Tsela e e Kgatlhang e Dipampitshana Tse Disha di Dirilweng ka Yone!
1. Ke didirisiwa dife tse re ka di dirisang mo bodireding tse di dirilweng ka tsela e ntšha e e kgatlhang?
1 Go ile ga gololwa dipampitshana tse tlhano tse disha kwa Dikopanong Tsa Kgaolo Tsa 2013 tsa setlhogo se se reng “Lefoko la Modimo ke Boammaaruri!” Gape mo godimo ga dipampitshana tse dingwe tse di leng teng, go na le pampitshana ya Dikgang Tsa Bogosi No. 38, e e nang le setlhogo se se reng “A Tota Baswi ba ka Tshela Gape?” Dipampitshana tseno tsotlhe tse thataro di dirilwe ka tsela e ntšha e e kgatlhang. Lebaka la go bo di dirilwe ka tsela eno e ntšha ke lefe? Fa re di tsamaisa mo tirong ya ntlo le ntlo, re ka dirisa jang dikarolo tsa tsone ka tsela e e molemo?
2. Boikaelelo jwa tsela e ntšha e dipampitshana tseno di dirilweng ka yone ke bofe?
2 Ke ka Ntlha Yang fa di Dirilwe ka Tsela e Ntšha?: Gantsi dipuisano tse di atlegileng mo tirong ya ntlo le ntlo di akaretsa dikgato tse nnè tseno: (1) Botsa potso e e dirang gore mong wa ntlo a ntshe maikutlo a gagwe gore o simolole motlotlo. (2) Mmontshe ntlha nngwe go tswa mo Dikwalong. (3) Tsamaisetsa mong wa ntlo dikgatiso tse a ka di balang. (4) Mo tlogele ka potso e o tla e arabang mo nakong e e tlang mme o dire dithulaganyo tsa go boa. Tsela e ntšha e dipampitshana tseno di dirilweng ka yone e tla re thusa go latela dikgato tseno tse nnè motlhofo.
3. Re ka tsamaisa jang nngwe ya dipampitshana tse disha mo bodireding?
3 Kafa Re ka Di Dirisang ka Gone: (1) Fa o sena go dumedisa mong wa ntlo, mmontshe potso e e kgatlhang e e nang le dikarabo tse di farologaneng e e kafa ntle mo pampitshaneng mme o mmotse gore ene o akanya eng. (2) Bula pampitshana mme o sekaseke setlhogo se se reng “Se Baebele e se Rutang.” Bala temana ka tlhamalalo go tswa mo Baebeleng fa maemo a letla. Fa mong wa ntlo a na le nako, tlotla ka setlhogo se se reng “Kafa Seo Se ka Re Solegelang Molemo ka Gone.” (3) Mo tsamaisetse pampitshana mme o mo kgothaletse go e bala yotlhe fa a na le nako. (4) Pele ga o tsamaya, mmontshe potso e e kafa morago kafa tlase ga setlhogo se se reng “Potso E o Ka Akanyang ka Yone” mme o bo o dira dithulaganyo tsa go tlotla ka karabo ya Baebele mo nakong e e tlang.
4. Re ka dirisa jang dipampitshana tse disha mo loetong lwa rona lwa go boela?
4 Go dira loeto lwa go boela le gone go motlhofo. Dirisa ditemana tse di umakilweng tse di kafa morago ga pampitshana go araba potso e o e boditseng fa o ne o konela mo loetong lwa gago lo lo fetileng. Pele ga o tsamaya, tlhalosa setshwantsho sa boroutšhara jwa Dikgang Tse di Molemo, mme o bontshe mong wa ntlo boroutšhara joo le thuto e e tshwanelang e e nang le tshedimosetso e e oketsegileng ka kgang eo mme o mo tsamaisetse boroutšhara. Fa a e amogela, dira dithulaganyo tsa go tlotla ka boroutšhara joo mo loetong lwa gago lo lo latelang. O simolotse thuto ya Baebele! Kgotsa mo boemong jwa go tsamaisa boroutšhara, o ka nna wa tsamaisa pampitshana e nngwe mme o dire dithulaganyo tsa go tla go tlotla ka yone le mong wa ntlo.
5. Dipampitshana di botlhokwa go le kana kang mo bodireding jwa rona?
5 Go setse go fetile dingwaga di le 130 re dirisa dipampitshana mo bodireding jwa rona. Le fa bogolo jwa tsone le tsela e di dirilweng ka yone e farologana, e ntse e le sedirisiwa se se molemo sa go neela bosupi. A re diriseng tsela eno e ntšha e dipampitshana di dirilweng ka yone ka tsela e e molemo go tswelela re anamisa kitso ya Baebele mo lefatsheng lotlhe.—Dia. 15:7a.