O Tla Reng fa o Bua le Momoseleme?
1 A o kile wa neela Momoseleme bosupi? Fa go le jalo, o tshwanetse wa bo o ile wa lemoga gore Bamoseleme ba dumela thata mo Modimong. Le fa go ntse jalo ga ba itse go le gontsi ka Paradaise e e tlang mo lefatsheng jaaka e boleletswe pele ke baporofeti ba ga Jehofa, mme re rata go ba bolelela kaga tsholofelo eo. (1 Tim. 2:3, 4) Tshedimosetso e e latelang e tshwanetse ya go thusa go neela bosupi sentle.
2 Bamoseleme ba dumela mo go Allah, kana Modimo, e bile ba dumela gore Muḥammad ke moporofeti wa Modimo. Buka ya bone e e boitshepo ke Koran, mme bodumedi jwa bone bo bidiwa Iselamo, e e rayang “boikokobetso.” Koran e bolela gore go aka le go obamela medingwana ga go a tshwanela, gore Modimo o mongwe fela, le gore ga se karolo ya Tharonngwe. Gape e ruta gore moya ga o swe, gore go na le molelo wa dihele, le gore go na le paradaise ya kwa legodimong. Bamoseleme ba dumela gore Baebele ke Lefoko la Modimo mme ba dumela gore e fetotswe, fa Koran yone, e e sa ntseng e le mo puong e e kwadilweng ka yone kwa tshimologong, e ntse e itshekile.
3 Nna Botsalano, O Nne Botlhale, O Dirise Temogo: Fa o tlotla le Momoseleme, nna botsalano o bo o nne botlhale. (Dia. 25:15) Nna o gakologetswe gore dilo tse Bamoseleme ba di dumelang ba di dumela tota le gore bontsi jwa tsone ba di tshwere ka tlhogo. Ka gone thulaganyo ya bone ya dilo tsa semoya ga e akaretse go ntsha mabaka a dilo tse ba di dumelang le go itlhatswa pelo malebana le se thato ya Modimo e leng sone. (Bar. 12:2) Gore o thuse Bamoseleme, o tlhoka go nna pelotelele le go tlhaloganya.—1 Bakor. 9:19-23.
4 Tila go dirisa mafoko a a ka dirang gore Momoseleme a akanye gore o motho wa Labokeresete. Dira gore go bonale sentle gore ga o karolo ya bodumedi jwa Katoliki le fa e le jwa Porotesetanta, gore o farologane le bone. Bitsa Baebele o re Buka ya Modimo. E re ka Bamoseleme ba sa rate polelwana ya “Morwa Modimo,” gantsi go botoka gore o se ka wa e dirisa kana wa tlotla ka kgang eno go fitlha a setse a gatetse pele semoyeng. Le fa go ntse jalo, o ka bua ka Jesu, o mmitsa moporofeti kana morongwa. Tila go ngangisana le ene. Fa o bona a simolola go galefa, tswa ka boikokobetso o tsamaye gone fela foo.
5 Go botoka go bua le motho a le mongwe fela e seng le setlhopha. Gantsi go molemo gore basadi ba rerele basadi, banna ba rerele banna. Gone ke boammaaruri gore ka dinako tse dingwe go ka se kgonege, mme o tshwanetse wa sekaseka maemo ka botlhale. Gape, Bamoseleme ba le bantsi ba bosisi thata malebana le se ba se tsayang e se go apara sentle le go ipaakanya sentle ga basadi. Bokgaitsadi ba tshwanetse go ela seno tlhoko.—1 Bakor. 10:31-33.
6 Dilo Tse o ka Buang ka Tsone: Bua o gololesegile kaga bogolo jwa Modimo le lorato lwa gagwe. O se ka wa okaoka go bolela gore o modumedi wa boammaaruri, gore Modimo o mongwe fela (ga se Tharonngwe), le gore go obamela medingwana ga go a tshwanela. Bua ka boikepo jo bo mo lefatsheng gompieno—dintwa, dikhuduego, go tlhoana ga ditso, le boitimokanyi jo bo bonalang thata mo bathong ba le bantsi ba bodumedi.
7 Boroutšhara jwa The Guidance of God—Our Way to Paradise bo tla go naya tshedimosetso e e oketsegileng ka dintlha tse di ka dirisiwang go simolola metlotlo le Bamoseleme. Bo diretswe gore bo ikuele mo Bamoselemeng ba ba nnang mo lefelong le ba ka ikutlwang ba gololesegile go ithuta Baebele mo go lone.
8 Fa o neela bosupi, o ka nna wa re:
◼ “Ke mo letsholong la go bua le Bamoseleme. Ke ntse ke bala kaga bodumedi jwa gago mme ke dumela gore ke tla bo ke nepile fa ke re Bamoseleme ba dumela mo Modimong a le mongwe fela wa boammaaruri le mo baporofeting botlhe. [Letela karabo.] Ke rata go tlotla le wena kaga boporofeti bongwe jwa bogologolo jo bo bolelelang pele gore lefatshe le tla fetolwa go nna paradaise. A nka go balela se moporofeti a se kwadileng? [Bala Isaia 11:6-9.] Boporofeti jono bo nkgopotsa mafoko a a tswang mo Koraneng a a fitlhelwang mo boroutšhareng jono.” Bula tsebe 9 ya boroutšhara jwa Guidance of God mme o bale mafoko a a nopotsweng a a kwadilweng ka ditlhaka tse dikima, a a buang ka basiami gore ba tla rua lefatshe. Fa a bontsha kgatlhego, tsweledisa puisano pele ka go tlotla ka serapa 7 go ya go 9 mo tsebeng e e lebaganeng le eo. Mo tlogelele boroutšhara ka moneelo wa R1,20, mme o rulaganyetse go dira loeto lwa go boela.—Fa o batla tsenyeletso e nngwe, bona Tirelo ya Rona ya Bogosi ya February 1998, tsebe 6, serapa 27.
9 Fa o kopa mongwe gore lo tlhatlhobe boroutšhara jwa Guidance of God, go molemo fa o re ke motlotlo, e seng thuto ya Baebele. Fa o fetsa boroutšhara jono, moithuti o tshwanetse go bo a setse a siametse go ka ithuta boroutšhara jwa Re Direng kana buka ya Kitso. Dikgatiso tse dingwe tse di diretsweng Bamoseleme ke pampitshana ya How to Find the Road to Paradise le bukana ya The Time for True Submission to God.
10 Fa re itse seno ka dilo tse di dumelwang mo Boiselamong le dilo tse ba sa di rateng, re ka kgona go dirisa temogo fa re tlhopha dikgatiso tse re ka di nayang Bamoseleme le tsela e re ba nayang bosupi ka yone. E kete Jehofa a ka tswelela pele a segofatsa maiteko a rona a go thusa batho ba mefuta yotlhe gore ba bitse leina la gagwe mme ba bolokwe.—Dit. 2:21.