Boidiidi jo Bogolo Jwa Baobamedi ba Boammaaruri—Ba Tswa Kae?
“Bonang, boidiidi jo bogolo jwa batho, . . . e le ba morafe mongwe le mongwe, le ba ditso tsotlhe, le batho, le dipuo, ba eme fa pele ga setulo sa bogosi, le fa pele ga Kwana.”—TSHENOLO 7:9.
1.Ke ka ntlha yang fa re kgatlhegela diponatshegelo tsa boperofeti tse di mo go Tshenolo thata gompieno?
FA LEKGOLO la ntlha la dingwaga C.E. le ne le ya kwa bokhutlong, moaposetoloi Johane o ne a bona diponatshegelo tsa ditiragalo tse di gakgamatsang malebana le se Jehofa a se ikaeletseng. Dingwe tsa dilo tse a di boneng mo diponatshegelong di a diragala gone jaanong jaana. Tse dingwe di tla diragala mo isagweng e e fa gaufi. Diponatshegelo tseno tsotlhe di amana thata le konelo e e kgatlhisang ya boikaelelo jo bo molemo jwa ga Jehofa jwa gore a itshepise leina la gagwe mo popong yotlhe. (Esekiele 38:23; Tshenolo 4:11; 5:13) Mo godimo ga moo, di ama dilo tse mongwe le mongwe wa rona a di lebeletseng mo botshelong. Seo se ntse jalo jang?
2. (a) Moaposetoloi Johane o ne a bona eng mo ponatshegelong ya gagwe ya bonè? (b) Re tlile go tlhatlhoba dipotso dife malebana le ponatshegelo eno?
2 Mo motseletseleng wa bonè wa diponatshegelo tsa Tshenolo, Johane o ne a bona baengele ba tshwere diphefo tse di senyang go fitlha “batlhanka ba Modimo wa rona” ba tshwaiwa mo diphatleng tsa bone. Go tswa foo o ne a bona sengwe se se kgatlhang thata—“boidiidi jo bogolo jwa batho, jo go seng motho ope yo o ka bo balang, e le ba morafe mongwe le mongwe, le ba ditso tsotlhe, le batho, le dipuo,” ba obamela Jehofa le go tlotla Morwawe ka kutlwano. Johane o ne a bolelelwa gore bano e ne e le batho ba ba tla tswang mo sepitleng se segolo. (Tshenolo 7:1-17) Ke bomang ba go tweng ke “batlhanka ba Modimo wa rona?” Mme ke bomang ba ba tla bopang “boidiidi jo bogolo” jwa bafalodi ba sepitla? A o tla nna mongwe wa bone?
“Batlhanka ba Modimo wa Rona” ke Bomang?
3. (a) Jesu o ne a tshwantsha kamano ya gagwe le balatedi ba gagwe jang mo go Johane 10:1-18? (b) Jesu o ne a dira gore dinku tsa gagwe di kgone go bona eng fa a ne a swa loso lwa setlhabelo?
3 Mo e ka nnang dikgwedi di le nne pele a swa, Jesu o ne a itlhalosa e le “modisa yo o molemo” mme balatedi ba gagwe e le “dinku” tse a neng a tla di swela. O ne a umaka ka tlhamalalo dinku tse a neng a di bone mo lesakeng la dinku la tshwantshetso e bo e re go tswa foo a bo a di tlhokomela ka kelotlhoko. (Johane 10:1-18)a Jesu ka lorato o ne a swela dinku tsa gagwe, ka go rialo a ntsha tlhotlhwa ya thekololo e e neng e tlhokega gore ba gololwe mo sebeng le mo losong.
4. Ke bomang ba ntlha go kgobokanngwa jaaka dinku go dumelana le se Jesu a se boletseng fano, mme ke ka ntlha yang fa o araba jalo?
4 Lefa go ntse jalo, pele a dira jalo, Jesu jaaka Modisa yo o Molemo o ne a kokoanya barutwa ka namana. Ba ntlha mo go bone ba ne ba tlisiwa ke Johane Mokolobetsi, yo e leng ene “molebedi wa kgoro” mo setshwantshong sa ga Jesu. Jesu o ne a batla batho ba ba neng ba ka arabela sentle fa go bulega sebaka sa gore ba nne karolo ya ‘losika lwa ga Aberahame’ lo lo dikarolo dintsi. (Genesise 22:18; Bagalatia 3:16, 29) O ne a ba rotloetsa gore ba anaanele Bogosi jwa magodimo go tswa mo dipelong tsa bone, mme a ba tlhomamisetsa gore o ne a ya go ba baakanyetsa bonno kwa ntlong ya ga Rraagwe ya selegodimo. (Mathaio 13:44-46; Johane 14:2, 3) O ne a bolela jaana ka tshwanelo: “E sa le ka metlha ya ga Johane Mokolobetsi go fitlha le jaanong bogosi jwa magodimo e ntse e le mokgele o batho ba gagamalelang kwa go one, mme ba ba gatelang pele ba a o fitlhelela.” (Mathaio 11:12, NW) Ba ba neng ba mo sala morago gore ba fitlhelele mokgele oo go ne go bonala ba le mo lesakeng la dinku tse Jesu a neng a bua kaga tsone.
5. (a) “Batlhanka ba Modimo wa rona” ba ba umakiwang mo go Tshenolo 7:3-8 ke bomang? (b) Ke eng se se bontshang gore ba bangwe ba le bantsi ba ne ba tla kopanela le Baiseraele ba semoya mo kobamelong?
5 Mo go Tshenolo 7:3-8, batho ba ba gatelang pele go ya kwa mokgeleng oo wa selegodimo ba bo ba atlega le bone ba bidiwa “batlhanka ba Modimo wa rona.” (Bona 1 Petere 2:9, 16.) A batho ba ba 144 000 ba ba umakiwang foo ke Bajuta ba tlholego fela? A batho ba ba mo lesakeng la dinku la tshwantshetso mo setshwantshong sa ga Jesu ke Bajuta fela? Nnyaa le eseng; ke maloko a Iseraele wa semoya wa Modimo, botlhe e le badirimmogo le Keresete mo losikeng lwa ga Aberahame lwa semoya. (Bagalatia 3:28, 29; 6:16; Tshenolo 14:1, 3) Gone nako e ne e tla goroga kgabagare, ya gore palo e e beilweng e tlale. Go tswa foo go ne go tla diragala eng? Fela jaaka Baebele e ne e boleletse pele, ba bangwe—boidiidi jwa bone—ba ne ba tla kopanela le Baiseraele bano ba semoya mo go obameleng Jehofa.—Sekaria 8:23.
“Dinku di Sele”—A ke Bakeresete ba Baditšhaba?
6. Johane 10:16 e bua ka tiragalo efe?
6 Fa Jesu a sena go umaka lesaka la dinku le le lengwe fela mo go Johane 10:7-15, o ne a tlhalosa ka setlhopha se sengwe gape, a re: “Ke na le dinku di sele, tse e seng tsa saka le; le tsone ke na le go di lere, mme di tlaa utlwa lentswe la me; mme di tlaa nna letsomane le le lengwe fela, le modisa a le mongwe fela.” (Johane 10:16) “Dinku di sele” ke bomang?
7, 8.(a) Ke ka ntlha yang fa kgopolo ya gore dinku di sele ke Bakeresete ba Baditšhaba e sena motheo wa boammaaruri? (b) Ke dintlha dife tse di malebana le boikaelelo jwa Modimo ka lefatshe tse di tshwanetseng go re thusa go tlhaloganya gore dinku di sele ke bomang?
7 Gantsi bakanoki ba Labokeresete ba akanya gore dinku di sele tseno ke Bakeresete ba Baditšhaba le gore ba ba mo lesakeng la dinku le le umakilweng pelenyana ke Bajuta, ba ba neng ba le mo kgolaganong ya Molao, le gore ditlhopha tseno ka bobedi di ya kwa legodimong. Mme lefa go ntse jalo Jesu o ne a tshotswe e le Mojuta mme ka ntlha ya lotso lwa gagwe o ne a le kafa tlase ga kgolagano ya Molao. (Bagalatia 4:4) Mo godimo ga moo, batho ba ba akanyang gore dinku di sele ke Bakeresete ba Baditšhaba ba ba tla duelwang ka go newa botshelo jwa selegodimo ga ba lemoge karolo ya botlhokwa ya boikaelelo jwa Modimo. Fa Jehofa a ne a bopa batho ba ntlha a bo a ba baya mo tshimong ya Edena, o ne a tlhalosa ka phepafalo gore o ne a ikaeletse gore lefatshe le tlale ka batho, gore le nne paradaise lotlhe, le gore batho ba ba le tlhokometseng ba itumelele botshelo ka bosakhutleng—fela fa ba tlotla le go obamela Mmopi wa bone.—Genesise 1:26-28; 2:15-17; Isaia 45:18.
8 Fa Adame a ne a leofa, boikaelelo jwa ga Jehofa ga bo a ka jwa phutlhama. Modimo o ne a dira thulaganyo ka lorato ya gore bana ba ga Adame ba nne le sebaka sa go itumelela se Adame a neng a paletswe ke go se anaanela. Jehofa o ne a bolelela pele gore o ne a tla dira gore go nne le mogolodi, losika, lo ditšhaba tsotlhe di neng di tla segofadiwa ka lone. (Genesise 3:15; 22:18) Tsholofetso eo e ne e sa kaye gore batho botlhe ba ba molemo ba ba mo lefatsheng ba ne ba tla isiwa kwa legodimong. Jesu o ne a ruta balatedi ba gagwe gore ba rapele jaana: “Bogosi jwa gago a bo tle. Go rata ga gago a go dirwe mo lefatsheng jaaka kwa legodimong.” (Mokwalo o o sekameng ke wa rona.) (Mathaio 6:9, 10) Lobaka lo lokhutshwane fela pele Jesu a bua setshwantsho se se mo go Johane 10:1-16, o ne a boleletse barutwa ba gagwe gore Rraagwe o ne a dumetse go neela “letsomanyane” fela Bogosi jwa selegodimo. (Luke 12:32, 33) Ka jalo fa re bala setshwantsho sa ga Jesu se mo go sone a leng Modisa yo o Molemo yo o ntshetsang dinku tsa gagwe moya wa gagwe, re tla bo re dira phoso fa re ka kgaphela kwa thoko bontsi jwa batho bao Jesu a simololang go ba tlhokomela ka lorato, ba ba nnang babusiwa ba Bogosi jwa gagwe jwa selegodimo bone ba le mo lefatsheng.—Johane 3:16.
9. Go tloga fela ka 1884, Baithuti ba Baebele ba ne ba itse dinku di sele e le bomang?
9 Go tswa fela ka 1884, Watch Tower e ne ya tlhalosa fa dinku di sele e le batho ba ba neng ba tla neelwa sebaka sa gore ba tshele mo lefatsheng leno mo maemong a a neng a tla diragatsa boikaelelo jwa Modimo jwa kwa tshimologong. Baithuti bao ba bogologolo ba Baebele ba ne ba lemoga gore dingwe tsa dinku tseno di sele e ne e tla nna batho ba ba neng ba tshedile ba bo ba swa Jesu a ise a tle go direla mo lefatsheng. Lefa go ntse jalo, go ne go na le dilo dingwe tse ba neng ba sa di tlhaloganye sentle. Ka sekai, ba ne ba akanya gore dinku di sele di ne di tla kokoanngwa fa batlodiwa botlhe ba sena go neelwa tuelo ya bone ya kwa legodimong. Lefa go ntse jalo, ba ne ba lemoga sentle gore dinku di sele e ne e se Bakeresete ba Baditšhaba fela. Bajuta mmogo le Baditšhaba, batho ba merafe yotlhe le ditso tsotlhe, ba na le sebaka sa gore ba nne bangwe ba dinku di sele.—Bapisa Ditiro 10:34, 35.
10. E le gore re tle re nne bao Jesu tota a ba lebang e le dinku tsa gagwe di sele, re tshwanetse ra bo re ntse jang?
10 Gore ba tle ba tshwanele tsela e Jesu a neng a ba tlhalosa ka yone, dinku di sele e tshwanetse ya nna batho ba ba dumelang fa Jesu Keresete e le Modisa yo o Molemo, go sa kgathalesege gore ke ba lotso lofe kana morafe ofe. Seo se akaretsa eng? Ba tshwanetse gore ba bo ba le pelonomi e bile ba rata go etelelwa pele, e leng dinonofo tse dinku di nang le tsone. (Pesalema 37:11) Fela jaaka letsomanyane, ba tshwanetse gore ba “itse lentswe la [modisa yo o molemo]” mme ba se ka ba itetla gore ba faposiwe ke ba bangwe ba ba ka tswang ba batla go ba tlhotlheletsa. (Johane 10:4; 2 Johane 9, 10) Ba tshwanetse ba anaanela kafa se Jesu a se dirileng se leng botlhokwa ka gone fa a ne a swela dinku tsa gagwe mme ba bontshe tumelo e e nonofileng mo thulaganyong eo. (Ditiro 4:12) Ba tshwanetse go “utlwa” lentswe la Modisa yo o Molemo fa a ba rotloetsa gore ba neele Jehofa fela tirelo e e itshekileng, gore ba tswelele pele ba batla Bogosi pele, ba nne ba kgaogane le lefatshe, le gore ba bontshane lorato lwa go intsha setlhabelo. (Mathaio 4:10; 6:31-33; Johane 15:12, 13, 19) A o ntse jaaka batho ba Jesu a ba tlhalosang e le bone a ba lebang jaaka dinku tsa gagwe di sele? A o batla go nna jalo? A bo batho botlhe ba ruri ba batlang go nna dinku di sele tsa ga Jesu ba nna le sebaka sa go nna le kamano e e tlhwatlhwakgolo jang ne!
Go Tlotla Taolo ya Bogosi
11. (a) Mo sesupong sa go nna gone ga gagwe, Jesu o ne a reng kaga dinku le dipodi? (b) Jesu o bua ka bomang ba a reng ke bomonnawe?
11 Jesu o ne a le kwa Jerusalema gape dikgwedi di le mmalwa a sena go neela setshwantsho se se fa godimo. Fa a ne a ntse mo Thoteng ya Lotlhware a bonela lefelo le tempele e neng e le mo go lone kwa tlase, o ne a neela barutwa ba gagwe tshedimosetso kaga ‘sesupo sa go nna gone ga gagwe le sa bokhutlo jwa tsamaiso eno ya dilo.’ (Mathaio 24:3) Gape o ne a bua kaga go kokoanya dinku. Sengwe sa dilo tse a neng a di bua ke gore: “E tlaa re Morwa Motho a tla ka kgalalelo ya gagwe, a na le baengele botlhe, foo o tlaa dula mo setulong sa gagwe sa bogosi sa kgalalelo. Merafe yotlhe e tlaa phuthelwa fa pele ga gagwe. Mme o tlaa ba kgaoganya, bangwe mo go ba bangwe, jaaka modisa a tle a kgaoganye dinku le dipodi; dinku o tlaa di baya ka fa letsogong le legolo, mme dipodi ka fa go la molema.” Mo setshwantshong seno Jesu o ne a bontsha gore batho ba ba neng ba neelwa tlhokomelo jalo ke Kgosi ba ne ba tla atlholwa go ya kafa ba neng ba dirisana le ‘bomonnawe’ ka gone. (Mathaio 25:31-46) Bomonnawe bano ke bomang? Ke Bakeresete ba ba tsetsweng ka moya bao ka jalo e leng “barwa ba Modimo.” Jesu ke Morwa wa Modimo wa motsalwapele. Ka jalo, ke bomonnawe Keresete. Ke “batlhanka ba Modimo wa rona” ba ba umakilweng mo go Tshenolo 7:3, ba ba tlhophilweng mo bathong gore ba ye go nna le Keresete mo Bogosing jwa gagwe jwa selegodimo.—Baroma 8:14-17.
12. Ke ka ntlha yang fa tsela e batho ba dirisanang le bomonnawe Keresete ka yone e le botlhokwa thata?
12 Tsela e batho ba bangwe ba dirisanang ka yone le baruaboswa bano ba Bogosi e botlhokwa thata. A o ba leba jaaka Jesu Keresete le Jehofa ba ba leba? (Mathaio 24:45-47; 2 Bathesalonia 2:13) Tsela e motho a lebang batlodiwa bano ka yone e bontsha gore o ikutlwa jang ka Jesu Keresete ka boene le ka Rraagwe, Molaodi wa Lobopo lotlhe.—Mathaio 10:40; 25:34-46.
13. Baithuti ba Baebele ba ne ba tlhaloganya setshwantsho sa dinku le dipodi ka selekanyo se se kana kang ka 1884?
13 Watch Tower e ne ya bolela sentle mo tokololong ya yone ya August 1884 gore “dinku” tse di mo setshwantshong seno ke batho bao ba neng ba tla bo ba lebeletse pele go tshela ba itekanetse mo lefatsheng. Gape go ne go dumelwa gore setshwantsho seno se tshwanetse sa dira fa Keresete a busa a le kwa setulong sa gagwe se se galalelang sa bogosi kwa legodimong. Lefa go ntse jalo, ka nako eo ba ne ba ise ba tlhaloganye sentle gore o ne a tla simolola leng tiro ya go kgaoganya e e tlhalositsweng foo kana gore e ne e tla tswelela pele ka lobaka lo lo kana kang.
14. Puo nngwe ya kwa kopanong ka 1923 e ne ya thusa Baithuti ba Baebele jang gore ba tlhaloganye gore setshwantsho sa ga Jesu sa boperofeti se ne se tla diragadiwa leng?
14 Lefa go ntse jalo, ka 1923, mo puong ya kwa kopanong, J. F. Rutherford, yo ka nako eo e neng e le poresidente wa Mokgatlho wa Watch Tower, o ne a tlhalosa ka phepafalo gore setshwantsho sa dinku le dipodi se ne se tla diragadiwa leng. Ka ntlha yang? Lebaka le lengwe ke ka gonne setshwantsho seno se bontsha gore bomonnaa Kgosi—bobotlana bangwe ba bone—ba ne ba tla bo ba santse ba le mo lefatsheng. Mo bathong, balatedi ba gagwe ba ba tloditsweng ka moya ke bone fela ba totatota ba neng ba ka bidiwa bomonnawe. (Bahebere 2:10-12) Bano ba ne ba se kitla ba nna mo lefatsheng Meleniamo otlhe, ba fa batho sebaka sa gore ba ba direle molemo ka ditsela tse Jesu a di tlhalositseng.—Tshenolo 20:6.
15. (a) Ke ditiragalo dife tse di neng tsa thusa Baithuti ba Baebele gore ba bone gore dinku tsa setshwantsho sa ga Jesu tota ke bomang? (b) Dinku di neetse bosupi jang jwa gore di anaanela Bogosi?
15 Mo puong eo ya ka 1923, go ne ga dirwa boiteko jwa go tlhalosa gore ke bomang ba ba tshwanelang tlhaloso ya Morena ya dinku le dipodi, mme lefa go ntse jalo go ne go tshwanetse ga tlhaloganngwa dintlha tse dingwe pele setshwantsho seno se ka tlhaloganngwa ka botlalo. Mo dingwageng tse di neng tsa latela, Jehofa o ne a tswelela pele a bontsha batlhanka ba gagwe ba ba ikanyegang dintlha tseno tsa botlhokwa. Tsone di ne di akaretsa go tlhaloganya sentle ka 1927 gore “motlhanka yo o boikanngo le yo o botlhale” ke setlhopha sa Bakeresete botlhe ba ba tloditsweng ka moya ba ba mo lefatsheng; le go tlhaloganya ka 1932 kafa go tlhokegang ka gone gore motho a dirisane thata ka go tlhoka poifo le batlhanka ba ga Jehofa ba ba tloditsweng, jaaka Jonadabe a ne a dira le Jehu. (Mathaio 24:45; 2 Dikgosi 10:15) Ka nako eo, go dumelana le Tshenolo 22:17, batho bano ba sekadinku ba ne ba kgothaleditswe ka tlhamalalo gore ba nne le seabe mo go iseng molaetsa wa Bogosi kwa go ba bangwe. Tsela e ba anaanelang Bogosi jwa ga Mesia ka yone e ne e tla ba tlhotlheletsa gore ba se ka ba nna pelontle mo batlodiweng ba Morena ka tsela ya botho fela mme ba neele matshelo a bone go Jehofa ka Keresete le go dirisana gaufiufi le batlodiwa ba gagwe, ba nna le seabe ka tlhoafalo mo tirong e ba e dirang. A ke sone se o se dirang? Kgosi e tla raya ba ba dirang jalo e re: “Tlang, lona basegofadiwa ba ga Rre, ruang bogosi jo lo bo baakanyeditsweng e sa le ka tlholego ya lefatshe.” Ba tla bo ba na le tebelelo e e molemo ya go tshelela ruri ba itekanetse mo lefatsheng ba laolwa ke Bogosi.—Mathaio 25:34, 46.
“Boidiidi jo Bogolo”—Bo ya Kae?
16. (a) Baithuti ba bogologolo ba Baebele ba ne ba na le maikutlo afe a a phoso kaga gore lesomo le legolo, kana ba boidiidi jo bogolo, ba ba mo go Tshenolo 7:9 ke bomang? (b) Tsela eo e ba neng ba leba dilo ka yone e ne ya baakanngwa leng mme go theilwe mo go eng?
16 Batlhanka ba ga Jehofa ba ne ba tsaya lobakanyana ba ntse ba dumela gore lesomo le legolo (kana boidiidi jo bogolo) la Tshenolo 7:9, 10 e ne e se tsone dinku di sele tse di mo go Johane 10:16 le dinku tse di mo go Mathaio 25:33. E re ka Baebele e re “ba eme fa pele ga setulo sa bogosi,” go ne go akanngwa gore ba ne ba tla bo ba le kwa legodimong, ba se mo ditulong tsa bogosi, ba busa mmogo le Keresete, mme ba ne ba tla bo ba ntse mo lefelong la maemo a a kwa tlasenyana fa pele ga setulo sa bogosi. Ba ne ba tsewa e le Bakeresete ba ba sa ikanyegeng thata, ba ba neng ba sa bontshe moya wa go intsha setlhabelo tota. Ka 1935 kgopolo eo e ne ya baakanngwa.b Fa go tlhatlhobiwa Tshenolo 7:9 go akantswe ka ditemana tse di jaaka Mathaio 25:31, 32 go ne ga bonala sentle gore batho ba ba gone mono lefatsheng ba ka nna “fa pele ga setulo sa bogosi.” Gape go ne ga bontshiwa gore Modimo ga a na ditekanyetso tse pedi tsa boikanyegi. Batho botlhe bao ba batlang a ba amogela ba tshwanetse go boloka bothokgami mo go ene.—Mathaio 22:37, 38; Luke 16:10.
17, 18. (a) Ke eng se se neng sa dira gore palo ya batho ba ba lebeletseng pele go tla go bona botshelo jo bo sa khutleng mo lefatsheng e oketsege thata, bogolo jang fa e sale ka 1935? (b) Ba boidiidi jo bogolo ba nna le seabe ka tlhagafalo mo tirong efe ya botlhokwa?
17 Batho ba ga Jehofa ba ne ba sa bolo go bua ka dingwaga di le dintsi kaga ditsholofetso tsa Modimo malebana le lefatshe. Ka ntlha ya se ba neng ba solofetse gore se diragale morago koo ka bo1920, ba ne ba bolela gore “Dimilione Tse di Tshelang ga Jaanong ga di Kitla di Swa.” Mme lefa go ntse jalo dilo tse Modimo a di baakanyeditseng gore batho ba tshele ga di a ka tsa amogelwa ke dimilione tsa batho ka nako eo. Moya o o boitshepo o ne wa dira gore bontsi jwa batho ba ba neng ba amogela boammaaruri ba solofele go tshela kwa legodimong. Lefa go ntse jalo, go ne ga simolola go diragala phetogo e e tlhomologileng, bogolo jang morago ga 1935. Ga se gore makasine wa The Watchtower o ne o tlhokomologile tsholofelo ya go tshelela ruri mo lefatsheng. Batlhanka ba ga Jehofa ba ne ba ile ba bua kaga seno e bile ba batlile batho ba ba tshwanelang tlhaloso eno ya Baebele ka masomesome a dingwaga. Lefa go ntse jalo, Jehofa o ne a dira gore batho bano ba bonale ka nako ya gagwe e e tshwanetseng.
18 Dipego tse di leng teng di bontsha gore ka dingwaga di le dintsintsi bontsi jwa batho ba ba neng ba nna gone kwa Segopotsong ba ne ba ja ditshwantshetso. Mme lefa go ntse jalo mo dingwageng di le 25 morago ga 1935, palo ya ba ba neng ba nna teng kwa Segopotsong sa loso lwa ga Keresete ngwaga le ngwaga e ne ya tlhatloga ya feta ya ba ba neng ba ja go menagane ga lekgolo. Ba bangwe bano e ne e le bomang? Ba e neng e tla nna ba boidiidi jo bogolo. Kwantle ga pelaelo, nako ya ga Jehofa e ne e setse e gorogile ya gore a ba kokoanye a bo a ba baakanyetse go falola sepitla se segolo se se neng se le fela fa gaufi. Jaaka go boleletswe pele, e ne e le “ba morafe mongwe le mongwe, le ba ditso tsotlhe, le batho, le dipuo.” (Tshenolo 7:9) Ba nna le seabe ka tlhoafalo mo tirong e Jesu a neng a boleletse pele kaga yone fa a ne a re: “Mafoko a a Molemo a, a bogosi, a tlaa rerwa mo lefatsheng lotlhe, go nna tshupo mo merafeng yotlhe; foo ke gone bokhutlo bo tlaa tlang.”—Mathaio 24:14.
[Dintlha tse di kwa tlase]
a Go bona tlhaloso e e atologileng ya bosheng jaana kaga matsomane a a mo go Johane kgaolo 10, bona Tora ya Tebelo, August 1, 1984, ditsebe 7-17, 29.
b The Watchtower, August 1 le 15, 1935.
O Akgela Jang?
◻ Ke ka ntlha yang fa ponatshegelo e e mo go Tshenolo kgaolo 7 e kgatlha ka tsela e e tlhomologileng?
◻ Ke ka ntlha yang fa dinku di sele tse di mo go Johane 10:16 di sa akaretse Bakeresete ba Baditšhaba fela?
◻ Batho ba ba tshwanelang tlhaloso ya Baebele ya dinku di sele ba tshwanetse gore ba bo ba ntse jang?
◻ Setshwantsho sa dinku le dipodi se gatelela jang kafa go tlhokegang ka gone go tlotla taolo ya Bogosi?
◻ Ke eng se se bontshang gore nako ya ga Jehofa e tsile leng ya gore a kokoanye boidiidi jo bogolo jo bo mo go Tshenolo 7:9?