Boikaelelo Jwa Rona ke Eng?
1 Ke ka ntlha yang fa re tshwara dithuto tsa magae tsa Baebele? A ke go naya batho kitso fela, go tokafatsa matshelo a bone kana go ba thusa go leba isagwe ka tsela e e molemonyana? Nnyaa. Boikaelelo jwa rona jo bogolo ke go dira batho barutwa ba ga Jesu Keresete! (Math. 28:19; Dit. 14:21) Ke gone ka moo go leng botlhokwa gore batho ba re ithutang le bone ba kopanele le phuthego. Go gatela pele ga bone semoyeng go amana thata le go anaanela ga bone phuthego ya Bokeresete.
2 Tsela Ya go Bo Fitlhelela: Go tloga fela kwa tshimologong, nna o kgothaletse motho yo o ithutang le ene gore a nne teng kwa dipokanong tsa phuthego. (Baheb. 10:24, 25) Mo tlhalosetse kafa di tlileng go nonotsha tumelo ya gagwe ka teng, kafa di tlileng go mo thusa go dira thato ya Modimo ka teng, le kafa di tlileng go dira gore a ipelele botsalano jo bo molemo ka teng le batho ba bangwe ba le bone ba batlang go baka Jehofa. (Pes. 27:13; 32:8; 35:18) Tsela e wena ka bowena o bontshang ka yone gore o rata phuthego le dipokano le go di anaanela, e tla mo tlhotlheletsa go nna teng kwa go tsone.
3 Batho ba basha ba tshwanetse go tlhaloganya gore phuthego ya ga Jehofa ke ya bokaulengwe jwa boditšhabatšhaba. O ka nna wa kgona go rulaganya didirisiwa tse di tlhokegang gore o ba bontshe dibidio tsa Jehovah’s Witnesses—The Organization Behind the Name le Our Whole Association of Brothers. Ba thuse go lemoga gore Jehofa o dirisa dimilione di le dintsi tsa batho ba ba ineetseng mo lefatsheng lotlhe go diragatsa thato ya gagwe. Dira gore batho bano ba basha ba itse gore le bone ba lalediwa go tla go direla Modimo.—Isa. 2:2, 3.
4 Ruri go itumedisa thata go bona motho yo o ithutang Baebele a nna morutwa wa boammaaruri wa ga Jesu. Joo ke jone boikaelelo jwa rona!—3 Joh. 4.