Batho ba Mefuta Yotlhe ba Tla Bolokwa
1. Kamano ya rona le Modimo e laolwa ke eng?
1 Bopelonomi jo bo sa re tshwanelang jwa Modimo bo dirile gore re kgone go bolokwa. Jehofa o eletsa gore “batho ba mefuta yotlhe ba bolokwe mme ba tle mo kitsong e e leng yone, ya boammaaruri.” (1 Tim. 2:3, 4) Kamano ya rona le Modimo ga e laolwe ke gore re batho ba mmala ofe, ba lotso lofe, re na le bokgoni bofe, kgotsa gore re ntse jang kafa ntle, mme e laolwa ke gore a re bontsha tumelo mo setlhabelong sa ga Jesu sa thekololo. (Joh. 3:16, 36) Ka gone fa re ntse re dira mmogo le Modimo, re tshwanetse go tlosa mo go rona boikutlo le fa e le bofe jwa go tlhaola batho, jo bo ka nnang jwa dira gore dipelo tsa rona di sekamele mo go ganeng go amogela batho ba Jehofa a ka nnang a bo a rata go ba amogela.
2, 3. Ke eng se se ka re thusang gore re se ka ra atlhola batho go ya ka se re se bonang kafa ntle?
2 O se Ka wa Atlhola Batho: Jehofa o leba se batho ba leng sone mo teng, ga a na maikutlo ape a bopeloemaswe ka bone kgotsa a go ba gobelela. (1 Sam. 16:7) Gape o bona se ba ka kgonang go se fitlhelela. Ka gone, o leba ba ba batlang go mo itumedisa e le batho ba ba eletsegang. (Hag. 2:7) A re leba ba bangwe ka tsela e Modimo a ba lebang ka yone?
3 Re ka nna ra tshosiwa ke tsela e batho bangwe ba re kopanang le bone mo tshimong ba lebegang ka yone. Ba ka nna ba bo ba apere makgasa, kgotsa ka tsela e e bosutlha fela, ditedu di tlhatlhabetse, kgotsa ba tsentse manyena mo dinkong kgotsa mo dipounameng. Ba bangwe ba ka nna ba bo ba se na magae a ba nnang mo go one. Ba bangwe ba ka nna ba bua le rona ka go re kgadiepetsa. Go na le gore re ipolelele gore ga go na go bo go tsamaya go direga gore ba nne baobamedi ba ga Jehofa, re tshwanetse go ba leba ka tsela e e tshwanetseng, ka “gonne le eleng rona re kile ra bo re se na tlhaloganyo, re sa utlwe, [e bile] re tsieditswe.” (Tito 3:3) Fa re ka gakologelwa ntlha eno re tla tlhagafalela go rerela mongwe le mongwe, go rerela le ba, ka go ba leba fela kafa ntle, re ka nnang ra tsaya gore ga ba tshwanelege.
4, 5. Re ithuta eng mo sekaing sa ga Jesu le sa ga Paulo?
4 Dikai Tsa mo Lekgolong la Ntlha la Dingwaga: Jesu Keresete o ne a ipha nako ya go thusa le batho ba ba neng ba bonala ba ka se ka ba nna le sepe se se molemo mo go bone, ba batho ba bangwe ba ka nnang ba bo ba ne ba ba tlhobogile. (Luke 8:26-39) Le mororo a ne a sa mpampetse ditiro tsa bone tse di phoso, o ne a itse gore go a direga gore batho ba iphitlhele ba tshela botshelo jo bo sa siamang. (Luke 7:37, 38, 44-48) Ka gone o ne a bontsha go tlhaloganya boemo jwa bone, “a tlhotlheletsega go ba tlhomogela pelo, ka gonne ba ne ba tshwana le dinku tse di se nang modisa.” (Mar. 6:34) A le rona re ka kgona go etsa sekao sa gagwe?
5 Moaposetoloi Paulo o ne a kgobotletswa ka maje, a itewa, a bo a latlhelwa mo kgolegelong. (Dit. 14:19; 16:22, 23) A tsela e e maswe e ba neng ba mo tshwere ka yone e ne ya dira gore a nne bogalaka mo pelong mme a swetse ka gore o senya nako ya gagwe ka go rerela batho ba ditšhaba dingwe kgotsa ba ditso dingwe? Nnyaa le eseng. O ne a itse gore o ne a ka kgona go bona batho ba ba dipelo di ikanyegang mo bathong ba ditso tsotlhe, mme o ne a ikemiseditse go ba batla. A ke tsela e re lebang batho ba re kopanang le bone mo tshimong ka yone, ba maemo a bone a botshelo a sa tshwaneng le a rona le ba ditso di sele?
6. Boikutlo jo re nang le jone ka batho ba ba simololang go tla kwa dipokanong tsa phuthego bo ka ba ama jang?
6 Go Amogela ba Bangwe Gompieno: Ba le bantsi ba batho ba Modimo ba itumelela gore bakaulengwe le bokgaitsadi ba ba sa lebeng fela bokafantle jwa motho ba ile ba ba amogela mo phuthegong. Monna mongwe yo o neng a sa tlhokomele ditedu tsa gagwe, le moriri o le moleele e bile o fitlha mo magetleng, a apere diaparo tse di leswe, o ne a fitlha kwa Holong ya Bogosi kwa Jeremane. O ne a itsiwe ka ditiro tsa gagwe tse di maswe. Le fa go ntse jalo, o ne a amogelwa sentle fa a fitlha kwa dipokanong. O ne a kgatlhegile tota mo a neng a boa gape mo bekeng e e latelang. Go ise go ye kae o ne a simolola go baakanya tsela e a lebegang ka yone, a tlogela motsoko, a ba a kwadisa lenyalo la gagwe sentle le mosetsana yo a neng a ratana le ene. Ka bonako fela ke fa ene le mosadi wa gagwe le bana ba bone ba direla Jehofa e le lelapa le le utlwanang.
7. Re ka etsa jang Modimo wa rona yo o sa tlhaoleng?
7 E kete re ka laletsa mongwe le mongwe gore a solegelwe molemo ke bopelonomi jo bo sa re tshwanelang jwa Modimo, e le fa re etsa Modimo wa rona yo o sa tlhaoleng.
[Blurb on page 3]
“Modimo ga a na tlhaolele, mme mo setšhabeng sengwe le sengwe motho yo o mmoifang a ba a dira tshiamo o a amogelesega mo go ene.”—Dit. 10:34, 35.