Go Neelwa Segolo—Go Lopiwa Segolo
1 A bo re le sego jang ne go bo re itse boammaaruri! Ka go bo re ineetse mo go Jehofa, re ‘neetswe mafoko a a molemo.’ (1 Bathes. 2:4) Seno se dira gore re nne le boikarabelo jo bogolo. Jesu o ne a bolela jaana: “Le fa e le mang yo o neilweng segolo, go tlaa lopiwa segolo mo go ene.”—Luke 12:48b.
2 A bo mafoko ao a le boammaaruri jang ne! E re ka rotlhe re segofaditswe ka go nna le kitso ya Lefoko la Modimo, bokaulengwe jo bo itumedisang, le tsholofelo e e molemolemo, tota go ka twe re neilwe segolo. Ka mo go utlwalang, go lebeletswe mo gontsi mo go rona.
3 Nna le Pono e e Siameng ka Dilo Tse di Batlegang: Batho bangwe ba tsaya gore go lebeletswe mo gontsi thata mo go rona. Jaaka Tlhogo ya phuthego ya Bokeresete, Jesu Keresete ke ene a bonang gore “go tlhokega eng” gore e dire sentle. (Baef. 4:15, 16) O re tlhomamisetsa gore ‘jokwe ya gagwe e bonolo le morwalo wa gagwe o motlhofo.’ (Math. 11:28-30) Ka lorato o akanyetsa batho ba ba nang le ditlhaelo. (Luke 21:1-4) Fa re dira gotlhe mo re ka go kgonang, go sa kgathalesege gore re dira go le kana kang, re tla segofadiwa.—Bakol. 3:23, 24.
4 Ipotse, ‘A dilo tse di direlwang Bogosi di tla pele mo botshelong jwa me? A ke dirisa nako ya me le dithoto tsa me ka tsela e e tlotlang leina la Modimo le go solegela batho ba bangwe molemo? A ke itumelela thata go direla Jehofa go na le go ipatlela dilo tse di bonalang ka bopelotshetlha?’ Fa re ka araba dipotso tseno ka boikanyegi re tla supa se se leng mo dipelong tsa rona tota.—Luke 6:45.
5 Tila go Raelesega go Dira se se Bosula: Ga go ise go ke go nne le dithaelo le dikgatelelo tse dintsi jaana tsa go iteba wena fela, tsa go nna bogagapa, le go rata menate ya nama, jaaka fa go ntse gompieno. Re lebana le dikgwetlho tsa boitsholo le dithaelo tsa go ineela letsatsi le letsatsi. Go fenya dikgwetlho tseno, re tshwanetse gore re kope Jehofa gore a re thuse. (Math. 26:41) A ka kgona go re nonotsha ka moya wa gagwe. (Isa. 40:29) Go thusa thata go bala Lefoko la Modimo letsatsi le letsatsi. (Pes. 1:2, 3) Go ikgalemela le go ikgapa go botlhokwa thata.—1 Bakor. 9:27.
6 Ga go a lekana go rata se se molemo—re tshwanetse go ila se se bosula. (Pes. 97:10) Seno se raya gore re se ka ra tlhagolela keletso ya dilo tse di bosula. Diane 6:16-19 e umaka dilo di le supa tse Jehofa a di ilang. Kwantle ga pelaelo, motho yo o batlang go itumedisa Jehofa o tshwanetse a ile dilo tse di ntseng jalo. E re ka re na le kitso e e tlhamaletseng ya boammaaruri, re tshwanetse gore re batle go dira go ya ka se re se itseng, re tlhomile megopolo ya rona mo dilong tse di molemo.
7 Go siame go rapelela maemo ao re ka kgonang go “dira mo gontsi mo tirong ya Morena ka metlha” mo go one. (1 Bakor. 15:58, NW) Batho ba le bantsi ba ile ba lemoga gore fa motho a tshwaregile ka metlha mo tirelong ya ga Jehofa seo se a ba sireletsa ka gonne se dira gore ba se ka ba nna le nako ya go batla dilo tse di senang mosola ope.
8 Fa re akanya ka dilo tseno tsotlhe, re bona gore dilo tse Jehofa a di batlang mo go rona di a utlwala. (Mika 6:8) Re na le mabaka a a nonofileng a gore re itumelele tshiamelo nngwe le nngwe ya tirelo e re nang le yone. (Baef. 5:20) Ka jalo, re nna re “dira e bile re a leka,” re tlhatswegile pelo gore tuelo ya rona e tla nna kgolo thata go feta lefa e le eng se se lebeletsweng mo go rona.—1 Tim. 4:10.