Re ka Dira Ditiro Tse Dikgolo
1 Bodiredi jwa ga Jesu Keresete bo ne bo itsege ka ditiro tse dikgolo. O ne a fepa diketekete tsa batho ka kgakgamatso, a fodisa batho ba le bantsi le go tsosa bangwe mo losong. (Math. 8:1-17; 14:14-21; Joh. 11:38-44) Tiro ya gagwe e ne ya lemogiwa ke setšhaba sotlhe. Le fa go ntse jalo, bosigo jwa bofelo pele a swa, o ne a bolelela balatedi ba gagwe ba ba ikanyegang jaana: “Yo o supang tumelo mo go nna, yoo le ene o tla dira ditiro tse ke di dirang; mme o tla dira ditiro tse dikgolo go feta tseno.” (Joh. 14:12) Re ka dira jang ditiro tse “dikgolo”?
2 Ka go Bereka Tshimo e Kgolwane: Tiro ya ga Jesu e ne e felela fela kwa Palesetina, mme baaposetoloi ba gagwe ba bogologolo ba ne ba bolelelwa gore ba neele bosupi “go ya karolong e e kwa kgakalakgakala ya lefatshe,” e e kgakala go feta kwa Jesu a neng a rera gone. (Dit. 1:8) Tiro ya go rera e a neng a e simolola jaanong e setse e dirwa lefatshe ka bophara, mo dinageng di le 232. (Math. 24:14) A o nna le seabe ka botlalo mo go berekeng tshimo e e abetsweng phuthego ya lona?
3 Ka go Fitlhelela Batho ba Bantsi: Jesu o ne a tlogela barutwa ba sekaenyana fela gore ba tsweledise tiro eno ya go rera. Le fa go ntse jalo, ka ntlha ya go neela ga bone bosupi ka tlhoafalo ka Pentekosete ya 33 C.E., batho ba ba neng ba amogela boammaaruri le go kolobediwa mo letsatsing leo e ne e le batho ba ka tshwara dikete tse tharo. (Dit. 2:1-11, 37-41) Go phuthiwa ga ba ba “sekametse[ng] sentle go bona botshelo” go ile ga tswelela go fitlha mo motlheng wa rona, mo re kolobetsang kakaretso ya batho ba ba fetang 1000 ka letsatsi. (Dit. 13:48) A o dira sotlhe se o ka se kgonang go fitlhelela batho ba ba dipelo tse di ikanyegang gongwe le gongwe kwa ba ka bonwang gone le go boela kwa go ba ba bontshitseng kgatlhego ka bonako jo bo ka kgonegang?
4 Go Rera ka Nako e Telele: Bodiredi jwa ga Jesu jwa mo lefatsheng bo tsere dingwaga tse tharo le sephatlo fela. Bontsi jwa rona re ile ra rera ka nako e telele go feta eno. Go sa kgathalesege gore re tlile go dumelelwa go tswelela pele ka tiro eno ka lobaka lo lo kana kang, re itumelela go thusa morutwa mongwe le mongwe yo mosha gore a simolole go tsamaya mo tseleng e e isang botshelong. (Math. 7:14) A o dira mo gontsi kgwedi le kgwedi mo tirong ya Morena?—1 Bakor. 15:58.
5 Re tshepa gore fa Jesu a re tshegetsa, re sa ntse re ka dira ditiro tse dikgolo jaaka barutwa ba gagwe ba boammaaruri.—Math. 28:19, 20.