O se Ka wa E Latlha

Dikakantsho Tsa Kafa re ka Buelelang Diboroutšhara ka Gone

Tsenyeletso eno e na le dikakantsho tse di farologaneng go go thusa go baakanyetsa tsela e o ka buelelang diboroutšhara ka yone. Dira gore tsela e o di buelelang ka yone e tshwanele maemo a lefelo la gaeno. O ka nna wa dirisa le dipuisano tse dingwe gape tse di sa umakiwang fano. Dipuisano tse di sa umakiwang mo tsenyeletsong eno di ka nna tsa baakanyediwa go dirisiwa sekai sa dikakantsho tse di latelang.—Bona Tirelo ya Rona ya Bogosi ya January 2005, ts. 8.

Kakantsho nngwe le nngwe e e mo tsebeng eno e akaretsa (1) go simolola motlotlo ka go dirisa potso e e dirang gore motho a akanye, (2) tsebe e e nang le dintlha tse o ka di dirisang fa o buelela boroutšhara, le (3) temana e e tshwanelang e o ka e balang fa o ntse o tlotla le motho. O ka nna wa feleletsa puisano eno yotlhe ka mafoko a gago, go ikaegile ka gore motho o arabela jang.

Buka ya Batho Botlhe

“A o akanya gore Baebele e na le kgakololo e e ka re solegelang molemo mo motlheng wa rona?”—ts. 22, mafoko a a tlhalosang setshwantsho; ts. 23, ser. 3 mo lebokosong; Dia. 25:11.

Itumelele Botshelo mo Lefatsheng ka Bosakhutleng!

“Batho ba le bantsi ba akanya gore ba tshwanetse go ya legodimong gore ba ye go itumelela botshelo jo bo sa khutleng teng, wena o akanya eng ka go tshelela ruri mo lefatsheng?”—Setshwantsho se se mo tsebeng e e ka fa ntle; Tshen. 21:4.

A O Tshwanetse Wa Dumela Tharo-nngwe?

“Batho ba na le megopolo e e sa tshwaneng ya gore tota Modimo o ntse jang. A o akanya gore se o se dumelang ka kgang eno se botlhokwa?”—ts. 3, dir. 3, 7-8; Joh. 17:3.

Leina La Modimo Leo Le Tla Nnelang Ruri

“Ba le bantsi ba rona re itse thapelo e e simololang ka mafoko a a reng “Rraetsho yo o kwa legodimong, leina la gago a le itshepisiwe.” (Math. 6:9, Baebele e e Boitshepo) A mme o ne o itse gore re tshwanetse go itse leina leo gore re bolokwe?”—ts. 28, ser. 1; Bar. 10:13.

Puso Eo e Tla Tlisang Paradaise

“Batho ba le bantsi ba eletsa thata go bona mathata a re nang le one gompieno a rarabolotswe. A o akanya gore go tla tsamaya go nna le puso e e ka kgonang go rarabolola mathata ano?”—ts. 3, ser. 1; Math. 6:9, 10.

Go Direga Eng ka Rona fa re Swa?

“Fa re swelwa ke batho ba re ba ratang, ke ga tlholego fela go ipotsa gore ba kae le gore a re tla tsamaya re ba bona gape. A o kile wa ipotsa dipotso tse di ntseng jalo?”—Dipotso tse di mo tsebeng e e kafa morago; Jobe 14, 14, 15.

Fa Mongwe Yo O Mo Ratang A Tlhokafala

“Gompieno jaana re tlotla le batho ka boroutšhara jono jo bo neileng batho ba le dimilionemilione ba ba swetsweng kgomotso le tsholofelo. A o kile wa ipotsa gore go na le tsholofelo efe ka baswi?”—ts. 27, ser. 3; Joh. 5:28, 29.

“A o kile wa ipotsa gore o ka gomotsa jang motho yo o swetsweng?”—ts. 20, ser. 1; Dia. 17:17.

Dikakantsho Tsa go Tsamaisa Boroutšhara Jwa A Ruriruri Modimo O Amega Ka Rona?

Fa o sena go umaka kgang nngwe e e utlwisang botlhoko e go ntseng go buiwa ka yone mo metsweding ya dikgang, o ka nna wa re:

“A o kile wa ipotsa gore ke ka ntlha yang fa Modimo a letlelela batho go boga fa e le gore tota o amega ka rona? [Mo letle gore a arabe.] Boroutšhara jono bo araba potso eo ka tsela e e kgotsofatsang e bile bo bontsha se Modimo a tlileng go se dira mo bogautshwaneng. [Mmontshe ditshwantsho mo tsebeng ya 27, o bo o bala Pesalema 145:16 mo serapeng 22.] Modimo o tlile go fedisa jang dilo tsotlhe tse di bogisang batho? Nka rata go tlotla le wena ka potso eo fa ke go etela gape mo nakong e e tlang.” Mo tsamaisetse boroutšhara o bo o rulaganyetsa go mo etela gape mo nakong e e tlang.

Mo loetong lwa go boela, o ka nna wa re:

“Fa ke ne ke go etetse mo nakong e e fetileng, re ne ra bala temana eno. [Bala Pesalema 145:16 kgotsa o e nopole fela.] Morago ga moo ke ne ka go botsa ka re: Modimo o tlile go fedisa jang dilo tsotlhe tse di dirang gore batho ba boge?” Mo kope gore a tle ka boroutšhara jwa gagwe. Morago ga moo bula mo tsebeng ya 27-8, o bo o tlotla le ene dirapa 23-5. Mmolelele gore o ka rata go mo tshwarela thuto ya Baebele, kgotsa rulaganyetsa go tla go tlotla le ene ka dirapa 26-7 fa o mo etela gape mo nakong e e tlang.

Mmoledi wa dingwaga tsa bolesome a ka nna a re:

“Basha ba le bantsi ba e leng dithaka tsa me ba tshwenyegile, ba ipotsa gore lefatshe le tla bo le ntse jang mo dingwageng di le 10 kgotsa di le 15 tse di tlang. Wena o akanya gore botshelo bo tla bo bo ntse jang ka nako eo? [Mo letle gore a arabe.] Mathata a re a bonang gompieno a bontsha gore re tshela mo metlheng ya bofelo. [Bala 2 Timotheo 3:1-3.] Boroutšhara jono bo araba dipotso tse di latelang. [Bala dipotso tse di mo tsebeng e e ka fa ntle, o bo o mo tsamaisetsa jone.] Fa ke go etela gape mo nakong e e tlang, fa e le gore o tla bo o na le metsotso e se kae, nka rata go tlotla le wena ka ntlha nngwe e e kgothatsang e e bontshang gore bolwetse le go tsofala di tlile go fela.” Dira dithulaganyo tsa go mo etela gape.

Fa o mo etela gape, o ka nna wa re:

“Fa re ne re tlotla mo nakong e e fetileng, ke ile ka go bolelela gore nka rata go tlotla le wena ka ntlha e e bontshang gore bolwetse le go tsofala di tlile go fela. Ntlha eo e bonwa fano.” Mo kope gore a tle ka boroutšhara jwa gagwe, o bo o bala dirapa 6-7 mo tsebeng ya 23-4 fa o fetsa o bo o di tlhalosa. Rulaganyetsa go tla go tlotla le ene ka dirapa 8-9 fa o mo etela gape mo nakong e e tlang.

Fa mogolo a bereka le ngwana, a ka nna a bolelela mong wa ntlo maina a bone a bo a re:

“Fa o sena bothata ka gone, ________ a ka rata go go balela temana nngwe. [Ngwana o bala Pesalema 37:29 a bo a e tlhalosa go sekae.] Boroutšhara jono bo bontsha kafa Modimo a tlileng go diragatsa maikaelelo a gagwe ka gone ka batho le ka lefatshe. [Mmontshe ditshwantsho mo tsebeng ya 24-7.] Fa re boa, nka rata go go bontsha tsholofetso e e itumedisang e e mo Baebeleng e e buang ka tsogo ya baswi.” Mo tsamaisetse boroutšhara o bo o rulaganyetsa go mo etela gape mo nakong e e tlang.

Fa mogolo a mo etela gape, a ka nna a re:

“Fa ke ne ke go etetse mo nakong e e fetileng, re ne ra bala Pesalema 37:29 mme ka umaka gore nka rata go go bontsha gore Baebele e a reng ka tsogo ya baswi. Ela tlhoko gore e a reng fano.” Mo kope gore a tle ka boroutšhara jwa gagwe. Morago ga moo o bo o tlotla le ene dirapa 12-14 mo tsebeng ya 24-5. Mmolelele gore o ka rata go mo tshwarela thuto ya Baebele, kgotsa rulaganyetsa go tla go tlotla le ene dirapa 15-16 fa o mo etela gape mo nakong e e tlang.

Dikakantsho Tsa go Tsamaisa Boroutšhara Jwa Lebaka la Go Bo Botshelo Bo le Gone Ke Lefe?—O Ka Le Bona Jang?

Fa o sena go dumedisa mong wa ntlo, o ka nna wa re:

“Ga go pelaelo gore gompieno, botshelo bo tletse ka mathata le dilo tse di kgobang marapo. A o akanya gore eno ke tsela e botshelo bo neng bo tshwanetse go nna ka yone? [Mo letle gore a arabe.] Boroutšhara jono bo bontsha gore boikaelelo jwa ntlhantlha jwa Modimo ka batho le lefatshe bo sa ntse bo tlile go diragadiwa. [Tlotla ka setshwantsho se se mo tsebeng ya 20-1. Morago ga moo bala serapa 9, o gatelele lekwalo la Isaia 14:24 le 46:11.] Fa ke tla mo nakong e e tlang, nka rata go go bontsha gore ke fa kae mo Baebele e bontshang gone gore Modimo o tlile go dira gore lefatshe le boe gape e nne Paradaise.” Mo tsamaisetse boroutšhara jono o bo o dira dithulaganyo tsa go mo etela gape mo nakong e e tlang.

Fa o mo etela gape, o ka nna wa re:

“Mo nakong e e fetileng, ke ne ka umaka gore Modimo o batla gore batho ba tshelele ruri mo lefatsheng la paradaise. [Mmontshe setshwantsho mo tsebeng ya 20-1 gape.] Ela tlhoko gore Jesu, Petere le Dafide ba ne ba bua ka Paradaise.” Mo kope gore a tle ka boroutšhara jwa gagwe. Morago ga moo o bo o bula mo tsebeng ya 21-2 o bo o tlotla le ene ka dirapa 10-13. Mmolelele gore o ka rata go mo tshwarela thuto ya Baebele, kgotsa rulaganyetsa go tla go tlotla le ene ka sengwe sa ditlhogwana tse di mo tsebeng ya 29-30 fa o mo etela gape mo nakong e e tlang.

Mosha wa dingwaga tsa bolesome a ka nna a re:

“Basha ba le bantsi ba e leng dithaka tsa me ga ba a tlhomamisega ka isagwe. A o akanya gore botshelo bo tla bo bo le botoka mo kokomaneng e e tlang? [Mo letle gore a arabe.] Baebele e bua ka isagwe e e itumedisang e e tlileng go ipelelwa ke batho botlhe. [Bula mo setshwantshong se se mo tsebeng ya 31 sa boroutšhara jono o bo o bala mafoko a a tlhalosang setshwantsho. Morago ga moo bala 2 Petere 3:13.] Boroutšhara jono bo na le tshedimosetso e e buang ka masego a Modimo a a beetseng batho. [Bala ditlhogwana tse di kwadilweng ka bontsho jo bo tseneletseng mo tsebeng ya 29-30, o bo o mo naya boroutšhara.] Nka rata go go etela gape go tla go tlotla le wena ka tsholofetso ya Modimo ya go fedisa dintwa.” Dira dithulaganyo tsa go mo etela gape mo nakong e e tlang.

Fa o mo etela gape, o ka nna wa re:

“Fa ke ne ke go etetse mo nakong e e fetileng, ke ile ka umaka ka bokhutshwane fela boikaelelo jwa Modimo jwa go dira gore lefatshe le boe gape e nne paradaise. [Mmontshe setshwantsho se se mo tsebeng ya 31 gape.] Nka rata go utlwa gore wena o a reng ka tsholofetso eno ya Modimo ya go fedisa dintwa.” Mo kope gore a tle ka boroutšhara jwa gagwe. Morago ga moo o bo o bala dirapa 3-6 mo tsebeng ya 29 o bo o di tlhalosa. Rulaganyetsa go tla go tlotla le ene ka dirapa 7-8 fa o mo etela gape mo nakong e e tlang.

Fa mogolo a bereka le ngwana, a ka nna a bolelela mong wa ntlo maina a bone a bo a re:

“Fa o se na bothata ka gone, ________ a ka rata go go bontsha setshwantsho sengwe a bo a go balela temana e le nngwe fela mo Baebeleng. [Ngwana o bontsha mong wa ntlo setshwantsho se se mo tsebeng ya 31 a bo a bala mafoko a a se tlhalosang morago ga moo a bo a bala Tshenolo 21:4.] Boroutšhara jono bo tlhalosa se Modimo a tlileng go se dira ka mathata a re lebaneng le one gompieno. [Ka bokhutshwane, mmontshe ditlhogwana tse di kwadilweng ka bontsho jo bo tseneletseng mo tsebeng ya 29-30, o bo o mo tsamaisetsa boroutšhara.] Fa re go etela gape mo nakong e e tlang, nka rata go go bontsha gore Baebele e a reng ka go fedisiwa ga mathata otlhe a botsogo.”

Fa mogolo a mo etetse gape mo nakong e e tlang, a ka nna a re:

“Fa re ne re tlotla mo nakong e e fetileng, ke ile ka umaka gore nka rata go go bontsha gore Baebele e a reng ka go fedisiwa ga mathata a botsogo. Ela tlhoko gore e a reng fano.” Mo kope gore a tle ka boroutšhara jwa gagwe. Morago ga moo o bo o tlotla le ene dirapa 9-14 mo tsebeng ya 29. Mmolelele gore o ka rata go mo tshwarela thuto ya Baebele, kgotsa rulaganyetsa go tla go tlotla le ene ka dirapa 15-17 fa o mo etela gape mo nakong e e tlang.

Diboroutšhara Tse di Kwaletsweng Batho ba Ditumelo Tse e Seng Tsa Bokeresete

Lasting Peace and Happiness—How to Find Them (Kagiso le Boitumelo Tse di Nnetseng Ruri—Kafa Re ka Di Bonang ka Gone)

Fa o neela moithuti wa sekolo wa Motšhaena bosupi, o ka nna wa re:

“Selo sengwe se ke fitlhetseng baithuti ba le bantsi ba sekolo ba batlang go nna le sone ke kagiso le boitumelo. A o akanya gore go botlhokwa go nna le tsone? [Mo letle gore a arabe.] A go ne go se kitla go nna molemo go bona mafoko ano a bogologolo a diragadiwa?” Bala Pesalema 37:11, o bo o mo tsamaisetsa boroutšhara jono.—km-TN 2/98 ts. 5.

“Bōnañ, Dilō Cotlhe Ke Di Diha Sesha.”

O ka nna wa bua jaana le motho mongwe yo o godileng wa Mobuda:

“Gongwe le wena o tshwenyegile fela jaaka nna ka ntlha ya megopolo e e leswe e batho ba nang le yone le kafa e amang bana ba rona ka gone. Ke ka ntlha yang fa boitsholo jo bo maswe bo ntse bo etegela jaana mo basheng ba rona? [Mo letle gore a arabe.] A o ne o itse gore bothata jono bo sa le bo bolelelwa pele mo bukeng e e neng ya kwalwa bogologolo pele bodumedi jwa Bomoseleme, jwa Bokeresete le jwa Bohindu bo nna gone? [Bala 2 Timotheo 3:1-3.] Ela tlhoko gore boemo jono bo aname le fa batho ba ntse ba tswelela pele go ithuta. [Bala temana 7.] Buka eno e nthusitse go tlhaloganya boammaaruri jo batho ba le bantsi ba iseng ba bo bone. A o ka rata go e bala?”—km-TN 8/99 ts. 8.

Our Problems—Who Will Help Us Solve Them? (Ke Mang yo o Tla re Thusang go Rarabolola Mathata a Rona?)

Fa o bua le Mohindu yo mmotlana, o ka nna wa re:

“Ke solofela gore o dumela mo Modimong. O akanya gore Modimo o ikaeletse eng ka rona? [Mo letle gore a arabe. Morago ga moo bala Genesise 1:28.] Mo mafelong a le mantsi, lefatshe le na le baagi ba bantsi go feta selekanyo e bile ba na le mathata a a seng kana ka sepe. A o akanya gore Mmopi a ka rata go re thusa go rarabolola mathata a re nang le one?” Mo letle gore a arabe. Morago ga moo, mo tsamaisetse boroutšhara.—km-TN 9/99 ts. 8.

The Guidance of God—Our Way to Paradise (Go Kaelwa ke Modimo—Tsela E e Re Isang Kwa Paradaiseng)

Fa o bua le Momoseleme, o ka nna wa re:

“Ke leka go buisana le Bamoseleme. Ke a itse gore Bamoseleme ba dumela mo Modimong yo o esi fela wa boammaaruri le mo baporofeting botlhe. Ga ke re? [Mo letle gore a arabe.] Ke rata go tlotla le wena ka boporofeti bongwe jwa bogologolo jo bo bolelelang pele gore lefatshe le tlile go fetolwa gore e nne paradaise. A nka go balela sengwe se se neng sa kwalwa ke moporofeti mongwe? [Mo letle gore a arabe. O bo o bala Isaia 11:6-9.] Boporofeti jono bo dira gore ke akanye ka mafoko mangwe mo bukeng eno a a nopotsweng mo bukeng ya Koran.” Bula mo tsebeng ya 9, o bo o bala mafoko ao a a nopotsweng a a kwadilweng ka bontsho jo bo tseneletseng. Fa a kgatlhega, tsweletsa motlotlo ka go tlotla le ene dirapa 7-9 mo tsebeng e e latelang.—km-TN 11/99 ts. 8.

Why Should We Worship God in Love and Truth? (Ke ka Ntlha Yang fa re Tshwanetse go Obamela Modimo ka Lorato le ka Boammaaruri?)

Puisano eno e ka nna ya kgatlha Mohindu yo o nang le lelapa:

“Ke etela batho ba ba tshwenngwang ke boemo jwa botshelo jwa lelapa mo dinageng di le dintsi gompieno. O akanya gore lelapa le ka thusiwa ke eng gore le nne le ntse le itumetse? [Mo letle gore a arabe.] Batho bangwe ba a itse gore ditemana tsa Sehindu di a reng ka lelapa, mme ga ba ise ba nne le nako ya go di bapisa le se Baebele yone e se buang ka kgang eno. Nka rata go go bontsha gore e a reng. [Bala Bakolosa 3:12-14.] Boroutšhara jono bo na le mekwalo e e boitshepo ya kwa India le e e tswang mo Baebeleng.” Mo tsamaisetse boroutšhara, o bo o mmontsha ditsebe 8-9 le 20-1.—km-TN 9/99 ts. 8.

Will There Ever Be a World Without War? (A go Tla Tsamaya go Nna le Lefatshe Le le Se Nang Ntwa?)

Fa o neela motho wa Mojuda bosupi, o ka nna wa re:

“Ba le bantsi ba rona re kile ra utlwisiwa botlhoko ke go swelwa ke mongwe yo re mo ratang. O akanya gore go direga eng ka rona fa re swa?” Mo letle gore a arabe. Morago ga moo mmontshe lebokoso le le reng “Death and the Soul—What Are They?” (“Loso le Moya—Ke Eng?”) mo tsebeng 22 ya boroutšhara jono. Bala serapa 17 mo tsebeng ya 23, se se buang ka tsogo ya baswi. Mo tlhalosetse gore tlhogo ya lotso e bong Jobe o ne a na le tsholofelo ya gore baswi ba tla tsoga. Mo tsamaisetse boroutšhara o bo o rulaganyetsa go boa o tla go tlotla le ene ka ditemana tse di umakilweng kwa bokhutlong jwa serapa 17.—km-TN 10/99 ts. 8.