Thuto ya Buka ya Atamalana le Jehofa e Simolola ka Beke ya January 6
1. Go simolola ka beke ya January 6, re tla nna le ditshono dife tsa go atamalana thata le Jehofa?
1 Jehofa o batla gore re atamalane le ene. (Jak. 4:8) Go re thusa go dira jalo, re tla ithuta buka ya Atamalana le Jehofa mo Thutong ya Baebele ya Phuthego, go simolola ka beke ya January 6. Tsebe e e mo tshimologong e bua jaana ka boikaelelo jwa buka eno: “Fa re akanya ka tsela e Jehofa a bontshang nngwe le nngwe ya dinonofo tsa gagwe ka yone, fa re bona kafa Jesu Keresete a neng a mo etsa ka botlalo ka teng mo go tsone le go tlhaloganya kafa le rona re ka nnang le tsone ka teng, seo se tla dira gore re atamalane le Modimo.” Diphuthego di kile tsa ithuta buka eno ka 2004 le 2005. Le fa go ntse jalo, baboledi ba le bantsi mo go ba ba ka nnang dimilione di le pedi ba ba tlileng mo boammaaruring fa e sa le ka nako eo, ba tla bo ba utlwa e le lekgetlho la ntlha go tlotliwa mo go tseneletseng ka dinonofo tse di rategang tsa ga Jehofa. Mo go ba ba kileng ba ithuta buka eno, go e bala gape go tla ba thusa gore ba anaanele dinonofo tsa ga Jehofa le go feta.—Pes. 119:14.
2. Buka ya Atamalana le Jehofa e tla ithutiwa jang?
2 Kafa e Tla Ithutiwang ka Gone: Motshwari wa thuto ya buka o tla simolola ka matseno a makhutshwane, gongwe ka seele se le sengwe kgotsa tse pedi. Kgatiso eno ga e bontshe gore go tshwanetse ga balwa ditemana dife, ka jalo motshwari wa thuto o tla tlhopha ditemana tsa konokono tse di tla balwang mo thutong. Go ka dirwa poeletso ka go botsa potso e le nngwe kgotsa tse pedi kwa bofelong jwa thuto nngwe le nngwe. Fa setlhogo se se ithutiwang se na le lebokose le le reng, “Dipotso Tsa go Tlhatlhanya,” le tla dirisiwa go dira poeletso. Fa nako e letla, motshwari a ka dira gore dingwe tsa ditemana tse di umakilweng mo lebokoseng di balwe, a bo a botsa dipotso tse di tlatseletsang go dira gore bareetsi ba akgele.
3. Fa re ntse re ithuta buka eno, re tshwanetse go dira eng mme ka ntlha yang?
3 Solegelwa Molemo ka Botlalo: Baakanyetsa go sa le gale le fa e le gore o kile wa ithuta buka eno mo nakong e e fetileng. Akgela ka gonne go dira jalo go tla baka Jehofa, go tla go thusa go gopola tshedimosetso e bile go tla solegela ba bangwe ba ba leng teng molemo. (Pes. 35:18; Baheb. 10:24, 25) Fa o ntse o tlhatlhanya ka dinonofo tsa ga Jehofa tse di sa tshwaneng le dipe, o tla atamalana thata le ene. (Pes. 77:11-13) Mme seo se tla dira gore o ikemisetse le go feta go ikobela melao ya gagwe e bile se tla go rotloetsa go bolelela ba bangwe ka ga gagwe.—Pes. 150:1-6.