Go Tokafatsa Bokgoni Jwa Rona mo Bodireding—Go Rera mo Tshimong ya Kgwebo

Lebaka La go Bo go Le Botlhokwa: E re ka batho ba le bantsi ba bereka diura tse di telele, gantsi tsela e e molemolemo ya go ba bolelela molaetsa wa Bogosi ke ka go ba rerela fa ba le kwa ditirong tsa bone. Go rera mo mafelong a kgwebo go ka nna monate e bile go ka nna le diphelelo tse di molemo ka gonne batho bao ba bo ba le teng kwa dikgwebong tsa bone e bile ba maitseo tota. Mme gone, baboledi ba tshwanetse go nna botlhale e bile ba apare le go ipaakanya sentle. (2 Bakor. 6:3) Ke ka moo molebedi wa tirelo a tshwanetseng go ela tlhoko gore tshimo ya kgwebo e dirwa makgetlo a le kae le gore e berekwa ke bomang.

Kafa O ka Go Dirang ka Gone:

Baakanyetsa puisano e khutshwane. Fa re bua lolololo le badiri, re ka nna ra se ka ra letlelelwa go tlhola re bua le bone gape.
Ya ka nako e ba sa tshwaregang thata ka yone, ka sekai, fa e le gone ba bulang.
Leka go bua pele le mothapi. Nna botsalano. O ka nna wa re: “Re etela batho mo ba berekang teng ka gonne go thata go ba fitlhela kwa malapeng a bone.” Tlhalosa ka bokhutshwane se o se tletseng mme o mo neye pampitshana, makasine kgotsa kgatiso epe fela. Go ka nna molemo fa re sa umake moneelo ka gonne ba ka nna ba akanya gore re mo kgwebong ntle le fa e le bone ba re botsang.
Fa mothapi a le botsalano, mo kope gore a go letle go bua le badiri ba bangwe ka bokhutshwane fela. Kwa dikgwebong tse dingwe, go ka nna botoka fa o ka kopa go tlogela dikgatiso tsa rona mo lefelong le badiri ba jelang mo go lone.
Nna botlhale mme o fetofetoge le maemo. Ka sekai, fa modiri a bua le moreki kgotsa a tshwaregile ka sengwe, mo lete go fitlha a fetsa.

Leka Seno mo Kgweding Eno:

Ka nako ya Kobamelo ya Lelapa, rulaganyang se lo ka se buang fa go ka direga gore lo ye go rera kwa tshimong ya kgwebo.