Letsatsi le le Botlhokwa go a Gaisa Otlhe ka 1991
1 Letsatsi le le botlhokwa go a gaisa otlhe mo khalendareng ya rona monongwaga ke Matlhatso, March 30. Morago ga phirimane ka letsatsi leo, re tla bo re keteka Segopotso sa loso lwa ga Jesu. (1 Bakor. 11:20, 24) Ke ka ntlha yang fa letsatsi la loso lwa ga Jesu le ne la dirwa letsatsi leo le tshwanetseng la gakologelwa ka mo go kgethegileng?
SEO SEGOPOTSO SE SE BOLELANG
2 Loso lwa ga Jesu e ne e le tiragalo e e botlhokwa thata mo lobopong. Fa a ne a kwalela maloko a phuthego ya Bakeresete ba ba tsetsweng ka moya, moaposetoloi Paulo o ne a bolela jaana: “Gonne ka galè ea re lo ya senkgwè se, le go nwa senwèlō, lo bo lo bolèla losho loa Morèna a ba a tla a tsamaea a tle.” (1 Bakor. 11:26) Ka jalo Segopotso se dira gore ka mo go kgethegileng tlhokomelo e nne malebana le seo loso lwa ga Jesu Keresete lo se bolelang mo go diragadiweng ga maikaelelo a ga Jehofa. Se tlotlomatsa bokao jwa loso lwa ga Jesu lwa setlhabelo, segolobogolo malebana le kgolagano e nts̆ha le tsela eo loso lwa gagwe lo amang ka gone bao ba tla nnang baruaboswa mmogo le ene mo Bogosing jwa selegodimo.—Yoh. 14:2, 3; Baheb. 9:15.
3 Ka go boloka ga gagwe bothokgami go fitlhela a bo a swa, Jesu o ne a tlotlomatsa leina la ga Rraagwe ebile o bontshitse gore motho yo o itekanetseng o ne a ka kgona go nna a ikanyega mo Modimong tlase ga kgatelelo lefa e ka nna ya mofuta ofe eo Satane a mo leretseng yone. Gape loso lwa gagwe lo ne lo neela setlhabelo se se itekanetseng sa motho seo se neng se tlhokega go rekolola bana ba ga Adame ebile lo dirile gore go kgonagale gore ba le bantsi bao ba neng ba tla bontsha tumelo ba tshele ka bosakhutleng mo lefatsheng la paradaise. Ka ntlha ya sotlhe seo se neng se ka kgona go dirwa ka loso lwa ga Jesu, go ne go tshwanela le go feta gore a laele barutwa ba gagwe gore ba gopole loso lwa gagwe.—rsTN dits. 356-7.
KA MOO RE KA BONTSHANG KA GONE GORE RE A ANAANELA
4 Lefatshe le na le mekete e le mentsi mo ngwageng, mme go dirwa dilo di le dintsi go e rotloetsa. Kafa letlhakoreng le lengwe, Sejo sa Morena sa Maitseboa ke one fela mokete oo balatedi ba ba ineetseng ba dikgato tsa ga Jesu ba neng ba laelwa gore ba o boloke. Kwantle ga pelaelo, ke one mokete o mogolo go e gaisa yotlhe mo ngwageng mo Bakereseteng ba boammaaruri. A lebaka la go bo go keteka Sejo seno sa Morena sa Maitseboa go le botlhokwa jaana ga le a tshwanela go re tlhotlheletsa gore re lebise tlhokomelo mo go lone ka March?
5 Gongwe re ka dirisa metsotso e se kae fela beke nngwe le nngwe ka March re tlotla le diithuti tsa rona tsa Bibela ka dikwalo tseo di tlotlomatsang ka moo loso lwa ga Keresete lo leng botlhokwa ka gone mme re ba bontshe motheo wa Segopotso. Gape re ka ba kgothaletsa gore ba tsamaisane ka botlalo le mmalo wa Bibela wa Segopotso ka March 25-30, jaaka o bontshiwa mo go 1991 Calendar of Jehovah’s Witnesses. Seno se ka thusa go dira gore kanaanelo ya bone mo Sejong seno sa Morena sa Maitseboa e nne e kgolo.
6 Ereka mokete wa Segopotso o tla bo o le ka Matlhatso, go tla bo go le bonolo gore ba le bantsi ba rulaganye mabaka a bone jaana gore ba kgone go nna gone. Baboledi ba le bantsi ba dirisa lebaka la go bo go na le mafelobeke a le matlhano ka March ka tsela e e molemo gore ba tseye bobulatsela jo bo thusang. Seno se ba letla gore ba nne le seabe se se oketsegileng mo go otleleleng gore go ketekiwe Sejo sa Morena sa Maitseboa. Go neela ditshono tse di oketsegileng go thusa batho ba basha gore ba ipaakanye mo megopolong ya bone ba ipaakanyetse tiragalo eno e e kgethegileng.
7 Ereka re bona kafa go ketekwa ga Segopotso go leng botlhokwa ka gone, a re dire sotlhe seo re ka se kgonang go thusa ba bangwe gore ba nne gone. Dikgakololo tse di molemo malebana le dintlha tse di ka tlhokomelwang ke bagolwane di ka bonwa go Tirelo ya Rona ya Bogosi ya March 1989 le April 1990.
8 Ekete re ka ya re lebile letsatsi leno le le botlhokwa go a gaisa otlhe la 1991 re lemoga sentle sotlhe seo loso lwa ga Jesu lo se bolelang mo sethong ebile re anaanela seno ka mo go boteng. Ee, ekete rotlhe re ka nna gone mo maitseboeng a March 30 fela jaaka baobamedi ba boammaaruri ba tla bo gape ba utlwa taelo ya ga Jesu ka boikanyego ya go “bolèla losho loa Morèna a ba a tla a tsamaea a tle.”