Ba Itumetse mo Lefatsheng le le Senang Boitumelo

“LENO e ntse e le lekgolo la dingwaga la ga Satane, kafa le leng bosula thata ka teng,” go ne ga simolola jalo setlhogo se se kwadilweng ke bagatisi go The New York Times ya January 26, 1995. “Ga go na motlha ope mo nakong e e fetileng o mo go one batho ba kileng ba nna le tlhoafalo le keletso e e kanakana ya go bolaya dimilione tsa batho ba bangwe ka ntlha ya lotso, bodumedi kana maemo.”

Ngwaga wa bo50 wa fa go ne go gopolwa go gololwa ga batho ba ba senang molato ba ba neng ba golegilwe mo dikampeng tsa loso tsa Banasi o ne wa dira gore bagatisi ba kwale jaaka ba ba kwadileng fa godimo. Lefa go ntse jalo, mofuta one oo wa go bolaya wa bophologolo o santse o diragala mo dikarolong dingwe tsa Afrika le Yuropa Botlhaba.

Go ganyaola batho ba ba senang molato, go ganyaolwa ga merafe, go bolaana ga ditso—go sa kgathalesege gore go ka tswa go bidiwa eng—go felela ka bohutsana jo bogolo. Lefa go ntse jalo, mo gare ga dipolaano tseno go na le mantswe a a nonofileng a boitumelo. Ka sekai, a re akanyeng ka Jeremane ka bo1930.

Ka April 1935, Basupi ba ga Jehofa ba ne ba thibetswe ke Hitler le phathi ya gagwe ya Bonasi gore ba se ka ba bona ditiro gotlhelele mo setšhabeng. Gape Basupi ba ne ba tshwarwa, ba tsenngwa mo kgolegelong ba bo ba tsenngwa mo dikampeng tsa pogisetso ka gonne ba ne ba bolokile boitlhaodi jwa Bokeresete. (Johane 17:16) Fa August 1936 e ya bofelong, Basupi ba ga Jehofa ba ne ba tshwarwa ka bontsi jo bogolo. Ba ne ba romelwa ka diketekete kwa dikampeng tsa pogisetso, mme bontsi jwa bone bo ne jwa nna koo go fitlha ka 1945 fa ba ne ba santse ba tshela. Lefa go ntse jalo, Basupi ba ne ba itshwara jang fa ba tshwarwa makgwakgwa kwa dikampeng? Lefa go ka lebega go gakgamatsa jaana, ba ne ba kgona go nna ba itumetse lefa ba ne ba le mo lefelong le le senang boitumelo.

“Leje mo Seretseng”

Moithuti mongwe wa hisitori wa kwa Boritane e bong Christine King o ne a botsolotsa mosadi mongwe wa Mokatoliki yo o neng a le mo dikampeng tseo. “O ne a dirisa mafoko a le gompieno ke sa a lebaleng,” go ne ga rialo Dr. King. “O ne a bua thata ka tsela e botshelo jwa koo bo neng bo tshosa ka teng, maemo a a makgapha ao a neng a tshela mo go one. Gape o ne a bolela gore o ne a itse Basupi, mme Basupi bao ba ne e kete ke leje mo seretseng. Ba ne ba tshwana le lefelo le le thata mo seretseng seo. O ne a bolela gore e ne e le bone fela batho ba ba neng ba sa kgwe mathe fa badisa ba feta. E ne e le bone fela batho ba ba neng ba sa nne le letlhoo ka ntlha ya dilo tse mme ba nna le lorato le tsholofelo e bile ba dumela gore go na le boikaelelo bongwe.”

Ke eng se se neng sa dira gore Basupi ba ga Jehofa ba kgone go nna ‘maje mo seretseng’? Tumelo e e nonofileng mo go Jehofa Modimo le Morwawe, Jesu Keresete. Ka jalo, maiteko a ga Hitler a ne a tlholega go fetsa lorato lwa bone le boitumelo jwa Bokeresete.

Reetsa se batho ba babedi ba ba duleng mo dikampeng tseo ba se gakologelwang morago ga dingwaga di le masomeamatlhano ba fentse teko eno ya tumelo ka katlego. Yo mongwe a re: “Ke itumela thata ka go bo ke itse gore ke ile ka nna le tshiamelo e e sa tshwaneng le epe ya go supa gore ke rata Jehofa e bile ke a mo leboga mo maemong a a setlhogo go feta lefa e le afe. Ga go na ope yo o mpateleditseng go dira seno! Go fapaana le seo, batho ba ba neng ba leka go re pateletsa e ne e le baba ba rona ba ba neng ba re tshosetsa ba leka go dira gore re utlwe Hitler go feta Modimo—mme ga ba a ka ba atlega! Ga se gore ke itumetse gone jaanong fela, mme ke ne ke itumetse le fa ke ne ke tswaletswe mo kgolegelong, ka gonne ke ne ke na le segakolodi se se phepa.”—Maria Hombach, wa dingwaga tse 94.

Mosupi yo mongwe a re: “Fa ke akanya ka nako ya fa ke ne ke le mo kgolegelong ke tlala ditebogo le boitumelo. Dingwaga tse ke di ntseng mo dikgolegelong le mo dikampeng tsa pogisetso tsa ga Hitler di ne di le bokete e bile di tletse diteko. Mme ga ke eletse gore di ka bo di mphetile, ka gonne di nthutile go ikanya Jehofa gotlhelele.”—Johannes Neubacher, wa dingwaga tse 91.

“Go ikanya Jehofa gotlhelele”—ke sone se se neng sa dira gore Basupi ba ga Jehofa ba itumele. Ka jalo, ba itumetse, lefa ba le mo lefatsheng le le senang boitumelo. Boitumelo jwa bone bo ne jwa bonala kwa Dikopanong tsa Kgaolo tsa “Babaki ba ba Itumetseng” mo dikgweding tse di sa tswang go feta. A re tlhatlhobeng ka bokhutshwane dikokoano tseno tse di itumedisang.

[Setshwantsho mo go tsebe 4]

Maria Hombach