Nnang Lo na Le Boitshwaro jo Bontle jo bo Galaletsang Modimo

¹ Gongwe le gongwe mo re leng teng, boitshwaro jwa rona, moaparo le go ipaakanya mo mmeleng di neela bosupi ka rona le ka Modimo yo re mo obamelang. Seno se bonala segolobogolo kwa dikokoanong tse dikgolo tsa batho ba Modimo, kwa batho ba bantsi ba re elang tlhoko teng. Fa re tlhoma sekao, leina la ga Jehofa le a galalediwa. (1 Pet. 2:12) Le fa go ntse jalo, maitseo a a seng mantle kgotsa ditiro tsa go sa akanyetse ba bangwe tse di dirwang ke ba le mmalwa fela di ka tlisa kgobo mo leineng la Modimo le mo bathong ba gagwe. (Mor. 9:18b) Fa re nna re gakologetswe gore batho ba ba kwa ntle ba atlhola phuthego ya rona le Modimo yo re mo obamelang ka boitshwaro jwa rona, re tla nna re le kelotlhoko gore re ‘dire dilo tsotlhe kgalaletsong ya Modimo.’—1 Bakor. 10:31.

² Boitshwaro jo bo Tlhomang Sekao Kwa Dihoteleng le Kwa Dihoseteleng: Gantsi, badiri ba kgatlhwa thata ke go itshwara sentle, maitseo a mantle le bophepa jwa Basupi ba ga Jehofa. Manejara mongwe, fa a ne a bua ka malapa a Basupi a a neng a nna kwa hoteleng ya gagwe o ne a re: “Bana ba Basupi ba ga Jehofa ba gaisa bana botlhe ba nkileng ka ba bona! Ba apara jaaka makgarebe le makawana; ba maitseo, ba itshwara sentle; mme ga ba ise ba bake mathata ape fela. Ruri lo tshwanetse go akgolwa ka ntlha ya basha ba lona. Re itumeletse go nna le bana ba lona fano.” Dikakgelo tse di tshwanang le tseno di itlela fela ka gonne ba ba dirisanang le rona ba kgona go bona lorato le tlotlo tse di leng teng mo gare ga batho ba ga Jehofa.

³ Kafa letlhakoreng le lengwe, dikakgelo tsa badiri ba bangwe di bontsha gore go sa ntse go na le bothata ka gore go na le bangwe ba ba sa eleng boitshwaro jwa bone tlhoko kgotsa ba ba senyang mafelo a ba a dirisang. Seno se baka mathata e bile se dira gore re tshwaiwe diphoso ka dilo tse re sa tshwanelang go tshwaiwa diphoso ka tsone. Bomanejara bangwe ba ngongorega ka bana le basha ba ba mo dingwageng tsa bolesome ba ba tsosang modumo e bile ba sa laolesege, ba sa tlhokomelwa ke batsadi ba bone fa ba dirisa letamo la go shapa kgotsa mafelo a mangwe a boitlosobodutu.

⁴ Dihotele tse dintsi le dihosetele di na le melao e baeng ba tshwanetseng go e ikobela. Bakaulengwe bangwe ba tlodile melao eno mabapi le modumo o ba o tsosang kgotsa go apeela mo dikamoreng tsa bone. Bomanejara ba dihotele le ba dihosetele ba re bolelela gore karolo nngwe e go senngwang mafelo a bone thata mo go yone ke go apaya, fa go dirwa mo go sa letlelelweng teng. Ga se fela gore go senya dikamore tseo mme gape menko e e salang e nkga moo e dira gore go nne thata go hirisa dikamore tseo morago ga malatsi a mantsi kgotsa dibeke. Ga go a tshwanela gore go apeelwe mo kamoreng ntle le fa go letleletswe.

⁵ Go tshwanetse ga dirwa maiteko a magolo a go dirisana sentle le balaodi ba lefelo. Ruri, ga re batle gore batho ba nne le megopolo e e seng mentle ka batho ba ga Jehofa. Jaaka Bakeresete re tshwanetse go itshwara ka go ikanyega ka dinako tsotlhe. Ga re a tshwanela go tsaya dilakane kgotsa “digopodiso” dipe kwa dihoteleng, ka gonne seno e tla bo e le bogodu; le gone ga re a tshwanela go sa bue boammaaruri fa re bega palo ya batho ba ba tlileng go robala mo kamoreng fa re dira dithulaganyo tsa teng le lefelo leo kgotsa fa re goroga kwa lefelong leo.

⁶ Boitshwaro jo bo Tshwanetseng Kwa Kopanong: Go sa kgathalesege gore go dirisiwa lefelo le le ntseng jang, lefelo leo le tshwanetse go lebiwa e le Holo e kgolo ya Bogosi ka nako ya kopano. Re tshwanetse go apara le go ipaakanya ka tsela e e tshwanetseng fela jaaka fa re le kwa dipokanong tsa phuthego ya rona. Ka nako ya thulaganyo le morago ga yone, bakaulengwe le bokgaitsadi ga ba a tshwanela go apara diaparo tse di sa bontsheng go nna bori kgotsa tsa feshene e e feteletseng, tse di bontshang moya wa lefatshe mme di dira gore go se ka ga nna motlhofo gore go bonale fa re le batho ba ba farologaneng thata. Bokgaitsadi ba tshwanetse go ela tlhoko gore mefuta ya dikete tsa bone le boleele jwa tsone le mesese ke tse di bori ka tsela e e tshwanetseng. (1 Tim. 2:9, 10) Komiti ya Kopano e ne ya bega se se latelang se se neng sa buiwa ke motho yo o kgatlhegang: “Batho ba ga Jehofa ke batho ba ba siameng. Thuto ya bone e boammaaruri mme mesese ya bokgaitsadi ba teng ga e bori jaaka ya Ba-Apostolic e ntse.” Komiti eo e ne ya lemoga gore “mathata ke gore malapa a mangwe a bagolwane ga a tlhome sekao se sentle.” Komiti e nngwe ya Kopano e ne ya bega jaana: “Go ne go itumedisa go lemoga gore bokgaitsadi ba bantsi ba ne ba apere ka tsela ya Bokeresete. Le fa go ntse jalo, go ne go tshosa tota go bona gore go ne go na le bokgaitsadi bangwe ba ba neng ba apere dikete tse dikhutshwane thata kgotsa mesese e e nang le mapeka a a neng a batla a fitlha kwa dinokeng.” Go thibela mekgwa eno go ka nna molemo gore malapa a tlhatlhobe kgang ya moaparo o o tshwanetseng mo thutong ya bone ya lelapa. Fa re le kwa kopanong, re nna kwa hoteleng kgotsa kwa hoseteleng, re ja mo resetšhurenteng, kgotsa re reka kwa mabenkeleng, re tshwanetse gore ka dinako tsotlhe re bontshe gore re badiredi ba Modimo, re sa kgopise ope.—2 Bakor. 6:3.

⁷ Kolobetso e tla tshwarwa ka Matlhatso mo mosong kwa kopanong. Tora ya Tebelo ya April 1, 1995, tsebe 30, e tlhalosa gore re tshwanetse go nna le boikutlo bofe ka nako ya tiragalo eo. E tlhalosa gore re “tlhoka go tsaya kolobetso e le masisi ka fa go tlhokegang ka gone. Ga se nako ya go goa, go keteka, kana go itumela mo go feteletseng. Mme gape ga se nako ya khutsafalo.” Go tla bo go sa tshwanela gotlhelele gore ba ba kolobediwang ba apare diaparo tsa go thuma tse di gagamatsang thata le tse di sa apeseng mmele ka tsela e e lekaneng, e ka tswa e le banna kgotsa basadi. Ka jalo, rotlhe re tshwanetse go bontsha masisi le boitumelo jwa kolobetso ya Bokeresete.

⁸ Petere o re gakolola ka ‘mofuta wa batho ba re tshwanetseng go nna one mo ditirong tse di boitshepo tsa boitshwaro le ditiro tsa boineelo jwa bomodimo.’ (2 Pet. 3:11) E kete mafoko a rona le ditiro tsa rona kwa Kopanong ya Kgaolo ya “Badiri ba Lefoko la Modimo” di ka thusa batho ba ba dipelo di ikanyegang ba ba tla bong ba le teng gore ba itse ba bo ba obamele Modimo wa rona yo mogolo, yo o tshwanelwang ke go tlotlwa le go galalediwa.—1 Bakor. 14:24, 25.