Dimakasine di Itsise Bogosi
1 Rona Basupi ba ga Jehofa, re itsege sentle ka go rera ga rona ka botlhaga ka bogosi jwa Modimo. Dimakasine tsa Tora Ya Tebelo le Tsogang! Tse re di tsamaisang di nna le seabe se segolo mo go thuseng dimilione tsa batho go ithuta ka maikaelelo a Modimo. Molaetsa o di o tshwereng ke dikgang tse di molemo tota, ka gonne o itsise Bogosi jwa Modimo jwa selegodimo e le jone fela tsholofelo ya batho.
2 Dimakasine tseno di tlotla ka dilo tse batho ba di tlhokang tota—tsa maikutlo, tsa loago le tsa semoya. jaaka fa mekgwa e mentle ya malapa e ntse e senyega gongwe le gongwe, dimakasine tsa Tora Ya Tebelo Le Tsogang! di thusa batho go tokafatsa tsela e ba tshelang ka yone ka go ba bontsha kafa ba ka dirisang melaometheo ya baebele ka gone. Re tla itumelela go tsamaisa dimakasine tseno ka April le May. Kwa go kgonegang teng, tsamaisa Thanolo ya Lefatshe le Lesha ya Dikwalo Tsa Bokeresete Tsa Segerika Ka Seburu, Sezulu, Sesotho, Sexhosa le Setswana, mmogo le dimakasine ka moneelo wa R6,00.
3 Di Kgatlha Tota: Dimakasine tsa Tora ya Tebelo le Tsogang! di gone ka dipuo tsa mo e ka nnang batho botlhe ba lefatshe. Ka ntlha ya seno, dimakasine tsa rona di itsege thata. Fano go na le mabaka mangwe a go bo batho ba kgatlhiwa ke tsone:
◼ E re ka e le makwalopaka a a thokgameng le a a boammaaruri, a bontsha ka phepafalo pharologanyo fa gare ga molemo le bosula.
◼ A naya tsholofelo ka paradaise ya tshiamo e e tlang, e e theilweng mo tsholofetsong ya Modimo ya go dira gore lefatshe le busiwe ke Bogosi jwa gagwe.
◼ E bua ka ditlhogo tse di farologaneng tsa dikgang tsa bosheng, tse di kgatlhang batho ba dikarolo tsotlhe tsa botshelo le ba ditso tsotlhe.
◼ Ditlhogo tseno di dikhutshwane, di a ruta, di boammaaruri mme ga di tlhaole e bile ga di mpampetse.
◼ Ditshwantsho tse dintle di ngoka motho kgatlhego ka bonako mme tsela e e motlhofo e di kwadilweng ka yone e dira gore dimakasine tseno di balege motlhofo.
4 Di Anamise Thata: Gore re atlege go tsamaisa dimakasine go ikaegile thata mo goreng re tlhoafalele go ipaakanyetsa dipuisano tsa rona, re rulaganya nako ya rona le go rulaganya tiro ya rona ya go rera. Go ile ga ntshiwa dikakantsho tse di mosola mo dikgatisong tsa Tirelo ya Rona ya Bogosi tsa September 1995 le October 1996, tse go ka nnang molemo fa re ka di boeletsa le go di dirisa.
5 Itlwaelanye le Dimakasine: Fa o ntse o bala makasine mongwe le mongwe, akanya ka mongwe yo o ka ratang go nna le khopi ya yone. Batla dintlha tse di rileng kana ditemana tse di rileng tse o ka di nopolang mo puisanong ya gago. Akanya ka potso e o ka e botsang go simolola motlotlo le go dira gore a kgatlhegele kgang eo.
6 Dira Gore Puisano e Tshwanele Motho Yoo: Baakanyetsa puisano e e motlhofo, e e fetofetogang e e ka fetolwang go tshwanela monna, mosadi, motho yo o godileng kana mosha, e ka ne e le motho yo o mo itseng kana yo o sa mo itseng.
7 Nna o Akantse ka Tora ya Tebelo le Tsogang!: E re ka dimakasine tseno di lekana sentle mo kgetsing kana mo kgetsaneng kana mo potleng, re ka tsaya dikhopi tsa tsone fa re le mo loetong kana re ile go reka. Di tsamaise fa o bua le ba losika, baagelani, badirimmogo, ba o tsenang sekolo le bone kana barutabana. Beela letsatsi kwa thoko beke nngwe le nngwe go neela bosupi jwa dimakasine.
8 Anaanela Dimakasine: Ga di ke di latlhegelwa ke boleng jwa tsone. Go bo di fetilwe ke nako ga go fokotse botlhokwa jwa molaetsa o di o tshotseng. Gone mme, fa re dira maiteko a a kgethegileng a go tsamaisa dimakasine tsotlhe tse re di tshotseng, ga go ka ke ga direga gore dimakasine tsa kgalenyana di kgobokane mo dishelofong tsa rona.
9 Bosupi Jwa Mmila Bo na Le Matswela: Eno ke nngwe ya ditsela tse di molemo thata tsa go tsamaisa dimakasine mo bathong ba bantsi. Baboledi bangwe ka metlha ba bereka mebila e e tlalang ka batho ka malatsi a ba yang mabenkeleng ka one.
10 Tshimo ya Kgwebo E na Le Matswela: Fa re rera mo mabenkeleng, ga se gantsi re sa fitlheleng batho gone. Batho ba le bantsi ba dikgwebo ba na le maitseo a mantle, mme ba le bantsi ba itumelela go tsaya dimakasine. Buelela ditlhogo tse di tshwanelang kgwebo e e rileng e o e etetseng.
11 Ditselana Tsa Dimakasine di ka Ntsha Maungo: E re ka Tora ya Tebelo e tswa gabedi ka kgwedi, go a tshwanela gore re boele kwa bathong ba ba di balang go ya go ba naya makasine o o latelang. Re tshwanetse go dira maeto a go boela ka metlha, e seng fela go tsamaisa dimakasine mme gape le go godisa kgatlhego ya motho yoo mo Baebeleng. Ditselana tsa dimakasine ke motswedi o o molemo wa go bona dithuto tsa Baebele.
12 Dirisa April le May ka Botlalo: Dimakasine tsa Tora ya Tebelo le Tsogang! di ratiwa ke babadi ba le bantsi ba ba di anaanelang. Di molemo thata mo go itsiseng Bogosi mo re tshwanetseng go go dira mokgele wa rona go di tshola mo go rona le go di tsamaisa ka tshono nngwe le nngwe e re nang le yone. E kete dikgwedi tsa April le May di ka nna tse di molemo thata tsa go bona dipeeletso le go tsamaisa dimakasine!