Buelela Dimakasine mo Tshimong
1, 2. Tora ya Tebelo le Tsogang! di fetotse matshelo a batho bangwe jang?
1 “Di a kgatlha, di mo nakong, e bile di a kgothatsa.” “Ke dimakasine tse di kgothatsang go feta le fa e le dife fela tse nkileng ka di bala.” Mafoko ano a bontsha sentle tsela e babadi ba dimakasine tsa rona mo lefatsheng lotlhe ba ikutlwang ka yone ka Tora ya Tebelo le Tsogang! Ee ruri, dimakasine tsa rona di thusitse fela thata go fitlhelela “batho ba mefuta yotlhe” ka dikgang tse di molemo.—1 Tim. 2:4.
2 Rakgwebo mongwe o ne a amogela makasine wa Tsogang! o o neng o bua ka setlhogo se a neng a se rata. Moragonyana o ne a bala makasine o o neng o tsamaya le one wa Tora ya Tebelo, o o neng o na le setlhogo se se neng sa dira gore a sekaseke gape thuto e a sa bolong go nna a e dumela botshelo jotlhe jwa gagwe ya Tharonngwe. Seno se ne sa dira gore a batle go ithuta mo go oketsegileng. Dikgwedi di le thataro moragonyana o ne a kolobediwa. Monna yo mongwe ene o ne a tlhola a amogela dimakasine tseno ka metlha mme a se ke a di bala. Kafa letlhakoreng le lengwe mosadi wa gagwe ene o ne a se ke a batla go bua le Basupi mme gone o ne a bala dimakasine tse ba di tlogelelang monna wa gagwe. Mosadi yono o ne a angwa pelo ke go bala gore Baebele e solofetsa lefatshe la paradaise le go tletseng batho ba ba siameng mo go lone. Fa nako e ntse e ile, mosadi yono, morwawe, le monnawe mosadi yono ba ne ba nna batlhanka ba ga Jehofa.
3. Go tsamaisa Tora ya Tebelo le Tsogang! mmogo go na le melemo efe?
3 Di Tsamaise Mmogo: Jaaka fa dikai tse re tlotlileng ka tsone fa godimo di bontsha, ga re ka ke ra itse gore ke mang yo o tlileng go bala dimakasine tsa rona kgotsa gore ke eng se se ka dirang gore motho yoo a di kgatlhegele. (Mor. 11:6) Ka gone go molemo go tsamaisa Tora ya Tebelo le Tsogang! di le mmogo, le mororo fa re bua le batho re tla buelela e le nngwe fela ya tsone. Mo maemong mangwe, go ka nna ga bo go tshwanela go buelela ditokololo di le mmalwa tsa dimakasine tsa rona mo mothong a le mongwe.
4. Re ka rulaganya jang tiro ya go tsamaisa dimakasine?
4 Go molemo go rulaganyetsa go nna le letsatsi le le lengwe beke le beke le o tla tsamaisang dimakasine ka lone. Khalendara ya Basupi ba ga Jehofa ya 2005, e bontsha gore Matlhatso mangwe le mangwe ke letsatsi la go tsamaisa dimakasine. Mme gone e re ka maemo a batho le a mafelo a sa tshwane, bangwe ba ka nna ba beela kwa thoko letsatsi lengwe le sele gore ba le dirise go tsamaisa dimakasine tsa rona. A o rulagantse dilo tsa gago gore beke le beke o nne le letsatsi le o tsamaisang dimakasine ka lone?
5. Re tshwanetse go nna re etse tlhoko dibaka dife tse re ka tsamaisang dimakasine mo go tsone, mme ke eng se se ka re thusang gore re di tsamaise?
5 Ipeele Mokgele: Go ipeela mokgele wa gore re batla go tsamaisa dimakasine tse kae kgwedi le kgwedi go ka re thusa gore re di buelele. A o na le batho ba o ba isetsang dimakasine ka metlha fa di tswa? A o buelela dimakasine mo bathong ba o kopanang le bone mo tshimong? A o ka tsamaisa dimakasine mo tirong ya mmila, mo tshimong ya kgwebo, kgotsa mo mafelong a botlhe? A o dira gore o nne o na le dimakasine fa o le mo loetong, kgotsa fa o ile go reka? Dirisa sebaka sengwe le sengwe se se tshwanelang go thusa batho ba bangwe go solegelwa molemo ke Tora ya Tebelo le Tsogang!
6. Re ka dirisa jang dimakasine tsa rona tsa bogologolo ka tsela e e molemo?
6 Gape re ka nna ra go dira mokgele wa rona go tsamaisa dimakasine tsa bogologolo tse re nang le tsone. Tota le fa makasine o sa tsamaisiwa morago ga kgwedi kgotsa tse pedi morago ga letlha la one, tshedimosetso e e mo go one e sa ntse e le botlhokwa. Di neye batho ba ba kgatlhegang. Mo bathong ba le dimilionemilione, dimakasine tsa Tora ya Tebelo le Tsogang! di itshupile e le “lefoko . . . ka nako e e le tshwanetseng.” (Dia. 25:11) A re di dirise go thusa batho ba bangwe ba le dimilione go itse Jehofa le go mo direla.