa kgoneng go tlhalosiwa mme o ne a di bopa ka tlhamalalo, dingwe le dingwe “kaha ditshikeñ tsa cōna” e bile e le ka maikaelelo a a botlhale. (Genesise 1:25) Moragonyana fa motho a sena go bopiwa a le botlhale e bile a na le dinonofo tse di fetang tsa diphologolo kgakala, barwa ba Modimo ba baengele ba tshwanetse ba bo ba ne ba thela loshalaba lo logolo thata lo lo neng lwa gwasa lwa bo lwa gwasa le magodimo. (Bapisa Yobe 38:1, 4, 7.) Dilo tsotlhe tse Jehofa a di dirileng mo lefatsheng di supa ka phepafalo fela gore o kgona go bonela pele ka temogo, e bile di supa gore o botlhale.—Pesalema 104:24.

15. (a) Ke eng go sa lekana go tlhagolela fela botlhale? (b) Diane 3:25, 26 e tshwanetse ya dira gore re nne le tsholofelo efe?

¹⁵ Ga go tlhokege fela gore re ithute go nna botlhale le go nna le temogo, e leng dinonofo tse Jehofa a nang le tsone, mme go tlhokega gape gore re di ngaparele, re se ka ra bo ra repisa le eseng mo go ithuteng Lefoko la gagwe. O re kgothatsa jaana: “Morwaaka, a di se tloge mo matlhoñ a gago; u chwarè botlhale yo bo itekanetseñ le pharologanyō. Yalo di tla nna botshelō mo moeeñ oa gago, le bontlè mo thamuñ ea gago.” (Diane 3:21, 22) Ka go dira jalo, re ka tsamaya re babalesegile e bile ditlhaloganyo tsa rona di le mo kagisong, le e leng le mo motlheng o o atamelang jaaka legodu wa “tshenyègō ea choganeco” o o tlileng go tlela lefatshe la ga Satane. (1 Bathesalonia 5:2, 3) Ka nako ya sepitla se segolo gone, ga o kitla o “boiha poihō e e choganetsañ, leha e le go shwahadiwa ga baikepi motlhañ go tlañ: Gonne Yehofa o tla nna boikañō yoa gago, me o tla boloka lonaō loa gago, gore lo se ka loa chwarwa.”—Diane 3:23-26.

Go Rata go Dira Molemo

16. Bakeresete ba tshwanetse go dira eng mo godimo ga go nna tlhaga mo bodiheding?

¹⁶ Ano ke malatsi a gore re rere mafoko a a molemo a Bogosi re le tlhaga gore e nne sesupo mo merafeng yotlhe. Mme tiro eno ya go neela bosupi e tshwanetse ya dirwa le ditiro tseno tsa Bokeresete tse di tlhalositsweng mo go Diane 3:27, 28: “Ba ba chwanecweñ ke go dihèlwa molemō, u se ka ua gana ka ōna, ha go le mo thateñ ea seatla sa gago go o diha. U se ka ua raea oa ga eno, ua re, Tsamaea, me u bo u tlè gapè, me ka moshō ke tla gu naea; le morōrō selō u na nashō.” (Bapisa Yakobe 2:14-17.) E re ka karolo e kgolo ya lefatshe e le mo lehumeng le mo tlaleng, re ile ra nna ra kopiwa gore re thuse batho ba bangwe, segolobogolo bakaulengwe ba rona ba semoya. Basupi ba ga Jehofa ba ile ba dira jang?

17-19. (a) Ke selo sefe se se neng se batlega ka bonako se se neng sa dirwa ka 1993, mme batho ba ne ba arabela jang? (b) Ke eng se se supang gore bakaulengwe ba rona ba ba neng ba le mo mathateng ba ‘a fenya’?

¹⁷ Ela tlhoko sekai seno se le sengwe: Go ne ga opiwa mokgosi ngwaga o o fetileng gore go tlhokega thuso kwa go se pele se neng se bidiwa Yugoslavia. Bakaulengwe ba ba mo dinageng tse di fa gaufi ba ne ba dira ka tsela e e kgatlhang tota. Mo dikgweding tse di tsididi tsa mariga a a fetileng, ba ne ba kgona go romela thuso ka makgetlo a le mmalwa kwa mafelong a go neng go lowa kwa go one, go isetsa Basupi ba ba tlhokang ba koo dibuka tsa bosheng, diaparo tse di bothito, dijo, le melemo. Ka nako nngwe, bakaulengwe ba ne ba kopa tetla ya go isa ditone di le 15 tsa dilo tse ba thusang ka tsone, mme tetla eo e ne ya tla e le ya ditone di le 30! Basupi ba ga Jehofa ba kwa Austria ba ne ba romela diteraka tse dingwe gape tse tharo. Fa di balwa tsotlhe, go ne ga romelwa ditone di le 25 mme di ne tsa goroga kwa di neng di romelwa teng. A bo bakaulengwe ba ne ba itumela jang ne fa ba ne ba amogela dijo tse dintsi tsa semoya le tsa senama!

¹⁸ Ba ba neng ba newa dilo bano ba ne ba araba jang? Mogolwane mongwe o ne a kwala jaana kwa tshimologong ya ngwaga ono: “Bakaulengwe le bokgaitsadi ba Sarajevo ba a tshela e bile ba tsogile sentle, mme se se botlhokwa thata ke gore re santse re nonofile sentle semoyeng gore re ka itshokela ntwa eno e e senang tlhaloganyo. Boemo bo ne bo le maswe tota fa go tla mo dijong. A Jehofa a le segofatse a bo a le duelele ditiro tse lo di re diretseng. Badiredi ba puso ba tlotla Basupi ba ga Jehofa ka tsela e e tlhomologileng thata gonne ba tlhoma sekao ka tsela e ba tshelang ka yone le ka go bo ba tlotla babusi. Re lebogela gape le dijo tsa semoya tse lo neng lwa di re romelela.”—Bapisa Pesalema 145:18.

¹⁹ Bakaulengwe ba ba mo kotsing bano ba ne ba supa gape gore ba a anaanela ka go nna tlhaga mo bodiheding jwa tshimo. Baagisani ba bantsi ba ya kwa go bone go ba kopa gore ba ithute le bone Bibela. Kwa motsemogolong wa Tuzla, koo go neng ga isiwa ditone di le tlhano tsa dijo teng, baboledi ba le 40 ba ne ba bega palogare ya diura di le 25 mongwe le mongwe mo kgweding eo, ba ema nokeng babulatsela ba le robongwe ba ba mo phuthegong eo. Ba ne ba nna le palo e e kgatlhang thata ya batho ba le 243 ba ba neng ba tla kwa Segopotsong sa loso lwa ga Jesu. Bakaulengwe bano ba rona ba ba rategang eleruri ke “bahenyi ka èna eo o re ratileñ.”—Baroma 8:37.

20. Ke “tekatekanō” efe e e neng ya direga kwa Soviet Union?

²⁰ Bakaulengwe ba ne ba tlhagafala mme ba dira jalo go lebogela bopelotshweu jo bo neng jwa supiwa ka diteraka tse dintsi tse di neng tsa isa dijo le diaparo tse di bothitho kwa go se pele se neng se bidiwa Soviet Union. Ka sekai, go ne ga tla batho ba le 7 549 kwa Segopotsong kwa Moscow fa ba bapisiwa le ba le 3 500 ngwaga o o fetileng. Mo go one ngwaga oo, diphuthego tsa motsemogolo oo di ne tsa oketsega go tloga go tse 12 go ya go tse 16. Diphuthego di ne tsa oketsega ka 14 lekgolong, baboledi ba Bogosi ba oketsega ka 25 lekgolong, mme babulatsela ba oketsega ka 74 lekgolong kwa go se pele e neng e le Soviet Union (go sa akarediwe Dinaga tsa Baltic). A moya wa botlhaga le wa go intsha setlhabelo ruri! O re gakolola o o neng o le teng mo lekgolong la ntlha la dingwaga fa go ne go dirwa gore go “nnè tekatekanō.” Bakeresete ba ba neng ba humile semoyeng le nameng ba ne ba isa dimpho ka bopeloephepa kwa go ba ba neng ba le kwa mafelong a go neng go na le lehuma kwa go one, fa botlhaga jwa ba ba bogang bano bo ne bo itumedisa le go kgothatsa ba ba neng ba ba abela dithuso tseo.—2 Bakorintha 8:14.

Ila Ba Ba Bosula!

21. Batho ba ba botlhale le ba ba dieleele ba bapisiwa jang mo mafokong a bofelo a Diane kgaolo 3?

²¹ Morago ga foo, kgaolo ya boraro ya Diane e bolela dilo tse di sa tshwaneng, e konela jaana: “U se ka ua rata ua bo u ka nna yaka motho oa sesenyi, u bo u se ka ua itshenkèla ditsela dipè tsa gagwè. Gonne eo o logwadi ke mohedisa pelo mo go Yehofa: me leōma ya gagwè le na le eo o thōkgameñ. Phucō ea ga Yehofa e mo tluñ ea moikepi; me o segōhatsa boagō yoa mosiami. Rure o shotla bashotli, me o naea bakgōbaladi bontlahalō. Ba ba botlhale ba tla rua kgalalèlō; me dieleele di tla godisediwa ditlhoñeñ.”—Diane 3:29-35.

22. (a) Re ka tila jang gore re se ka ra balelwa le dieleele? (b) Ke eng se batho ba ba botlhale ba se ilang, mme ba ithuta go nna le eng, mme ba tla duelwa ka eng?

²² Re ka tila jang gore re se ka ra balelwa le dieleele? Re tshwanetse go ithuta go ila batho ba ba bosula, ee, re kgale se Jehofa a se kgalang—ditsela tsotlhe tsa bonokwane tsa lefatshe leno le le tletseng thubakanyo le le nang le molato wa tshololo ya madi. (Bona gape Diane 6:16-19.) Go farologana le seo, re tshwanetse go ithuta go dira se se molemo—re thokgame, re nne ba ba siameng, re bo re nne bonolo—gore ka go ikokobeletsa Jehofa jalo le go mmoifa re kgone go bona “khumō, le letlōtlō, le botshelō.” (Diane 22:4) Seno e tlile go nna tuelo ya botlhe ba ba dirisang kgakololo eno ka boikanyego: “U ikanyè Yehofa ka pelo eotlhe ea gago.”

O Tla Akgela Jang?

◻ Temana ya setlhogo ya thuto eno e ka dirisiwa jang gompieno?

◻ Re ka tlotla Jehofa jang?

◻ Ke eng fa re sa tshwanela go nyatsa kgalemelo?

◻ Re ka bona kae boitumelo jo bogolo?

◻ Re ka rata se se molemo jang mme ra ila se se bosula jang?

[Setshwantsho mo go tsebe 18]

Bao ba dirang bojotlhe jwa bone fa ba ntshetsa Jehofa ditlhabelo ba tla segofadiwa thata