“Lefoko la Modimo . . . le Naya Maatla”
1 Moaposetoloi Paulo o ne a kwala jaana: “Lefoko la Modimo le a tshela e bile le naya maatla.” (Baheb. 4:12) O ne a kaya eng ka seno? Lefoko la Modimo kana molaetsa wa gagwe o o bonwang mo Baebeleng o ka tlhotlheletsa batho fela thata. Mafoko a a tlhabang botlhale a a fitlhelwang mo Baebeleng a na le maatla a go tokafatsa botshelo jwa motho. Kgomotso le tsholofelo tse e di nayang di dira gore batho ba atamelane le Moneibotshelo e bong Jehofa Modimo. Molaetsa wa yone o ka tsenya batho ba ba dipelo di ikanyegang mo tseleng e e isang botshelong jo bo sa khutleng. Le fa go ntse jalo, gore re bone melemo eno, re tshwanetse go dirisa Baebele fa re neela ba bangwe bosupi.
2 Bala Temana ka Sebaka Sengwe le Sengwe: Go lebega baboledi ba le bantsi ba setse ba dirisa Baebele ka sewelo fa ba le mo tirong ya ntlo le ntlo. A le wena o dira jalo? Gongwe ka ntlha ya gore go lebega batho ba le bantsi ba sa tlhole ba na le nako ya go tlotla nako e telele, o setse o simolotse go naya batho dibuka fela kana go tlhalosa temana nngwe ka mafoko a gago fela. Re kgothaletsa baboledi botlhe go dira boiteko jo bogolo jwa go bala bobotlana temana e le nngwe go tswa mo Baebeleng fa ba bolelela ba bangwe dikgang tse di molemo, gore motho a bone gore eleruri molaetsa wa rona o tswa mo Lefokong la Modimo.
3 Le mororo e le batho ba le mmalwa fela ba ba balang Baebele ka metlha, yone e sa ntse e tlotlwa thata. Tota le batho ba ba tshwaregileng thata ba a tle ba iphe metsotso e sekae go reetsa molaetsa o o balwang ka tlhamalalo go tswa mo Lefokong la Modimo. Fa temana e e tshwanelang e balwa ka matlhagatlhaga e bo e tlhalosiwa ka bokhutshwane, maatla a lefoko la ga Jehofa a ka ama moreetsi ka tsela e e molemo. Le fa go ntse jalo, o ka dira jang gore mafoko a o simololang motlotlo wa gago ka one a golagane sentle le temana e o tlileng go e bala go tswa mo Baebeleng?
4 Leka Seno mo Tirong ya Dimakasine: Molebedi mongwe yo o etang o dirisa Dikwalo ka tsela e e nang le matswela fa a le mo tirong ya dimakasine. O tsamaya a tshotse Baebele e nnye mo potleng ya gagwe. Fa a sena go bontsha motho dimakasine le go buelela setlhogo sengwe sa tsone, o bula Baebele a sa okaoke a bo a bala temana e e tsamaisanang le setlhogo seo. Seno se ka dirwa ka go botsa potso eno fela, “O ikutlwa jang ka tsholofetso eno e e kgothatsang?” o bo o bala temana e o e tlhophileng.
5 Ipeele mokgele wa go balela moreetsi mongwe le mongwe temana e le nngwe kana di le pedi go tswa mo Baebeleng. Maatla a yone a a tlhotlheletsang a ka dira gore batho ba le bantsi ba atamelane le Modimo.—Joh. 6:44.